juon em̧m̧aan ej jar

Kōm̧eļeļe jān Joshua Dennis

Juļae 20–26

Alma 36–38

“Reilo̧k n̄an Anij im Mour”

Ilo am̧ jar im ekkatak Alma 36–38, im̧we remaron̄ itok n̄an eok kōn ajri ro kwoj katakin. Je im̧we kein; remaron̄ im̧we ļōmņak ko n̄an ekkatak m̧akūtkūt ko.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān aolep ajri n̄an kwaļo̧k jet men me ro jineer im jemeer raar katakin er. Kajjitōk ippāer eļan̄n̄e rejeļā ta eo Alma eaar katakin ļōm̧aro nejin.

pija ej bōk jikin katakin

Katakin Katak ko: Ajri ro Reddikļo̧k

Alma 36:6, 20, 24

Ukweļo̧k ej bōktok n̄an eō lem̧ōņōņō.

Katakin ajri ro kōn lem̧ōņōņō in ukweļo̧k n̄e rej iddik wōt kōnke emaron̄ im̧we er n̄an ukweļo̧k ilo aer rūttoļo̧k.

M̧akūtkūt ko Maron̄ Kōm̧m̧ani

• Riiti Alma 36:20 n̄an ajri ro, im kajjitōk ippāer n̄an ron̄jake an Alma kar en̄jake. Kajjitōk ippān ajri ro n̄an ņaetan jet men me ej bōktok lem̧ōņōņō n̄an er. Kwaļo̧k juon pija in Rilo̧mo̧o̧r eo, im kōmeļeļeiki bwe Alma eaar en̄jake lem̧ōņōņō kōnke Jisōs Kraist eaar jeo̧rļo̧k an bōd.

• Leļo̧k n̄an kajjojo ajri jidik peba in juon māj elemōņōņō ilo turājet eo juon im juon mājjen būrom̧ōj ilo turājet eo juon. Kajjitōk ippān ajri ro n̄an ron̄jake ilo am̧ riiti Alma 36:6 im kālet māj ta eo renaaj kotake. Kōmeļeļeik bwe Alma eaar ukweļo̧k im kar en̄jake lem̧ōņōņō kōnke Jisōs Kraist eaar jeo̧rļo̧k an bōd kōn kālet ko rebōd eaar kōm̧m̧ani. Kajjitōk ippān ajri ro n̄an ron̄jake ilo am̧ riiti Alma 36:24 kōn kālet ko rem̧m̧an eaar kōm̧m̧ani tok ālik im kotak māj eo ejim̧we.

• Al juon al ippān doon kōn Jisōs Kraist, āinwōt “He Sent His Son” (Children’s Songbook,34–35). Kwaļo̧k am̧ naan in kam̧ool bwe Jisōs eaar itok n̄an laļin n̄an lo̧mo̧o̧ren kōj jān jerawiwi im bōktok n̄an kōj lem̧ōņōņō.

Alma 37:6–7

“Jān men ko redik im reļam waan men ko reļļap rej kūrm̧ool.”

Ewi wāween am̧ katakin ajri ro n̄an kile bwe Irooj ej kōjerbal men ko redik im reļam waan n̄an kadedeļo̧k jerbal in An?

M̧akūtkūt ko Maron̄ Kōm̧m̧ani

• Riiti Alma 37:6–7, im kajjitōk ippān ajri ro n̄an je kajjojo iien n̄e kwoj kwaļo̧k naan eo “redik.” Kwaļo̧k n̄an er jet men ko reddik me emaron̄ kōm̧m̧ane juon men eļap ak kōm̧akūt men eo eļap, āinwōt juon petere ak juon kii in wa. Ta men eo eļap ewaļo̧k ak em̧akūt kōn wōt men ko reddik? Jipan̄ ajri ro ļōmņake jet men reddik ak men ko reddik Anij ekōņaan bwe jen kōm̧m̧ani. Ta men ko reļļap remaron̄ waļo̧k kōn wōt men ko reddik ak kien ko reļam waan?

• Kwaļo̧k juon pija ak ruo men ko reddik me raar jidik jidik aer im erom̧ men eļap, āinwōt ujooj ak juon melaaj, ak jidik dān ak reba. Kam̧ool bwe men̄e reddik, m̧akūtkūt ko reļam waan remaron̄ kōm̧m̧ane juon oktak eļap ilo mour ko ad im ilo mour ko an ro jet. Rōjan̄ ajri ro n̄an kōnono kōn jet men reļam, men ko rem̧m̧an rej kōm̧m̧ani kajjojo raan, ak kwaļo̧k waanjon̄ok eo am̧ make. Kajjitōk ippān ajri ro n̄an bōk juon men eļam waan, men eo em̧m̧an remaron̄ kōm̧m̧ane wiik in im n̄an jin̄aik juon pijain aer make kōm̧m̧ane. Kajjitōk ippāer n̄an bōk jin̄a eo aer n̄an m̧weeo im kwaļo̧k n̄an baam̧le eo aer.

Alma 37:38–47

Jeje ko rekwojarjar remaron̄ jipan̄ kōj kajjojo raan.

Men̄e ajri ro reddik reban riit, kwomaron̄ jipan̄ er bōk juon naan in kam̧ool kōn kajoor eo an jeje ko rekwojarjar n̄an tōl mour ko aer kajjojo raar in aer mour.

M̧akūtkūt ko Maron̄ Kōm̧m̧ani

• Kwaļo̧k juon pija in Liaona eo (āinwōt Gospel Art Book, no. 68), ak kajjitōk ippān ajri ro n̄an jin̄aiki ilo aer kwaļo̧k ta eo rej keememej kake (lale 1 Nipai 16:10, 28–29). Kotak jeje ko rekwojarjar, im kajjitōk ippān ajri ro n̄an kwaļo̧k ewi wāween an jeje ko rekwojarjar āinwōt Liaona eo. Kōjerbal Alma 37:38–47 im peij in m̧akūtkūt eo an wiik in n̄an kobaik ilo kōnono in.

• Al ippān doon kōn riiti jeje ko rekwojarjar, āinwōt “Search, Ponder, and Pray” ak “As I Search the Holy Scriptures” (Children’s Songbook, 109; Hymns, no. 277). Ta kōjeraam̧m̧an ko an riiti jeje ko rekwojarjar rej waļo̧k ilo al in?

  kōrā eo ej riiti jeje ko rekwojarjar

  Jeje ko rekwojarjar rej katakin kōj ewi wāween ļoor Anij.

pija ej bōk jikin katakin

Katakin Katak ko: Ajri ro Rerūttoļo̧k

Alma 36

Imaron̄ bar “lo̧tak ilo Anij” n̄e ij ļoor Jisōs im ukweļo̧k jen jerawiwi ko aō.

“Oktak … ej juon ad lukkuun piktok in oktak. Ej juon oktak eļap me Irooj im rikanaan ro An rej kōnono kake āinwōt bar lo̧tak” (“Conversion,” Gospel Topics, topics.ChurchofJesusChrist.org).

M̧akūtkūt ko Maron̄ Kōm̧m̧ani

• Etale ippān ajri ro bwebwenatoon oktak eo an Alma eo Edik ilo Alma 36:6–21. Je ioon peba naan ko im eoon ko jān eoon kein me ekōmeļeļeik en̄jake eo an Alma, im likūti ioon bo̧o̧t eo. Kajjitōk ippān ajri ro n̄an ajeji peba ko n̄an ruo kurup ko: men ko Alma eaar en̄jake m̧okta jen an kar keememej ta eo jemen eaar kwaļo̧ke kōn Rilo̧mo̧o̧r im men ko eaar en̄jake ālkin an keememeji. Riit ippān doon Alma 36:17–20, im kam̧ool n̄an ajri ro bwe Jisōs Kraist ej jeo̧rļo̧k ad bōd n̄e jej ukweļo̧k.

• Je Lo̧tak ilo Anij im eoon jen jeje ko rekwojarjar ioon bo̧o̧t eo: 1 Jon 4:7; Mosaia 5:7; 27:25–26; Alma 5:14; 22:15. Jipan̄ ajri ro riiti eoon ko im pukot naan ko me ej kōmeļeļeik ta meļeļe in bar lo̧tak ilo Anij. Elmen an juon armej bar lo̧tak ilo Anij? Ekōjkan ad maron̄ kwaļo̧k bwe em̧ōj ad lo̧tak ilo Anij?

Alma 37:6–9, 38–47

“Jān men ko redik im reļam waan men ko reļļap rej kūrm̧ool.”

Jipan̄ ajri ro kwoj katakin loe bwe riiti jeje ko rekwojarjar men̄e jidik iien ilo kajjojo raan emaron̄ bōktok n̄an er kōjeraam̧m̧an ko reļļap.

M̧akūtkūt ko Maron̄ Kōm̧m̧ani

• Jin̄a ak kwaļo̧k juon bōkaj. Ewōr jete pililil in dān emaron̄ kabo̧o̧ļ bōkaj eo? Jipan̄ ajri ro kile bwe elōn̄ pilillil in dān ko maron̄ aikuji n̄an kabo̧o̧ļe bōkaj eo. Ewi wāween an eiokļo̧k Alma 37:6–7? Ewi wāween an riiti jeje ko rekwojarjar āinwōt likūt jidik pililil in dān ilo bōkaj eo?

• Kajjitōk ippān ajri ro n̄an lale Alma 37:6–9 kōn kōjeraam̧m̧an ko rej itok jān “ļook ko,” ak jeje ko rekwojarjar. Āinwōt juon kūlaaj, kōm̧m̧ane juon laajrak in ta eo rej loe. Ewi wāween riiti jeje ko rekwojarjar kar kōjeraam̧m̧an mour ko aer? Kwaļo̧k naan in kam̧ool eo am̧ kōn jeje ko rekwojarjar, im rōjan̄ ajri ro n̄an kōm̧m̧an āinwōt.

• Kwaļo̧k ak kalikkar juon pija in Liaona eo (āinwōt Gospel Art Book, no. 68), im kajjitōk ippān ajri ro n̄an etale ta eo raar keememeje kōn Liaona eo ilo 1 Nephi 16:10, 28. Jipan̄ ajri ro riiti Alma 37:38–42. Ewi wāween an kar Liaona eo jerbal? Ewi wāween an wāween in iokļo̧k an jeje ko rekwojarjar jerbal? Riit ippān doon eoon 43–47 n̄an jipan̄ uwaake kajjitōk in. Kajjitōk ippān ajri ro kadedeļo̧k peij in m̧akūtkūt eo āinwōt m̧ōttan m̧akūtkūt in.

pija ej bōk jikin ekkatak

Kōketak Ekkatak ilo M̧weo

Rōjan̄ ajri ro n̄an kwaļo̧k juon un rej kam̧m̧oolol kake kōn jeje ko rekwojarjar im kajjitōk ippān ro uwaan baam̧le eo n̄an kōm̧m̧an āinwōt.

Kōkōm̧anm̧anļo̧k Ad Katakin

Jipan̄ ajri ro n̄an katak em̧m̧anļo̧k. Jibadbad eo am̧ n̄an katakin ajri ro ejjab ba leļo̧k wōt m̧ool eo n̄an er. Kwoj aikuj jipan̄ er un̄are peier make āinwōt ro rej pukot m̧ool eo. N̄an waanjon̄ok, ijelo̧kin kwaļo̧k m̧ool ko reddik n̄an ajri ro loi ilo bwebwenatoin in oktak eo an Alma, kwomaron̄ karōk m̧akūtkūt ko me remaron̄ lo m̧ool ko ilo bwebwenato in kōn er make.

peij in m̧akūtkūt: jeje ko rekwojajar rej kepaakļo̧k kōj n̄an Kraist