o se tinā ma se tamaitiiti o loo su‘esu‘e i tusitusiga paia

Manatu e Faaleleia ai a Outou Su‘esu‘ega Faaleaiga o Tusitusiga Paia

O le su‘esu‘e faaleaiga o tusitusiga paia e le aunoa o se ala mamana lea e fesoasoani ai i lou aiga ia lagona faatosinaga a le Agaga Paia ma a‘oa‘o ai le talalelei. O le a le tele po o le a foi le umi tou te faitau ai o se aiga e le tutusa le taua ma le faifai pea e le aunoa o a outou taumafaiga. A o e faia le su‘esu‘e o tusitusiga paia o se vaega taua o lou olaga faaleaiga, o le a e fesoasoani i tagata o lou aiga e o mai latalata atili i le Tama Faalelagi ma Iesu Keriso ma fausia a latou molimau i le faavae o Lana afioga. Mafaufau e fefautuaa‘i faatasi e uiga i fesili nei:

• E mafai faapefea e tagata o lou aiga ona faamalosi‘au i le tasi ma le isi ia su‘esu‘e le tagata lava ia i tusitusiga paia?

• O le a se mea e mafai ona faia e tgata o lou aiga e faamalosi‘auina ai i tagata taitoatasi ia fefaasoaa‘i i mea ua latou a‘oa‘oina?

• E mafai faapefea ona e faamamafaina mataupu faavae o loo e a‘oa‘oina i le Feagaiga Fou i taimi e a‘oa‘o atu ai i aso uma?

Manatua o le fale o se nofoaga lelei tele mo le a‘oa‘oina o le talalelei. E mafai ona e a‘oa‘o mai ma a‘oa‘o atu le talalelei i le fale i auala e le mafai ona faia i se vasega i le Lotu. Ia fatufatu mea fou a o e mafaufau i auala e fesoasoani ai i lou aiga e a‘oa‘o mai tusitusiga paia. Mafaufau i nisi o manatu nei e faalautele ai le su‘esu‘eina o tusitusiga paia e lou aiga.

o le aiga ma ta‘ita‘i o le Ekalesia o loo pepese faatasi i se aiga.

Faaaoga Musika

Usu pese e faamalosia ai mataupu faavae na a‘oa‘oina i tusitusiga paia. Ua lisiina atu se viiga fautuaina po o se pese a tamaiti i otootoga i vaiaso taitasi. E mafai ona e fesili atu i tagata o le aiga ni fesili e uiga i upu po o fasi fuaiupu o le pese. E le gata i le pepese, ae e mafai foi e le tou aiga ona faatino ia taga e o faatasi ma pese pe faalogologo foi i pese e tata a o faia isi a latou gaoioiga. Mo nisi manatu, tagai “Faaaofiaga o Musika Paia i Lou A‘oa‘oina o le Talalelei” o loo i lenei puna‘oa.

Faasoa Atu ni Mau ‘Anoa

Tuu atu i tagata o le aiga se taimi e faasoa mai ni fuaitau o mau latou te mauaina e ‘anoa i le taimi o a latou su‘esu‘ega faaletagata lava ia.

Faaaogaina o Au Lava Upu

Valaaulia tagata o le aiga e aotele i a latou lava upu mea latou te aoao mai mau tou te suesueina.

Faaaoga Mau i Lou Olaga

A uma ona faitau se mau, fai i tagata o le aiga e fasoa mai ni auala e faaaoga ai le fuaitau i o latou olaga.

Fai se Fesili

Valaaulia tagata o le aiga e fai se fesili faaletalalelei, ona faaalu lea o se taimi e sue ai fuaiupu e mafai ona fesoasoani e tali ai le fesili.

Faaali i luga se Mau

Filifili se fuaiupu e te iloa e anoa, ma faaali i se mea o le a vaai soo i ai tagata o le aiga. Valaaulia isi tagata o le aiga e feauaua’i e filifili se mau e faaali i luga.

o se tina ma tamaiti o loo suesue i tusitusiga paia

Fai se Lisi o Mau

I le avea ai o se aiga, filifili ni fuaiupu e te manao e talanoaina i le vaiaso a sau.

Tauloto ia Mau

Filifili se mau e anoa i lou aiga, ma valaaulia tagata o le aiga e tauloto e ala i le faifai soo i aso taitasi pe fai foi se taaloga faatauloto.

Faasoa Lesona Faatino

Sue ni mea faitino e faatatau i mataupu o le talalelei i fuaitau o mau tou te faitauina o se aiga. Valaaulia tagata o le aiga e talanoa e uiga i le auala e fesootai ai mea faitino taitasi i aoaoga i tusitusiga paia.

Filifili se Autu

Tuu e feauaua’i tagata o le aiga e filifili se autu o le a suesue faatasi e le aiga. Faaaoga le Taiala mo Autu, le Bible Dictionary, po o le Taiala i Tusitusiga Paia (scriptures.lds.org) e sue ai mau e uiga i le autu.

Tusi se Ata

Faitau ni nai fuaiupu o se aiga, ona tuu lea o se taimi i tagata o le aiga e tusi ai se mea e fesootai ma mea o loo outou faitauina. Faaalu se taimi e talanoaina ai ata a le tasi ma le isi .

Faatino se Tala

A uma ona faitau se tala, valaaulia tagata o le aiga e faatino mai. A uma, talanoa pe faapefea ona fesootai le tala ma mea sa outou oo i ai taitoatasi faapea foi o se aiga.

Ua saunoa Peresitene Russell M. Nelson: “Ou te folafola atu pe a e galue filiga e toe faafou lou fale e avea ma se nofoaga autu e aoaoina ai le talalelei, i le gasologa o taimi o le a avea au aso Sapati ma aso fiafia moni. O le a fiafialau fanau e aoao ma ola i aoaoga a le Faaola, ma o le a faaitiitia le faatosinaga a le fili i lou olaga ma i lou aiga. O suiga i lou aiga o le a iloga ma tumau” (“Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 113).