« ថ្ងៃទី ១–៧ ខែ មិថុនា ។ អាលម៉ា ៥–៧ ៖ ‹ តើអ្នករាល់គ្នាបានស្គាល់ការផ្លាស់ប្ដូរដ៏ធំនេះ នៅក្នុងដួងចិត្តអ្នកហើយឬនៅ ? ›» ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )
« ថ្ងៃទី ១–៧ ខែ មិថុនា ។ « តើអ្នករាល់គ្នាបានស្គាល់ការផ្លាស់ប្ដូរដ៏ធំនេះ នៅក្នុងដួងចិត្តអ្នកហើយឬនៅ ? » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២០
អ្នកពុំត្រូវបានបំភ្លេចចោលឡើយដោយ ចន ម៉ាកន័រតុន
ថ្ងៃទី ១–៧ ខែ មិថុនា
អាលម៉ា ៥–៧
« តើអ្នករាល់គ្នាបានស្គាល់ការផ្លាស់ប្ដូរដ៏ធំនេះ នៅក្នុងដួងចិត្តអ្នកហើយឬនៅ ? »
សូមពិចារណាគោលការណ៍នានានៅក្នុង អាលម៉ា ៥–៧ ប្រកបដោយការអធិស្ឋាន ដែលអ្នកមានអារម្មណ៍ថា ទាក់ទងយ៉ាងពិសេសទៅនឹងកុមារដែលអ្នកបង្រៀន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមអញ្ជើញឲ្យកុមារចែកចាយអ្វីដែលពួកគេចងចាំអំពីការរៀនពីអាលម៉ាជាកូនកាលពីរបីសប្តាហ៍មុន។ សូមពន្យល់ថា បន្ទាប់ពីអាលម៉ាបានប្រែចិត្តជឿ នោះលោកបានបង្រៀនមនុស្សអំពីរឿងដ៏សំខាន់ៗស្តីពីដំណឹងល្អ ។ សូមឲ្យកុមារចែកចាយនូវអ្វីដែលពួកគេដឹងអំពីអ្វីដែលលោកបានបង្រៀន ។
បង្រៀនគោលលទ្ធិ ៖ កុមារតូចៗ
ខ្ញុំអាចទទួលទីបន្ទាល់ផ្ទាល់ខ្លួនតាមរយៈព្រះវិញ្ញាណបរិសុទ្ធ ។
កុមារដែលអ្នកបង្រៀន អាចអភិវឌ្ឍទីបន្ទាល់ផ្ទាល់ខ្លួនរបស់ពួកគេឲ្យរឹងមាំ ទោះបីជាពួកគេនៅក្មេងក្តី ។
សកម្មភាពដែលអាចជ្រើសរើស
-
សូមប្រើរូបភាពអាលម៉ាជាកូន ( សូមមើល សៀវភៅរូបភាពដំណឹងល្អ លេខ ៧៧ ) ដើម្បីរំឭកពីដំណើររឿងកាលទេវតាបង្ហាញកាយដល់លោក ( សូមមើល ម៉ូសាយ ២៧ ) ។ បន្ទាប់មក សូមឲ្យកុមារពិពណ៌នាពីអត្ថន័យនៃទីបន្ទាល់ ហើយជួយពួកគេតាមការចាំបាច់ ។ សូមពន្យល់ថា អាលម៉ាបានខិតខំទទួលបានទីបន្ទាល់មួយ បន្ទាប់ពីទេវតាបានបង្ហាញកាយដល់លោក ។ សូមអាន អាលម៉ា ៥:៤៦ យឺតៗពីរបីដង ហើយសូមអញ្ជើញកុមារឲ្យស្តាប់រកអ្វីដែលអាលម៉ាបានធ្វើ និងរបៀបដែលលោកបានដឹងសេចក្តីពិត ។ ( អ្នកអាចត្រូវពន្យល់ថា ការតមអាហារមានន័យថា ការមិនបរិភោគអាហារ និងទឹក ) ។
-
សូមបង្ហាញរូបភាពនៃអ្វីៗដែលរីកលូតលាស់សន្សឹមៗ ហើយត្រូវការការមើលថែជាប្រចាំ ដូចជាដំណាំ ឬកូនសត្វមួយ ។ សូមឲ្យកុមារចែកចាយរបៀបដែលយើងមើលថែអ្វីៗទាំងនោះ ហើយជួយវាឲ្យរីកលូតលាស់ ។ សូមរំឭកពួកគេថា យើងក៏ត្រូវមើលថែដល់ទីបន្ទាល់របស់យើងជាប្រចាំផងដែរ ។
-
សូមប្រើប៉េតប៉ោងដែលពុំទាន់ផ្លុំ ដើម្បីតំណាងឲ្យទីបន្ទាល់មួយ ហើយផ្លុំខ្យល់ចូលក្នុងប៉េតប៉ោងនោះ រៀងរាល់ពេលដែលអ្នកចែកចាយអ្វីមួយដែលជួយឲ្យទីបន្ទាល់របស់អ្នកកើនឡើង ។ សូមចងប៉េតប៉ោងនោះ ហើយហុចតគ្នានៅក្នុងថ្នាក់ ដោយសូមឲ្យកុមារចែកចាយអ្វីមួយដែលពួកគេធ្វើ ដើម្បីជួយឲ្យទីបន្ទាល់របស់ពួកគេរីកចម្រើនឡើង ។ សូមឲ្យកុមារគូររូបភាពខ្លួនឯងធ្វើអ្វីមួយដែលនឹងពង្រឹងទីបន្ទាល់របស់ពួកគេ ។
នៅពេលយើងទទួលយកដំណឹងល្អ វាដូចជាការចាប់ផ្តើមជីវិតថ្មីមួយ ។
ព្រះអង្គសង្គ្រោះបានលើកដាក់មកលើអង្គទ្រង់នូវអំពើបាប ការឈឺចាប់ និងជំងឺទាំងឡាយរបស់ខ្ញុំ ។
សេចក្តីពិតនៅក្នុង អាលម៉ា ៧:១០–១៣ អាចជួយកុមារឲ្យដឹងថា ព្រះយេស៊ូវគ្រីស្ទខ្វល់ព្រះទ័យនឹងពួកគេ ហើយអាចជួយពួកគេបាន ។
សកម្មភាពដែលអាចជ្រើសរើស
-
សូមបង្ហាញកុមារនូវរូបភាពរបស់ព្រះយេស៊ូវ ។ សូមពន្យល់ថា ទ្រង់ជ្រាបដឹងថា ការឈឺចាប់ ការកើតទុក្ខ ឬការភ័យខ្លាចមានសភាពយ៉ាងណា ។ សូមអានពាក្យមួយចំនួននៅក្នុង អាលម៉ា ៧:១១–១៣ ដែលពិពណ៌នាអំពីអ្វីដែលព្រះអង្គសង្គ្រោះបានរងទុក្ខ ហើយពន្យល់ពាក្យនានាដែលកុមារពុំអាចយល់បាន ។ សូមចង្អុលបង្ហាញថា ព្រះយេស៊ូវអាចជួយ និងលួងលោមយើង នៅពេលយើងកើតទុក្ខ ។ សូមបង្ហាញអំពីរបៀបដែលព្រះអង្គសង្គ្រោះបានជួយ និងលួងលោមអ្នក ។
-
សូមឲ្យកុមារចែកចាយបទពិសោធន៍ នៅពេលពួកគេឈឺ ឬឈឺចាប់ ឬមានបញ្ហាផ្សេងៗទៀត ដែលធ្វើឲ្យពួកគេកើតទុក្ខ ។ សូមថ្លែងទីបន្ទាល់របស់អ្នកថា ព្រះអង្គសង្គ្រោះបានរងទុក្ខនូវរឿងទាំងនោះផងដែរ ហើយទ្រង់ជ្រាបដឹងពីរបៀបដើម្បីជួយយើង ។
ផ្លូវត្រឡប់ទៅកាន់ព្រះវរបិតាសួគ៌ និងព្រះយេស៊ូវគ្រីស្ទគឺត្រង់ ។
តើអ្នកអាចប្រើការពិពណ៌នារបស់អាលម៉ាស្តីពីផ្លូវត្រឡប់ទៅកាន់ព្រះវរបិតាសួគ៌ ដើម្បីជួយកុមារឲ្យរៀនធ្វើការសម្រេចចិត្តល្អដោយរបៀបណា ?
សកម្មភាពដែលអាចជ្រើសរើស
-
សូមអាន អាលម៉ា ៧:១៩ ឲ្យកុមារស្តាប់ ហើយពន្យល់ថា នៅពេលយើងធ្វើការជ្រើសរើសល្អ នោះយើងស្ថិតនៅលើផ្លូវដែលដឹកនាំត្រឡប់ទៅកាន់ព្រះវរបិតាសួគ៌វិញ ។ សូមផ្ដល់ជម្រើស ឬសកម្មភាពមួយចំនួនដល់កុមារ ( ដូចជាការពុំមានចិត្តល្អចំពោះសមាជិកគ្រួសារ ឬការបម្រើពួកគេ ) ។ សូមឲ្យពួកគេប្រាប់អ្នកបើជម្រើសនីមួយៗល្អ ហើយដឹកនាំត្រឡប់ទៅកាន់ព្រះវិញ ឬជម្រើសនីមួយៗអាក្រក់ ហើយដឹកនាំឲ្យចេញឆ្ងាយពីទ្រង់ ។
-
សូមអាន អាលម៉ា ៧:២០ ហើយជួយកុមារឲ្យយល់ពាក្យនៅក្នុងខគម្ពីរទាំងនេះដែលពិពណ៌នាអំពីផ្លូវត្រឡប់ទៅកាន់ព្រះវិញ ។ សូមគូរផ្លូវត្រង់មួយនៅលើក្តារខៀនចេញពីយើងឆ្ពោះទៅកាន់ព្រះវរបិតាសួគ៌ ។ បន្ទាប់មក សូមគូសផ្លូវវៀចមួយដែលរួមមានទាំងសេចក្តីស្លាប់នៅចុងផ្លូវនោះ ដែលដឹកនាំចេញឆ្ងាយពីព្រះ ។ សូមអញ្ជើញកុមារឲ្យយកម្រាមដៃដើរលើផ្លូវទាំងពីរនេះ ។ តើផ្លូវណាមួយដែលល្អប្រសើរ ? សូមជួយពួកគេឲ្យគិតអំពីជម្រើសល្អនានា ដែលនឹងជួយពួកគេឲ្យបន្តនៅលើផ្លូវត្រង់ ។
បង្រៀនគោលលទ្ធិ ៖ កុមារធំៗ
អាលម៉ា ៥:១២–១៤, ២៧–២៨, ៥៧; ៧:១៤–២៤
ខ្ញុំត្រូវកើតជាថ្មីម្តងទៀត បន្ទាប់មកដើរតាមផ្លូវដែលដឹកនាំត្រឡប់ទៅរកព្រះវិញ ។
តើអ្នកអាចជួយកុមារឲ្យយល់ពីអត្ថន័យនៃការកើតជាថ្មីម្តងទៀតយ៉ាងដូចម្ដេច ?
សកម្មភាពដែលអាចជ្រើសរើស
-
សូមបង្ហាញរូបភាពទារកម្នាក់ដល់កុមារ ហើយអញ្ជើញពួកគេឲ្យបរិយាយអំពីសភាពរបស់ទារកនោះ ពេលទារកនោះទើបតែកើត ។ សូមអញ្ជើញកុមារឲ្យអាន អាលម៉ា ៥:១៤ ។ ដើម្បីជួយកុមារឲ្យយល់អត្ថន័យនៃការ « កើតមក…អំពីព្រះខាងវិញ្ញាណ » សូមឲ្យពួកគេគិតអំពីសភាពដែលអាលម៉ាជាកូនមាន ពីមុនលោកបានប្រែចិត្តជឿ ។ តើក្រោយមកលោកក្លាយជាមនុស្សបែបណា ? ( សូមមើល ម៉ូសាយ ២៧:២៣–៣២ និង អាលម៉ា ៣៦:១២–២៤ ) ។ សូមពន្យល់ថា ពេលយើងមានសេចក្ដីជំនឿលើព្រះយេស៊ូវគ្រីស្ទ ហើយរស់នៅតាមដំណឹងល្អរបស់ទ្រង់ នោះវាមានសភាពដូចជាយើងបានចាប់ផ្តើមជីវិតថ្មីមួយ ដូចជាទារកម្នាក់ផងដែរ ។
-
សូមអាន អាលម៉ា ៧:១៩ ជាមួយគ្នា ហើយពន្យល់ថា បន្ទាប់ពីយើងបានកើតជាថ្មីម្តងទៀត នោះយើងត្រូវតែដើរតាម « ផ្លូវដែលនាំទៅរកនគរនៃព្រះ » ។ សូមលាក់ក្រដាសដែលសរសេរខគម្ពីរយោងដូចតទៅនេះនៅជុំវិញបន្ទប់រៀន ៖ អាលម៉ា ៥:១២–១៣, ២៧–២៨, ៥៧; ៧:១៤–១៦, ២៣–២៤ ។ សូមអញ្ជើញកុមារឲ្យស្វែងរកក្រដាសនោះ អានខគម្ពីរ ហើយចែកចាយអ្វីដែលខគម្ពីរនីមួយៗបង្រៀនយើងនូវអ្វីដែលយើងត្រូវធ្វើ ដើម្បីត្រឡប់ទៅកាន់វត្តមានរបស់ព្រះវិញ ។
ខ្ញុំអាចទទួលទីបន្ទាល់ផ្ទាល់ខ្លួនតាមរយៈព្រះវិញ្ញាណបរិសុទ្ធ ។
ទេវតាមួយអង្គបានយាងមកជួបអាលម៉ា ប៉ុន្តែទីបន្ទាល់របស់លោក « បានសម្ដែងប្រាប់ [ លោក ] ដោយព្រះវិញ្ញាណបរិសុទ្ធរបស់ទ្រង់ » ( អាលម៉ា ៥:៤៦ ) ។
សកម្មភាពដែលអាចជ្រើសរើស
-
សូមអាន អាលម៉ា ៥:៤៤–៤៦ ជាមួយកុមារ ។ តើអាលម៉ាបានធ្វើអ្វីខ្លះដើម្បីទទួលបានទីបន្ទាល់ផ្ទាល់ខ្លួនរបស់លោកអំពីដំណឹងល្អ ? សូមឲ្យក្រដាសទៅសិស្សម្នាក់ៗ ហើយអញ្ជើញពួកគេឲ្យដាក់ផែនការដើម្បីធ្វើអ្វីមួយនៅសប្តាហ៍នេះ ដើម្បីពង្រឹងទីបន្ទាល់របស់ពួកគេ ។
-
សូមហុចកញ្ចក់មួយឲ្យសិស្សជុំវិញថ្នាក់ ហើយទុកឲ្យកុមារមើលរូបរបស់ពួកគេនៅក្នុងកញ្ចក់ នៅពេលអ្នកអាន អាលម៉ា ៥:១៤ ។ តើការទទួលព្រះភក្ត្ររបស់ព្រះអង្គសង្គ្រោះនៅក្នុងទឹកមុខរបស់យើងមានន័យយ៉ាងណា ? សូមចែកចាយពីគ្រានានាដែលនរណាម្នាក់បាននិយាយ ឬធ្វើអ្វីមួយ ដែលរំឭកអ្នកអំពីព្រះអង្គសង្គ្រោះ ហើយសូមឲ្យកុមារធ្វើដូច្នោះផងដែរ ។
ព្រះអង្គសង្គ្រោះបានលើកដាក់មកលើអង្គទ្រង់នូវអំពើបាប ការឈឺចាប់ និងជំងឺទាំងឡាយរបស់ខ្ញុំ ។
នៅពេលអ្នកសិក្សា អាលម៉ា ៧ សូមពិចារណាអំពីរបៀបដែលអ្នកអាចស្ថាបនាសេចក្តីជំនឿរបស់កុមារលើព្រះយេស៊ូវគ្រីស្ទ ដើម្បីឲ្យពួកគេនឹងបែរទៅរកទ្រង់នៅក្នុងការសាកល្បងរបស់ពួកគេ ។
សកម្មភាពដែលអាចជ្រើសរើស
-
សូមអញ្ជើញកុមារឲ្យអាន អាលម៉ា ៧:១១–១៣ ដោយរកមើលអ្វីដែលព្រះយេស៊ូវគ្រីស្ទបានរងទុក្ខ ។ ពួកគេអាចមានចិត្តចង់ចែកចាយបទពិសោធន៍នានា ពេលពួកគេមានអារម្មណ៍ឈឺចាប់ ឬពេលគេមានជំងឺ ។ យោងតាមខគម្ពីរទាំងនេះ ហេតុអ្វីព្រះអង្គសង្គ្រោះពេញព្រះទ័យរងទុក្ខនឹងរឿងទាំងនេះ ? ( សូមពន្យល់ថា « ជួយ » មានន័យថា « សម្រាលទុក្ខ » ) ។
-
សូមប្រាប់កុមារអំពីជំងឺ, ការរងរបួស ឬការរងទុក្ខផ្សេងទៀតដែលអ្នកបានមាន ហើយសួរពួកគេ ប្រសិនបើពួកគេមានអារម្មណ៍ស្រដៀងនោះដែរ ។ សូមអាន អាលម៉ា ៧:១១–១៣ ជាមួយគ្នា រួចបង្ហាញអំពីអ្វីដែលព្រះយេស៊ូវបានរងទុក្ខសម្រាប់ពួកយើង ។ សូមជួយកុមារឲ្យគិតអំពីគ្រានានា ពេលដែលព្រះអង្គសង្គ្រោះបានដកពិសោធន៍រឿងទាំងនេះ ដូចជាពេលដែលទ្រង់ត្រូវបានល្បួង ( សូមមើល ម៉ាថាយ ៤:១–១១ ) ឬនៅពេលទ្រង់បានរងទុក្ខនៅក្នុងសួនច្បារគែតសេម៉ានី ។ តើវាជួយយើងឲ្យដឹងថា ព្រះយេស៊ូវយល់ពីឧបសគ្គរបស់យើងយ៉ាងដូចម្ដេច ? សូមចែកចាយទីបន្ទាល់របស់អ្នកអំពីព្រះចេស្តារបស់ព្រះយេស៊ូវដើម្បីលួងលោម, ជួយ និងព្យាបាលពួកគេ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យព្យួររូបភាពរបស់ព្រះយេស៊ូវនៅកន្លែងមួយ ដែលពួកគេនឹងឃើញវាញឹកញាប់ ដើម្បីរំឭកពួកគេអំពីអ្វីដែលពួកគេបានរៀនអំពីទ្រង់ថ្ងៃនេះ ។
ការកែលម្អការបង្រៀនរបស់យើង
ការកែលម្អខ្លួនក្នុងនាមជាគ្រូបង្រៀនដែលដូចព្រះគ្រីស្ទ ។ ក្នុងនាមជាគ្រូបង្រៀន វាសំខាន់ដើម្បីពិចារណាអំពីវិធីនានា ដែលអ្នកអាចបង្កើនសមត្ថភាពអ្នក ដើម្បីជួយដល់កុមារឲ្យស្ថាបនាសេចក្ដីជំនឿរបស់ពួកគេលើព្រះវរបិតាសួគ៌ និងព្រះយេស៊ូវគ្រីស្ទ ។ សូមគិតពីការប្រើសំណួរវាយតម្លៃផ្ទាល់ខ្លួននៅ ទំព័រ ៣៧ នៃសៀវភៅ ការបង្រៀនតាមរបៀបរបស់ព្រះអង្គសង្គ្រោះ ។