“23–29 ni Tiseba. Ai Vakatakila 12–22: ‘O Koya sa Gumatua ena Rawata na Ka Kece ga Oqo’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“23–29 ni Tiseba. Ai Vakatakila 12–22,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Na Koro Tawamudu, maivei Keith Larson
23–29 ni Tiseba.
Ai Vakatakila 12–22.
“O Koya sa Gumatua ena Rawata na Ka Kece Ga Oqo”
Ni o wilika na Ai Vakatakila 12–22, vasaqara na veika e tautauvata na veika e raica o Joni kei na veika o raica ena vuravura oqo nikua. Vakasaqara na veidusimaki vakayalo me vukei iko mo kunea na lesoni e baleti iko ena nomu raica vakatitobu na vosa vakatautauvata nei Joni.
Vola na Veika o Vakauqeti Kina
Vakasamataka mada e dua na marama “ni sa bukete sa qoqolou, ni sa tatara me vakasucu.” Vakasamataka mada oqo “sa dua na gata levu ka damudamu, sa vitu na uluna ka tini na nonai leu sa toka e uluna” a sa tu e matai yalewa na gata levu ni sa vakarau me vakasucu, “ka me kania sara na luvena ni sa qai sucu mai” (Ai Vakatakila 12:2–4). Me da kila vinaka na veitikina oqo ni ivakatakila nei Joni, nanuma tiko na iyaloyalo eso oqo e matataka na Lotu kei na matanitu ni Kalou kei na dredre ena sotava. Vei ira na Yalododonu era sotava na veivakaduiduitaka levu ena gauna i Joni, na qaqa mai na vu ni ca e a rairai sega beka ni rawa. Na qaqa talega oqo ena rawa ni dredre ni laurai ena noda gauna oqo, ena gauna e “veivala kei ira na yalo savasava” ka “me rawai ira … na veimataqali kece, veimatanitu kei na duivosavosa” na meca (Ai Vakatakila 13:7). Ia na icavacava ni vakatakila nei Joni e vakaraitaka ni na qaqa na vinaka mai na ca. Ena rusa o Papiloni. Ena vakatulewa o Jisu Karisito me nodra Tui na Tui. “Ena tavoya tani kecega na wai ni mata,” o koya sa gumatua “ena rawata na ka kece oqo” (Ai Vakatakila 21:4, 7).
Vakasama eso ni Vuli iVolanikalou Yadua
Na iValu mai Lomalagi e tomani tiko oqo e vuravura.
Eda sega soti ni nanuma vinaka na iValu mai Lomalagi, ia e dua na kena ivakamacala lekaleka e tiko ena Ai Vakatakila 12:7–11. Ni o wilika na veitikina oqo, raitayaloyalotaki iko ni o tiko ena veivorati oya ena bula taumada. Na cava soti e vakatavulica na veitikina oqo me baleta na nomuni qaqa mai vei Setani o iko kei ira na luvena yalodina eso tale na Kalou? Na cava na ibalebale ni veika oqo ni vakatauvatani kei na noda rawa ni vorati vunica ena nona saga tiko ena noda gauna oqo me “ia na veivala [kei ira] sa vakabauta ka taura tikoga na itukutuku kei Jisu”? (tikina 17).
Raica talega na 1 Nifai 14:12–14; “War in Heaven,” iUlutaga ni Kosipeli, topics.lds.org; Bible Dictionary, “Michael,” “War in Heaven.”
Ocei na agilosi e raica o Joni ni vunautaka tiko na kosipeli?
E dua vei ira na parofisai ena veitikina oqo e yaco ena gauna a rairai mai o Moronai vei Josefa Simici ka qai liutaki koya kina itukutuku maroroi a qai vakadewataki ka tabaki me iVola i Momani. Na ivola oqo e tiko kina na “tukutuku vinaka ka sega ni oti rawa” ka sa noda itavi me da vunautaka yani ki na “veimatanitu, veimataqali, duivosavosa, kei ira na tamata” (Ai Vakatakila 14:6).
Sa sureti au na Turaga meu dro mai Papiloni kei na nona ivalavala ca.
Ai Vakatakila 17–18 e tiko kina nai yaloyalo veivakacalai ka vakamacalataka nai valavala ca, nai yau ni vuravura oqo, kei na veigagano ca i Papiloni—nai vakatakilakila ni vakavuravura kei nai valavala ca. Vakasamataka na ivakaraitaki ni veituvaki vaka-Papiloni sa tiko e vuravura ena gauna nikua, ka qai vakasamataka vakatitobu na veika o rawa ni cakava me vakamuria na ivakasala mo “lako tani mai” Papiloni ka “mo dou kua ni cala vata kaya” (Ai Vakatakila 18:4).
O ira kece na luveni Kalou era na lewai mai na ivola ni bula.
Vakasamataka mada ke a vinakata e dua na dauvola ivola me vola e dua na ivola me baleta nomu bula. Na itukutuku matailalai kei na veika o sotava cava so o vinakata me na volai kina? Kevaka o kila na veika o cakava ena nomu bula ena veisiga ni mataka ena volaitukutukutaki, na cava o na veisautaka ena iwalewale ni nomu bula? Vakasamataka tiko na veika oqo ni o wilika baleta na Siga ni Lewa ena Ai Vakatakila 20:12–15. Na cava o nuitaka me volai tu baleti iko ena ivola ni bula?
Raica talega na Bible Dictionary, “Book of life.”
Kevaka au sa yalodina, au na ciqoma na lagilagi vakaselesitieli.
Me vakatauvatani kina ivakamacala kei Papiloni, Ai Vakatakila 21–22 e vakamacalataka na lagilagi vakaselesitieli e waraki ira tu na dauvakamuri Karisito yalodina. Nai yaloyalo, malanivosa, se yalayala cava so ena veiwase oqo e vakauqeti iko mo yalodina tikoga ena veigauna dredre?
E kena ibalebale beka na tikina oqo ni sega ni rawa ni vakuri tale na ivolanikalou mai na iVola Tabu ga?
Eso era sa cavuta na Ai Vakatakila 22:18–19 me iulubale mera kua ni ciqoma kina na iVola i Momani kei na ivolanikalou ni gauna oqo. Ia, o Elder Jeffrey R. Holland e vakatavulica:
“Esa tiko oqo e dua na iwiliwili vakaitamera ena monalivaliva ni kenadau vakaivolatabu era sa vakamacalataka tiko ni tikina oqo e veidonui ga kina vosa ni Ai Vakatakila, ka sega ni Vola Tabu taucoko. O ira na kenadau vakaivolatabu ni noda gauna era sa duavata ni eso na ‘ivola’ ena Veiyalayalati Vou era a volai ni oti na raivotu nei Joni e a ciqomi ena yanuyanu o Patemo. …
“Ia e tiko e dua na ivakamacala rawarawa. … Na iVola Tabu taucoko me vaka eda kila—e dua na isoqoni ni vola era vauci vata ena dua na ivau—era se bera ni volai ena gauna e volai kina na tikina oqori” (“My Words … Never Cease,” Ensign se Liaona, Me 2008, 91).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Eso na lewe ni matavuvale era na marautaka ka rawaka mai na kena droinitaki eso na iyaloyalo ka vakamacalataki me baleta na raivotu ena Ai Vakatakila. Me ivakaraitaki, droinitaka e dua na iyaloyalo me baleta na Ai Vakatakila 12 ena rawa ni veimuataki ki na veivosakitaki me baleta na iValu mai Lomalagi (raica na tikina 7–11). Na iyaloyalo me baleta na Ai Vakatakila 21 ena rawa ni vakauqeta na veitalanoa me baleta na matanitu vakaselesitieli. Ena rawa talega ni o vakaraitaka na iyaloyalo e salavata mai na idusidusi oqo ka qai tarogi ira na leweni matavuvale me ra vakasaqara na Ai Vakatakila 19 e vakaraitaka tiko na iyaloyalo.
Na cava e rawa ni ibalebale ni malanivosa “na vuku ni vosa era sa tusanaka”? E vukei keda vakacava na noda ivakadinadina me baleti Jisu Karisito meda vorati Setani?
Na cava na nodratou nanuma na nomu vuvale me baleta na manumanu dau veivakacalai? Eda rawa ni kidava se levea vakacava na veivakacalai ni vuravura oqo nikua?
E vukei keda vakacava na 1 Nifai 22:26; Vunau kei na Veiyalayalati 43:30–31 meda kila vakavinaka na ibalebale ni sa “vesuki” o Setani?
Na cava beka na ibalebale vakaivakatakilakila me “volai e yadre[da]” na yacana na iVakabula? (Ai Vakatakila 22:4; raica talega na Ai Vakatakila 13:16–17).
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Vakamuria na veisureti me caka. “Ni ko sa vakamuria na veisureti mera laki cakacakataka, ko sa vakaraitaka vei ira na [lewe ni nomu vuvale] ni ko kauwai ena vuku ni sa vakalougatataki ira tiko na kosipeli. Ko sa solia tale tikoga vei ira na madigi mera wasea na veika era sa sotava, ka sa vaqaqacotaka na nodra yalodina ka solia vei ira na veitokoni vakai ira ena bulataki ni kosipeli” (Veivakavulici ena iVakarau ni iVakabula, 35).
E vakaisulu damudamu tu o Karisito ka dabe toka ena dua na ose vulavula.