“Panangusar iti Umaykayo, Sumurot Kaniak—Para kadagiti Indibidual ken Pamilia,” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Panangusar iti Umaykayo, Sumurot Kaniak—Para kadagiti Indibidual ken Pamilia,” Umaykayo, Sumurot Kaniak—Para kadagiti Indibidual ken Pamilia: 2020
Panangusar iti Umaykayo, Sumurot Kaniak—Para kadagiti Indibidual ken Pamilia
Para iti Siasino Daytoy a Resource?
Daytoy a resource ket para iti tunggal indibidual ken pamilia iti Simbaan. Naisangrat daytoy a mangtulong kenka nga agsursuro iti ebanghelio—iti bukodmo man wenno kaduam ti pamiliam. No saan a masansan ti panagadalmo iti ebanghelio iti napalabas, daytoy a resource ket matulongannaka a mangirugi. No addaankan iti nasayaat nga ugali nga agadal iti ebanghelio, daytoy a resource ket makatulong kenka a maaddaan iti ad-adu pa a napapatega padas.
Kasano ti Nasken a Panangusarko iti Daytoy a Resource?
Usarem daytoy a resource iti ania man a wagas a makatulong kenka. Mabalin a masarakam daytoy a makatulong a kas pangiwanwan wenno tulong para iti bukod ken sangapamiliaan a panagadal iti nasantuan a kasuratan. Mabalinmo pay nga usaren daytoy para iti family home evening. Dagiti balabala ket mangitampok kadagiti pagbatayan a masarakan iti Libro ni Mormon, mangisingasing kadagiti kapanunotan iti panagadal ken aktibidad para kadagiti indibidual ken pamilia, ken mangted kadagiti lugar a pangisuratam kadagiti impresionmo.
Mabalin a sika ken ti pamiliam ket masansan nga agad-adalen iti ebanghelio. Kas pagarigan, nalabit nga agbasbasaka iti sabali pay a libro ti nasantuan a kasuratan malaksid iti Libro ni Mormon para iti klase ti seminary wenno institute. Umaykayo, Sumurot Kaniak—Para kadagiti Indibidual ken Pamilia ket saan a nairanta a mangsukat wenno makikompetensia kadagiti naimbag a banag nga ar-aramidem. Mabalin nga adda dagiti wagas a kanayon a masursuruan manipud iti Libro ni Mormon ken maipatungpalmo latta dagiti dadduma pay a panggepmo a tun-oyen nga agadal iti dadduma pay a nasantuan a kasuratan. Kas pagarigan, mabalinmo ti agbasa iti maysa a libro ti nasantuan a kasuratan para iti bukodmo a panagadal ken panagbasa iti Libro ni Mormon a kaduam ti pamiliam (wenno vice versa). Surotem ti pannarabay ti Espiritu a mangikeddeng no kasano ti pamay-am iti bukodmo a panagadal iti balikas ti Dios.
Kasano a Mainaig Daytoy a Resource iti no Ania ti Mapasamak iti Simbaan?
Naurnos dagiti balabala iti daytoy a resource a mayannurot iti linawas nga iskediul iti panagbasa. Umaykayo, Sumurot Kaniak—Para iti Primary ken Umaykayo, Sumurot Kaniak—Para iti Sunday School suroten ti isu met laeng nga iskediul. Tapno masuportaran dagiti panagkagumaanmo nga agsursuro ken agbiag iti ebanghelio iti pagtaengan, mangtedto kenka dagiti mannursurom kadagiti gundaway a pangibinglayam kadagiti padasmo, kapanunotan, ken dagiti saludsodmo maipapan kadagiti binatog iti nasantuan a kasuratan nga ad-adalem iti pagtaengan.
Agsipud ta maisuro iti mamindua laeng iti makabulan ti Sunday School, mabalin a pilien dagiti mannursuro iti Sunday School ti manglabtaw wenno mamagtitipon kadagiti balabala tapno kumamakam iti linawas nga iskediul. Mabalin pay a kasapulan daytoy iti linawas no dagiti gagangay a miting iti Simbaan ket saan a maangay gapu iti stake conference wenno dadduma pay a rason. Bayat dagitoy a lawas maawiska nga agtultuloy nga agadal iti Libro ni Mormon iti pagtaengan.
Nasken Kadi a Surotek ti Iskediul?
Ti iskediul ti mangtulongto kenka a mangileppas nga agbasa iti Libro ni Mormon agingga iti gibus ti tawen. Kas mainayon, ti panangsurot iti isu met laeng nga iskediul kas kadagiti dadduma iti ward ket mabalin a mangiturong kadagiti napatpateg pay a padas iti simbaan. Ngem saan a nasken a surotem ti iskediul; ta gagangay daytoya pangiwanwan a mangtulong kenka a makagiddan. Ti napateg a banag ket ti pannakasursurom iti ebanghelio a kas indibidual ken kas maysa a pamilia.