“11--17 Mati Mataio 10–12; Mareko 2; Luka 7; 11: ‘O Le Toasefulu Ma Le Toalua Lenei na Auina Atu e Iesu’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“11--17 Mati Mataio 10–12; Mareko 2; Luka 7; 11,” Sau, Mulimuli Mai ia te Au—Mo Tagata Taitoatasi ma Aiga: 2019
11--17 Mati
Mataio 10–12; Mareko 2; Luka 7; 11
“O Le Toasefulu Ma Le Toalua Lenei na Auina Atu e Iesu”
A o e faitauina le Mataio 10–12; Mareko 2; ma le Luka 7; 11, tusitusi i lalo lagona uunai na e maua mai le Agaga Paia. Mafaufau e manatunatu loloto ma tusifaamaumau.
Tusifaamaumau Ou Lagona Uunai
Sa vave ona salalau le tala o vavega o faamalologa a Iesu. Sa mulimuli atu le motu o tagata ia te Ia, ma le faamoemoe mo se mapusaga mai o latou ma’i. Ae ina ua silasila atu le Faaola i le motu o tagata, sa sili atu isi mea sa ia silasila i ai nai lo na o o latou ma’i faaletino. I le faatumulia ai i le alofa, sa Ia silasila atu i “mamoe ua leai so latou leoleo” (Mataio 9:36). “E tele le saito e seleseleina, a o le au fai galuega e toaitiiti ia” (Mataio 9:37) O lea na ia valaauina ai Aposetolo e toasefululua, “ma avatu ia te i latou le mana,” ma auina atu i latou e aoao atu ma auauna atu “i mamoe o le aiga o Isaraelu ua le iloa” (Mataio 10:1, 6). O le taimi nei ua faapena foi ona tele le manaomia o le au faigaluega e auauna atu i fanau a le Tama Faalelagi. O loo i ai lava Aposetolo e toasefululua, ae ua toatele atu soo o Iesu Keriso nai lo le taimi muamua---o tagata o e ua mafai ona tautino atu i le lalolagi uma, “Ua latalata mai le malo o le lagi” (Mataio 10:7).
Manatu mo Suesuega Faaletagata Lava Ia
E tuuina atu e le Alii i Ana auauna le mana e fai ai Lana galuega.
O le faatonuga na tuu mai e Iesu i le Mataio 10 o le faatonuga i Ana Aposetolo, ae e tofu i tatou uma ma se vaega i le galuega a le Alii. O le a le mana na tuu atu e Keriso i Ana Aposetolo e fesoasoani latou te faataunuu ai la latou misiona? E mafai faapefea ona e maua Lona mana i le galuega na tofia oe e fai? (tagai 2 Korinito 6:1–10; MFF 121:34–46).
O loo faatino e Aposetolo e Toasefululua le galuega a le Alii i le taimi nei.
A o e faitauina le poloaiga na tuu atu e Keriso i Ana Aposetolo, e te ono maua ni lagona uunai e uiga i le glauega e finagalo le Alii e te faia. E mafai ona fesoasoani se siata e pei o lea e te faatulagaina ai ou mafaufauga.
|
O lagona uunai ua ou mauaina | |
|---|---|
|
Na tuu atu e le Faaola i Ona soo le mana. | O lagona uunai ua ou mauaina O le a tuu mai e le Atua ia te au le mana ou te moomia e fai ai la’u galuega. |
O lagona uunai ua ou mauaina |
Tagai foi Mataupu Faavae o le Faatuatua 1:6; Bible Dictionary, “Apostle”; “Jesus Calls Twelve Apostles to Preach and Bless Others” (video, LDS.org).
Pe a ou i ai i le galuega a le Alii, o le a Ia musuia a’u i mea ou te tautala atu ai.
Na muai silafia e le Alii o le a sauaina Ona soo ma fesiligia lo latou faatuatua---se mea e pei o mea e ono oo i ai soo o aso nei. Ae na Ia folafola atu i Ona soo o le a latou iloa i le Agaga le mea latou te fai atu ai. Pe ua i ai sou aafiaga ina ua faataunuuina lenei folafolaga paia i lou olaga, atonu ina ua e tuuina atu lau molimau, tuu atu se faamanuiaga, pe fai se talanoaga ma se tasi? Mafaufau e faasoa atu i se e pele ia te oe ou aafiaga pe tusia foi i se tusi talaaga.
Tagai foi Luka 12:11–12; Mataupu Faavae ma Feagaiga 84:85.
O le a le uiga o le fetalaiga a Iesu “Ou te lei sau e avatu le filemu, a o le pelu”?
Na aoao mai Elder D. Todd Christofferson: “Ou te mautinoa o le toatele o outou ua teena ma tuliese e le tama ma le tina, uso ma tuafafine, a o e taliaina le talalelei a Iesu Keriso ma ulu atu i Ana feagaiga. I se auala se tasi po o le isi, e manaomia e lou alofa sili i le Keriso le ositaulaga o sootaga sa pele ia te oe, ma na maligi ou loimata e tele. Ae faatasi ai ma lou lava alofa e le faaitiitia, e te tumau mautu i lalo o le satauro, ma faaalia ia te oe lava le le maasiasi i le Alo o le Atua” (“Mauaina o Lou Ola,” Ensign, Mar. 2016, 28).
O lea naunautai e lafoai sootaga faapelepele ina ia mulimuli i le Faaola e oo mai ma se folafolaga faapea “o le faamaumau i lona ola ona o a’u, e maua e ia” (Mataio 10:39).
O le a aumai e Iesu Keriso ia te au le malologa pe a ou faalagolago ia te Ia ma Lana Togiola.
Tatou te tauaveina uma lava avega---o nisi e afua mai ia tatou lava agasala ma mea sese, o nisi e mafua i filifiliga a isi, ma o nisi e le ona o se isi ae ua na o se vaega lava o le olaga i le lalolagi. Tusa lava po o a mafuaaga o mea o tatou tauivi ai, ua augani mai Iesu ia te i tatou e o mai ia te Ia ina ia mafai ai ona Ia fesoasoani ia te i tatou e tauave a tatou avega ma maua ai se mapusaga (tagai foi Mosaea 24). Na aoao mai Elder David A. Bednar, “O le osia ma le tausia o feagaiga paia e tuufaatasia ai i tatou ma le Alii o Iesu Keriso” (“Tauave ma le Faigofie a Latou Avega,” Ensign po o le Liahona, May 2014, 88). I le i ai o lea mea i le mafaufau, manatunatu loloto i fesili e pei o lea ina ia malamalama atili ai i upu a le Faaola o i nei fuaiupu: “O faapefea e a’u feagaiga ona feso’ota’i ai a’u i le Faaola?” “O le a le mea e tatau ona ou faia ou te sau ai ia Keriso?” po o “o le a le itu e avegofie ai le amo a le Faaola ma mama Lana avega?”
O a isi fesili e oo mai i lou mafaufau a o e faitau? Tusifaamaumau ma saili mo tali i le vaiaso lenei i tusitusiga paia ma upu a perofeta. E mafai ona e maua tali i nisi o fesili i le savali a Elder David A. Bednar o loo ta’ua i luga.
Talu ai ua faamagaloina a’u agasala, o lea ua loloto ai lo’u alofa mo le Faaola.
Pe o e vaai ia te oe lava i le tala o i nei fuaiupu e uiga i le Faaola o asiasi atu ia Simona le Faresaio? Pe i ai se taimi e te pei ai o Simona? O le a se mea e mafai ona e fai ia mulimuli ai i le faataitaiga a le fafine na faaalia le lotomaualalo ma le alofa ia Iesu Keriso? O anafea na e iloa ai le alofamutimutivale lea na faaalia e le Faaola i le fafine? O le a se mea ua e aoao mai i nei fuaiupu e uiga i le ala e faamalosia ai lo tatou alolofa mo le Faaola pe a tatou magalo?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia mau, e mafai e le Agaga ona fesoasoani ia te oe e iloa ai po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:
A o tatou mafaufau i savali aupito lata mai o le konafesi aoao, o le tulaga o i ai lo tatou aiga i le mauaina ma le mulimuli i fautuaga a Aposetolo o onapo nei? O faapefea ona faalatalata atili mai i tatou ia Iesu Keriso ona o lo tatou usiusitai?
E mafai ona e fesoasoani i lou aiga e vaai faalemafaufau i aoaoga a le Faaola o i nei fuaiupu i le feauauai lea e taumafai e toso se mea mamafa, muamua e i latou lava fesoasoani lea o nisi e toso. O a ni nai avega o tatou tauaveina? O le a le uiga o le tauaveina o le amo a Keriso i o tatou luga? O le ata o loo avatu faatasi ma lenei otootoga e mafai ona fesoasoani ia te oe e faamalamalama ai le amo.
E mafai faapefea ona tatou “agalelei” i le aso Sapati? (Mataio 12:12). E mafai faapefea e le Faaola ona faamalolo i tatou i le Sapati?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava Ia
Faalogo i le Agaga. A o e suesue, mataitu ou mafaufauga ma lagona (tagai MFF 8:2--3), tusa lava pe foliga mai e le faia i mea o loo e faitauina. O na lagona uunai atonu o mea tonu lava na e finagalo le Atua ia e iloa ma faia.
Na fetalai mai le Faaola,“Ia outou amoina la’u amo” (Mataio 11:29).
O Katelani ma le Uluai Malumalu, saunia e Dan Burr