Përdorimi i Manualit Eja, Më Ndiq – Për Individët dhe Familjet

Për Kë Është Ky Burim?

Ky burim është për çdo individ dhe familje në Kishë. Ai është hartuar që t’ju ndihmojë ta mësoni ungjillin – qoftë më vete ose me familjen tuaj. Nëse nuk e keni studiuar rregullisht ungjillin në të shkuarën, ky burim mund t’ju ndihmojë të filloni. Nëse e keni tashmë një zakon të mirë të studimit të ungjillit, ky burim mund t’ju ndihmojë të keni përvoja më kuptimplota.

Si Duhet ta Përdor Këtë Burim?

Përdoreni këtë burim në çfarëdo mënyre që është e dobishme për ju. Ju mund ta shihni të dobishëm si udhëzues apo si ndihmë për studimin vetjak dhe familjar të shkrimeve të shenjta. Mund ta përdorni edhe për mbrëmjen e shtëpisë. Përvijimet e mësimeve theksojnë parime të rëndësishme që gjenden në Dhiatën e Vjetër, sugjerojnë ide për studim dhe veprimtari për individë e familje dhe sigurojnë vende për t’i shënuar mbresat tuaja.

Eja, Më Ndiq – Për Individët dhe Familjet nuk ka për qëllim t’i zëvendësojë gjërat e tjera të mira që po bëni apo të konkurrojë me to. Ndiqni udhërrëfimin e Shpirtit për të përcaktuar se si ta kryeni studimin tuaj vetjak të fjalës së Perëndisë.

çift duke studiuar shkrimet e shenjta në shtëpi

Si Lidhet Ky Burim me Atë që Ndodh në Kishë?

Përvijimet e mësimeve në këtë burim organizohen në përputhje me një program leximi të përjavshëm. Burimet për manualin Eja, Më Ndiq për Filloren, për Shkollën e së Dielës dhe për kuorumet e Priftërisë Aarone dhe klasat e Të Rejave ndjekin të njëjtin program. Në mbështetje të përpjekjeve tuaja për ta mësuar e jetuar ungjillin në shtëpi, mësuesit tuaj në kishë do t’ju japin mundësi për të shprehur përvojat, mendimet dhe pyetjet tuaja lidhur me fragmentet e shkrimeve të shenjta që i keni studiuar në shtëpi.

Ngaqë Shkolla e së Dielës jepet mësim vetëm dy herë në muaj, mësuesit e Shkollës të së Dielës mund të zgjedhin t’i lënë pa bërë ose t’i ndërthurin përvijimet për t’iu përmbajtur programit javor. Kjo gjithashtu mund të jetë e nevojshme (për Shkollën e së Dielës si edhe për Filloren) në javët kur mbledhjet e rregullta të Kishës nuk mbahen për shkak të konferencës së kunjit ose arsye të tjera. Gjatë këtyre javëve ju ftoheni ta vazhdoni studimin e librit Dhiata e Vjetër në shtëpi.

A Kam Nevojë Unë që ta Ndjek Programin?

Programi do t’ju ndihmojë t’i lexoni pjesët e përzgjedhura nga Dhiata e Vjetër dhe Perla me Vlerë të Madhe deri në fund të vitit. Përveç kësaj, ndjekja e të njëjtit program si të tjerët mund të çojë në përvoja kuptimplota në shtëpi, në kishë dhe tjetërkund. Por mos u ndieni të kufizuar nga programi ose të detyruar për të lexuar çdo varg; programi është thjesht një udhëzues për t’ju ndihmuar të përcaktoni ritmin tuaj. Gjëja e rëndësishme është që ju po e mësoni ungjillin individualisht dhe si familje.

Shënim rreth Programit të Leximit të Dhiatës së Vjetër

Programi i sugjeruar i leximit të manualit Eja, Më Ndiq për vitin 2022 nuk e përfshin çdo kapitull në Dhiatën e Vjetër. Për shkak se Dhiata e Vjetër është më e gjatë se volumet e tjera të shkrimeve të shenjta, disa kapituj dhe libra janë hequr për ta bërë programin e leximit më të përdorshëm për ju dhe familjen tuaj.

Kapitujt dhe librat u përzgjodhën për të shmangur gjërat e tepërta dhe për të nxjerrë në pah fragmente që dëshmojnë për Jezu Krishtin, që janë të pasura me doktrinë dhe janë veçanërisht të përshtatshme për kohën tonë. Për shembull, programi i sugjeruar i leximit nuk i përfshin librat 1 dhe 2 Kronikave, sepse një pjesë e mirë e përmbajtjes së atyre librave përsërit materialin që gjendet te librat 1 dhe 2 Mbretërve. Programi gjithashtu nuk e përfshin librin Kantiku i Kantikëve, sepse Profeti Jozef Smith dha mësim se nuk është shkrim i shenjtë i frymëzuar (shih Udhëzuesi për Shkrimet e Shenjta, “Kantik(u) i Kantikëve”, scriptures.ChurchofJesusChrist.org). Megjithatë, mbani mend se ky është thjesht një program i sugjeruar leximi. Studimi juaj vetjak dhe familjar i shkrimeve të shenjta duhet të udhërrëfehet nga zbulesa vetjake.