Abentekiti B

“Koaua aika a Mataata ao ni Kakawaki”

E katauraoaki Ana Boki Moomon bwa e na otinako ni boong aika kaitira, tain te mangaongao ae butanako iaon te reirei, ke ana koaua te Atua aika akea tokina. Mwakoron te kantaninga mai ieta n te boki anne bon, are e a kaman nooria Nibwaai, ni “katea koauan te [Baibara],” bwa “a na ataaki bwaai aika a mataata man ni kakawaki” ake a tia n anaaki mai irouia inanon tienture aika a mwaiti, ao a na “kaotaki nakoia reeti, neewe, ao aomata nako bwa Ana Tiibu te Teei te Atua bon Natin te Tama ae Akea Tokina, ao te Tia Kamaiua te Aonaaba” (1 Nibwaai 13:40).

Ana Boki Moomon e kaoti koaua aika akea tokina ake a bua n tain Kitanan te Koaua ao ni karina te kauoua, ni koaua ae mataata nakon koaua aika a mwaiti aika a reiakinaki n te Baibara. Aikai tabeua koaua aikanne. Tarai bwaai aikai ao koaua tabeua aika a mataata ao ni kakawaki ngkana ko kamatebwaia Ana Boki Moomon.

Taian Atua

• Tamara are i Karawa, Iesu Kristo, ao te Tamnei ae Raoiroi bon aomata aika a kakaokoro ma teuana aia kantaninga (taraa 3 Nibwaai 11:32, 36).

• Te Tia Kamaiu ae e a uti iai rabwatana ae kona n ringaki (taraa 3 Nibwaai 11:10–17).

Koroboki aika tabu riki tabeua ibukin Taian Atua: 2 Nibwaai 31:6–8; Ita 12:41

Ana Mwakuri ni Kamaiu Iesu Kristo

• E rinanon te maraki Iesu Kristo ibukin ara bure ao karawawatakira bwa E aonga n ataia bwa e na kanga ni buokiira (taraa Aramwa 7:11–13).

• Ti kona ni kororaoi rinanon ana akoi Iesu Kristo (taraa Moronaai 10:32–33).

Koroboki aika tabu riki tabeua ibukin Ana Mwakuri ni Kamaiu te Tia Kamaiu: 1 Nibwaai 10:6; 2 Nibwaai 2:6–9; Iakobwa 4:11–12; Motiaea 3:1–19; Aramwa 34:8–16

Te Babaire ni Kamaiu

• Bwakan Atam ao Ewa bon mwakoron ana babaire ae kakawaki Tamara are i Karawa (taraa 2 Nibwaai 2:22–27).

• Bon te bwai ae riai te kakaitara ibukira bwa ti aonga ni kabongana inaomatara n rinerine (taraa 2 Nibwaai 2:11–16).

• Ana motikaki taekara nakon ara mwakuri ao bwaai aika e tangirii nanora (taraa Aramwa 41:3–7).

• Te “nei n ai ao te burimton” bon te kanikinaa ibukin korakaia aika aki rairi nanoia (taraa 2 Nibwaai 9:16–19; Motiaea 3:24–27).

Koroboki aika tabu riki tabeua ibukin te babaire ni Kamaiu: 2 Nibwaai 9:11–26; Aramwa 22:12–14; 34:31–35; 42:1–26

Kitanan te Koaua ao Kaokan Bwaai

• E riki Kitanan te Koaua ae Korakora ibukin te buakaka ao te aki onimaki (taraa Moomon 8:28, 31–41).

• Ana Boki Moomon e katei koaua aika a reiakinaki n te Baibara (taraa 1 Nibwaai 13:19–41; 2 Nibwaai 3:12).

• E riai ana Ekaretia Kristo n aranaki n Arana (taraa 3 Nibwaai 27:3–9).

Koroboki aika tabu riki tabeua ibukin Kitanan te Koaua: 1 Nibwaai 13:1–9, 24–29; 2 Nibwaai 27–28

Koroboki aika tabu riki tabeua ibukin Kaokan bwaai: 1 Nibwaai 14:7–12; 22:7–11; 2 Nibwaai 3:7–24; 25:17–18

Burabeti ao te Kaotioti

• Burabeti ni kabane a kakoaua Iesu Kristo (taraa Motiaea 13:33–35).

• Te taneiai n te koaua n tamnei e roko rinanon te Tamnei ae Raoiroi (taraa Aramwa 5:45–47).

• A aki bane n rin ana taeka te Atua ni kabane inanon te Baibara (taraa 2 Nibwaai 29:10–13).

• Te Kaotioti mairoun te Atua e tuai toki n ara bong (taraa Moomon 9:7–9).

Koroboki aika tabu riki tabeua ibukiia burabeti: 1 Nibwaai 22:1–2; Motiaea 8:16–18; Ereman 13:24–33

Koroboki aika tabu riki tabeua ibukin te kaotioti: Iakobwa 4:8; Aramwa 12:9–11; 17:2–3; Moronaai 10:5

Te Nakoanibonga

• Ake iai irouia te nakoanibonga a weteaki ao a katauraoaki man moan karikan te aonaaba (taraa Aramwa 13:1–3).

• E riai te aomata ni karekea te kariaiakaki mairoun te Atua bwa e na tataekina te euangkerio (taraa Motiaea 23:17).

Koroboki aika tabu riki tabeua ibukin te nakoanibonga: Motiaea 18:17–20; Aramwa 13; Ereman 10:7

Taian Otenanti ao Berita aika a Tabu

• E kakawaki te bwabetito ibukin karekean te maiu are akea tokina (taraa 2 Nibwaai 31:4–13, 17–18).

• E riai ni karaoaki te bwabetito n te kateboaki (taraa 3 Nibwaai 11:23–27).

• Akea kainnanoakin bwabetitoakiia ataei aika a uarereke (taraa Moronaai 8:8–12).

• A riai otenanti n tararuaaki ni kaineti ma ana tua Kristo iroun temanna ae iai irouna te kariaiakaki (taraa Motiaea 18:17–18; 3 Nibwaai 11:21–27; Moronaai 4:1).

Koroboki aika tabu riki tabeua ibukin otenanti: Motiaea 18:8–17; 21:33–35; Aramwa 13:16; 3 Nibwaai 18:1–11; Moronaai 2–6; 8:4–26

Koroboki aika tabu riki tabeua ibukin berita aika tabu: 2 Nibwaai 11:5; Motiaea 5:1–9; Aramwa 24:17–18

Mare ao te Utu

• A riai bumwaane ao buaine n tangiriia i bon irouia (taraa Iakobwa 3:5–7).

• A riai kaaro ni kaikawaia rake natiia inanon te Uea (taraa 1 Nibwaai 7:1).

Koroboki aika tabu riki tabeua ibukin te mare ao te utu: 1 Nibwaai 1:1; 2 Nibwaai 25:26; Iakobwa 2:23–28; Enos 1:1; Motiaea 4:14–15; 3 Nibwaai 18:21

Tuua

• E na katauraoa te kawai te Uea ibukira bwa ti na kakoroi nanon Ana tua (taraa 1 Nibwaai 3:7).

• E berita te Atua bwa E na kakabwaiaira ngkana ti kawakin Ana tua (taraa Motiaea 2:22–24).

Koroboki aika tabu riki tabeua ibukin tuua: 1 Nibwaai 17:3; 22:30–31; Aramwa 37:13, 35; 50:20