Ti parmata ni Lehi maipapan iti kayo ti biag

Tagainep ni Lehi, ni Steven Lloyd Neal

Enero 13–19

1 Nephi 8–10

“Umay ken Mairanud iti Bunga”

Kas nayon iti panangkitam iti bagim iti parmata ni Lehi, padasem a kitaen dagiti ubbing a sursuruam. Kasano a mayaplikar daytoy a parmata kadakuada?

Isuratmo Dagiti Impresionmo

icon iti panagbibinninglay

Yawis ti Panagbibinninglay

Kasaritam a nasapsapa ti sumagmamano nga ubbing ket kiddawen kadakuada a mangpanunot kadagiti padas wenno nasantuan a kasuratan a mabalinda nga ibinglay a nakatulong kadakuada a makarikna iti ayat ti Dios.

icon iti panangisuro

Isuro ti Doktrina: In-inaudi nga Ubbing

1 Nephi 8:2, 5–34

Ti balikas ti Dios ti mangiturong kaniak iti Dios ken mangtulong kaniak a mangrikna iti ayatna.

Iti parmata ni Lehi, naawistayo a makiranud iti ayat ti Dios, nga insimbolo ti kayo ken ti bungana. Kasano a matulongam dagiti ubbing a mangawat iti daytoy nga awis?

Dagiti Mabalin nga Aktibidad

• Awisem dagiti ubbing a mangtulong kenka a mangisarita iti estoria ti parmata ni Lehi manipud iti 1 Nephi 8:10–34. Tapno matulongam ida a mangiladawan iti estoria, mabalinmo ti mangipakita iti ladawan ti parmata ni Lehi (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia) wenno dagiti ladawan iti “Kapitulo 6: Tagainep ni Lehi” (Dagiti Estoria iti Libro ni Mormon, 18–20 ). Siguraduem nga ammo dagiti ubbing a ti landok a pagkaptan ket mangibagi iti balikas ti Dios, a mabasatayo kadagiti nasantuan a kasuratan ken mangngegantayo manipud kadagiti sibibiag a propeta. Tulongam ida a makaawat a ti kayo ket mangibagi iti ayat ti Dios para kadatayo.

• Mangitugot iti maysa a lubid a mangibagi iti landok a pagkaptan iti parmata ni Lehi. Kiddawen kadagiti ubbing a petpetanda daytoy bayat ti panangiturongmo kadakuada iti lawlaw ti siled a mapan ti ladawan ti maysa a kayo. Tulongam ida a makaawat a ti balikas ti Dios ket mangyas-asideg kadatayo Kenkuana, kas iti lubid a mangibagi iti landok a pagkaptan a mangiturog kadatayo iti kayo. Tapno maipakita a ti kayo ti mangibagi iti ayat ti Dios, mabalinmo nga ipakita dagiti ladawan ti bambanag a naited kadatayo ti Dios a mangipakita iti ayatna para kadatayo, kas iti Mangisalakan, dagiti pamiliatayo, ken ti napintas a lubong.

• Mangitugot ti sumagmamano a bunga nga addaan iti puso a naipigket iti daytoy. Mangted kadagiti ubbing iti piraso ti bunga a ramananda ket saludsodem kadakuada maipapan kadagiti paggugustoda a bunga. Ilawlawag a ti bunga iti parmata ni Lehi ket isu ti kasam-itan a bunga a naramananna, ken nangpunno daytoy iti rag-o iti kararuana. Kas iti nasam-it a bunga a mangparagsak kadatayo, agragsaktayonto no surotentayo ni Jesus ken makipagnaed manen iti Nailangitan nga Ama.

• Basaen ti 1 Nephi 8:12, ket awisem dagiti ubbing a dumngeg a nasayaat no ania ti tinarigagayan ni Lehi nga aramiden kalpasan ti panangramanna iti bunga. Pagsisinnublatem dagiti ubbing nga agpammarang a kas ni Lehi a mangaw-awis kadagiti dadduma nga umay ken makiranud iti bunga. Ania ti maaramidtayo a mangawis kadagiti dadduma nga umay ken mangnanam kadagiti bendision ti ebanghelio a kaduadatayo?

1 Nephi 10:17, 19

Ipalgakto ti Dios kaniak ti kinapudno babaen ti bileg ti Espiritu Santo.

Kalpasan ti pannakangngegna maipapan iti parmata ti amana, tinarigagayan ni Nephi a nasken a maaddaantayo amin—iti tarigagay a mangammo iti kinapudno para iti bagina.

Dagiti Mabalin nga Aktibidad

• Basaem ti 1 Nephi 10:19, ket awisem dagiti ubbing a mangingato kadagiti imada no mangngeganda dagiti balikas a “maiparang” ken “Espiritu Santo.” Tulongam dagiti ubbing a makaawat iti daytoy a nasantuan a kasuratan, a mangisuro a tulongannatayo ti Espiritu Santo a mangammo kadagiti sungbat dagiti saludsodtayo. Tapno matulongan dagiti ubbing a mangiladawan iti panunotda no ania ti kaipapanan para iti kinapudno a “maiparang,” mangitugot ti nakupin nga ules nga addaan iti maysa a ladawan ti Mangisalakan iti unegna, ket kiddawen kadagiti ubbing a mangukrad iti daytoy.

• Agkanta iti maysa a kansion a kagiddan dagiti ubbing maipapan iti panagsapul iti kinapudno, kas iti “Search, Ponder, and Pray” (Children’s Songbook, 109). Mangipakita kadagiti ladawan a mangiladawan kadagiti balikas ti kanta tapno matulongan dagiti ubbing a manglagip iti no kasano a mangisuro ti Espiritu Santo kadatayo.

• Ibilang ti panangibinglay iti maysa a padas idi tinulongannaka ti Espiritu Santo a mangammo a pudno ti maysa a banag. Ibagam kadagiti ubbing no kasano a nagsarita kenka ti Espiritu Santo.

icon iti panangisuro

Isuro ti Doktrina: In-inauna nga Ubbing

1 Nephi 8:2, 5–34

Ti balikas ti Dios ti mangiturong kaniak iti Dios ken mangtulong kaniak a mangrikna iti ayatna.

Bayat ti panangsursuro dagiti ubbing iti klasem maipapan iti parmata ni Lehi, allukoyen ida a mangadal iti balikas ti Dios ken mangibinglay iti ayat ti Dios kadagiti dadduma.

Dagiti Mabalin nga Aktibidad

• Bayat ti panangbasa dagiti ubbing kadagiti napili a bersikulo manipud iti 1 Nephi 8, awisen ida a mangbirok kadagiti detalye manipud kadagitoy a bersikulo iti maysa a ladawan ti parmata ni Lehi (kas ti maysa iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Wenno awisen ida a mangidrowing kadagiti ladawan iti pisarra maipapan iti nabasada. Kalpasanna tulongam dagiti ubbing a mangtakuat iti no ania ti mangibagi kadagiti simbolo iti tagainep (kitaen iti 1 Nephi 11:21–22; 12:16–18; 15:23–33, 36).

• No mabalin, mangitugot iti piraso ti landok wenno sabali pay a metal iti klase ket awisem dagiti ubbing nga iladawanda ti sumagmamano kadagiti kalidadna ken dagiti banag a mabalin a pakausaran daytoy. Kasano a maipada ti balikas ti Dios iti landok a pagkaptan? Sadino ti pakasarakantayo iti balikas ti Dios? Apay a napateg unay ti landok a pagkaptan iti parmata ni Lehi?

  Ni Lehi a mangmangan iti bunga ti kayo ti biag

  Ni Lehi a mangmangan iti bunga ti kayo ti biag. Kayo ti Biag, ni Marcus Alan Vincent

• Awisem dagiti ubbing a mangisurat iti piraso ti papel ti maysa a padas idi nakatulong kadakuada a mangammo no ania ti aramidenda wenno nakatulong kadakuada a makarikna nga as-asidegda iti Nailangitan nga Ama. Bayat ti panangibinglayda iti no ania ti insuratda, awisem ida a manglukot iti papelda iti sukog ti maysa a tubong [rod]. Mabalinmo pay nga ipigket a sangkamaysa dagiti “tubong [rod]” dagiti ubbing a mangibagi ti landok a pagkaptan iti tagainep ni Lehi.

• Awisem ti sumagmamano kadagiti ubbing a mangbasa iti 1 Nephi 8:10–12 ket iladawam no ania ti nakita ni Lehi. Kiddawem kadagiti ubbing a mangbasa iti 1 Nephi 11:20–23 ken iladawan no ania ti nakita ni Nephi. Apay koma nga iparang ti anghel ken ni Nephi ti maladaga a ni Jesus tapno isuro kenkuana maipapan iti ayat ti Dios? Tapno makatulong a mangsungbat iti daytoy a saludsod, aggigiddan a mangbasa iti Juan 3:16 wenno aggigiddan nga agkanta ti maysa a kansion maipapan iti Mangisalakan, a kas iti “He Sent His Son” (Children’s Songbook, 34–35). Isaritam kadagiti ubbing no kasano a nariknam ti ayat ti Nailangitan nga Ama ken ti Anakna a ni Jesucristo iti biagmo.

• Isurat iti pisara ti: Ania ti masursurotayo manipud iti pagwadan ni Lehi? Awisem dagiti ubbing a mangpanunot maipapan ti parmata ni Lehi ken agsurat iti kas kaadu a sungbat agingga a kabaelanda. Kiddawem kadakuada a mangibinglay kadagiti sungbatda iti klase. Kalpasanna kiddawem kadagiti ubbing a mangpanunot iti maysa a tao a mabalinda a pangibinglayan iti rag-o ti ebanghelio.

1 Nephi 10:17–19; 11:1

Ipalgakto ti Dios kaniak ti kinapudno babaen ti bileg ti Espiritu Santo.

No agdawattayo iti Nailangitan nga Ama iti pammati ti kinapudno ket “maiparangto [kadatayo] babaen ti bileg ti Espiritu Santo” (1 Nephi 10:19). Kasano a matulongam dagiti ubbing a sursuruam a makaawat iti daytoy a kinapudno?

Dagiti Mabalin nga Aktibidad

• Awisem dagiti ubbing a pagsasaritaanda maipapan kadagiti wagas a masarakanda kadagiti sungbat iti maysa a saludsod. Allukoyem dagiti ubbing a mangbasa iti 1 Nephi 10:17–19 ken 11:1. Ania koma ti kuna ni Nephi no agsaludsod kenkuana ti maysa a tao no kasano ti mangsapul iti sungbat iti maysa a saludsod maipapan iti ebanghelio? Kasano nga isuronatayo ti Dios babaen ti Espiritu Santo? (kitaen iti DkK 8:2).

• Kiddawen kadagiti ubbing nga agsarita maipapan iti maysa a panawen idi tinulongan ida ti Espiritu Santo a mangammo a pudno ti maysa a banag. Kiddawem kadakuada a mangipapan nga addaanda iti maysa a gayyem nga agpampanunot a saan a makaawat kadagiti sungbat babaen ti Espiritu Santo. Ania ti mabalinda nga ibinglay manipud iti 1 Nephi 10:17–19 ken 11:1 tapno makatulong iti dayta a gayyem?

icon iti panagsursuro

Yallukoy ti Panagsursuro iti Pagtaengan

Allukoyen dagiti ubbing a mangusar iti panid ti aktibidad iti daytoy a lawas tapno mangibinglay kadagiti pamiliada no ania ti nasursuroda maipapan iti parmata ni Lehi iti kayo ti biag.

Panangpadur-as iti Panangisurotayo

Makasursuro dagiti ubbing iti adu a wagas. Maragsakan dagiti ubbing iti panagsursuro babaen kadagiti nadumaduma a padas. Usarem dagiti aktibidad a makatulong kadakuada nga aggunay, nga usaren ti amin a panagriknada, ken agpadas kadagiti baro a banag. (Kitaen iti Panangisuro iti Wagas ti Mangisalakan, 25–26.)

panid ti aktibidad: matulonganak ti balikas ti Dios a makarikna iti ayatna