Reireinaia Ataei Aika a Uarereke

Ngkana iai ataei aika a uarereke n am utu, aikai tabeua waaki ni kakukurei aika a na kona ni buokiia n reiakin:

• Anenei Anene ao kuuna man te Boki n Anene ao aia Anene ataei a reiakin taekan te reirei ma te korakora. Kabongana te intekiti mai ibukin te Boki n Anene ao aia Anene ataei ni kakaai anene aika a irekereke ma reirein te euangkerio aika ko reirei iaoia. Buokiia am ataei ni kairekerekei rongorongo n taian anene nakon maiuia. Te katooto, ko kona n titiraki iaon taekan ke kibun n te mwanewe. N raonaki ma te anene, a kona am ataei ni karaoi kaiia are e nako ma te anene ke n ongora nakon te anene bwa katangitang n te baekiraun ngkana a karaoi kaai riki tabeua.

• Ongora nako iai ke karaoa kain te karaki. Ataei aika a uarereke a tangirii karaki—man booki aika tabu, man maium, man rongorongon te Ekaretia, ke man ana maekatiin te Ekaretia. Kakaai kawai aika ko na katabeia iai n te karaki. A kona n taui tamnei ke bwaai, koroi tamnein bwaai aika a ongo, karaoa kain te karaki, ke n ibuobuoki n taekina te karaki. Buokiia am ataei bwa a na atai koaua n te euangkerio inanon karaki aika ko tibwauai.

• Wareka te kibu. Ataei aika a uarereke a na aki bati ni kona ni wareware, ma ko kona n teimatoa ni katabeia n reirei man koroboki aika tabu. Ko na bae ni kainnanoi ni kabanea aia iango iaon teuana te kibu, mwakoron te kibu, ke te taeka. A na kona naba ni kamatenanoi mwakoro n taeka aika uarereke man koroboki aika tabu ngkana a kaokioki tabeua te tai. Ngkana a ongo ana taeka te Atua, a na bon namakina te Tamnei.

• Taraa te tamnei ke mataku n te witeo. Ngkana ko kaotia nakoia am ataei te tamnei ke te witeo ae kaineti ma reirein te euangkerio ke koroboki aika tabu, titirakiniia titiraki aika e buokiia n reireiniia man te bwai are a nooria. Te katooto, ko kona n titiraki, “Tera ae riki n te tamnei ke te witeo aei? E kanga am namakin iai?” Te Gospel Library app, medialibrary.ChurchofJesusChrist.org, ao children.ChurchofJesusChrist.org bon taabo aika a raoiroi ni kakaai tamnei ao witeo.

• Karaoia. Ataei a kona ni katea, korotamneia, ke ni karana te bwai teuana ae kaineti ma te karaki ke te reirei ae a reiakinna.

• Ibuokan bwai n taian reirei ma te bwai ni kabotau. Te reirei ma te bwai ni kabotau e kona ni buokiia am ataei n ataa te reirei n te euangkerio ae kaangaanga te ota iai. Ngkana ko kabongana te reirei ma te bwai ni kabotau, kakaai anga aika a na kona iai am ataei n tibwatibwa. A na reirei ae mwaiti riki man taneiai ni marooro nakon ae ti taraakin te kamataku.

• Katea Kain te Karaki. Ngkana a karaoa katotoon te kaangaanga ataei ae a na kona ni kaitarai ni maiuia, a na kona n ataia raoi iai bwa e kanga reirein te euangkerio ni kabonganaki nakon maiuia.

• Kaokioki Waaki ni Kakukurei. A na bae ni kainnanoia ataei aika uarereke n ongora nakon iango n taai aika mwaiti bwa ana ota iai. Tai maaku ni kaokioki karaki ke waaki ni kakukurei n tainako. Te katooto, ko kona n tibwaua te karaki n taai aika a mwaiti ni kawai aika a kakaokoro—wareware man koroboki aika tabu, kakimototoi n oin am taeka, tibwauaan te witeo, kariaia am ataei bwa a na buokiko n taekina te karaki, kaoiia bwa a na katea kain te karaki, ao a mwaiti riki.

  te utu ae kamatebwai