20–26 Novemba, Fas mo Seken Pita: ‘Yufala I Stap Bilif long Hem, Nao Yufala I Stap Harem Gud Tumas, we Yufala I Glad we I Glad, we I No blong Talem,’” Kam Folem Mi—Blong Wanwan Man, Woman mo Famli: Niu Testeman 2023 (2022)

“20–26 Novemba, Fas mo Seken Pita,” Kam Folem Mi—Blong Wanwan Man, Woman mo Famli: 2023

Pikja

Jisas Kraes i stap prijim gospel long spirit wol

Kraes I Stap Prij long Spirit Wol, i kam long Robert T. Barrett

20–26 Novemba

Fas mo Seken Pita

“Yufala I Stap Bilif long Hem, Nao Yufala I Stap Harem Gud Tumas, we Yufala I Glad we I Glad, we I No blong Talem”

Taem yu stap ridim Leta blong Pita, maet bae yu kasem sam filing mo tingting long saed blong spirit. Kwiktaem, raetemdaon olgeta taem yu stap yet “wetem Spirit” (Doktrin mo Ol Kavenan 76:80) blong mekem se yu kasem stret wanem we God i stap tijim yu.

Raetemdaon Ol Filing mo Tingting blong Yu

I no longtaem afta long Laef Bakegen long Ded blong Hem, Sevya i bin talem wan profesi we maet i mekem tingting blong Pita i trabol. Hem i bin talem finis long Pita we bae Pita i ded from ol bilif blong hem, “we long ded blong hem, bambae i leftemap nem blong God. (Jon 21:18–19). Sam yia afta, taem we Pita i bin raetem ol leta blong hem, hem i bin save se taem blong hem blong ded, we profesi i talem, bae i kam i no longtaem: “Mi mi savegud se bambae i no longtaem, mi mi aot long bodi blong mi, stret olsem we Jisas Kraes, Masta blong yumi i talemaot i klia long mi bifo” (2 Pita 1:14). Be yet, ol toktok ia blong Pita oli no fulap long fraet, o fasin blong lusum hop. Be, hem i bin tijim Ol Sent blong oli mas glad fulap, nomata we oli bin hevi wetem plante temtesen. Pita i givim kaonsel long yumi blong tingbaot se “ol samting i stap soemaot fasin blong bilif blong [yumi], … be oli mas bonem wetem faea,” bae i lid i go long taem we “Jisas Kraes i kamtru long [yumi], God bae i givim ona long [yumi], i presem [yumi] nao leftemap nem blong [yumi]” mo i kasem taem “we God bae i sevem laef blong [yumi]” (1 Pita 1:6-7,9). Yufala i harem gud, from we yufala i joen long Kraes*, mo yufala i stap kasem haf blong ol samting ya we i mekem hem i harem nogud. Nao taem ol gudgudfala samting blong Kraes oli kamtru, bambae yufala i glad tumas” (1 Pita 4:13).

Pikja

stadi blong yuwan pikja aekon

Sam Aedia blong Skripja Stadi blong Yuwan

1 Pita 1:3–9; 2:19–24; 3:14–17; 4:12–19

Mi save faenem glad long ol taem blong tes mo safaring blong mi.

Taem ia afta long taem we Kraes i hang long kros, i no bin wan isi taem blong stap olsem wan Kristin man, mo fas leta blong Pita i luksave hemia. Long ol fas fofala japta, bae yu luk ol toktok mo ol sentens we oli tokbaot taem we i had: harem nogud, temtesen, krae sore, traem, mo safaring (luk long 1 Pita 1:6; 2:19; 4:12–13). Be tu, bae yu luk ol toktok we oli soem glad—maet bae yu wantem mekem wan lis blong wanem nao yu stap faenem. Eksampol: taem yu stap ridim 1 Pita 1:3–9; 2:19–24; 3:14–17; mo 4:12–19, ?wanem nao i givim yu hop se yu save faenem glad long medel blong ol taem we oli had tumas?

Maet bae yu save ridim mesej blong Presiden Russell M. Nelson “Glad mo Traehad blong Laef long Saed blong Spirit” (Jeneral Konfrens, Okt 2016, ChurchofJesusChrist.org/general-conference/conferences?lang=bis) mo lukaotem ol semmak samting bitwin wanem we Pita i bin tijim mo wanem we Presiden Nelson i bin tijim. ?Wanem nao, insaed long plan blong fasin blong sevem man mo gospel blong Jisas Kraes, we i givim yu glad?

Luk tu long Ricardo P. Giménez, “Faenem Sef Ples long Taem blong Ol Strong Win blong Laef,” Liahona, Mei 2020, 101–3.

1 Pita 3:18–20; 4:1–6

Oli prijim gospel i go long ol dedman blong mekem se oli save jajem olgeta long wan stret fasin.

Wan dei, wanwan bae i stanap long jajmen ples mo “i mas talemaot laef blong [hem] long fes blong God, we hem i stap rere blong jajem ol man we oli ded, wetem ol man we oli laef” (1 Pita 4:5). ?Olsem wanem nao bae God i jajem evri pipol long wan stret fasin taem we janis blong olgeta blong andastanem mo laef folem gospel i defren evriwan? Luk olsem wanem doktrin ia we Pita i bin tijim long 1 Pita 3:18–20; 4:6 i help blong ansarem kwestin ia. ?Olsem wanem ol ves ia oli stap mekem fet blong yu long stret fasin mo jastis blong God, i kam strong moa?

Blong lukluktru long doktrin ia i go moa, stadi long Doktrin mo Ol Kavenan 138, wan revelesen we Presiden Josef F. Smit i bin kasem taem hem i bin stap tingting hevi long ol raeting blong Pita. ?Wanem moa trutok nao Presiden Smit i bin lanem?

Luk tu long Gospel Topics, “Baptisms for the Dead,” topics.ChurchofJesusChrist.org.

2 Pita 1:1–11

Tru long paoa blong Jisas Kraes, mi save developem tabu fasin blong mi.

?Yu yu filim se blong stap kam olsem Jisas Kraes mo stap developem ol kwaliti fasin blong Hem, i wan samting we i no posibol? Elda Robert D. Hales i bin talem tingting ia we i leftemap tingting abaot wei we yumi save developem ol fasin olsem hemia blong Kraes: “ Ol kwaliti fasin blong Sevya … oli ol fasin we oli wivim tugeta, we oli ademap, wan afta long narawan, mo i stap develop insaed long yumi. Long nara toktok, yumi no save kasem wan fasin olsem hemia blong Kraes sapos yumi no kasem mo no stap yusum blong lidim tingting blong ol narawan. Taem yu kam strong long wan fasin, bae plante moa tu i kam strong” (“Blong Kam wan Disaepol blong Lod Jisas Kraes,” Jeneral Konfrens, Epril 2017, ChurchofJesusChrist.org/general-conference/conferences?lang=bis).

Wanwan kwaliti blong Kraes we yumi stap developem, i helpem yumi blong wivim wan tapi o mat blong stap disaepol.

Taem yu stap ridim 2 Pita 1:1–11, tingting long ol kwaliti fasin blong “tabu fasin” we oli listimdaon long ol ves ia. Long eksperiens blong yu, ?olsem wanem nao oli wivim olgeta tugeta,” olsem Elda Hales i stap tokbaot? ?Olsem wanem nao oli bildimap olgeta antap long ol narawan? ?Wanem moa yu yu lanem aot long ol ves ia abaot rod blong stap kam moa olsem Kraes?

Maet bae yu tingting hevi long ol bigfala mo gudfala promes we God i bin givim long Ol Sent blong Hem—we i tekem yu tu (2 Pita 1:4). Mesej blong Elda David A. Bednar: “Exceeding Great and Precious Promises” (Liahona, Nov. 2017, 90–93) oli save helpem yu andastanem wanem nao ol promes ia, mo olsem wanem blong kasem olgeta.

Pikja

famli stadi pikja aekon

Ol Aedia blong Famli Skripja Stadi mo Haos Naet

1 Pita 2:5–10.Taem yu stap ridim ol ves ia wetem famli blong yu, tingting blong yusum ol ston blong helpem ol memba blong famli, oli luk pikja blong ol tijing blong Pita, se Sevya i “jif konaston” blong yumi. ?Long wanem wei nao yumi olsem ol ston we oli laef, we God i stap yusum blong bildimap kingdom blong Hem? ?Wanem nao yumi lanem aot long Pita abaot Sevya, mo abaot rol blong yumi insaed long kingdom ia blong Hem? ?Wanem nao hem i mesej blong Pita we i go long famli blong yu?

1 Pita 3:8–17.?Olsem wanem nao yumi mas rere oltaem blong givim wan ansa long olgeta we oli askem yumi abaot bilif blong yumi? Famli blong yu i save mekem ol rol plei situesen, we wan i kam kolosap wetem wan kwestin abaot gospel.

1 Pita 3:18–20; 4:6.?Wanem nao famli blong yu i stap mekem blong i filim se hem i joen wetem ol bubu blong yufala? Maet yufala i save selebretem betdei blong ol bubu we oli ded finis, taem yu rere fevret kaekae blong olgeta, stap lukluk ol pikja, mo stap talem ol stori blong laef blong olgeta. Sapos i posibol, yu save mekem plan blong mekem ol odinens long bihaf blong ol bubu blong yu, insaed long tempol (blong kasem help, visitim FamilySearch.org).

2 Pita 1:16–21.Long ol ves ia, Pita i mekem Ol Sent oli tingbaot eksperiens we hem i bin gat antap long Hil we Jisas I Kam Narafala (luk tu long Matiu 17:1–9). ?Wanem nao yu lanem aot long ol ves ia abaot ol tijing blong ol profet? (luk tu long Doktrin mo Ol Kavenan 1:38). ?Wanem nao i givim yumi tras blong folem profet blong yumi we i laef tedei?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Family History—I Am Doing It,” Children’s Songbook, 94.

Kam Antap long Fasin blong Yumi blong Stap Tij

“Yu rere oltaem.” Ol taem blong tij oli pas kwiktaem, mekem se yu mas holem evri janis taem ol taem blong tij ia oli kamkamaot. ?Olsem wanem nao bae yu traehad blong yu rere oltaem blong tijim ol memba blong famli long saed blong ol trutok blong gospel, mo serem hop we i stap insaed long yu (1 Pita 3:15) taem ol tijing taem ia oli kam antap? (Luk long Teaching in the Savior’s Way, 16.)