20--26 Ianuari. 1 Nifae 11--15: ‘Faaauupegaina i le Amiotonu ma le Mana o le Atua,’” Sau, Mulimuli Mai ia te A’u--Mo le Peraimeri: Tusi a Mamona 2020 (2020)
“20--26 Ianuari. 1 Nifae 11--15,” Sau, Mulimuli Mai ia te A’u—Mo Le Peraimeri: 2020
Sili Atu le Suamalie nai lo Mea Suamalie Uma, saunia e Miguel Angel Gonzalez Romero
20--26 Ianuari
1 Nifae11–15
“Faaauupegaina i le Amiotonu ma le Mana o le Atua”
Faitau le 1 Nifae 11--15 ma mafaufau i tamaiti o loo e aoaoina, ma tusi faamaumau soo se lagona e te mauaina.
Tusi faamaumau Ou Lagona Uunai
Valaaulia le Fefaasoaai
Faaali atu se ata o le faaaliga a Liae i le laau o le ola, ma valaaulia tamaiti e faasoa mai mea latou te manatua na latou aoaoina e uiga i lenei faaaliga i le vaiaso ua teʻa. Fesili atu ia i latou pe ua latou aʻoaʻoina se mea fou e uiga i ai talu mai lena taimi.
Aoao atu le Aoaoga Faavae: Tamaiti Laiti
Na auina mai e le Tama Faalelagi ia Iesu Keriso i le lalolagi ona e alofa o Ia ia te au.
Na vaai Nifae i le soifuaga ma le talaiga a Iesu Keriso i se faaaliga. Mafaufau loloto i mea e mafai e tamaiti o lau vasega ona aoao e uiga i le Faaola mai le 1 Nifae 11.
Gaoioiga e Mafai Ona Fai
-
Tuu atu i tamaiti taitoatasi se ata o loo faaalia ai se tasi o mea na tupu mai le soifuaga o le Faaola na valoia i totonu o le 1 Nifae 11:20, 24, 27, 31, ma le 33 (tagai Tusiata o le Talalelei, nu. 30, 35, 39, 42, 57). Ao e faitauina nei fuaiupu, fai atu i tamaiti e uu i luga a latou ata pe a latou faalogo i le fuaiupu e fetaui i ai.
-
Tau atu i tamaiti nisi o mea na aoaoina e Nifae o le a faia e Iesu Keriso i le taimi o Lona soifuaga (tagai 1 Nifae 11:16--33), ma faaali atu ata o nisi o nei mea na tutupu (tagai, mo se faataitaiga, Tusiata o le Talalelei, nu. 41, 46, 47, 49, 56, 57, 58, 59). Faasoa atu mea na faia e le Faaola mo oe. Faaali atu ata e fesoasoani ai i tamaiti e mafaufau i auala e mafai ai ona tatou faasoa atu le alofa o le Atua (tagai Tusiata o le Talalelei, nu. 109, 110, 115).
O loo aoao mai e le Tusi a Mamona upu moni taua.
Aisea e te loto faafetai ai mo le Tusi a Mamona? Mafaufau pe mafai faapefea ona e faasoa atu lau molimau i le Tusi a Mamona i tamaiti.
Gaoioiga e Mafai Ona Fai
-
Tusi se ata i luga o le laupapa, ma valaaulia tamaiti e sui pe aveese vaega o le ata ina ia foliga ese. Fesoasoani atu ia i latou ina ia malamalama, e pei lava o lenei ata, o nisi mea na i ai i le Tusi Paia na suia ma aveesea i le aluga o taimi. Faitau vaega o le 1 Nifae 13:40 o loo aoao mai pe faapefea e le Tusi a Mamona (lea na taʻua e Nifae o “talafaamaumau mulimuli nei”) e fesoasoani tatou te malamalama ai i “mea manino ma pele” ia na leiloloa mai le Tusi Paia.
-
Ia nana faataamilo i totonu o le potu ata e fai ma sui o upu moni o le talalelei o loo faamanino mai i le Tusi a Mamona, e pei o le papatisoga, faamanatuga, ma le toetu. Valaaulia ia tamaiti e sue ia ata. Faamalamalama atu o le Tusi a Mamona na toe aumaia upu moni o le talalelei ia na leiloloa.
O le afioga a le Atua e aumaia ia te au le mana.
E faʻapefea ona e faʻaaogaina le ata o le ai uʻamea e aʻoaʻo ai tamaiti e uiga i le malosi, puipuiga, ma le mana o le afioga a le Atua?
Gaoioiga e Mafai Ona Fai
-
Faaali atu se ata o le miti a Liae, e pei o le ata i le otootoga o le vaiaso ua tuanai i le Sau, Mulimuli Mai ia te A’u---Mo Tagata Taitoatasi ma Aiga. Valaaulia tamaiti e sue le ai uamea i le ata, ma fesoasoani ia i latou ia malamalama pe mafai faapefea ona puipuia i tatou pe a tatou taofimau i le afioga a le Atua (tagai 1 Nifae 15:23--24). Tuu atu i tamaiti se mea e taitutusa ma le ai ‘uamea e taofi, e pei o se paipa poo se laau, ao e faitauina le fuaiupu 24. O fea tatou te maua ai le afioga a le Atua? O le a se mea e mafai ona tatou faia e avea ai le afioga a le Atua ma vaega o tatou olaga i aso uma?
-
Fesoasoani i tamaiti e valivali ma faamaea le itulau o gaoioiga o lenei vaiaso. E faapefea ona tatou “pipiimau” i le afioga a le Atua? (1 Nifae 15:24).
Aoao atu le Aoaoga Faavae: Tamaiti Matutua
Na auina mai e le Tama Faalelagi ia Iesu Keriso i le lalolagi ona e alofa o Ia ia te au.
Na maua e Nifae se faaaliga lea na ia molimauina ai le fuafuaga a le Tama Faalelagi mo i tatou, ma o Iesu Keriso o se vaega tutotonu o lena faaaliga.
Gaoioiga e Mafai Ona Fai
-
Valaaulia tamaiti e faafetaui fuaiupu mai le 1 Nifae 11:16--33 ma ata o loʻo faʻaalia ai mea o loʻo faʻamatalaina e fuaiupu (pei o 1 Nephi 11:20, 24, 27, 29, 31, 33; tagai Tusiata o le Talalelei, nu. 30, 35, 38, 39, 42, 57). O a mea ua aoao e tamaiti e uiga ia Keriso mai fuaiupu ma ata?
-
Fesili i tamaiti pe aisea e taua ai Iesu Keriso ia i latou. Usu se pese e faatatau i le Faaola, e pei o le “Na Ia Auina Mai Lona Alo” (Tusipese a Tamaiti, 20--21), ma fesili atu i tamaiti po o le a se mea o aoao mai e lenei pese e uiga ia Iesu. Valaaulia tamaiti e faaavanoa sina taimi i le vaiaso e mafaufau ai e uiga ia Iesu Keriso ma faasoa mai latou aafiaga i le vaiaso lea i le vasega.
O le Tusi a Mamona o loo i ai le talalelei a Iesu Keriso.
O loo aoao mai e le Tusi a Mamona upu moni taua.
O a mea ua iloa e tamaiti e uiga i le Liliuese? E mafai faapefea ona e fesoasoani ia i latou ia malamalama i le taua o le Tusi a Mamona i le toefuataiina o upu moni o le talalelei na leiloloa i le taimi o le Liliuese?
Gaoioiga e Mafai Ona Fai
-
Faitau le 1 Nifae 13:26--29 faatasi, ma valaaulia tamaiti e vaavaai mo mea e tutupu pe a le maua e tagata “mea manino ma pele” o upumoni o le talalelei. Na faapefea ona toefuatai mai e le Alii upumoni na leiloloa? (tagai fuaiupu 35--36, 40). Valaaulia tamaiti e faasoa mai a latou molimau i upu moni ua latou aoaoina mai le Tusi a Mamona, pe faasoa atu lau lava molimau.
-
Faaali le vitio, “The Book of Mormon—a Book from God” (ChurchofJesusChrist.org) e faamatala ai pe faapefea ona galulue faatasi le Tusi Paia ma le Tusi a Mamona e aoao atu le upu moni. Aisea e fesoasoani ai le sili atu ma le tasi le molimau? Tusi se togi i luga o le laupapa, ma faaigoa o le Tusi Paia, ma valaaulia tamaiti taitoatasi e tusi ni laina sasao eseese e pasi ane i le togi e faailoa ai o aoaoga i totonu o le Tusi Paia e mafai ona faamatalaina i ni auala eseese pe a tu toatasi le Tusi Paia. Tape laina, ma tusi seisi togi ma faaigoa o le Tusi a Mamona. Valaaulia se tamaitiiti e tusi se laina saʻo e pasi uma i togi e lua e faaali ai e na o le tasi le auala e faamatala ai le talalelei pe a faaaogaina faatasi le Tusi Paia ma le Tusi a Mamona.
-
Fesoasoani i tamaiti e tauloto le mataupu faavae lona valu o le faatuatua.
O le afioga a le Atua e aumaia ia te au le mana e tetee atu ai i faaosoosoga.
E mafai faapefea ona e fesoasoani i tamaiti o e aoaoina e faamalosia a latou molimau e uiga i tusitusiga paia? Mafaufau loloto i lenei fesili a o e faitauina le 1 Nifae 15:23--25, ma faʻaaoga gaoioiga o loʻo i lalo e faaopoopo i ou lava manatu.
Gaoioiga e Mafai Ona Fai
-
Fai i tamaiti e aotele le faaaliga o le laau o le ola (tagai 1 Nifae 8; 11). O a mea na taofia tagata mai le oʻo atu i le laau? O a mea na fesoasoani ia i latou e oo atu i ai? Valaaulia tamaiti e faitau le 1 Nifae 15:23--25. Na faʻapefea ona fesoasoani le ai uʻamea i tagata ia sao atu i le puao o le pogisa? E mafai faapefea e le faitauina o le afioga a le Atua ona fesoasoani ia i tatou e tetee atu i faaosoosoga ma le pouliuli i aso nei?
-
Faamaea ma tamaiti le itulau o gaoioiga. Aʻo latou faia, fai atu ia i latou e talanoa e uiga i nisi o faʻaosoosoga o feagai ma tamaiti. E faapefea ona latou manatua e taofimau i le ai u’amea i aso uma? Usu le “The Iron Rod” (Hymns, nu. 274) o se vaega o lenei gaoioiga.
Fautuaina le Aoaoina i le Aiga
Uunai tamaiti e faaali atu io latou aiga ia “ai u’amea” na latou faia mai le itulau o gaoioiga ma faasoa mai pe mafai faapefea ona latou taofimau i le ai u’amea e ala i le faitauina o tusitusiga paia.
Faaleleia o Lo Tatou Aoao Atu
Faaaoga faatufugaga e faaauai mai ai tagata aoao. A e aoaoina tamaiti i se tala faatusipaia, saili ni auala e fesoasoani ai ia i latou e vaai faalemafaufau i ai. E mafai ona e faaaogaina ni ata, vitio, papeti, teuga, ma isi.