“Septiembre 21–27. 3 Nephi 12–16: ‘Siak ti Paglintegan ken ti Silaw,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Septiembre 21–27. 3 Nephi 12–16,” Umaykayo, Sumurot Kaniak—Para kadagiti Indibidual ken Pamilia: 2020
Septiembre 21–27
3 Nephi 12–16
“Siak ti Paglintegan, ken ti Silaw”
Adu dagiti pagbatayan a masarakan iti 3 Nephi 12–16. Sumagmamano ti naitampok itoy a balabala, ngem mabalinmo a sapulen dagiti dadduma pay. Agpaisuroka iti Nailangitan nga Ama, babaen ti Espirituna, no ania ti kasapulam itan.
Isuratmo dagiti Impresionmo
Kas met kadagiti disipulo ni Jesus a nagummong iti bantay iti Galilea, nagbiag dagidi nagummong a tattao iti templo iti Bountiful babaen ti paglintegan ni Moises. Simmurotda iti daytoy agsipud ta inturongna dagiti kararuada ken ni Cristo (kitaen iti Jacob 4:5, ket ita nagtakder ni Cristo iti sanguananda a mangipakpakdaar iti nangatngato a paglintegan. Ngem uray kadatayo a di pulos nagbiag iti paglintegan ni Moises ket mailasintayo a ti pagrukodan nga intuding ti Jesus para kadagiti disipulona ket amang a nangatngato a paglintegan. “Kayatko a naan-anaykayo a kas kaniak,” impakdaarna (3 Nephi 12:48). No daytoy ti mangiparikna kenka nga adda pagkurangam, laglagipem a kinuna pay ni Jesus, “Nagasat dagiti napanglaw iti espiritu a kumamang kaniak, ta kukuadanto ti pagarian ti langit” (3 Nephi 12:3). Daytoy nangatngato a paglintegan ket maysa nga awis—maysa a wagas ti panangisao iti “Umaykayo Kaniak ket maisalakankayo” (3 Nephi 12:20). Kas iti paglintegan ni Moises, iturongnatayo daytoy a paglintegan ken ni Cristo—ti kakaisuna a Maysa a makaisalakan ken makapaan-anay kadatayo. “Adtoy,” kinunana, “ Siak ti paglintegan, ken ti silaw. Kitaendak, ken agituredkayo agingga iti panungpalan, ket agbiagkayto” (3 Nephi 15:9).
Dagiti Kapanunotan para iti Bukod a Panagadal iti Nasantuan a Kasuratan
Ipakitana kaniak dagiti pannursuro ti Mangisalakan no kasano ti agbalin a maysa a pudno a disipulo.
Adu dagiti kinapudno, balikas a pammagbaga, ken ballaag iti 3 Nephi 12–14. Adtoy ti maysa a wagas tapno agadal ken mangyaplikar iti no ania ti insuro ti Mangisalakan kadagitoy a kapitulo: Pumili iti maysa a ragup dagiti bersikulo, ket kitaen no magupgopmo no ania ti isuro dagiti bersikulo iti maysa a binatog a mangrugi iti “Dagiti pudno a disipulo ni Jesucristo …” Kas pagarigan, maysa a pakagupgopan ti 3 Nephi 14:1–5 ket mabalin a “Dagiti pudno a disipulo ni Jesucristo ket saanda a mangngeddeng.” Mabalin a kayatmo ti agpili iti maysa a bersikulo manipud kadagitoy a kapitulo a napnuan kaipapanan kenka ket yulom daytoy wenno kopiaem daytoy ket ipan iti lugar a makitamto daytoy a masansan. Utobem no kasano a mayaplikarmo ti nasursurom iti bukodmo a panagkagumaan nga agbalin a maysa a nasaysayaat a disipulo ni Jesucristo.
Kitaen met iti Mateo 5–7; Lucas 6:20–49.
3 Nephi 12:1–2; 15:23–24; 16:1–6
Nagasat dagiti mamati a saanda a makita.
Idasig iti dagup ti bilang dagiti annak ti Dios, manmano laeng ti nakakita iti Mangisalakan ken nakangngeg iti timekna, a kas iti inaramid dagiti tao iti Bountiful. Kaaduan kadatayo ti ad-adda a kas kadagiti tao a nailadawan iti 3 Nephi 12:2; 15:23; ken 16:4–6. Ania dagiti kari a naited kadagiti kasta a tattao kadagitoy a bersikulo? Kasano a naipatungpal dagitoy a kari iti biagmo?
Kitaen met iti Juan 20:26–29; 2 Nephi 26:12–13; Alma 32:16–18.
3 Nephi 12:21–30; 13:1–8, 16–18; 14:21–23
Saan nga umdas dagiti nalinteg a tignay; rumbeng nga agbalin a nadalus met ti pusok.
Maysa a tema a mabalin a madlawmo kadagitoy a kapitulo ket ti awis ti Mangisalakan nga agbiag iti maysa a nangatngato a paglintegan—tapno agbalin a nalinteg a saan laeng kadagiti akinruar a tignaytayo ngem kadagiti pay puspusotayo. Sapulen daytoy a tema idi nagsao ti Mangisalakan maipanggep iti panagsusuppiat iti (3 Nephi 12:21–26), kinarugit iti dayaw (3 Nephi 12:27–30), kararag (3 Nephi 13:5–8), ken panagayuno (3 Nephi 13:16–18). Ania dagiti dadduma pay a pagarigan a masarakam? Ania ti mabalin nga aramidem a mangpatarnaw kadagiti tarigagay ti pusom imbes nga agpokuska laeng kadagiti akinruar a tignay?
No sapulek dagiti “nasasayaat a bambanag” manipud iti Nailangitan nga Ama, maawatkonto.
Kinuna ni Presidente Russell M. Nelson: Talaga kadi a tarigagayan ti Dios ti makisao kenka? Wen! … O, nakaad-adu pay ti kayat ti Amam sadi Langit a maammuam ” (“Revelation for the Church, Revelation for Our Lives,” Ensign wenno Liahona, Mayo 2018, 95). Bayat ti panangbasam iti awis ti Apo iti 3 Nephi 14:7–11 nga agdawat, agsapul, ken agtuktok, agutob no ania dagiti “nasayaat a bambanag” a mabalin a kayatna a dawatem. Dagiti sumaganad a mainayon a nasantuan a kasuratan ket mabalin a mangtulong kenka a makaawat no kasano ti agdawat, agsapul, ken agtuktok. Makatulongda pay a mangilawlawag no apay di masungbatan dagiti sumagmamano a kararag iti wagas a namnamaem: Isaias 55:8–9; Helaman 10:5; Moroni 7:26–27, 33, 37; ken Doktrina ken Katulagan 9:7–9.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
3 Nephi 12:48
Kasano a ti mensahe ni Elder Jeffrey R. Holland iti “Be Ye Therefore Perfect—Eventually” (Ensign wenno Liahona, Nob. 2017, 40–42) ket matulongannatayo a makaawat kadagiti balikas ti Mangisalakan itoy a bersikulo? Masarakam pay ti tulong iti Moroni 10:32–33.
3 Nephi 12:9, 38–42; 14:3–5, 12
Kasano a mayaplikar dagitoy a bersikulo iti panagdidinnangay dagiti miembro ti pamilia? Nalabit a mabalin a mangituding ti pamiliam iti sumagmamano a panggep a tun-oyen a sangkamaysa tapno napudpudno nga agbiag babaen kadagitoy a pagbatayan.
3 Nephi 13:19–21
Mabalin a mangparegta dagitoy a bersikulo iti panaglilinnawag maipapan iti no ania dagiti ipateg ti pamiliam. Adda kadi sumagmamano a kinabaknang iti daga a manglapped kenka nga agurnong kadagiti kinabaknang iti langit? Mabalin nga ipaganetgetmo daytoy a punto babaen ti panangidaulom iti maysa a treasure hunt nga agsapul iti bambanag iti pagtaenganyo a mangipalagip kadagiti miembro ti pamilia kadagiti kinabaknang nga addaan iti agnanayon a pateg.
3 Nephi 14:7–11
Mabalin a magustuan dagiti in-inaudi nga ubbing ti maysa nga ay-ayam, a pinaregta ti 3 Nephi 14:8–9, a pagdawatanda iti maysa a banag ken pangawatanda iti maysa a banag a naan-anay ti pakaidumaanna. Ania ti kayat ti Mangisalakan a maammuantayo maipapan iti Amatayo iti Langit idi imbinglayna daytoy pagarigan?
3 Nephi 14:15–20
Ania ti “naimbag a bunga” a mangtulong kadatayo a mangammo a ni Joseph Smith, wenno ti agdama a Presidente ti Simbaan, ket maysa a pudno a propeta?
3 Nephi 14:24–27
Mangpanunot kadagiti wagas a pakatulongam iti pamiliam a mangiladawan iti panunotda ti pangngarig kadagitoy a bersikulo. Nalabit a mabalin nga agdrowing dagiti miembro ti pamilia kadagiti ladawan, agaramid kadagiti tignay, wenno agbangon kadagiti banag iti rabaw dagiti solido ken nadarat a pamuon.
Para iti nayon a kapanunotan iti panangisuro kadagiti ubbing, kitaen iti balabala itoy a lawas iti Umaykayo, Sumurot Kaniak—Para iti Primary
Panangpadur-as iti Panangisurotayo
Agaramat kadagiti adalen a banag [object lesson]. Insuro ti Mangisalakan dagiti napateg a kinapudno babaen ti panagibasar kadagiti pamiliar a bambanag. Mabalinmo nga aramiden ti isu met la a banag bayat ti panangbasa ti pamiliam iti 3 Nephi 12–16. Kas pagarigan no basaem ti kapitulo 12, mabalinmo ti mangipakita iti sumagmamano nga asin, maysa a kandela, ken maysa a kagay. Mabalin a maiturong pay daytoy iti maysa a nasayaat a pangrebyu nga aktibidad. Kalpasan a nabasam dagitoy a kapitulo, i-display manen dagiti banag (object), ket saludsoden kadagiti miembro ti pamilia no ania ti insuro ti Mangisalakan maipapan iti tunggal maysa.
Ti Isasarungkar ti Mangisalakan kadagiti Tattao iti America, ni Glen S. Hopkinson