Juun 29–Juļae 5. Alma 23–29: Raar ‘Jamin Raar Bun̄,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
Juun 29–Juļae 5. Alma 23–29,” Itok, Ļoor Eō—N̄an Kajjojo Armej im Baam̧le ko: 2020
Antai-Nipai-Liai ro rej Kalbwin Kein Tariņae ko aer, jān Jody Livingston
Juun 29–Juļae 5.
Alma 23–29
Raar “Jamin Bun̄”
Ilo am̧ ekkatak Alma 23–29, ta ennaan ko kwoj loi n̄an eok make im baam̧le eo? Ta eo komaron̄ kwaļo̧k ilo kūlaaj ko am̧ ilo Kabun̄ in?
Je En̄jake ko Rej Im̧we Eok
Kwoj ke jet iien kajjitōk eļan̄n̄e armej ro remaron̄ lukkuun in oktak? Bōlen kwoj inepata kōn eļan̄n̄e komaron̄ anjo̧ ioon kāālet ko rejjab em̧m̧an kwaar kōm̧m̧ani ak iminene ko renana kwoj ejaaki, ak emaron̄ wōr am̧ ejja inepata ko wōt kōn ro kwoj iakwe er. Eļan̄n̄e āindein, bwebwenato eo an Antai-Nipai-Liai ro emaron̄ jipan̄ eok. Armej rein raar dike armej in Nipai ro. Ke Ammōn im ļōmaro jein in jatin raar kāālet n̄an kwaļo̧k gospel eo n̄an er, armej in Nipai ro “raar ettōn̄ ilo [aer] kajjirere kake.” M̧an armej in Leman ro eaar āinwōt juon men eļapļo̧k an alikkar jān ukōt er. (Lale Alma 26:23–25.)
Bōtaab RiLeman ro raar oktak—kōn kajoor in ukōt an Irooj. Ijo juon iien raar jeļā kake er āinwōt “kijn̄en̄e im juon armej rellāj” (Alma 17:14), raar “jenolo̧k kōn aer kijejeto n̄an Anij” (Alma 27:27). Ilo m̧ool, raar “jamin bun̄.” (Alma 23:6).
Bōlen ewōr am̧ iminene ko rebōd n̄an kōjerwawaik ak “kein tariņae ko in … jum̧ae” n̄an likūt ilaļ (Alma 23:7). Ak bōlen ej aikuj ļapļo̧k jidik am̧ kijejeto ilo naan in kam̧ool eo am̧ im kadikļo̧k m̧ōjņo̧ļo̧k n̄an wōtlo̧k. Jekdo̧o̧n ta oktak ko kwoj aikuji, Alma 23–29 emaron̄ lewaj n̄an eok kōjatdikdik eo me, kōn kajoor in pinmuur eo an Jisōs Krraist, oktak eo aitok kitien emaron̄.
Ļōmņak ko n̄an Ekkatak Jeje ko Rekwojarjar Ippam̧ Make
N̄e ajri ro nejin Anij rej bōk gospel eo, kōjeraam̧m̧an ko rej itok ippān tok.
Ke kiin̄ eo an RiLeman ro eaar kean̄ bwe naan eo an Anij ej aikuj in “jab wōr an kapan̄pan̄,” (lale Alma 23:1–5), eaar kōpeļļo̧k kōjām eo n̄an kōjeraam̧m̧an ko reļļap n̄an er. Ilo am̧ riiti Alma 23–29, pukōt kōjeraam̧m̧an kein. Ekōjkan am̧ maron̄ jeļā bwe naan eo an Anij “jab wōr an kapan̄pan̄” ilo mour eo am̧ ak ilo baam̧le eo am̧?
Oktak eo aō n̄an Jisōs Kraist im gospel eo An ej ukōt mour eo aō.
RiLeman ro kar loļo̧k er jān Ammōn im ļōm̧aro jein im jatin raar āinwōt reban kar oktak—raar to̧rōk jān iminene ko an ro jemeer im nana eo aer make. Aaet elōn̄ iaer raar bōk gospel eo an Jisōs Kraist im kar kōm̧m̧ani oktak ko remenin aorōk ilo mour ko aer. Āinwōt juon kōkaļļe in oktak eo aer make, RiLeman rein raar ņa etaer make Antai-Nipai-Liai ro. (Meļeļe in “anti” ilo jekjek in ejjab āinwōt “anti” eo ilo “anti-Christ.”)
Kōļmānļo̧kjeņ ioon oktak eo an armej in Leman rein emaron̄ im̧we eok n̄an kejōkļo̧kjeņ kōn oktak eo am̧ make “n̄an Irooj” (Alma 23:6). Juon wāween n̄an ekkatak jebta kein emaron̄ in n̄an kile ekōjkan an oktak eo an Antai-Nipai-Liai ro kar ukōt mour ko aer. Eoon kein remaron̄ kōm̧m̧an bwe kwon ijjino.
Ilo am̧ kejekļo̧kjeņ kōn oktak ko ilo Antai-Nipai-Liai ro, ļōmņak kōn ekōjkan an oktak eo am̧ make n̄an Kraist ukōt eok. Ta eo kwoj en̄jake kwoj aikuj in oktak wōt bwe gospel eo en maron̄ wōr an kajoor eļapļo̧k ilo mour eo am̧?
Anij ej tūriam̧o.
Ilo an jerawiwi ko me Ammōn im Antai-Nipai-Liai ro raar aikuj in anjo̧ ioer raar āinwōt bwe aer oktak jān jabdewōt men ilo mour eo am̧, jej aolep pedped ioon tūriam̧o eo an Anij. Ta eo kwoj loe ilo Alma 24:7–19 im 26:17–22 me ejipan̄ eok meļeļe An tūriam̧o̧? Ilo am̧ riiti, komaron̄ ļōmņak kōn men kein, wāween ko emōj kar kūr eok n̄an ukweļo̧k, en̄jake ko am̧ kōn ukweļo̧k, ekōjkan am̧ kar kajjieon̄ in joļo̧k n̄an jab bar jerawiwi, im kōjeraam̧m̧an ko me raar itok n̄an kwe kōn ukweļo̧k. N̄e kwoj riiti eoon kein ilo wāween in, ta eo kwoj ekkatak kōn tūriam̧o eo an Anij ilo mour eo am̧?
Jerbal n̄an Irooj ej bōktok lan̄lōn̄.
Kōjekdo̧o̧n en̄jake ko aer roktak, Ammōn im Alma raar kwaļo̧k men ko reier wōt juon kōn jerbal in mijenede ko aer. Ļōmņak n̄an riiti Alma 26 im 29 im keidi er. Ta eier wōt juon ko kwoj kili? Ta naan ko ak eoon ko rej āliji? Ta eo komaron̄ ekkatak jān Ammōn im Alma kōn ekōjkan n̄an lo lan̄lōn̄ eo em̧ool kejekdo̧o̧n apan̄ ko am̧? (N̄an etale apan̄ ko Alma eaar iooni, lale jino in jebta ko n̄an Alma 5–16. N̄an etale apan̄ ko an Ammōn im ro jein im jatin, lale jino in jebta ko n̄an Alma 17–28.)
Ta ko rej kāān im im̧ōn ko̧koņ ko?
Ilo iien m̧adm̧ōd, grain ekkā kar aini n̄an juon ejouj kar ņa etan kāān im kar likūti ilo im̧ōn kakoņkoņ ko, jet iien kar ņa etan imōn ko̧koņ. Elder David A. Bednar eaar kwaļo̧k juon ukook in kōkaļļe eo ilo Alma 26:5: “Kāān (Sheaves) ko ilo keidi in ej jutak kōn membōr ro rekāāl rej kab peptaij an Kabun̄ in. Im̧ōn ko̧koņ ko rej tampeļ ko rekwojarjar” (“Honorably Hold a Name and Standing,” Ensign ak Liahona, Māe 2009, 97). Ļōmņak kōn ta eo waanjon̄ak eo ilo Alma 26:5–7 ej katakin eok kōn aorōk in bujen ko an tampeļ.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Alma 24:6–19
Etke Antai-Nipai-Liai ro raar kalbwin kein tariņae ko aer “ilo bwidej em̧wilaļ.”? (Alma 24:16). Bōlen ro uwaan baam̧le e renaaj m̧ōņōņō in jeje ioon m̧ōttan peba men ko renaaj kōņaan anjo̧ ioer ak kōjerwawaik. Innām remaron̄ kibwin juon ron̄ im kalbwin peba ko.
Alma 24:7–12
Ekkatak eoon kein emaron̄ jipan̄ baam̧le eo am̧ meļeļe menin letok eo eaiboojoj an ukweļo̧k. Ta eo Antai-Nipai-Liai ro raar kōm̧m̧ane n̄an ukweļo̧k jān jerawiwi ko aer? Ekōjkan an kar Irooj jipan̄ er ukweļo̧k? Ta eo jemaron̄ ekkatak jān waanjon̄ak in?
Alma 24:20–27
Ta eo em̧ōj ad kar loe me ej kam̧ool kōn m̧ool eo an kean̄ eo an Mormon: “Āindein jej lo bwe Irooj ej jerbal ilo elōn̄ wāween ko n̄an lo̧mo̧o̧r an armej ro An.”? (Alma 24:27).
Alma 26:2
Ekōjkan an baam̧le eo am̧ naaj kar uwaake kajjitōk eo an Ammōn ilo Alma 26:2? Bōlen komaron̄ kōm̧m̧ane juon laajrak in uwaak ko aer ioon juon m̧ōttan peba ekilep im katotoik ilo juon jikin aolep remaron̄ loe. Kōketak ro uwaan baam̧le eo n̄an kakobaba n̄ane ilo aer ļōmņak kōn kōjeraam̧m̧an ko jet Anij eaar “likūt iood.”
Alma 29:9
Ekōjkan an kar Ammōn im Alma kein kōm̧admōd ko ilo pein Anij? Ļōmņak in kappukōt kein jerbal ko ak kein kōm̧adm̧ōd ko ilo m̧weo imōm̧ im ekōnono kōn ekōjkan aer kajjojo jipan̄ baam̧le eo am̧. Ekōjkan an menin jipan̄ kōj meļeļe ekōjkan ad maron̄ kajjojo erom “juon kein kōm̧adm̧ōd ilo pein Anij”?
Kōn elōn̄ļo̧k ļōmņak ko kōn katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Kōjerbal elōn̄ jekjek ko. Ukukōt jekjek eo am̧ n̄an ekkatak jeje ko rekwojarjar an baam̧le emaron̄ jipan̄ ro uwaan baam̧le eo pād wōt ilo aer itok limo im bōk kūņaer. N̄an waanjon̄ak, ālkin an juon uwaan baam̧le eo riiti juon eoon, emaron̄ kajjitōk ippān bar juon uwaan baam̧le eo n̄an bar ba ilo naan ko aer make ta eo ej kab m̧ōj riiti.
Pija eo kōn an Antai-Nipai-Liai ro kalbwij kein tariņae ko aer jān Dan Burr