Tingting long evri risen we ol pipol oli gat blong no serem gospel: “Mi no save inaf”, o” mi no save stret se bae oli intres o nogat,” o ating “mi fraet se bae oli no wantem lisin long mi.” Mebi yu faenem se yuwan yu gat ol semmak tingting ia long sam taem. Ol Man blong Nifae oli bin gat wan moa risen blong no serem gospel wetem Ol Man blong Leman: oli tokbaot olgeta olsem “pipol we i wael mo i bin mekem hat blong olgeta i strong mo i prapa wael; wan pipol we oli glad blong kilimded Ol Man blong Nifae” (Alma 17:14; luk tu long Alma 26:23–25). Be ol boe blong Mosaea oli gat wan moa risen from wanem oli bin filim se oli mas serem gospel wetem Ol Man blong Leman: “oli wantem se oli mas talemaot fasin blong sevem man long evri man, from oli no save tekem se wan sol blong man i save lus” (Mosaea 28:3). Lav ia, we i bin givim insperesen long Amon mo ol brata blong hem, i save givim insperesen tu long yu blong serem gospel wetem ol famli blong yu, ol fren mo olgeta man mo woman we yu save olgeta—iven olgeta we yu luk se bae oli no save akseptem.
Ol Aedia blong Stap Lanem Samting long Hom mo long Jos
Ol simpol fasin blong givim evri samting mo blong wantem blong mekem oltaem i go long Kraes i helpem mi kasem paoa blong Hem.
?Wanem nao yu lanem long Alma 17:1–4 abaot olsem wanem blong gohed blong mekem testemoni blong yu long Jisas Kraes i strong? ?Wanem nao ol boe blong Mosaea oli mekem, mo olsem wanem nao Lod i bin blesem olgeta?
Taem yu rid abaot ol eksperiens blong ol boe blong Mosaea long Alma 17–22, raetemdaon olsem wanem fasin blong olgeta blong rere long saed blong spirit i givim paoa long seves blong olgeta long medel blong Ol Man blong Leman (eksampol, luk long Alma 18:10–18, 34–36; 20:2–5; 22:12–16). ?Wanem nao yumi filim insperesen blong mekem blong folem eksampol blong olgeta?
Ol stori blong jenisim laef we yumi bin ridim long ol skripja, plante taem, oli stap soem wan bigfala samting, be long stamba blong hem, yumi faenem ol man o woman we oli bin gat strong paoa long tingting blong talemaot, mo serem fet blong olgeta long Jisas Kraes. Tingbaot hemia taem yu stap rid abaot Abis mo ol boe blong Mosaea long wik ia.
?Wanem nao yu ting se toktok ia, stap olsem wan tul long han blong God i minim? Bae i help blong yu save tingting long ol tul blong plei wan miusik o ol tul we yu save yusum long evri dei laef blong yu. Long Alma 17:6–12, lukaotem wanem nao ol boe blong Mosaea oli bin mekem blong oli save stap olsem ol tul long han blong God. ?Long wanem wei nao yu save kam wan tul we i gat moa paoa blong save stap helpem ol narawan blong kam long Kraes?
?Wanem nao i tajem hat blong yu abaot Abis long Alma 19:16–36? ?Wanem nao yu lanem long hem abaot helpem ol narawan blong bildimap fet long Kraes? Eksampol. ?Wanem nao yu filim we i save helpem ol pipol we yu lavem olgeta blong oli “biliv long paoa blong God”? (Alma 19:17).
Bae yu save komperem tu eksperiens blong Abis wetem ol prinsipol we Elda Dieter F. Uchtdorf i bin tijim long“Misinari wok: Stap Serem Wanem I Stap long Hat blong Yu” (Liahona, Epril 2019, 15–18). ?Olsem wanem nao Abis i soem ol “Faef Simpol Tingting” blong Elda Uchtdorf? Traem stap raetemdaon sam samting we bae yu save talem abaot Jisas Kraes. Eksampol, “Long mi, Jisas Kraes …” o “Sevya ia i helpem mi …”
Luk tu long Gospel Topik, “Stap Givhan olsem we Sevya I Bin Mekem,” Gospel Laebri; “Brightly Beams Our Father’s Mercy,” Hym, namba 335; “Come and See,” “Come and Help,” “Come and Belong” (ol vidio), Gospel Laebri.
Yusum samting long lesen blong yu. Enitaem we ol pipol oli save luk o tajem wan samting we i go wetem wanem we oli stap lanem, bae oli save tingbaot samting blong wan longfala taem. Sapos yu stap tij abaot Alma 17:11, eksampol, tingting blong stap soem ol tul blong miusik o ol tul blong stap raet blong help givim insperesen long wan storian abaot fasin blong stap wan tul long han blong God.
Taem yumi soem lav long ol narawan, yumi save helpem olgeta blong kasem gospel blong Jisas Kraes.
Lukaotem ol ves long Alma 17–19 we i soem olsem wanem lav blong Amon long Ol Man blong Leman i givim insperesen long ol hadwok blong hem blong serem Gospel blong Jisas Kraes. ?Wanem narafala trutok abaot fasin blong serem gospel we yu stap lanem aot long eksampol blong hem?
Luk tu long “Ammon Serves and Teaches King Lamoni” (video), Gospel Library.
Pikja
Amon i sevem sipsip blong King
Minerva Teichert (1888–1976), Amon I Sevem Ol Animol blong King, 1949–1951, oel long mesonaet, 35 15/16 × 48 inj. Brigham Yang Yunivesiti Miusiom blong Art, 1969.
Afta we hem i talem bakegen fasin blong Lamonae mo ol pipol blong hem we oli bin jenisim laef, Momon i talem i sot stori blong wanem we Jisas Kraes i bin mekem. ?Wanem nao Alma 19:36 i tijim yu abaot fasin blong Lod? ?Wanem bakegen long stori long Alma 19:16–36 i tijim yu abaot Hem? ?Wetaem nao yu bin filim se Lod i stap stretem han blong Hem i kam long yu?
Blong Save God i stamba blong mekem eni sakrifaes.
Komperem wanem we papa blong Lamonae i bin tingting strong blong mekem sakrifaes from, blong sevem laef blong hem (luk long Alma 20:23) wetem wanem we hem i tingting strong blong bae hem i mekem sakrifaes from afta, blong kasem glad blong gospel blong save God (luk long Alma 22:15, 18). Tingting hevi long wanem we bae yu wantem blong mekem sakrifaes from, blong save moa abaot God fulwan.
Blong kasem moa aedia, luk long magasin blong manis ia Liahona mo ol magasin blong Blong Ol Yut Oli Kam Strong.
Testemoni blong mi abaot Jisas Kraes i stap gro taem mi ridim ol skripja, prea mo fast.
?Olsem wanem ol eksampol blong ol boe blong Mosaea oli helpem ol pikinini blong yu blong bildimap testemoni blong olgeta abaot Jisas Kraes? Yu save helpem ol pikinini blong yu blong faenem wanem ol boe blong Mosaea oli bin mekem blong bildimap paoa blong olgeta long saed blong spirit long Alma 17:2–3. Afta, oli save droem ol pikja o faenem ol samting we oli ripresentem ol samting ia. Helpem olgeta blong mekem ol plan blong wanem bae oli mekem blong testemoni blong olgeta i stap strong long Sevya.
Mi save serem gospel blong Jisas Kraes wetem ol narafala man.
Blong lanem olsem wanem blong stap olsem wan tul long han blong God, yu mo ol pikinini blong yu i save luk wan tul blong miusik o wan tul mo tokbaot wanem nao yus blong hem. Afta, save rid long Alma 17:11 mo tokbaot wanem i minim blong stap wan tul blong Papa long Heven blong helpem ol pipol blong lanem abaot Jisas Kraes.
Aktiviti pej blong wik ia i gat ol pikja we oli ripresentem ol trutok we Amon i bin tijim long King Lamonae. Yu save helpem ol pikinini blong yu blong faenem ol trutok ia long Alma 18:24–40. Ol pikinini blong yu oli save aktem se oli ol misinari mo serem wanem oli save abaot ol trutok ia.
Afta we yu rid abaot Abis wetem ol pikinini blong yu (luk long Alma 19:16–20, 28–29), oli save aktem se oli Abis taem oli stap ron long ol ples, stap noknok long ol doa, mo stap talem wanem i hapen long Alma 19:1–17. ?Olsem wanem yumi save kam olsem Abis mo serem wanem yumi save abaot Jisas Kraes mo gospel blong Hem? Ol pikinini blong yu oli save dro ol pikja blong olgetawan we oli stap serem gospel wetem wan o singsing tugeta wan singsing abaot fasin blong serem gospel, olsem “Called to Serve” (Children’s Songbook, 174–75).
Mi save helpem ol narafala man blong kam long Kraes taem mi stap soem lav blong mi long olgeta.
Long fas ples, tugeta King Lamonae mo papa blong hem tufala i gat strong hat agensem gospel. Afta, hat blong tufala i kam sofsof mo oli biliv long Jisas Kraes. ?Olsem wanem samting ia i save hapen? Helpem ol pikinini blong faenemaot ol ansa long kwestin ia, taem yu stap luklukbak long ol eksperiens blong Amon wetem olgeta. Oli save aktem “Japta 23: Amon: Wan Gud Wokman” mo “Japta 24: Amon i Mitim Papa blong King Lamonae” (Ol Stori long Buk blong Momon, 64–68, 69–70). O ating bae ol pikinini blong yu oli laekem blong dro ol pikja blong ol defren pat blong stori mo yusum ol pikja blong talem ol stori. ?Wanem nao Amon i mekem blong helpem Lamonae mo papa blong hem blong openem hat blong tufala long gospel blong Jisas Kraes? (luk long Alma 17:21–25; 20:8–27; 22:1–3).
Yu mo ol pikinini blong yu bae yufala i save tingting long wan we i nidim blong save abaot Jisas Kraes. Helpem olgeta blong tingting long ol wei we oli save stap ol gudfala eksampol mo soem lav long man o woman ia, olsem Amon i bin mekem long Lamonae mo papa blong hem.
Blong kasem moa aedia, luk long magasin blong manis ia blong Friend magasin.