Tijem̧ba 13–19

Baam̧le Eo: Juon Naan in Kean̄ n̄an Laļ in

“Baam̧le eo ej Dilepen Karōk eo an Rikõmanman”

Būreejtōn Dallin H. Oaks ekar ba: “Ij tōmak m̧wil eo ad n̄an im kōjerbal kean̄ eo an baam̧le ej [juon idajon̄jon̄] ko n̄an epepen in. Ij jar bwe aolep Armej ro Rekwojarjar ilo Raan ko Āliktata n̄an jutak pen ilo idajon̄jon̄ in” (“Karōk eo im Kean̄ eo,” Ensign ak Liaona, Nob. 2017, 31). Kejōkļo̧kjeņ kōn naan kein ilo am̧ katak kean̄ eo an baam̧le ilo wiik in.

Je En̄jake ko Rej Im̧we Eok

M̧okta jān ad kar ļotak tok n̄an laļ in, jekar uwaan juon baam̧le—baam̧le eo an Jemed im Jined Ilan̄. Ke ekar iien ad em̧akūt jān im̧aan Mejāer, ekar ļap kaeņōm̧m̧an ilo ad jeļā bwe ilo laļ in, baam̧le ko renaaj bar m̧ōttan wōt karōk eo an Anij. Jon̄ak eo ilo laļ in ej n̄an ļoor jon̄ak eo ejjejōt ilo lan̄.

Ejjab meļeļein bwe baam̧le ko ilo laļ in renaaj wānōk ak jejjet ilo kōm̧m̧ani eddo ko aer. Ak āinwōt an Būreejtōn Henry B. Eyring kar katakin, baam̧le ko “rej karuwaineneik ajri ro nejin Anij n̄an laļ in kōn iakwe eo me ej āinwōt iakwe eo jaar en̄jake ilo lan̄—iakwe an ro jined im jemād” (“Kakobaik Baam̧le eo an Anij,” Ensign ak Liaona, Māe 2017, 20). Jeļā bwe baam̧ļe rejjab wānōk im epidodo an rinana eo kakkure, Anij ekar jilkintok Nejin Emake Wōt n̄an lo̧mo̧o̧ren kōj im kōmour baam̧le ko ad. Im E ekar jilkintok rikanaan ro kōn juon naan in kean̄ n̄an jojomar im kōkajoorļo̧k baam̧le ko. Eļan̄n̄e jej ļo̧o̧r rikanaan ro im ad im likūt tōmak ilo Rilo̧mo̧o̧r, men̄e baam̧le ko ad ilo mour in rej likjab ilo wānōk ekwojarjar, ewōr kōjatdikdik kōn baam̧ļe ko—ilo laļ in im ilo lan̄.

Ļōmņak ko n̄an Ekkatak Jeje Ko Rekwojarjar Ippam̧ Make

“Baam̧le eo ej Dilepen Karōk eo an Rikōmanman.”

“Baam̧le Eo: Juon Naan in Kean̄ n̄an Laļ in” ealikkar kōn baam̧le ko. Ak ej jon̄an wōt juon ilo karōk in lo̧mo̧o̧r eo an Anij. Juon wāween n̄an katak kōn naan in kean̄ eo ej n̄an kappukot ta ko me rej katakin kōn mour eo m̧okta, mour in, im mour eo ālkin mour in. Ta eo kwoj ekkatak n̄e kwoj katak naan in kean̄ eo ilo wāween in? Ekōjkan an menin jipan̄ eok meļeļe unin an m̧are im baam̧le lukkuun aorōk n̄an karōk eo an Anij?

Barāinwōt lale Dallin H. Oaks, “Karōk eo im Kean̄ eo,” Ensign ak Liaona, Nob. 2017, 28–31.

“M̧ōņōņō ilo mour in baam̧le ej maron̄ tōprak eļan̄n̄e ej pedped wōt ioon katakin an Irooj Jisōs Kraist.”

Ļōmņak kōn pārokūrāāp jiljino im jiljilimjuon ilo juon naan in kean̄ eo an baam̧le eo āinwōt juon jon̄ak n̄an “m̧ōņōņō ilo mour in baam̧le.” Ilo am̧ riit pārokūrāāp kein, pukot pedped in katak ko an “m̧are ko repen aer rub im baam̧le ko.” Innem ļōmņak kōn juon jem̧jera an baam̧le me kwokōņaan kōkajoorļo̧ke. Ta eo kwoj en̄jake ekar im̧we eok n̄an kōm̧m̧ane? Ewi wāween am̧ bōk jipan̄ an Rilo̧mo̧o̧r ilo kijejeto ko am̧?

Barāinwōt lale Richard J. Maynes, “Establishing a Christ-Centered Home,” Ensign ak Liaona, Māe 2011, 37–39; “What Matters Most,” video, ChurchofJesusChrist.org.

N̄a “naaj ņa ruō im̧aan mejān Anij” kōn wāween aō kōm̧m̧an n̄an baam̧le eo aō.

Kean̄ an Baam̧le ekoba kōjeraam̧m̧an ko rekwabwūlōn̄lōn̄ me Jemedwōj Ilan̄ ej kallim̧ur kaki n̄an ro me rej ļoor kapilōk eo An. Ej barāinwōt koba kakkōl ko rekajoor n̄an ro me rejjab ļoor kapilōk in. Ļōmņak n̄an kōm̧m̧ane juon laajrak in kōjeraam̧m̧an im kakkōl ko kwoj loi.

Ejet am̧ mour ekkar n̄an kapilōk eo an Anij me ej pād ilo naan in kean̄ eo? Eļan̄n̄e kwoj jutak im̧aan mejān Anij rainin, ta eo kwonaaj peran ilo kōnono kake Ippān kōn jem̧jerā eo an baam̧le eo am̧? Ta eo kwonaaj aikuj kōkm̧anm̧anļo̧k?

Barāinwōt lale Alma 5:15–22; Katak im Bujen Ko 42:22–25; 93:39–44.

Pāāren ro rej aikuj karūttoikļo̧k ajri ro nejier ilo iakwe im jim̧we.

Imaron̄ ke bōk kōjeraam̧m̧an ko kar kallim̧ur kaki eļan̄n̄e jekjek eo an baam̧le eo aō rej pād ie ejjab lukkuun wānōk?

Elder D. Todd Christofferson ekar katakin: “N̄an kwaļo̧k m̧ool ko raorōk kōn m̧are im baam̧le ejjab n̄an jab mijōk ak kadikļo̧k wujilepļo̧k im lo aenōm̧m̧an ñan ro me jekjek eo em̧m̧an ejjañin de m̧ool. … Elōn̄ an aolep menin letok ko; elōn̄ an aolep kapeel ko; aolep remaron̄ jipan̄ n̄an kajeded karōk kwojarjar eo ilo kajjojo epepen. Eļap ijo em̧m̧an, eļap ijo emenin aikuj—em̧ool jet iien aolep men emenin aikuj n̄an kiiō—maron̄ tōpari ilo jekjek ko me rejjab kanooj em̧m̧an. … Kōn lōke kōmij kam̧ool bwe Pinmuur eo an Jisōs Kraist ej kōtmene im, ilo jem̧ļo̧k in, jenaaj ņa wōņāān aolep karmejete im jerwaan n̄an ro me rej oktakļo̧k n̄an E. Ejjeļo̧k juon ej jitōn̄e n̄an bōk edikļo̧k jān aolep men Jemān ewōr ippān n̄an ro Nejin.” (“Etke Jej M̧are, Etke Jej Baam̧le,” Ensign ak Liaona, Māe 2015, 52).

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

“Oktak in ānbwinnid jān doon ej juōn jōkjōk eo eaorōk n̄an kwaļo̧k kadkadin kajjojo ilo mour eo m̧okta im kadkadin kajjojo ilo mour in im kadkad eo ejjeļo̧k jemļo̧kin im unleplep in.”Eļan̄n̄e enaaj lukkuun ļap an jipan̄ baam̧le eo am̧ n̄an kōmeļeļeik katak eo me ej iookļo̧k gender im same-sex attraction: Dallin H. Oaks, “M̧ool im Karōk eo,” Ensign or Liahona, Nov. 2018, 25–28; Gospel Topics, “Same-Sex Attraction,” topics.ChurchofJesusChrist.org.

“Karōk in m̧ōņōņō eo ekwojarjar.”N̄an jipan̄ baam̧le eo am̧ lo aorōkin baam̧le ko ilo karōk eo an Jemedwōj Ilan̄, kwomaron̄ je mour eo m̧okta, mour in, im mour eo ālkin mej ilo jilu jekjen ko ilo juon peba. Etale kean̄ eo ippān doon, im je ilo juon pepa ta eo kwoj ekkatak kōn kajjojo m̧ōttan kein ilo karōk eo an Anij. Etke baam̧le ko reaorōk ippān Anij?

“Baam̧le ko [remaron̄] ippān doon n̄an indeeo.”Kwomaron̄ alooje bitio in “Plan of Salvation—We’re Still a Family” (ChurchofJesusChrist.org). Lale kean̄ an baam̧le n̄an pukot m̧ool ko me likao eo ilo bitio eo emeļeļe im ekar jipan̄ e bwe en wōr an tōmak.

“M̧ōņōņō ilo mour in baam̧le.”N̄an kōmeļeļeik wāween en̄jake eļap, “m̧ōņōņō ilo mour in baam̧le eo [am̧],” kom̧ maron̄ al ippān doon juon al kōn baam̧le ko “Home Can Be a Heaven on Earth” (Hymns, no. 298). Ta eo jej ekkatak jān al eo im jān kean̄ an baam̧le me enaaj boktok eļap m̧ōņōņō n̄an baam̧le eo am̧? Ekōjkan ad lale bwe baam̧le eo ad ej “pedped wōt ioon katak ko an Irooj Jisōs Kraist”? Ļōmņak n̄an kālet juon katak kwokōņaan n̄an mour kake ilo wiik in.

“Kōkajoorļo̧k Baam̧le eo āinwōt pedped in ekkal eo an juon jukjuk in pād.”Ekōjkan an Setan kajjieon̄ kōm̧ōjņoikļo̧k baam̧le ko ilo laļ in? Ekōjkan ad maron̄ kōm̧m̧ane ijo koņaad n̄an kōkajoorļo̧k baam̧le ko? N̄an ļōmņak ko, lale enaan eo an Sister Bonnie L. Oscarson “Rijojomar ro an Naan in Kean̄ eo an Baam̧le” (Ensign ak Liaona, Māe 2015, 14–17).

N̄an ļōmņak ko reļļapļo̧k n̄an katakin ajri ro, lale laajrak in katak eo an wiik in ilo Itok, Ļoor Eō—N̄an Būraimere.

Al eo kar elmakote: “Home Can Be a Heaven on Earth,” Hymns, nō. 298.

Kōkm̧anm̧anļo̧k Am̧ Ekkatak Ippam̧ Make

Pukot iakwe eo an Anij. Būreejtōn M. Russell Ballard eaar katakin, “Gospel [eo] ej juon gospel in iakwe—iakwe n̄an Anij im iakwe n̄an doon” (“God’s Love for His Children,” Ensign, May 1988, 59). Ilo am̧ riiti kean̄ an Baam̧le, ļōm̧ņāk in je ak kōkaļļeiki kam̧ool ko kōn iakwe eo an Anij me eļap meļeļeier n̄an kwe.