ko ha fefine ʻoku ako folofola

Ngaahi Fakakaukau ki hono Fakatupulaki Hoʻo Ako Fakataautaha ʻa e Folofolá

Ko ha ngaahi founga faingofua ʻeni ke fakatupulaki ai hoʻo ako e folofola ʻa e ʻOtuá ʻi he ngaahi tohi folofolá.

Fekumi ki ha ngaahi Moʻoni kau kia Sīsū Kalaisi

ʻOku akoʻi mai ʻe he folofolá ʻoku fakamoʻoni ʻa e meʻa kotoa pē kia Kalaisi (vakai, 2 Nīfai 11:4; Mōsese 6:63 ko ia fekumi kiate Ia ʻi he ngaahi meʻa naʻe hokó, talanoá, mo e ngaahi akonaki ʻo e Tohi ʻa Molomoná. Fakakaukau ke tohi pe fakaʻilongaʻi ʻa e ngaahi veesi ʻoku akoʻi fekauʻaki mo e Fakamoʻuí mo e founga ke muimui ai kiate Iá.

Fekumi ki he Ngaahi Lea mo e Kupuʻi Lea Ueʻi Fakalaumālié

Mahalo te ke saiʻia ʻi ha ngaahi foʻi lea mo e kupuʻi lea pau ʻi he folofolá, ʻo hangē naʻe hiki fakapatonu pē ia kiate koé. ʻE lava ke ongo fakataautaha, fakalaumālie mo fakalotolahi ia kiate koe. Fakakaukau ke fakaʻilongaʻi ia ʻi hoʻo tohi folofolá pe hiki ia ʻi ha tohinoa ako.

Fekumi ki he ngaahi Moʻoni ʻo e Ongoongoleleí

ʻI he taimi ʻe niʻihi ʻoku fakamatalaʻi mahino mai ʻa e ngaahi moʻoni ʻo e ongoongoleleí (ʻa ia ʻoku faʻa ui ko e tokāteliné pe tefitoʻi moʻoní), pea taimi ʻe niʻihi ʻoku ʻomi ia ʻi ha sīpinga pe talanoa. Fehuʻi loto pē kiate koe, “Ko e hā ha ngaahi moʻoni taʻengata ʻoku akoʻi ʻi he ngaahi veesi ko ʻení?”

Fakafanongo ki he Laumālié

Tokanga ki hoʻo ngaahi fakakaukaú mo e ongo ʻokú ke maʻú, neongo kapau ʻoku ʻikai felāveʻi ia mo e meʻa ʻokú ke laú. ʻE lava ke hoko e ngaahi ongo ko iá ko e meʻa ʻoku finangalo ʻa e Tamai Hēvaní ke ke akó.

Fakatatau ʻa e Folofolá ki Hoʻo Moʻuí

Fakakaukau ki he founga ʻoku ʻaonga ai ʻa e ngaahi talanoa mo e akonaki ʻokú ke laú ki hoʻo moʻuí. Hangē ko ʻení, te ke lava ʻo fehuʻi pē kiate koe, “Ko e hā ha ngaahi meʻa kuó u aʻusia ʻoku faitatau mo e meʻa ʻoku ou laú?” pe “ʻE founga fēfē haʻaku muimui ki he sīpinga ʻa e tokotaha ko ʻeni ʻi he folofolá?”

ʻEke ha Ngaahi Fehuʻi Lolotonga Hoʻo Akó

ʻI hoʻo ako e folofolá, ʻe lava ke ke fakakaukau ki ha ngaahi fehuʻi. ʻE lava ke fekauʻaki e ngaahi fehuʻi ko ʻení mo e meʻa ʻokú ke laú pe ki hoʻo moʻuí fakalūkufua. Fakalaulauloto ki he ngaahi fehuʻi ko ʻení pea fekumi ki he ngaahi talí ʻi hoʻo hokohoko atu ke ako e folofolá.

Fakaʻaongaʻi e Ngaahi Tokoni ki he Ako Folofolá

Ke maʻu ha ʻilo lahi ange ki he ngaahi veesi ʻokú ke laú, fakaʻaongaʻi ʻa e Fakahinohino ki he Ngaahi Folofolá, (scriptures.ChurchofJesusChrist.org), mo e ngaahi tokoni kehé.

Fakakaukau ki he Puipuituʻa ʻo e Folofolá

Te ke lava ʻo maʻu ha ngaahi fakakaukau mahuʻinga fekauʻaki mo e folofolá ʻo ka ke fakakaukau ki hono puipuituʻá—ʻa e ngaahi tūkunga pe taimi mo e feituʻu ʻo e folofolá. Hangē ko ʻení, ʻe tokoni hono ʻilo e puipuituʻá mo e tui ʻa e kakai naʻe lea ki ai ʻa e palōfitá ke mahino kiate koe ʻa e taumuʻa ʻo ʻene ngaahi leá.

Hiki Hoʻo Ngaahi Fakakaukaú mo e Ngaahi Ongó

ʻOku lahi e ngaahi founga ke hiki ai e ngaahi ongo ʻokú ke maʻú lolotonga hoʻo akó. Hangē ko ʻení, te ke lava ʻo fakaʻilongaʻi ha foʻi lea pe kupuʻi lea mahuʻinga pea hiki hoʻo ngaahi fakakaukaú ko ha fakaʻilonga ʻi hoʻo tohi folofolá. Te ke lava foki ʻo tauhi ha tohinoa ki he ngaahi fakakaukau mo e ongo ʻokú ke maʻú.

Ako e Ngaahi Lea ʻa e Kau Palōfita mo e Kau ʻAposetolo ʻi he Ngaahi ʻAho Kimui Ní

Lau ʻa e meʻa kuo akoʻi mai ʻe he kau palōfita mo e kau ʻaposetolo ʻi he ngaahi ʻaho kimui ní fekauʻaki mo e ngaahi tefitoʻi moʻoni ʻokú ke maʻu ʻi he folofolá (hangē ko ʻení, vakai, conference.ChurchofJesusChrist.org mo e ngaahi makasini ʻa e Siasí).

Vahevahe e Ngaahi Fakakaukaú

ʻOku ʻikai ngata pē ʻi he hoko ʻa hono aleaʻi e ngaahi fakakaukau mei hoʻo ako fakatāutahá ko ha founga lelei ia ke akoʻi ai e niʻihi kehé, ka ʻoku tokoni foki ia ke fakamālohia hoʻo mahino ki he meʻa naʻá ke laú.

Moʻui ʻaki ʻa e Meʻa ʻOkú ke Akó

ʻOku ʻikai totonu ke ngata pē ʻi hono ueʻi fakalaumālie kitautolu ʻe he folofolá ka ʻoku totonu ke ne tākiekina kitautolu ke liliu ʻetau tōʻonga moʻuí. Fakafanongo ki he meʻa ʻoku ueʻi koe ʻe he Laumālié ke ke fai lolotonga hoʻo laukongá, pea tukupā ke ke ngāue ʻo fakatatau mo e ngaahi ueʻi ko iá.

ko ha tangata ʻokú ne ako e folofolá

Naʻe pehē ʻe Palesiteni Lāsolo M. Nalesoni: “Kapau te tau ʻvilitaki atu, pea keinanga ‘i he folofola ‘a Kalaisí, pea kātaki ki he ngataʻangá,, … te [tau] maʻu ‘a e moʻui taʻengatá”’ [2 Nīfai 31:20].

“ʻOku mahulu ange ʻa e ʻuhinga e keinangá he ʻahiʻahiʻi pē. ʻOku ʻuhinga ʻa e keinangá ke ifoʻia. ʻOku tau ifoʻia ʻi he folofolá ʻi haʻatau ako ia ʻi he laumālie ʻo e ʻilo ha meʻa mo talangofua faivelenga. ʻI heʻetau keinanga he folofola ʻa Kalaisí, ʻoku tohi tongi ia ʻhe kakano ʻo e lotó.’ [2 Kolinitō 3:3]. ʻOku hoko leva ia ko e konga mahuʻinga ʻo hotau ʻulungāngá” (“Living by Scriptural Guidance,” Ensign, Nov. 2000, 17).