mama mo pikinini i stap stadi ol skripja

Sam Aedia blong Kam Antap long Famli Skripja Stadi

Famli skripja stadi i wan wei we i gat moa paoa blong helpem famli blong yu blong blong filim paoa blong Tabu Spirit mo lanem gospel. Hamas japta mo hamas minit yu stap rid olsem wan famli i no impoten, be wanem i impoten, i we yu stap traehad blong mekem oltaem. Taem yu mekem skripja stadi i kam wan impoten pat blong famli laef blong yu, bae yu stap helpem ol memba blong famli blong yu blong kam kolosap moa long Papa long Heven mo long Jisas Kraes, mo bildimap testemoni blong olgeta antap long fandesen blong toktok blong God. Tingting long kaonsel tugeta blong yu abaot olgeta kwestin ia:

• ?Olsem wanem nao ol memba blong famli blong yu oli stap leftemap tingting blong wanwan long olgeta blong stadi long ol skripja olgetawan?

• ?Wanem nao yu save mekem blong leftemap tingting blong ol memba blong famli blong oli serem wanem we oli stap lanem?

• ?Olsem wanem nao yu save tokbaot moa ol prinsipol we yu stap lanem insaed long Niu Testeman long evri dei, taem yu gat wan taem blong tij?

Tingbaot se hom i nambawan ples blong lanem gospel. Yu save lanem mo tijim gospel long hom long sam wei we i no posibol blong mekem insaed long wan klas long Jos. Yusum tingting blong yu blong krietem wan wei we yu save helpem famli blong yu blong lanem samting aot long ol skripja. Tingting long sam long ol aedia ia blong mekem famli skripja stadi blong yu i kam gud moa.

famli mo ol nara lida blong Jos oli i stap singsing tugeta insaed long wan hom

Yusum Miusik

Singsing ol singsing we oli kam sapotem ol prinsipol we oli stap tijim insaed long ol skripja. I gat wan hym o wan singsing blong ol pikinini we oli putum i stap long lis insaed long aotlaen blong wanwan wik. Yu save askem ol memba blong famli long saed blong ol kwestin abaot ol toktok, o ol sentens insaed long ol toktok blong singsing ia. Antap long singsing, famli blong yu i save mekem ol aksen we oli go wetem ol singsing, o lisin long ol singsing olsem bakgraon miusik long semtaem we oli stap mekem sam nara aktiviti. Blong gat moa aedia, luk long pat ia, “Stap Yusum Tabu Miusik Taem Yu Stap Lanem Gospel” we i stap insaed long risos ia.

Serem Ol Skripja we Oli Gat Mining

Givim taem long ol memba blong famli blong oli serem ol ples long ol skripja, we oli bin stadi olgetawan, we oli faenem se i gat mining long olgeta.

Yusum Toktok blong Yuwan

Invaetem ol memba blong famli blong yusum toktok blong olgetawan, mo talemsot wanem oli lanem aot long ol skripja we yufala i stap stadi long olgeta.

Yusum Ol Skripja Ia long Laef blong Yu

Afta we yu ridim wan skripja, askem ol memba blong famli blong serem ol wei we skripja ia i go wetem laef blong olgeta.

Askem Wan Kwestin

Invaetem ol memba blong famli blong askem wan kwestin blong gospel, mo afta, spendem taem blong lukaotem ol ves we i gat ansa long kwestin ia.

Hangem Wan Skripja

Jusum wan ves we yu luk se i gat mining long yu, mo raetem mo hangem long wan ples we ol memba blong famli bae oli luk plante taem. Invaetem ol nara memba blong famli blong oli gat wanwan taem blong jusum wan skripja blong hangem.

Mama mo pikinini oli stap stadi long ol skripja

Mekem Wan Lis blong Ol Skripja

Olsem wan famli, jusum plante defren ves we bae yu wantem toktok raon long hem long wik ia.

Lanem Ol Skripja Baehat

Jusum wan skripja we i gat mining long famli blong yu, mo invaetem ol memba blong famli blong lanem skripja ia baehat; yufala i mekem hemia taem yufala i ripitim skripja ia evri dei, o taem yufala i stap plei wan memori gem.

Ol Lesen we Oli Yusum Samting long Hem

Faenem sam samting we i go wetem ol prinsipol blong gospel insaed long ol skripja ia we yufala i stap ridim olsem wan famli. Invaetem ol memba blong famli blong tokbaot olsem wanem wanwan samting we yu karem, i go wetem ol tijing insaed long ol skripja.

Jusum Wan Topik

Bae ol memba blong famli oli gat wanwan taem blong jusum wan topik we famli bae i stadi long hem tugeta. Yusum Topical Guide, o Bible Dictionary, o Gaed long Ol Skripja (olskripja.ChurchofJesusChrist.org) blong faenem skripja we i go wetem topik.

Droem Wan Pikja

Ridim sam ves olsem wan famli, mo afta, givim taem blong ol memba blong famli oli droem wan samting we i go wetem wanem yufala i stap ridim. Spenem taem blong toktok raon long wanwan droing.

Aktem Wan Stori

Afta we yu stap ridim wan stori, invaetem ol memba blong famli blong oli aktem stori ia. Afta long hemia, tokbaot olsem wanem stori i go wetem wanem wanwan i stap gotru long hem hemwan, mo wetem wanem yufala i stap gotru long hem olsem wan famli.

Presiden Russell M. Nelson i talem: “Mi promes se taem yu stap wok strong blong jenisim hom blong yu i kam wan senta blong lanem gospel, wetem taem, bae ol Sabat dei blong yufala i rili kam wan glad. Ol pikinini blong yufala bambae oli wantem tumas blong lanem samting, mo blong laef folem ol tijing blong Sevya, mo paoa blong enemi insaed long laef blong yufala, mo insaed long hom blong yufala, bae i kamdaon. Ol jenis insaed long famli blong yufala bae i bigwan mo i sapotem yufala” (“Blong Kam Ol Lata-dei Sent we I Givim Eksampol,” Liahona, Novemba 2018, 113).