C. C. A. Christensen (1831–1912), Zion’s Camp,, c. 1878, tempera on muslin, 78 x 114 te inti. Brigham Young University Museum of Art, gift of the grandchildren of C. C. A. Christensen, 1970.

Tebetembwa 15– 21: “I Mwin te Karawawata aika Mwaiti … E na Roko te Kakabwaia”

Reirei ao Berita aika Tabu 102–105

A uruaki nanoia Aomata aika Itiaki i Kirtland ngke a ongo bwa tariia ma mwaneia ake i Jackson County, Missouri, a kanakoaki ma te matoa man mwengaia. Bon te kaunganano, n te tai arei, ngke e katanoata te Uea bwa “kamaiuan Tion” e na “roko man te mwaaka” (Reirei ao Berita aika Tabu 103:15). Ma te berita anne i nanoia, e riaon 200 mwaane n ikotaki ma 25 aine ao ataei ake a kaaina te waaki ae aranaki bwa Kaembwan Iteraera, are kinaaki i mwiina bwa Kaembwan Tion. Ana mition bon te mwaati nako Missouri ao ni kamaiua Tion.

Nakoia kaain te kaembwa, kamaiuan Tion e nanonaki ni kaokakiia Aoma aika Itiaki nako abaia. Ma bon i mwain rokoia i Jackson County, e tuanga Iotebwa Timiti te Uea bwa e na kamaenakoa ana Kaembwa Tion. Tabeman kaain te kaembwa aki ota ao a un, e taraa n ae e aki koro bukin te mwananga ao ana berita te Uea a aki koro nanoia. Ma, tabeman, a kaokoro taraakina irouia. E ngae ngke a aki reke okin abaia ao mweengaia Aomata aika Itiaki, te kakatai anne e uota aron te “kamaiuaki” nakon Tion, ao e bon “roko man te mwaaka.” Kaain ana Kaembwa Tion aika kakaonimaki, a mwaiti aika riki i mwiina bwa taan kairiiri n te Ekaretia, a kakoaua bwa te kakatai e kamatoaa aia onimaki n mwaakan te Atua, n wetean Iotebwa Timiti ae tabu, ao i Tion—tiaki tii Tion te tabo ma Tion ana aomata te Atua. N aki nanokokoraki ni kakaawakin te katabeaki ae aki koro nanona aei, a reiakinna bwa te tabe raoi bon iriiran te Tia Kamaiu, e ngae ngkana tiaki oota ni bwaai ni kabane. Aio are bon aron Tion, n tokina, e na bon kamaiuaki.

Taraa Saints, 1:194–206; “The Acceptable Offering of Zion’s Camp,” n Revelation in Context, 213–18.

Iango ibukin te Kamatebwai n te Mweenga ao n te Taromauri

Reirei ao Berita aika Tabu 102:12–23

Tera te kaantaninga ibukin kaainakin kauntira?

Mwakoro 102 iai i nanona minitin te boowi are i Kirtland, Ohio, are e moan kateaki iai te moan kauntira ae rietata n te Ekaretia. I nanon kiibu 12–23, e kabwarabwara te Uea taian kawai aika a riai n irii kauntira aika a rietata ngkana a karekea kaainakin te kauntira ibukiia naake a tia n karaoi buure aika kakaiaki.

E reirei Beretitenti M. Russell Ballard, “N tabetai a titiraki membwa bwa bukin tera e karaoki te [membwatibu] kauntira n te Ekaretia. Bon teniua oin bukina: ni kamaiua tamnein te tia bure, ni kamanoa ae akea ana bure, ao ni kamanoa itiakin, raoiroin, ao kinaakin te Ekaretia” (“A Chance to Start Over: Church Disciplinary Councils and the Restoration of Blessings,” Ensign, Tebetembwa. 1990, 15).

Taraa naba Topics and Questions, “Membership councils,” Gospel Library.

Reirei ao Berita aika Tabu 103:1–12, 36; 105:1–19

E tii kona ni kateaki Tion i aon tuan te raoiroi.

Bukin tera a kabuaa abaia ni berita are i Missouri? Tao e mwaiti bukina—ma ti teuana, e taku te Uea, bwa “riaoan te tua irouia au botanaomata.” Ngkana tiaki ibukin anne, Tion “e na kaman tia ni kamaiuaki” (Reirei ao Berita aika Tabu 105:2). Ngkai ko wareka Reirei ao Berita aika Tabu 103:1–12, 36; 105:1–19, ko kona n noori tabeua bwaai ake a tuuka katean Tion i Missouri ao tabeman ake a kona n ibuobuoki. Tera ae ko reiakinna ae kona n buokiko ni katea Tion i nanom, ni mwengam, ao n te kaawa?

Reirei ao Berita aika Tabu 103:12–13, 36; 105:1– 6, 9–19

A roko kakabwaia i mwiin kataakin te onimaki.

N kawai aika a bati, kaainakin ana Kaembwa Tion bon kataan te onimaki. E abwabwaki te mwananga, e kabuebue kanoan te bong, ao n tabetai e uarereke te amwarake ma te ran. Ao i mwiin teimatoaia ni bwaai nako, ana Kaembwa Tion e bon aki te roko ni kaokiia Aika Itiaki nakon abaia. Iangoia bwa e reke am tai ni korea te reta nakon temanna kaain te kaembwa i Tion are e a memeere ana onimaki iroun te Uea man ana taneiai teuanne ke neienne. Tera ae ko na taekinna ni kaungaa te aomata aei? Tera koaua aika ko kunei inanon Reirei ao Berita aika Tabu 103:5–7, 12–13, 36; 105:1–6, 9–19 ae a kona n ibuobuoki?

Ngkanne ko kona ni iangoa te katooto ae e a tibwa riki n te kataaki n aron ana Kaembwa Tion—n aron te mitinare ae mwakuri korakora, ma akea temanna ae kaaina te Ekaretia ibukin ana kekeiaki teuanne ke neienne. Man baike ko a tia n reiakin, ko na kanga ni buoka te mitinare anne n nooria bwa ana mwakuri ni mitinare teuanne ke neienne e bon tokanikai iai?

E kanga te Uea ni kakabwaiako “i mwiin karawawata aika mwaiti”? (Reirei ao Berita aika Tabu 103:12).

Taraa naba 1 Nibwaai 11:16–17; Aramwa 7:11–12; Reirei ao Berita aika Tabu 6:33–36; 84:88; 101:35–36; David A. Bednar, “On the Lord’s Side: Lessons from Zion’s Camp,” Ensign, Turai 2017, 26–35, ke Riaona, Turai 2017, 14–23; Topics and Questions, “Endure to the End,” Gospel Library; “How Firm a Foundation,” Hymns, no. 85.

Katauraoi man kamatebwaian te bwaai ae riki n rongorongo aika a tauaki mwiia n te kaotioti. Te atatai n te bwai ae wakinaki n te kaotioti inanon Reirei ao Berita aika Tabu a kona ni buokiko ni mataata ao ni kamwakurii tuua ake a reiakinaki. Nakomai, Iriirai e katauraoi reitaki nakon bwaai n ibuobuoki aikai. Ibukin Reirei ao Berita aika Tabu 102–5, taraa Saints, 1:194–206; “The Acceptable Offering of Zion’s Camp,” inanon Revelations in Context, 213–18; ao “Voices of the Restoration: Zion’s Camp.”

A katea maekaia irarikin te karaanga ae Little Fishing River Ana Kambwa Iteraera.

Tera te kantaninga n te kataaki?

Iangoa ana taeka n reirei Unimwaane Orson F. Whitney i aon te kantaninga n te kataaki: “Akea te maraki are ti namakinna, akea te kataaki are ti rinanona ae banebuaka te tai iai. E ibuobuoki nakon reireiara, nakon karikirakean aroaro n aron te tataona n nano, te onimaki, te kakorakoraaki ao te nanorinano. Marakira ni kabanea ao baike ti rinanona, riki ngkana ti rinanona ma te tataona n nano, e kamatoai aroarora, e kaitiaki nanora, e kaukanako tamneira, ao e anganira te nanoanga ma te tatangira, n tau riki n aranaki bwa natin te Atua … ao bon rinanon te rawawata ma te maraki, te mwakuri ao te rawawata, are ti karekea iai te reirei are ti roko ikai bwa ti na karekea ao are e na karikira riki n aron Tamara ao Tinara are i Karawa” (in Spencer W. Kimball, Faith Precedes the Miracle [1972], 98).

Reirei ao Berita aika Tabu 104:11–18, 78–83

E a tia ni karikai te Uea bwa te “tia tararua i aon kakabwaian te aonaaba.”

N reitaki ma kakatai i Missouri, n 1834, e kaitara ma te kangaanga n te mwane te Ekaretia, kanoan aei bon te tarau korakora ao te kabanemwane. N mwakoro 104 e anga te kaetieti te Uea iaon aron ana mwane te Ekaretia. Ko na kanga n kauaei reirei n kiibu 11–18 ao 78–83 nakon aron kabonganaan am mwane?

Taraa naba “Treasure in Heaven: The John Tanner Story” ao “The Labor of His Hands” (videos), Gospel Library.

Treasure in Heaven: The John Tanner Story

The Labor of His Hands

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraaia Kairake maekatiin.

Iango ibukin Reiakinaia Ataei

Reirei ao Berita aika Tabu 103:9

I kona n riki bwa “te oota nakon te aonaaba” man iriiran Iesu.

• Ko kona ni kaoiia am ataei bwa a na taua tamnein te taura, te taura te nenea, ke teuana riki te bwai ae e reke iai te oota ngkai ko wareka Reirei ao Berita aika Tabu 103:9. Ti na kanga n riki n ai aron te ota nakoia aomata tabeman ngkana ti iriira Iesu Kristo? Taraa naba “Jesus Wants Me for a Sunbeam” (Aia Boki n Anene Ataei, 60–61).

I kona n riki n aron te ota nakoia aomata tabeman ngkana I iriira Iesu Kristo.

Reirei ao Berita aika Tabu 104:13–18

E tangirai te Uea bwa N na tibwai bwaai ake iai irou ma aomata ake a kainnano.

• Ko na bae n tangiria n anganiia am ataei tebeua te miniti bwa a na karaoi ni koroi rinanin kakabwaia ake e anganiia te Atua (n aron te amwarake, kunnikai, taarena, onimaki, ao te mweenga). Kaungaia bwa a na karin rinanin bwaai ni kabane ake a kona n uringi. I mwiina ikotaki wareka Reirei ao Berita aika Tabu 104:13–18, n taratarai kaeka nakon titiraki n aron aikai: Antai te tia bwaibwai ni koaua ni bwaai ni kabane? Tera ae E tangiria bwa ti na karaoia ma bwaai aikai? Ngkoe ao am ataei kam kona n tibwaia i marenami taneiai ike temanna te aomata e anganiko te bwai ae ko kainnanoia (taraa naba “The Coat” [witeo], Gospel Library).

  The Coat

Reirei ao Berita aika Tabu 104:42

E na kakabwaiaai te Uea ngkai I kawakin Ana tua.

• E mwaiti te tai i nanon mwakoro 104 ae e kakabwaia te Uea “ni kakabwaiaia aika a mwaiti” nakoia naake a kakaonimaki n ongotaeka nakon Ana tua. Ni buokiia ataei ni mataata bwa tera ae nanonaki n “rangi ni mwaiti”, ko kona ni korea te mronron ao tuangiia am ataei bwa a na buokiko ni kamwaiti mronron—korea uoua, ngkanne aua, i mwiina waniua, i mwiina tebwi ma onoua, ao e nako riki. Ni katoa tai are ko karina riki te mronron, buokiia am ataei n iangoa te kakabwaia are e a tia n anganiia Tamara are i Karawa.

Reirei ao Berita aika Tabu 105:38–40

I kona n riki bwa te tia raoi.

• Ni buokiia am ataei n reiakina karakinan ana Kaembwa Tion, ko kona n tibwaa “Mwakoro 36: Ana Kaembwa Tion” (i nanon Karaki man Reirei ao Berita aika Tabu, 135–39, ke witeo ake a irekereke i aon Gospel Library). Katokia ni katoatai ao ni marooro i aon reirei ake ti kona n reiakin man ana Kaembwa Tion—te katooto, e tangiriira te Uea bwa ti na riki bwa taan raoi ao n uaia ni mwakuri irarikin are ti na kakauntaeka ao n uun (taraa naba Russell M. Nelson, “A Kainnanoaki Taan Raoi,” Riaona, Meei 2023, 98–101).

• Ko kona naba ni wareka Reirei ao Berita aika Tabu 105:38–40 ao tuangiia ataei bwa a na teirake ngkana a ongo te taeka ae “rau.” Kabwarabwara bwa e tangiriia Aomata aika Itiaki te uea bwa a na karekea te rau ma aomata aika aki rangi n akoi. Buokiia am ataei bwa a na iangoi bwaai ake a kona n riki iai bwa taan raoi, ao kaoia bwa a na karaoa te kaotioti n aron tabeua kaangaanga.

The Camp of Israel

Ibukin iango riki tabeua, taraa te beeba ni kaongora n te namwakaina aio n Te Rao maekatiin.

Ana Kaembwa Tion (Ana Kaembwa Tion n te Karanga ae Fishing River), iroun Judith A. Mehr