Hulyo 13–19

Alma 32–35

“Itanom kini nga Pulong sa Inyong mga Kasingkasing”

Hunahunaa ang mga bata nga imong tudloanan samtang ikaw mainampoong magtuon sa Alma 32–35. Sa imong pagbuhat niini, moabut kanimo ang mga hunahuna ug mga impresyon kon unsaon sila sa pagtudlo. Irekord ug buhata kini nga mga impresyon.

Irekord ang Imong mga Impresyon

Dapita ang Pagpaambit

Ibutang ang ngalan sa matag bata sa usa ka sudlanan. Hangyoa ang usa ka bata sa pagkuha og usa sa mga ngalan, ug dapita kana nga bata sa pagpakigbahin og usa ka butang nga bag-ohay lang niyang nakat-unan gikan sa Basahon ni Mormon. Padayona kini hangtud nga ang matag usa mahatagan og kahigayonan, apan ayaw pamugos ni bisan kinsa sa pagpakigbahin.

Itudlo ang Doktrina: Mas Gagmay nga mga Bata

Alma 32:28–43

Akong matabangan sa pagtubo ang akong hugot nga pagtuo kang Jesukristo.

Ang mga liso, mga kahoy, ug prutas pamilyar nga mga butang nga makatabang sa mga bata sa pagsabut sa mga tulukibon nga mga baruganan sama sa hugot nga pagtuo ug pagpamatuod. Pamalandong kon unsaon nimo paggamit ang pagkumpara ni Alma sa pagtudlo sa mga bata.

Posible nga mga Kalihokan

• I-summarize ang Alma 32:28–43; mahimo nimong gamiton ang “Kapitulo 29: Si Alma Nagtudlo bahin sa Hugot nga Pagtuo ug sa Pulong sa Dios” (Mga Sugilanon sa Ang Basahon ni Mormon, 81, o sa katugbang nga video diha sa ChurchofJesusChrist.org). Pagpakita og mga litrato sa usa ka tanum sa lain-laing mga hugna sa pagtubo, ug hangyoa ang mga bata sa pagtabang kanimo sa pagpahimutang sa mga litrato sa husto nga pagkahan-ay (tan-awa ang mga litratro sa kalihokan niining semanaha). Ipasabut nga samtang kita magsunod sa ebanghelyo, ang atong pagpamatuod motubo—magsugod kini nga gamay sama sa usa ka liso apan mahimong modako sama sa usa ka kahoy.

• Pakit-a ang mga bata og usa ka liso, ug basaha ngadto kanila ang nag-unang pipila ka mga linya sa Alma 32:28. Sultihi ang mga bata nga ang pulong sa Dios susama sa usa ka liso. Ipangutana kon unsaon nato pagtabang sa usa ka liso nga motubo. Hangyoa ang mga bata sa pagpakaaron-ingnon nga magtanom og liso, bu-buan kini, ug tabangan kini nga motubo. Itudlo nga dili nato makita ang liso human nato kini matanom, apan nasayud kita nga anaa ra kini diha ug nagtubo; kita usab dili makakita sa Langitnong Amahan ug kang Jesukristo, apan nasayud kita nga Sila tinuod ug Sila nagmahal kanato. Tabangi ang mga bata sa paghunahuna sa mga butang nga ilang mahimo aron sa pagtabang sa ilang hugot nga pagtuo diha ni Jesukristo nga motubo.

• Pagdrowing og usa ka kahoy diha sa pisara, ug hangyoa ang mga bata nga dugangan kini og dahon o usa ka bunga matag higayon nga sila maghunahuna og usa ka butang nga ilang mabuhat aron sa pagtabang sa ilang hugot nga pagtuo diha ni Jesukristo nga motubo. Dapita sila sa pagbuhat og yano nga mga lihok aron sa pagrepresentar sa mga butang nga ilang gihunahuna.

Alma 33:2–11; 34:17–27

Ang Langitnong Amahan maminaw kanako kon ako mag-ampo.

Ang mga Zoramite nag-ampo kausa lamang sa usa ka semana, naggamit sa sama nga mga pulong sa matag higayon (tan-awa sa Alma 31:22–23). Gitudlo ni Alma ug Amulek nga mahimo kitang mag-ampo bisan kanus-a mahitungod sa bisan unsa nga atong espiritwal o pisikal nga mga panginahanglan.

Posible nga mga Kalihokan

• Basaha ang mga hugpong sa pulong nga imong napili gikan sa Alma 33:4–11 nga naghulagway sa mga dapit nga mahimo kitang mag-ampo, ug tabangi ang mga bata nga makahunahuna og mga dapit nga mahimo silang mag-ampo. Dayon dapita sila sa pagdrowing og mga hulagway sa ilang kaugalingon nga nag-ampo nianang mga dapita. Ipamatuod nga sila makaampo bisan asa, bisan kon sila nag-ampo sa hilom.

• Pagpili og hugpong sa mga pulong gikan sa Alma 34:17–27 nga naghulagway sa mga butang nga mahimo natong iampo, ug basaha kini ngadto sa mga bata. Tabangi sila sa paghunahuna sa mga butang nga mahimo nilang isulti ngadto sa Langitnong Amahan kon sila mag-ampo, ug dapita sila sa pagdrowing og mga hulagway niini nga mga butang. Ipamatuod nga sila makasulti ngadto sa Langitnong Amahan mahitungod sa bisan unsa nga ilang gihunahuna o gibati. Pagpaambit og kasinatian diin ang Langitnong Amahan mitubag sa imong mga pag-ampo.

• Pag-awit og usa ka kanta nga nagtudlo sa mga bata mahitungod sa pag-ampo, sama sa “Ampo sa Usa ka Bata” o “Iduko ang Atong Ulo” (Songbook sa mga Bata, 6, 18). Tabangi sila nga makamatikod kon unsa ang gitudlo sa kanta mahitungod sa pag-ampo.

Itudlo ang Doktrina: Mas Dagko nga mga Bata

Alma 32:1–16, 27–28

Kon ako mapainubsanon, and Ginoo makatudlo kanako.

Si Alma ug Amulek nagmalampuson sa pagtudlo sa mga Zoramite kinsa mapainubsanon ug andam nga maminaw sa pulong sa Dios. Hunahunaa unsaon nimo pag-awhag ang mga bata sa pagpili nga magpaubos.

Posible nga mga Kalihokan

• Pangutan-a ang mga bata unsa ang ilang nahinumduman nga pagkat-on sa miaging semana mahitungod sa mga Zoramite (tan-awa sa Alma 31:8–24). Pahinumdumi sila nga usa ka rason nga si Alma nabalaka mahitungond kanila mao ang ilang garbo (tan-awa sa Alma 31:24–28). Dungan nga magbasa sa Alma 32:1–5, ug hangyoa ang mga bata sa pag-summarize kon unsay nahitabo sa mga Zoramite nga mga kabus. Dayon dapita ang mga bata sa pagbasa sa mga bersikulo 12–13 aron mahibaloan kon nganong gibati ni Alma nga ang pagkasinalikway gikan sa ilang mga sinagoga (o mga simbahan) usa ka maayong butang alang niini nga mga Zoramite. Unsa ang pipila ka mga panalangin nga nagagikan sa pagpaubos?

• Tabangi ang mga bata sa pagpangita sa kahulugan sa mapainubsanon o pagkamapainubsanon diha sa Giya ngadto sa mga Kasulatan o sa diksyonaryo. Unsa ang laing mga ilhanan mahitungod sa kahulugan niini nga mga pulong ang ilang makita sa Alma 32:13–16? Dapita sila sa paghunahuna og lainlaing mga pamaagi aron makompleto ang usa ka kapahayag sama sa “Ako magmapainubsanon kon ako .”

Alma 32:26–43

Ang akong pagpamatuod ni Jesukristo motubo samtang ako mag-amuma niini.

Tabangi ang mga bata nga imong gitudloan nga madiskobrehan unsay ilang mabuhat aron sa “pagtanom” sa pulong sa Dios diha sa ilang mga kasingkasing.

Posible nga mga Kalihokan

• Ipakita ang usa ka gahi, lig-on nga butang (sama sa usa ka bato) aron sa paghulagway sa usa ka gahi o mapasigarbuhong kasingkasing ug usa ka humok (sama sa yuta) nga magrepresentar sa usa ka malumo o mapainubsanon nga kasingkasing. Pahikapa ang mga bata niining duha ka mga butang. Dayon ipakita sa mga bata ang usa ka liso nga magrepresentar sa pulong sa Dios. Dapita sila sa pagduot sa liso ngadto sa gahi nga butang ug sa humok nga butang. Basaha og dungan ang Alma 32:27–28, ug hisguti kon unsa kahay kahulugan sa “makahatag og luna” sa (bersikulo 27) alang sa pulong sa Dios diha sa inyong mga kasingkasing.

• Samtang magbasa kamo sa Alma 32:26–43 og dungan, hunong panagsa ug dapita ang mga bata sa pagdrowing og usa ka hulagway sa liso o tanom nga gihulagway—sama pananglit sa, usa ka liso o binhi (bersikulo 28), nagtubo nga tanom (bersikulo 30), ug usa ka guwang na nga tanom nga namunga (bersikulo 37). Awhaga sila sa pagbutang og ngalan sa ilang mga hulagway nga may mga pakisayran gikan sa Alma 32. Sa unsa nga paagi ang pag-alima sa usa ka liso sama sa pag-alima sa atong mga pagpamatuod ni Jesukristo? Unsaon nato pag-amuma sa atong mga pagpamatuod? Dapita ang mga bata sa paghunahuna sa hilom kon sa unsang paagi ang ilang mga pagpamatuod nagtubo ug unsa ang ilang buhaton aron sa pag-amuma niini.

Alma 33:2–11; 34:17–27

Ang Langitnong Amahan maminaw kanako kon ako mag-ampo.

Ang mga Zoramite adunay sayop nga pagsabut mahitungod sa pag-ampo, ang uban niini makita pa gihapon nato sa atong panahon. Si Alma ug si Amulek mitudlo og gamhanang mga kamatuoran aron sa pagbuntog niini nga mga sayop nga pagsabut.

Posible nga mga Kalihokan

• Tabangi ang mga bata sa pagsiksik sa Alma 33:2–11 alang sa mahinungdanong mga pulong ug hugpong sa mga pulong kalabut sa pag-ampo nga gibalik-balik. Unsa man ang gitudlo niini nga mga pulong ug hugpong sa mga pulong mahitungod sa pag-ampo?

• Tabangi ang mga bata sa paghimo og lista sa mga sitwasyon diin sila mahimong mag-ampo, lakip na niadtong gihisgutan diha sa Alma 33:4–10 ug 34:17–27 ingon man usab sa mga sitwasyon sa ilang mga kinabuhi. Dapita ang mga bata sa paghunahuna o pagpaambit og mga kasinatian sa dihang sila nag-ampo ug mibati nga ang Dios mitubag sa ilang mga pag-ampo.

Awhaga ang Pagkat-on diha sa Panimalay

Kon mahimo, hatagi ang matag bata og liso nga ilang dad-on sa balay ug itanom aron makapahinumdom nila sa pagtabang sa ilang mga pagpamatuod ni Jesukristo nga motubo. Awhaga sila sa pagsulti sa ilang mga pamilya unsa ang ilang nakat-unan mahitungod sa paggamit sa ilang hugot nga pagtuo ni Jesukristo.

Pagpalambo sa Atong Pagtudlo

Pagmapatuod sa gisaad nga mga panalangin. Kon ikaw modapit sa mga bata sa pagsunod sa usa ka baruganan sa ebanghelyo, sultihi sila mahitungod sa mga saad sa Dios alang niadtong mosunod niana nga baruganan (tan-awa sa Pagtudlo sumala sa Pamaagi sa Manluluwas, 35).