kabataan kag titser nga nagakinanta

Appendix C

Para sa Primary—Mga Instruksyon para sa Singing Time kag sa Presentasyon sang mga Kabataan sa Sakramento nga Miting

Ang mga kanta sa Primary mabaskog nga kasangkapan para buligan ang mga kabataan sa pagtuon parte sa plano sang kalipayan sang Amay nga Langitnon kag sang pundasyon nga mga kamatuoran sang ebanghelyo ni Jesucristo. Samtang nagakinanta ang mga kabataan parte sa mga prinsipyo sang ebanghelyo, ang Balaan nga Espiritu magapamatuod sang kamatuoran sini. Ang mga tinaga kag musika magatiner sa kaisipan kag tagipusuon sang mga kabataan sa bilog nila nga mga kabuhi.

Pangayoa ang bulig sang Espiritu samtang nagahanda ka sa pagtudlo sang ebanghelyo paagi sa musika. Magpaambit sang imo testimonya parte sa mga kamatuoran nga ginakanta ninyo. Buligi ang mga kabataan nga makita kon ako ang koneksyon sang musika sa ila ginatun-an kag ginaeksperiyensyahan sa balay kag sa mga klase sang Primary.

Mga Pagsulundan sa Presentasyon sa Sakramento nga Miting

Sa direksyon sang bishop, ang presentasyon sang mga kabataan sa sakramento nga miting kinaandan nga ginahiwat sa ikaapat nga quarter sang tuig. Bilang Primary presidency kag music leader, magbuligay upod sa manuglaygay sang bishopric nga nagadumala sang Primary sa pagplano sang presentasyon.

Ang presentasyon dapat nga magtugot sa mga kabataan nga magpresentar sang ginatun-an nila kag sang ila mga pamilya sa Libro ni Mormon sa balay kag sa Primary, dala na ang mga kanta sa Primary nga ginkanta nila sa sulod sang tuig. Samtang ginaplano ninyo ang presentasyon, magpanumdom sang mga paagi nga mabuligan sini ang kongregasyon nga magtutok sa Manluluwas kag sa Iya mga pinanudlo.

Ang mga yunit nga diutay lang ang kabataan pwede magpamensar sang mga paagi nga makapartisipar ang mga miyembro sang pamilya upod ang ila mga kabataan. Ang isa ka miyembro sang bishopric pwede nga maghingapos sang miting sa malip-ot nga pamulong-pulong.

Samtang ginahandaan ninyo ang presentasyon, tandai ang masunod nga mga pagsulundan:

• Ang mga praktis indi dapat magkuha sang dako nga oras sang mga klase sa Primary ukon sang mga pamilya.

• Ang mga visual, costume, kag iban pa nga presentasyon sa media indi bagay para sa sakramento nga miting.

Tan-awa sa Mga Pinili nga Bahin sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 12.2.1.2.

Mga Instruksyon sa Singing Time

5 ka minutos (Primary presidency): Pangbukas nga Pangamuyo, balaan nga kasulatan ukon artikulo sang pagtuo, kag isa ka manughambal

20 ka minutos (music leader): Singing Time

Ang Primary presidency kag music leader ang nagapili sang mga kanta para sa tagsa ka bulan para pabakuron ang mga prinsipyo nga ginatun-an sang mga kabataan sa ila mga klase kag sa balay. Ang listahan sang mga kanta nga nagapabakod sining mga prinsipyo nalakip sa sining pagsulundan.

Samtang nagatudlo ka sang kanta sa mga kabataan, agdaha sila nga iistorya ang ila na nga natun-an parte sa mga istorya kag mga prinsipyo sang doktrina nga ginatudlo sang mga kanta. Hagara ang mga kabataan nga iistorya ang ila mga panghunahuna kag mga balatyagon parte sa mga kamatuoran nga makita sa mga kanta.

Ang Mga Himno kag mga Ambahanon sang Kabataan amo ang pinakamayor nga galamiton para sa musika sa Primary. Ang mga himno halin sa hymnbook kag mga kanta halin sa Ang Abyan nagakabagay man. Ang paggamit sang iban pa nga musika magluwas sa musika sang Primary kinahanglan nga aprubahan sang bishopric (tan-awa sa Libro sang Pangkabilogan nga Pagsulundan, 12.3.4).

mga kabataan nga nagakinanta

Musika para sa Singing Time

Enero

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Pebrero

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Marso

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Abril

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Mayo

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Hunyo

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Hulyo

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Agosto

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Septyembre

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Oktubre

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Nobyembre

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Disyembre

• Magpili sang kanta nga nagasuporta sang doktrina nga ginatudlo sini nga bulan sa Dali, Magsunod sa Akon.

Paggamit sang Musika sa Pagtudlo sang Doktrina

Ang singing time gintuyo para buligan ang mga kabataan nga magtuon sang mga kamatuoran sang ebanghelyo. Ang masunod nga mga ideya makainspirar sa imo samtang nagaplano ka sang mga paagi para itudlo ang mga prinsipyo sang ebanghelyo nga makita sa mga himno kag mga kanta sang Primary.

Magbasa sang naangot nga balaan nga mga kasulatan.   Buligi ang mga kabataan nga basahon ang pila sining mga dinalan, kag hambali kon ano ang koneksyon sang balaan nga mga kasulatan sa kanta. Pwede mo man ilista ang pila ka mga balaan nga kasulatan sa board kag hagaron ang mga kabataan nga ipares ang tagsa ka balasahon sa kanta ukon berso sang kanta.

Sulati ang blangko. Magsulat sang berso sang kanta sa board nga may mga kulang nga importante nga mga tinaga. Dayon ipakanta sa kabataan ang kanta, nga nagapamati sa mga tinaga nga dapat isulat sa mga blangko. Samtang ginasulatan nila ang kada blangko, hambali kon ano nga mga prinsipyo sang ebanghelyo ang inyo matun-an halin sa kulang nga mga tinaga.

singing time leader

Magpamatuod. Maghatag sang malip-ot nga testimonya sa mga kabataan parte sa mga kamatuoran sang ebanghelyo nga makita sa kanta sang Primary. Buligi ang mga kabataan nga maintiendihan nga ang pagkanta isa ka paagi nga magpahayag sang testimonya kag mabatyagan ang Espiritu.

Magtindog bilang saksi. Agdaha ang mga kabataan nga magbulos-bulos sa pagtindog kag pag-istorya kon ano ang ila natun-an sa kanta nga ila ginakanta ukon sang ila nabatyagan parte sa mga kamatuoran nga ginatudlo sa kanta. Pamangkota sila kon ano ang ila nabatyagan samtang nagakanta sila, kag buligi sila nga makilala ang impluwensya sang Balaan nga Espiritu.

Maggamit sang mga litrato. Magpabulig sa kabataan sa pagpangita ukon paghimo sang mga litrato nga nagabagay sa importante nga mga tinaga ukon dinalan sa kanta. Hagara sila sa pag-istorya kon ano ang koneksyon sang mga litrato sa kanta kag kon ano ang ginatudlo sang kanta.   Pangabaya ang mga kabataan nga tipunon ang mga litrato kag alsahon ang mga ini sa husto nga pasunod samtang nagakanta kamo sing ululupod.

Magpaambit sang leksyon nga nagagamit sang mga bagay. Pwede ka maggamit sang bagay para mag-inspirar sang diskusyon parte sa kanta. Halimbawa, pwede kamo magkanta upod sa kabataan sang kanta parte sa pagtuo. Pwede ka magpakita sa mga kabataan sang liso kag hambalan kon paano naton ginapakita ang pagtuo kon magtanom kita sang liso; mahimo ini magresulta sa diskusyon parte sa mga paagi nga mapakita naton ang pagtuo kay Jesucristo, nga ginalaragway sa kanta.

Mag-imbitar sang pag-istorya sang personal nga mga eksperiyensya. Buligi ang mga kabataan nga i-angot ang mga prinsipyo nga ginatudlo sa kanta sa mga eksperiyensya nila sa sining mga prinsipyo. Halimbawa, antes magkanta sang kanta parte sa mga templo, pwede mo pangabayon ang mga kabataan nga alsahon ang ila mga kamot kon nakakita na sila sang templo. Agdaha sila, samtang nagakanta sila, nga hunahunaon kon ano ang ila nabatyagan kon makakita sila sang templo.

Magpamangkot. Madamo ka sang pwede ipamangkot samtang nagakanta kamo. Halimbawa, pwede mo pamangkuton ang mga kabataan kon ano ang ila matun-an sa kada berso sang kanta. Pwede mo man sila hambalan nga magpanumdom sang mga pamangkot nga masabat sang kanta. Pwede ini magresulta sa paghambalanay parte sa mga kamatuoran nga ginatudlo sa kanta.

Maggamit sang simple nga mga aksyon sang kamot. Agdaha ang mga kabataan nga magpanumdom sang simple nga mga aksyon sa kamot para buligan sila nga madumduman ang mga tinaga kag mensahe sang kanta.