Vakavulici Ira na Gonelalai

Kevaka e tiko na gonelalai ena nomu vuvale, oqo eso na itaviqaravi ena rawa ni vukei ira me ra vuli:

• Vakarogoca se vakatasuasuataka e dua na italanoa. Era dau taleitaka na gonelalai sobu na itukuni—mai na ivolanikalou, mai na nomu bula, mai na itukutuku makawa ni Lotu, se mai na mekesini ni Lotu. Vakasaqara na sala me vakaitavitaki ira ena tukuni ni talanoa. E rawa ni ra taura tu na iyaloyalo se iyaya, droinitaka na iyaloyalo me baleta na veika era rogoca tiko, vakatasuasuataka na italanoa, se veivuke me talanoataki na italanoa. Vukei ira na luvemu me ra raica donu na dina vakosipeli ena italanoa o wasea.

• Vakaraica e dua na ivolanikalou. Era sega beka ni rawa ni wilivola vakalevu na gonelalai sobu, ia se rawa tikoga ni o vakaitavitaki ira ena vuli mai na ivolanikalou. Ena gadrevi beka mo vakanamata ena dua walega na tikina, malanivosa bibi, se vosa. Ena rawa sara mada ga me ra cavuqaqataka e dua na malanivosa lekaleka kevaka era na cavuta tikoga me dua na gauna. Ni ra rogoca na vosa ni Kalou, era na vakila na Yalo.

• Raica e dua na itaba se sarava e dua na vidio. Ni o vakaraitaka vei ira na luvemu e dua na itaba se iyaloyalo e veisemati kei na ivakavuvuli ni kosipeli se italanoa vakaivolanikalou, tarogi ira na taro ena vukei ira me ra vuli mai na veika era raica. Me ivakaraitaki, e rawa ni o taroga, “Na cava e yaco tiko ena itaba se vidio oqo? Na cava o a vakila?” Na Gospel Library app, Biblevideos.lds.org, medialibrary.lds.org, kei na children.lds.org eso na vanua vinaka mo raica kina na itaba kei na vidio.

• Lagata. Serenilotu kei na sere mai na Children’s Songbook e vakavulica vakaukauwa na ivakavuvuli. Vakayagataka na topics index ena dakuni Children’s Songbook me kunei kina na sere era veisemati kei na ivakavuvuli ni kosipeli o vakatavulica. Vukei ira na gone me ra semata na itukutuku ni sere ki na nodra bula. Me ivakaraitaki, e rawa ni o taroga na taro me baleta na vosa kei na malanivosa ena qaqanisere. Me ikuri ni lagasere, e rawa ni ra matanataka na luvemu na qaqanisere se vakarogoca na sere e vakatagi malua tu ni ra cakava tale tiko eso na itaviqaravi.

• Tauyavutaka. Era rawa ni bulia, droinitaka, se rokataka na ka e veisemati ki na italanoa se ivakavuvuli era vulica tiko.

• Vakaitavi ena lesoni vakainaki. E dua na lesoni vakainaki ena rawa ni vukei ira na gone me ra kila vinaka na ivakavuvuli ni kosipeli ena via dredre me ra kila. Ni vakayagataki tiko na lesoni vakainaki, vakasaqara na sala me rawa ni ra vakaitavi kina na gone. Ena levu cake na ka era vulica ni ra na vakaitavi tiko, mai na nodra sarava tikoga e dua ka matanataki tiko.

• Matanataka Ni ra matanataka na gone e dua na ituvaki e rawa ni ra sotava ena nodra bula, sa rawa me ra kila vakavinaka cake na iwalewale ena yaga kina ena nodra bula e dua na ivakavuvuli ni kosipeli.

• Tokaruataki na itaviqaravi. Ena gadrevi beka me ra rogoca vakavica vata na gone eso na ivakavuvuli me rawa ni ra kila vakavinaka. Kakua ni rere me tokaruataki na italanoa se itaviqaravi eso. Me ivakaraitaki, o na wasea e dua na italanoa ni ivolanikalou vakavica vata ena sala e duidui eso—wilika mai na ivolanikalou, vakasokumuna ena nomu vosa ga, vakaraitaka e dua na vidio, vakatara me ra vukei iko na luvemu mo talanoataka e dua na italanoa, ka sureti iko mo matanataka na italanoa, kei na veika tale eso.

  era vakavulici ira na gonelalai o ira na itubutubu.