“Disyembre 16–22. Pasko: ‘Maayong Balita sa Dakong Kalipay’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)

“Disyembre 16–22. Pasko,” Dali, Sunod Kanako—Alang sa mga Indibidwal ug mga Pamilya: 2019

Imahe

batang Jesus sa pasungan

Luwas diha sa Kwadra, ni Dan Burr

Disyembre 16–22

Pasko

“Maayong Balita sa Dakong Kalipay”

Alang sa uban, ang Pasko usa ka busy nga panahon. Ikonsiderar sa unsa nga paagi nga ang imong pagtuon sa Bag-ong Tugon makatabang sa diwa sa kalinaw ug kasagrado sa imong kinabuhi. Palandunga ang impluwensya sa pagkahimugso ug misyon sa Manluluwas sa imong kinabuhi, ug irekord ang bisan unsa nga espirituhanon nga mga impresyon nga moabut.

Irekord ang Imong mga Impresyon

Ngano nga ang pagkahimugso sa usa ka batang masuso makahatag og dakong kalipay? Tingali tungod kay ang bag-ong batang masuso mahimong simbolo sa paglaum. Adunay butang mahitungod sa bag-ong kinabuhi nga puno sa mga posibilidad nga nagdapit nato sa pagpamalandong unsa ang umaabut sa kinabuhi niana nga bata ug unsang talagsaong mga butang ang iyang matuman. Wala pa gayud sukad ang mas natinuod kay sa pagkahimugso sa Anak sa Dios, nga si Jesukristo. Wala pa gayud sukad nga mas dunay paglaum nga anaa sa usa ka bata, ug wala pa gayud sukad nga natawo uban sa daghan kaayo nga saad.

Sa dihang ang anghel midapit sa mga magbalantay sa karnero sa pagpangita sa bag-ong natawo nga bata diha sa usa ka pasungan, mihatag usab siya kanila og mensahe mahitungod niana nga bata. Usa kadto ka mensahe sa paglaum—nga kini nga bata mianhi sa yuta aron sa pagtuman sa usa ka sagrado nga misyon. Ang mga magbalantay sa karnero mipahibalo sa ilang mensahe “gipanugilon … ug ang tanan nakadungog niini nahibulong sa gisulti kanila sa mga magbalantay sa karnero. “Kining tanang mga butanga gitipigan ni Maria nga namalandong niini diha sa iyang kasingkasing” (Lucas 2:17–19). Tingali maayo nga mosunod sa ehemplo ni Maria niining Pasko: sa pagpamalandong diha sa imong kasingkasing sa mga butang nga imong nakat-unan mahitungod sa Manluluwas niining tuiga. Giunsa Niya pagtuman ang Iyang misyon sa katubsanan diha sa mga istorya nga imong nabasa? Ug ang mas importante, sa unsa nga paagi nga ang Iyang misyon nakausab sa imong kinabuhi?

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 1:18–25; 2:1–12; Lucas 1:26–38; 2:1–20

Si Jesukristo mikunsad aron matawo taliwala kanato dinhi sa yuta.

Bisan kon ikaw nakabasa o nakadungog sa istorya sa pagkahimugso ni Jesukristo daghang higayon na kaniadto, pagtuon niini karon uban niini sa hunahuna: “Ang Pasko dili lamang usa ka pagsaulog sa unsa nga paagi si Jesus mianhi sa kalibutan apan usab sa pagkasayud kinsa Siya—ang atong Ginoo ug Manluluwas, si Jesukristo—ug ngano nga miabut Siya” (Craig C. Christensen, “Ang Kompleto nga Istorya sa Pasko” [Debosyonal sa Pasko sa Unang Kapangulohan, Dis. 4, 2016], broadcasts.lds.org).

Unsay atong nahibaloan mahitungod kinsa si Jesukristo sa wala pa Siya matawo? (pananglitan, tan-awa sa, Juan 17:5; Mosiah 3:5; DP 76:13–14, 20–24; Moises 4:2). Sa unsa nga paagi kini nga kahibalo nakaapekto sa paagi sa imong gibati sa dihang imong nabasahan ang mahitungod sa Iyang pagkahimugso?

Unsay imong nahibaloan ngano nga si Jesukristo mianhi sa yuta? (pananglitan, tan-awa sa, Lucas 4:16–21; Juan 3:16–17; 3 Nephi 27:13–16; DP 20:20–28). Sa unsa nga paagi kini nga kahibalo nakaapekto sa imong pagbati mahitungod sa Manluluwas? Sa unsa nga paagi kini nakaapekto sa imong pagpakabuhi?

Tan-awa usab sa 2 Mga Taga-Corinto 8:9; Mga Hebreohanon 2:7–18; 1 Nephi 11:13–33; Alma 7:10–13; “The Nativity” (video, LDS.org).

1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25

Gituman ni Jesukristo ang Iyang misyon ug nakahimo nga posible nako nga makapanunod sa kinabuhing dayon.

Bisan og ang istorya sa pagkahimugso ni Kristo gilibutan og milagroso nga mga hitabo, ang Iyang pagkahimugso usa lang sa laing pagkahimugso kon dili pa tungod sa importante nga buhat nga Iyang natuman sa ulahing bahin sa Iyang kinabuhi. Sama sa gisulti ni Presidente Gordon B. Hinckley, “Ang masuso nga si Jesus sa Betlehem usa lang sa laing masuso kon wala ang matubsanong Kristo sa Getsemani ug Kalbaryo, ug ang madaugong kamatuoran sa Pagkabanhaw” (“The Wondrous and True Story of Christmas,” Ensign, Dis. 2000, 5).

Ebidensya sa balaang misyon sa Manluluwas ug sa Iyang gamhanang gugma alang sa uban makita sa tibuok Bag-ong Tugon. Unsa nga mga tudling o mga istorya ang moabut sa imong hunahuna? Mahimo nimong tan-awon pag-usab kini nga kapanguhaan o sa imong journal sa pagtuon ug ribyuhon ang pipila sa mga impresyon nga imong narekord. Mahimo usab nga imong basahon ang 1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25 ug mamalandong sa unsa nga paagi ang Manluluwas ug ang Iyang buhat nakapanalangin sa imong kinabuhi. Unsay imong gibati nga nadasig nga usbon sa imong kinabuhi? Unsaon nimo nga makagamit sa gahum sa Manluluwas?

Imahe

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

Mateo 1:18–25; 2:1–12; Lucas 1:26–38; 2:1–20

Unsaon nimo sa pagsaulog ang pagkahimugso ni Jesukristo uban sa imong pamilya? Ania ang pipila ka ideya, o ikaw makahimo og imong kaugalingon:

Basaha o i-drama ang mga bahin sa istorya sa Pagkatawo.
Suhira ang pipila sa mga kapanguhaan sa christmas.mormon.org; jesuschrist.lds.org; o sa “Christmas,” Gospel Topics, topics.lds.org.
Tan-awa ang Debosyonal sa Pasko sa Unang Kapangulohan (broadcasts.lds.org;).
Panganta og mga himno sa Pasko, o pagpili og mga silingan o mga higala nga bisitahan ug kantahan sila (tan-awa sa Hymns, nos. 201–14).
Paghimo og buhat sa pagserbisyo.
Hangyoa ang mga sakop sa pamilya sa pagpangita sa mga detalye sa istorya sa Pagkatawo nga makahatag nila og mga ideya alang sa dayan-dayan o mga dekorasyon nga ilang mahimo aron mopahinumdom nila ni Jesukristo.

1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25

Ngano nga kita mapasalamaton nga natawo si Jesukristo? Unsa nga mga gasa ang Iyang gihatag nato? Unsaon nato pagpakita Niya sa atong pasalamat?

“Ang Buhi nga Kristo: Ang Pagpamatuod sa mga Apostoles”

Kon gusto nimong motabang sa imong pamilya nga motutok sa Manluluwas panahon sa Pasko, tingali kamo makagahin og panahon sa pagbasa ug pagtuon sa “Ang Buhi nga Kristo: Ang Pagpamatuod sa mga Apostoles” (Liahona, Mayo 2017, luyo sa atubangan nga hapin). Tingali makasag-ulo ka og mga tudling gikan sa “Ang Buhi nga Kristo” o mangita og mga deskripsyon sa kinabuhi sa Manluluwas diha sa Bag-ong Tugon nga nagsuporta sa mga pamahayag niini. Mahimo usab nga imong dapiton ang matag sakop sa pamilya sa pagsulat sa iyang kaugalingong pagpamatuod ni Jesukristo ug, kon naaghat, mobasa niini ngadto sa pamilya.

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pangitaa si Jesukristo. Ang mga kasulatan nagtudlo nato nga ang tanang mga butang nagpamatuod ni Jesukristo (tan-awa sa Moises 6:62–63), aron kita motan-aw Kaniya sa tanang mga butang. Samtang ikaw magbasa sa mga kasulatan, ikonsiderar ang pagtimaan o pagmarka sa mga bersikulo nga nagtudlo kanimo mahitungod Kaniya. Paggahin og panahon sa mga adlaw nga nagsingabut ang Pasko sa pagpangita sa mga butang sa imong palibut nga nagpamatuod ni Jesukristo.