“Hunio 1–7. Alma 5–7: ‘Limmansad Kadi iti Pusoyo Daytoy Naisangsangayan a Panagbalbaliw?’”.Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hunio 1–7. Alma 5–7,” Umaykayo, Sumurot Kaniak—Para kadagiti Indibidual ken Pamilia: 2020
Saanka a Nalipatan, ni Jon McNaughton
Hunio 1–7
Alma 5–7
“Limmansad Kadi iti Pusoyo Daytoy Naisangsangayan a Panagbalbaliw?”
TiAlma 5–7 ket matulongannaka a mangpanunot iti madama a kumbersionmo ken ni Jesucristo. Bayat ti panagbasam, isuratmo ti isuro kenka ti Espiritu.
Isuratmo Dagiti Impresionmo
Saan a naammuan ni Alma maipapan kadagiti agdama a mangisalakan iti biag a pannakasukat ti puso nga operasion, a mangsukat iti nadadael wenno nagsakit a puso ti maysa a nasalun-at. Ngem ammona maipapan iti ad-adda a “nakaskasdaaw a panagbalbaliw iti pusoyo” (Alma 5:26)—maysa a no sadino a ti Mangisalakan ket mangted kadatayo iti baro a naespirituan a biag, a kas “maipasngay manen” (kitaen iti Alma 5:14, 49 Makita ni Alma a daytoy a panagbalbaliw iti puso ti eksakto a kasapulan dagiti adu a Nephite. Sumagmamano ti nabaknang ken dagiti dadduma ket napanglaw, adda napannakkel ket dagiti dadduma napakumbaba, sumagmamano dagiti mangidaddadanes , ken nagsagaba dagiti dadduma iti pannakaidadanes (kitaen iti Alma 4:6–15). Ngem kasapulanda amin nga umay ken ni Jesucristo tapno maagasan—kas met laeng iti aramidentayo amin. No man agkalikagumtayo a mangparmek iti kinapalangguad wenno mangibtur kadagiti rigrigat, maipada iti mensahe ni Alma: “Umaykayo, ket saankayo nga agbuteng” (Alma 7:15 Ti Mangisalakan koma ti mangbalbaliw iti napatangken, napnuan basol, wenno nasugatan a puso iti maysa a napakumbaba, natarnaw, ken baro.
Dagiti Kapanunotan para iti Bukod a Panagadal iti Nasantuan a Kasuratan
Nasken a mapadasak—ket agtultuloy a makarikna—iti naisangsangayan a panagbalbaliw ti pusok.
Dagiti pangamiris a saludsod a dinamag ni Alma iti tattao ti Zarahemla, a masarakan iti Alma 5:14–33, ket matulongannaka a mangsukisok iti bukodmo a kararua ket maawatam no ania ti kaipapanan ti mangpadas iti “naisangsangayan a panagbalbaliw ti puso” iti unos ti panagbiagmo. Inlawlawag ni Presidente M. Russell Ballard ti pateg dagitoy a saludsod: “Nasken a kanayon nga addaanak iti oras a mangdamag iti bagik, ‘Kumustan ti ar-aramidek?’ A kasla maaddaan iti bukod, pribado a pannakiumanmo iti bagim. … Kas pangiwanwan kaniak bayat daytoy pribado, bukod a panangamiris, kayatko ti agbasa ken agutob kadagiti pangamiris a balikas a masarakan iti maikalima a kapitulo ti Alma” (“Return and Receive,” Ensign wenno Liahona, Mayo 2017, 64).
Ibilangmo ti panangbasa kadagiti saludsod ni Alma a kasla makisarsaritaka iti bagim ket am-amirisem ti pusom. Mabalin a kayatmo nga isurat dagiti sungbatmo kadagiti saludsod. Ania ti mariknam a makaparegta nga aramidem kas bunga ti pannakisarsaritam?
Kitaen met iti Dale G. Renlund, “Preserving the Heart’s Mighty Change,” Ensign wenno Liahona, Nob. 2009, 97–99.
Nasken a padasen ti tunggal disipulo ni Cristo ti “panagbalbaliw ti puso.”
Magun-odko ti bukodko a pammaneknek maipapan iti Mangisalakan ken ti ebangheliona babaen ti Espiritu Santo.
Nangiburay ni Alma iti nabileg a pammaneknek iti Mangisalakan ken ti ebangheliona, ket inlawlawagna pay no kasano a nagun-odna dayta a pammaneknek. Bayat ti panagpaneknekna, saanna a dinakamat dagiti padasna iti pannakakita ken pannakangngegna iti maysa nga anghel (kitaen iti Mosiah 27:10–17) ngem ketdi inladawanna ti pateg a binayadanna a mangammo iti kinapudno para iti bagina. Ania ti nasursurom manipud iti Alma 5:44–51 maipapan iti no kasano a naammuan ni Alma ti kinapudno? Kasano a masurotmo ti pagwadanna kadagiti panagkagumaanmo a manggun-od wenno mangpapigsa iti pammaneknekmo? Ania ti masursurom maipapan iti Mangisalakan manipud kadagiti pannursuro ni Alma iti Alma 5:33–35, 48–50, ken 57–60?
Ti naregta a panagtungpal ti mangtulongto kaniak nga agtalinaed iti “dalan nga agturong iti pagarian ti Dios.”
Saan a napasaran dagiti tao ni Gideon dagiti isu met laeng a rigrigat a napadasan dagiti tao iti Zarahemla, isu a tinulongan ti Espiritu ni Alma a maawatan dagiti kasapulanda ket insurona ida iti maiduma (kitaen iti Alma 7:17, 26). Mabalin a madlawmo a sumagmamano a paggidiatan dagiti mensahe ni Alma iti Zarahemla (kitaen iti Alma 5 ken iti Gideon. Kas pagarigan, naawatan ni Alma nga adda dagiti tao tiGideon “iti dana nga agturong iti pagarian ti Dios” (Alma 7:19). Iti sibubukel a sermonna kadakuada, insuro ni Alma kadakuada dagiti adu a banag maipapan iti no kasano ti agtalinaed iti dayta a dana (kitaen iti Alma 7). Ania ti pammagbaga nga intedna kadakuada? Ania ti mayaplikarmo iti biagmo ita?
Inawat ti Mangisalakan iti Bagina dagiti basol, saem, ken saksakitko.
Nariknam kadin nga awan maysa a makaawat kadagiti panagrigatam wenno karitmo? No kasta, makatulong ti kinapudno a naisuro iti Alma 7:7–16. Impaneknek ni Elder David A. Bednar: “Naan-anay a mannakaammo ken mannakaawat ti Anak ti Dios, gapu ta narikna ken binaklayna dagiti dagensen ti tunggal maysa kadatayo. Ket gapu iti awan patinggana ken agnanayon a sakripisiona (kitaen iti Alma 34:14), addaan Isuna iti naan-anay a pannakipagrikna ket mabalinna nga ipaay kadatayo ti takiag ti kaasina” (“Bear Up Their Burdens with Ease,” Ensign wenno Liahona, Mayo 2014, 90).
Bayat ti panangbasam iti Alma7:7–16, panunotem no ania ti maitulong dagitoy a bersikulo kadatayo a makaawat maipapan kadagiti panggep ti sakripisio ti Mangisalakan. Kasano a magun-odtayo ti bilegna iti biagtayo? Ibilang ti panangisuratmo kadagiti impresionmo.
Kitaen met iti Isaiah 53:3–5.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 5:6–13
Apay a tinarigagayan ni Alma kadagiti taona a manglaglagip iti asi ti Apo kadagiti kapuonanda? Ania dagiti estoria manipud iti pakasaritaan ti pamiliam [family history] a mangisuro kenka maipapan iti asina? Nalabit a mabalinmo a sarungkaram ti familysearch.org/myfamily tapno mangisurat kadagitoy nga estoria.
Alma 5:14–33
Mabalin a maammuan dagiti miembro ti pamiliam no ania ti rikna ti nakasagana—wenno saan a nakasagana—para iti maysa a panagbiahe iti camping, maysa a pannubok iti eskuela, wenno maysa nga interbyu iti trabaho. Ania dagiti kallabes a padas a mabalinda nga ibinglay a pangiladawan ti kinapateg ti panagbalin a nakasagana? Mabalinmo nga awisen dagiti miembro ti pamilia a mangrebyu iti Alma 5:14–33 ket pasapul dagiti saludsod a dinamag ni Alma a mangisagana kadagiti taona a sumabat iti Dios. Nalabit nga agpili ti saludsod ti tunggal miembro ti pamilia ket ibinglay no kasano a matulongannatayo nga agsagana a sumabat iti Dios. Mabalin pay ti pamiliam a mangi-display iti sumagmamano a saludsod iti lawlaw ti pagtaenganyo nga utoben dagiti miembro ti pamiliam.
Alma 6:4–6
Ania dagiti sumagmamano a gapu no apay nga aguummongtayo kas Sasanto? Kasano a mapagbalintayo ti orastayo iti simbaan nga ad-adda a makatulong iti bagbagitayo ken iti dadduma?
Alma 7:9–16
Ania ti masursurotayo kadagitoy a bersikulo a makatulong kadatayo a “saan[tayo] nga agbuteng” (Alma 7:15) no nasken nga agbabawi ken agbalbaliwtayo? Ania ti isuro dagitoy a bersikulo maipapan iti panagsubli ti Mangisalakan no kasapulantayo ti tulong? Ania dagiti dadduma pay a bambanag a naaramidtayon tapno umawat iti tulongna? Kasano a tinulongannatayo?
Alma 7:23
Asino ti am-ammotayo a maysa a nasayaat a pagwadan ti maysa wenno ad-adu pay kadagiti kababalin a nailista ditoy a bersikulo? Apay a napateg a papintasen dagitoy a kababalin?
Para kadagiti dadduma pay a kapanunotan iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agdamag kadagiti saludsod a mangawis kadagiti miembro ti pamilia nga agtignay. Ibilangmo dagiti saludsod a mangiparikna kadagiti miembro ti pamilia a mangutob no kasano a naan-anay ti panagtungpalda iti ebanghelio. “Saan a gagangay a pagsasaritaan dagitoy a saludsod; dagitoy ket para iti bukod a panangpampanunot” (Panangisuro iti Wagas ti Mangisalakan, 31).
Ti Mangibabaettayo, ni Jay Bryant Ward