“Tuun 15–21. Aramwa 13–16: ‘Ti na rin inanon ana rau te Atua,’” Nakomai, Iriirai—Ibukin te Moanrinan: Ana Boki Moomon 2020 (2020)
“Tuun 15–21. Aramwa 13–16,” Nakomai, Iriirai—Ibukin te Moanrinan: 2020
Kabwarabwaraan Aramwa ao Amureka ngke a kaotinakoaki man te karabuti, iroun Andrew Bosley
Tuun 15–21
Aramwa 13–16
“Ti na rin inanon ana rau te Atua”
Ngkoe ma am ataei inanon ami kiraati ti inanon te tai ae kimototo ni katoa wiiki. Ko na bon kakabwaia maiuia n te aro ae moan e tamaroa ngkana ko kona ni kaungai nanoia bwa a na reitinako n reiakinaki man Ana Boki Moomon i tinanikun am kiraati—riki ma aia utu.
Korea am Namakin
Kaungaa te Tibwatibwa
Anganiia ataei aia tai n tibwaua te bwai are a kaman ataia n te karaki n Aramwa 13–16. Ni buokiia, kaoti tamnei n aron ake inanon Nakomai, Iriirai—Ibukiia Aomata n Tatabemaniia ao Utu ke “Mwakoro 22: Ana Mition Aramwa nakoia kain Amonia” (Karaki man Ana Boki Moomon, 58–63).
Reirei te Reirei: Ataei aika a Uarereke
Te nakoanibonga e buokai n nakon Kristo.
Tataromwaaka iangoia bwa tera ae a kainnanoia ataein am kiraati bwa a na ota man te bwai are e reirei iaona Aramwa ibukin taekan te nakoanibonga man kiibu aikai.
Waaki ni Kakukurei aika a Kona ni Karaoaki
-
Tuangiia ataei bwa a na kaokiokia ma ngkoe kabwarabwara aika beebete iaon te nakoanibonga, n aron “te nakoanibonga bon mwaakan te Atua.”
-
Kauki koroboki aika tabu nakon Aramwa 13:2, ao tuangiia ataei bwa te Atua e weteia naake e na anganiia te nakoanibonga “n te aro raa are aomata a na … kariariaa natina ibukin te kaboaki.” Ni kabwarabwaraa bwa a kanga ni karaoa aei naake iai irouia te nakoanibonga, kaoti tamnei n aroia naake iai irouia te nakoanibonga ni beku (taraa Te Boki n Tamnei n te Euangkerio, nambwa 38–41, 103–9), ao ngkanne tibwauai karaki n aron Iesu n ibuobuoki (taraa Mataio 26:26–28; Mareko 5:22–24, 35–43).
-
Rairia nakon Aramwa 13:6, ao kabwarabwaraa bwa naake iai irouia te nakoanibonga “a reirei ana tua te [Atua] nakoia natiia aomata.” Buokiia ataei n iangoia naake a kinaia akei ai irouia te nakoanibonga. A kanga n reirei taekan tua? Kaoiia ataei bwa a na korea tamnein teuare iai irouna te nakoanibonga are a kinaa n reireina temanna ana tua te Atua.
Otenanti n te nakoanibonga a buokira n tara Iesu Kristo ibukin te kabooaki.
Tamara are i Karawa e kakorakoraai ni kaineti ma au onimaki.
Rongorongon Aramwa ao Amureki ngke a kaotinakoaki man te karabuti e kona ni kaungai nanoia ataei bwa a na rairaki nakon te Uea ngkana a kainnanoa te ibuobuoki.
Waaki ni Kakukurei aika a Kona ni Karaoaki
-
Kaoti tamneia Aramwa ao Amureki iaon te iteraniba ibukin waaki ni kakukurei n te wiiki aei ngkai ko karakina te karaki n Aramwa 14:18–29. Ko kona naba n okira “Mwakoro 22: Ana Mition Aramwa nakoia kain Amonia” (Karaki man Ana Boki Moomon, 58–63, ke te witeo ae irekereke ma ngaia iaon ChurchofJesusChrist.org). Anganiia ataei bwa a na ikaruoruo ni kabonganai tamnei ni karakina te karaki. Katurutura bwa Aramwa ao Amureki a anganaki te mwaaka bwa a na kona n otinako man te karabuti “naron [aia] onimaki are mena iroun Kristo” (Aramwa 14:26).
-
Buokiia ataei n iangoa aron Aramwa ao Amureki are a namakinna ngke a mena n te karabuti ao kaoiia bwa a na karaoia n te kaotioti namakin aikai (taraa kiibu 22). Kabwarabwaraa bwa Aramwa e butiia te Uea ibukin buokana (taraa kiibu 26). Kakoaua bwa te Atua e na kakorakoraira ngkana ti tataro ma te onimaki.
-
Kabongana te iteraniba ni waaki ni kakukurei n te wiiki n reireiniia ataei kawai tabeua are te Atua e kakorakoraia naake iai aia onimaki. Ngkai a karani iteraniba n te waaki ni kakukurei ataei karakina te tai are e kakorakorako iai te Atua.
I kakabwaiaaki ngkana I iriira te burabeti.
Tioram, mataniwiia kaaben n ana taanga Nibwaaite, e ataia ae Aramwa bon te burabeti ao e ukoukora ana kairi. Ibukin aei, Tioram e tokanikai.
Waaki ni Kakukurei aika a Kona ni Karaoaki
-
Tibwaia n oin am taeka te karaki inanon Aramwa 16:1–8. Katuruturua bwa ibukina Tioram ao ana taanga Nibwaite a ira te burabeti Aramwa, Nibwaite a kona ni kamaiuia raoraoia ake a tauaki bwa bure irouia Remwanaite. Tibwaua te namakin ngke ko kakabwaiaki ibukina bwa ko iriira te burabeti.
-
Kaota tamnein te Beretitenti n te Ekaretia, ao tibwauai bwaai tabeua ake e a tia n reireiniira bwa ti na karaoi. Buokiia ataei n iangoi kawai ake a kona iai n iriira Iesu man karaon are e reireiniia Ana burabeti.
-
Kaota tamnein te burabeti (taraa Te Boki n Tamnei n te Euangkerio, nambwa. 6–9, 14, 18, 26–27) ngkai ko anene ma ataei n anenea taekaia burabeti, n aron ae “Follow the Prophet” (Aia Boki n Anene Ataei, 110–11). Katuruturui mwakoro n taeka tabeua n te anene are ti riai n iriira te burabeti.
Reirei te Reirei: Ataei aika a Ikawai
Te nakoanibonga e buokai n nakon Kristo.
Ngkai ko wareka Aramwa 13:1–19, tera ae ko kunea are e a nano riki iai am karinerine ibukin te nakoanibonga? Tera ae ko namakinna bwa ko riai n tibwauaia ma ataei ngkai ko anga rerei? Iango aikai a kona ni ibuobuoki.
Waaki ni Kakukurei aika a Kona ni Karaoaki
-
Warekia ma ataei Aramwa 13:10 and 13, tarataraa aron te tia taua te nakoanibonga ae riai ni karekea. Tuangiia bwa a na iangoia aomata ake a kinaia aika banna ni katoto n aro aikai.
-
Buokiia ataei bwa a na karaoi rinanin otenanti ake ti karekei rinanon te nakoanibonga (taraa “Ordinances” n True to the Faith, 109–10). Tuanga temanna bwa e na wareka Aramwa 13:16. E kanga otenanti aikai ni buokiira “ni kariaria [Iesu Kristo] ibukin kamaunan [ara] bure”?
-
Titirakiniia ataei ngkana a ataia bwa e kanga te Nakoanibonga ae te Merekitereka n reke arana. Buokiia ni karekea te kaeka n Aramwa 13:14–19 ao Reirei ao Berita aika Tabu 107:1–4. Tera ae ti reiakinna iroun Merekitereka ibukin te nakoanibonga bwa e na kanga ni kabonganaaki?
Tamara are i Karawa e kakorakoraai ni kaineti ma au onimaki.
Aramwa ao Amureki a kabureaki inanon boong aika a bati imwain kainaomataaia iroun te Uea. Te karaki aei e kona ni buokiia ataei n ataia bwa katakiia e kona n aki waekoa ke ni beebete katokana, ma te Uea e na kakorakoraia “ni kaineti nakon [aia] onimaki” (Aramwa 14:26).
Waaki ni Kakukurei aika a Kona ni Karaoaki
-
Korei titiraki iaon te burakibooti ni buokiia ataei bwa a na kakaai kabwarabwaraana man Aramwa 14:18–29, n aron Tera ae karaoia taan moti nakoia Aramwa ao Amureki n te karabuti? ke A kanga ni kaota aia onimaki iroun Iesu Kristo? Katoaia ataei anganiia teuana te kibu ke uoua, n tarai kaeka nakon titiraki.
-
Kaoia ataei bwa a na korea tamnein te bwai are riki man Aramwa 14:18–29, ao imwiina anganiia bwa a na kabonganai aia tamnei ni karakina te karaki. Ti na kanga n riki n ai aron Aramwa ao Amureki?
-
Tibwaua te bwai are ko rinanona are ko kaota iai am onimaki iroun te Uea ao E anganiko te korakora bwa ko na tokanikai ke n teimatoa inanon te kataaki. Kaungaia ataei bwa a na tibwaua te bwai ae a rinanona ae aekakin naba aei.
Te euangkerio e kona ni bitii nano.
Teetorom e rang kakaitaraia Aramwa ao Amureki n te moan tai, ma aia koaua e riinga nanona ao e kaunga nanona bwa e na rairananona. Ngkai ko kamatebwai kibu aikai, iangoa aron Teeterom ni bwaai ake e rinanona ake a kona ni kaungai nanoia ataei ake ko reireiniia.
Waaki ni Kakukurei aika a Kona ni Karaoaki
-
Manga rinanona ma ataei te bwai are a reiakinna n te wiiki ae nako iroun Teeterom. Ikotaki wareka Aramwa 15:3–12 ni kakaea bwa e kanga ni bitaki.
-
Kaoia ataei bwa a na iangoia bwa a kaitibo ma Teeterom imwain ae e raira nanona. Tera ae a na taekinna ae e na buokia ni kakoaua te euangkerio? A kona ni kabotaua are a taekinna ma are e taekinna Aramwa ao Amureki n reireina Teeterom (taraa Aramwa 11:40–46; 15:6–11). Bukin tera atakin koaua aikai e buoka temanna bwa e na tangiria ni bitaki?
Kaungaa te Kamatebwai n te Mweenga
Kaoiia ataei bwa a na iangoa te bwai teuana are a kona ni karaoia n te wiiki aei ni kaota aia onimaki iroun te Uea. Kaungaia bwa a na tibwaua aia baire ao aia namakin ma aia utu.
Kanakoraoan Ara Anga reirei
Reiakinna ni kinaa te kaotioti. “Te kaotioti e aki toki n roko ‘teutana imwiin teutana’ (2 Nibwaai 28:30), tiaki ni kabane n teuana te tai. … Ngkai ko iangoa aron te reirei n te euangkerio are ko reirei iaona a na kakabwaiaki kain am kiraaki, iango ao namakin a na roko rinanon nako maium ni katoa bong—ngkai ko mwananga nako ni mwakuri, karaoi am mwakuri ni mweengam, ke ngkai ko reitaki ma am utu ao raoraom” (Reirei n Ana Kawai te Uea, 12).