Papitaisotaki Jisu tiko o Joni na Dauveipapitaisotaki

Katubaleka iloilo buto ni Valetabu mai Nauvu Ilinoi, mai vei Tom Holdman

23–29 ni Janueri

Maciu 3; Marika 1; Luke 3

“Dou Caramaka na Sala i Jiova”

Mo tekivu ena nomu wilika na Maciu 3; Marika 1; kei na Luke 3. Nio sa masulaka me vukei iko na Yalo Tabu mo kila vinaka na veiwase ni ivola oqo, ena solia vei iko o Koya na raititobu sa baleti iko sara ga vakatabakidua. Vola na vei nanuma oqo, ka biuta vata na ituvatuva mo vakayacori ira kina.

Vola na Nomu Nanuma

E rawa ni veisautaki iko o Jisu Karisito kei na Nona kosipeli. E a cavuta o Luke e dua na parofisai makawa nei Aisea ka vakamacalataka na ilesilesi i Joni na Dauniveipapitaisotaki kei na mana ni Nona tadu mai na iVakabula: “Ena vakaceceretaki na buca kecega, ka na vakalolovirataki na ulunivanua kei na vanua cecere kecega; ka na vakadodonutaki na ka sa veve, ka na vakalogalogavinakataki na sala sa sukusukura” (Luke 3:5; raica talega na Aisea 40:4). Oqo na itukutuku me baleti keda taucoko, wili kina o ira ka ra nanuma ni ra sega ni rawa ni veisau. Kevaka e dua na ka e tudei me vaka na ulunivanua e rawa ni vakatautauvatataki, sa dina sara ni sa rawa vua na Turaga me vukei keda me da vakadodonutaka na noda gaunisala veve eso (raica na Luke 3:4–5). Ni da sa ciqoma na veisureti nei Joni na Dauveipapitaisotaki me da veivutuni ka veisau, eda sa vakarautaka tiko na noda vakasama kei na lomada me da ciqomi Jisu Karisito ka sa rawa talega vei keda me da “raica talega na vu ni bula mai vua na Kalou” (Luke 3:6).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

O cei o Marika?

Vei ira na dauvolaivola ni Kosipeli, e lailai duadua na ka eda kila me baleti Marika. Eda kila ni a itokani kaulotu i Paula, o Pita, kei na so tale na daukaulotu. E levu na dauvulica na iVolatabu era vakabauta ni o Pita e a vakaroti Marika me vola na ka e yaco ena bula ni iVakabula. E kena irairai ni a volai e liu na Kosipeli i Marika mai vei iratou na tolu na kena vo.

Raica talega na Bible Dictionary, “Mark.”

Maciu 3:1–12; Marika 1:1–8; Luke 3:2–18

Na veivutuni e dua na veisau cecere ni vakasama kei na lomada.

Sa ilesilesi nei Joni na Dauveipapitaisotaki me vakarautaka na lomadra na tamata me ra ciqoma na iVakabula ka yaco me ra vakataki Koya. A cakava li vakacava? E kacivaka, “Dou veivutuni” (Maciu 3:2). Ka vakayagataka na ivakaraitaki me vaka na vuata kei na witi me vakavulica kina na veivutuni (raica na Luke 3:9, 17).

Na iyaloyalo cava tale o rawa ni kunea ena itukutuku ni veiqaravi nei Joni na Dauveipapitaisotaki? (raica na Maciu 3:1–12; Marika 1:1–8; Luke 3:2–18). Nanuma mo makataki ira ena nomu ivolanikalou se mo droinitaka na kedra i yaloyalo. Na cava era vakatavulica na ivakaraitaki oqo me baleta na ivunau kei na yaga bibi ni veivutuni?

Na veivutuni dina sa ikoya na “veisau ni vakasama, e dua na rai vou me baleta na Kalou, baleti iko, ka vakakina na vuravura. … [Sa kena ibalebale] na vagolei ni yalo kei na lomada vua na Kalou” (Bible Dictionary, “Repentance”). Ena Luke 3:7–14, na veisau cava e sureta o Joni me ra vakayacora na tamata me ra vakarau kina me ra ciqomi Karisito? Ena rawa vakacava ni vakaibalebale talega vei iko na ivakasala oqo? O na vakaraitaka vakacava ni ko sa veivutuni dina? (raica na Luke 3:8).

Raica talega na Russell M. Nelson, “We Can Do Better and Be Better,” Liaona, Me 2019, 67–69; Dallin H. Oaks, “Cleansed by Repetntance,” Liaona, Me 2019, 91–94.

Maciu 3:7; Luke 3:7

O cei o ira na Farisi kei na Tokani i Setoki?

O ira na Farisi era lewe ni dua na isoqosoqo ni lotu vaka-Jiu ka ra dau dokai ira vakataki ira ena nodra dau vakamuria vakamatailalai na vunau i Mosese. O ira na iTokani i Setoki era a dua na kalasi ni Jiu vutuniyau era dau veivakauqeti cecere ena veika vakalotu kei na politiki; era sega ni vakabauta na ivakavuvuli ni tucaketale mai na mate. Na ilawalawa ruarua oqo era sa gole tani mai na inaki taumada ni lawa ni Kalou.

Raica talega na Maciu 23:23–28; Bible Dictionary, “Pharisees,” “Sadducees.”

Maciu 3:11, 13–17; Marika 1:9–11; Luke 3:15–16, 21–22

E papitaisotaki o Jisu Karisito me “vakayacori kina na ivalavala dodonu kecega.”

Ena gauna ko papitaiso kina, o sa muria tiko na ivakaraitaki ni iVakabula. Vakatauvatana na ka o vulica mai na itukutuku ni nona papitaiso na iVakabula ki na vei ka e yaco ena nomu papitaiso.

Nona Papitaiso na iVakabula	Noqu Papitaiso
Nona Papitaiso na iVakabula O cei e papitaisotaki Jisu, kei na lewa cava e a tu vua?	Noqu Papitaiso Ko cei e papitaisotaki iko, kei na lewa cava e tu vua?
Nona Papitaiso na iVakabula E papitaiso mai vei o Jisu?	Noqu Papitaiso Ko papitaiso mai vei?
Nona Papitaiso na iVakabula E papitaiso vakacava o Jisu?	Noqu Papitaiso Ko papitaiso vakacava?
Nona Papitaiso na iVakabula Na cava na vuna e a papitaiso kina o Jisu?	Noqu Papitaiso Na cava na vuni nomu papitaiso?
Nona Papitaiso na iVakabula E vakaraitaka vakacava na Tamada Vakalomalagi ni sa marautaki Jisu?	Noqu Papitaiso E vakaraitaka vakacava na Tamada Vakalomalagi ni marautaka na nomu papitaiso? E sa vakaraitaka tiko mai vakacava na Nona veivakadonui mai na gauna oya?

Raica talega na 2 Nifai 31; Mosaia 18:8–11; Vunau kei na Veiyalayalati 20:37, 68–74; “The Baptism of Jesus” (vidio), ChurchofJesusChrist.org.

Maciu 3:16–17; Marika 1:9–11; Luke 3:21–22

O iratou na lewe ni Lewetolu Vakalou e tolu na kabula duidui.

Na iVolatabu e tu kina e vuqa na ivakadinadina ni lewe ni Lewetolu Vakalou e ratou tolu na kabula duidui. Na itukutuku ni nona papitaiso na iVakabula sa dua na kena ivakaraitaki. Nio wilika na itukutuku oqo, vakasamataka vakatitobu na veika o vulica me baleta iratou na lewetolu vakalou. Na cava era bibi kina vei iko na vei tikina oqo?

Raica talega na Nai Vakatekivu 1:26; Maciu 17:1–5; Joni 17:1–3; Cakacaka 7:55–56; Vunau kei na Veiyalayalati 130:22.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Maciu 3.A tiko vei Joni na Dauveipapitaisotaki na Matabete i Eroni. Na cava eda rawa ni vulica mai na ivakaraitaki nei Joni me baleta na inaki ni Matabete i Eroni? Na veivakalougatataki cava eda sa ciqoma ena vuku ni Matabete i Eroni? Kevaka e tiko e dua na cauravou ena nomu vuvale, solia na gauna mo vukei koya me kila vakavinaka kina na sala e rawa ni vakayagataka kina na Matabete i Eroni me vakalougatataki ira kina na tamata. (Raica talega na Vunau kei na Veiyalayalati 13:1; 20:46–60.)

sa papitaisotaka tiko o cauravou e dua tale

Ni da sa papitaiso, na noda ivalavala ca e sa savai laivi.

Maciu 3:11 –17; Marika 1:9–11; Luke 3:21–22.E ratou sa raica beka na lewe ni nomu vuvale e dua me papitaiso se vakadeitaki me lewe ni Lotu? Na cava beka era a vakila na lewe ni matavuvale? Sa rawa mo vakavulica vei ira na ivakatakarakara ni papitaiso kei na veivakadeitaki. E tautauvata vakacava kei na sucu tale na noda papitaiso kei na vakadeitaki? Na cava na vuna eda sa tabadromuci vakataucoko kina ena wai ni da sa papitaiso? Na cava eda daramaka kina na vulavula ni da papitaiso? Na cava e dau vakamacalataki kina na isolisoli ni Yalo Tabu me “papitaiso ena bukawaqa”? (Vunau kei na Veiyalayalati 20:41; raica talega na Bible Dictionary, “Baptism,” “Holy Ghost”).

Maciu 3:17; Marika 1:11; Luke 3:22.Eda a vakila beka ena gauna cava ni sa marautaki keda tiko na Kalou? Na cava eda rawa ni vakayacora vakamatavuvale me da vakamarautaka kina na Kalou?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Jisu Ni a Papitaiso,” Nodra iVolanisere na Lalai, 54.

Vakatoroicaketaki ni Vuli ni Tamata Yadua

Kerea vua na Turaga me vukei iko. Na ivolanikalou era soli mai ena ivakatakila, ia me ra kilai sara vakavinaka eda gadreva na ivakatakila ki vei keda yadua. E yalataka na Turaga: “Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou” (Maciu 7:7).

Papitaisotaki Jisu tiko o Joni

Sa Papitaisotaki Jisu o Joni na Dauveipapitaisotaki, mai vei Greg K. Olsen