Sa vakavulici ira na nona tamata o Tui Penijamini

Ciqomi na iVakavuvuli ni Tui o Penijamini, mai vei Maria Alejandra Gil

22–28 ni Epereli: “Vakasinaiti ena Loloma Vua na Kalou kei na Tamata Kecega”

Mosaia 1–3

Ni o rogoca na vosa na tui, o na vakasamataka beka na sala vakatui, vale vakatui, tamata talai, kei na dabedabe vakatui. Ena Mosaia 1–3, o na wilika kina me baleta e dua na mataqali tui e duatani. E sega ni bula ena nodra buno na nona tamata, na Tui o Penijamini ia “sa cakacaka sara tiko mada ga e liga[na]” (Mosaia 2:14). Me kua ni ra qaravi koya na tani, e a veiqaravi vei ira na nona tamata ena “igu taucoko, kei na vakasama, kei na kaukauwa kecega sa solia vei [koya] na Turaga” (Mosaia 2:11). E sega ni vinakata na tui oqo me ra qaravi koya na nona tamata; ia, a vakavulici ira me ra sokalou vua na nodratou Tui Vakalomalagi, o Jisu Karisito. E kila vinaka tu na Tui o Penijamini ni o ya “na Turaga Kaukauwa sa dau lewa tiko” (Mosaia 3:5), o koya sa “lako sobu mai lomalagi” ka lako “yani ki na kedra maliwa na tamata, … me rawa kina na veivakabulai vei ira na luve ni tamata ena vakabauti ni yacana” (Mosaia 3:5, 9).

Vakasama eso ni Vuli ena iTikotiko kei na Lotu

Mosaia 1:1–7

“Vakasaqara vagumatua [na ivolanikalou].”

Ena veitikina oqo, raica na sala e vakalougatataki ira kina na tamata nei Penijamini na Tui na ivolatukutuku tabu. E vinaka cake vakacava na nomu bula baleta ni tu vei iko na ivolanikalou?

ivakatakilakila ni semineri

Mosaia 2:10–26

Niu sa qaravi ira na tani, au sa qarava tale tiko ga na Kalou.

Na cava beka o nanuma ni na tukuna na Tui o Penijamini kevaka o taroga vei koya na cava beka na vuna e veiqaravi kina ena nona “igu, vakasama, kei na kaukauwa” kece Mosaia 2:11 Vakasamataka vakatitobu oqo ni o wilika na Mosaia 2:10-26. Na cava e vakavulica na Tui o Penijamini ka vakauqeti iko mo qaravi ira na tani ena sala e vakaibalebale cake? Me vakataka, na cava e kena ibalebale vei iko mo kila ni gauna o qaravi ira kina na tani, o sa qarava tale tikoga na Kalou? (raica na Mosaia 2:17). Vakasaqara na veivakauqeti me baleta na sala o rawa ni qarava kina e dua ena macawa oqo.

Ena gauna mada ga eda kila kina ni dodonu me da qaravi ira na tani, ena so na gauna eda sotava na bolebole. E dua tale na sala me vulici kina na Mosaia 2:10–26 sai koya me volai na dina a vakavulica na Tui o Penijamini ka rawa ni vukei iko mo vorata rawa na bolebole e rawa ni tarovi iko mai na nomu veiqaravi. Na cava soti o sa sotava sa vakaraitaka vei iko ni dina na veika e vakavulica na Tui o Penijamini?

A wasea o Peresitedi Joy D. Jones e dua na ka qaqa a sotava ka veisautaka na ivakarau ni nona raica na qaravi ira eso. Wilika na kena itukutuku ena “Me Baleti Koya” (Ensign se Liaona, Nove. 2018, 50–52), ka vakasamataka na veimadigi eso sa tu vei iko mo qaravi ira kina eso. Sa rawa mo vola e vica ka vakasamataka vakatitobu kina na itukutuku nei Peresitedi Jones, vata kei na Mosaia 2:17, e rawa ni vakauqeta na sala mo raica kina na veimadigi oqo. E dua na serenilotu me vaka na “A Poor Wayfaring Man of Grief” (Serenilotu, naba 29) se na vidio me vaka na “The Old Shoemaker” (Gospel Library) ena rawa mo vakasamataka kina na ikuri ni veivakararamataki.

Raica talega na Maciu 25:40; “Faith Murray’s Story: Overcoming Adversity through Service,” “King Benjamin Teaches about Serving God” (vidio), Gospel Library; JustServe.org; Gospel Topics, “Service,” Gospel Library.

veimokomoko tiko e rua na marama

Niu sa qaravi ira na tamata, au sa qarava tale tikoga na Kalou.

Mosaia 2:38–41

Na bula marau e lako mai ni da maroroya tiko na vunau ni Kalou.

O na vakamacalataka vakacava na marau e lako mai ena talairawarawa vua na Kalou? E tiko beka eso na malanivosa ena Mosaia 2:38–41 ka na rawa ni vukei iko mo vakamacalataka na vuna o muria kina na Nona ivakaro?

Mosaia 3:1–20

Au sa rawa ni tamata yalododonu ena vuku ni Veisorovaki i Jisu Karisito.

Na Tui o Penijamini, me vakataki ira kece na parofita, a vakadinadinataki Jisu Karisito me “bokoci rawa kina na nodra ivalavala ca, ka ra na reki ena marau levu” na nona tamata (Mosaia 3:13 Oqo eso na taro mo vakasamataka vakatitobu ni o wilika na ivakadinadina i Penijamini na Tui me baleta na iVakabula ena Mosaia 3:1–20:

• Na cava au vulica mai na veitikina oqo me baleta na iVakabula kei na Nona ilesilesi?

• Na cava au vulica mai na Mosaia 3:18–19 me baleta na ibalebale meda tamata yalododonu?

• Esa vukei au vakacava o Jisu Karisito meu uabaleta na ivalavala ca, veisautaka na noqu ituvaki, ka yaco meu tamata yalododonu vakalevu cake?

Mosaia 3:5–21

“Na Turaga Kaukauwa … ena lako sobu mai lomalagi.”

Na cava e solia vei iko na kaukauwa vakalivaliva mo rawa ni cakava kina na veika eso? Ena duidui vakacava nomu bula ni yali oqo? Na veitaro oqo ena rawa ni vukei iko mo vakasamataka vakatitobu na kaukauwa cecere e rawa ni kauta mai na iVakabula ki na nomu bula.

Na agilosi a rairai vei Tui Penijamini a vakatokai Jisu Karisito me “Turaga Kaukauwa,” e dua na itutu e kena ibalebale ni tu Vua na kaukauwa kecega. Na cava o vulica mai na Mosaia 3:5–21 me baleta na sala e vakayagataka kina na iVakabula na kaukauwa oya? O sa raica vakacava na kaukauwa ni iVakabula ena nomu bula kei na nodra bula na tamata era tu wavoliti iko? Na cava e rawa kina vei iko ena Nona kaukauwa mo cakava ka yaco mo vakakina? Ena duidui vakacava nomu bula ni yali oqo?

Me ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

Mosaia 2:11–18

Ni‘u sa qaravi ira na tamata, au sa qarava tiko na Kalou.

• Na tabana ni itaviqaravi ena macawa oqo e tiko kina e dua na isala ni tui rawarawa e rawa ni ra cakava na luvemu. Era na vinakata beka me ra veivukevuke ena tucake tu ena dua na idabedabe se sutulu ka dramataka ni ra sa Tui Penijamini ni o wasea tiko eso na ka a vakavulica na Tui o Penijamini vei ira na nona tamata, ka tiko ena Mosaia 2–3. E rawa talega ni o wasea vei ira na “Wase 12: Tui Penijamini” (iTalanoa ena iVola i Momani, 32-35) me solia vei ira e dua na rai me baleta na veivakavulici nei Tui Penijamini.

• Mosaia 2:17 e rawa ni dua na tikina vinaka me ra vulica na luvemuni. Sa rawa mo vukei ira mera tokaruataka ena vica na vosa ena dua na gauna. Se mo vola na tikina oqori, ka yali e vica na vosa bibi, ka kerei ira na luvemu me ra vaqara na vosa e yali tiko. Sa rawa mo qai vosa vei ira na luvemu me baleta na vuna e vinakata kina na Kalou meda veiqaravi vakai keda.

• Sa rawa mo vukei ira na gone me ra vaqaqara ena Mosaia 2:11–18 me ra raica na veika a vakayacora na Tui o Penijamini me veiqaravi. Mera qai vola na luvemu ena tiki ni pepa eso na sala era rawa ni qaravi ira kina na lewe ni matavuvale. Biuta na pepa ena dua na koniteina, me vaka e dua na taga se tavaya, me rawa kina vei ira na luvemu me ra digia e dua ena veisiga ka cakava na cakacaka oya ena veiqaravi vua e dua.

E dau yaga vei ira na gone na tokaruataki ni ivakavuvuli. Kua ni ririko mo tokaruataka vakavica vata na itaviqaravi, vakauasivi vei ira na gone sobu. Na tokarua ena vukei ira na gone me ra nanuma na veika era vulica.

era lobika tiko na gone na tiki ni sulu

E vakavuvulitaka na Tui o Penijamini ni rawa ni da qarava na Kalou ena noda qaravi ira na tamata.

Mosaia 2:19–25

Na noqu veivakalougatataki kece e lako mai vei Tamada Vakalomalagi.

• Na nona veiqaravi na Tui o Penijamini vei ira na nona tamata a vakauqeti ena nona vakavinavinaka titobu vua na Kalou. O na vakauqeta vakacava na yalo vata oqori vei ira na luvemu? Sa rawa mo ni wilika vata na Mosaia 2:21 ka tekivuna e dua na lisi ni veivakalougatataki sa solia vei keda na Tamada Vakalomalagi. Sa rawa mo vakuria ki na lisi eso tale na veivakalougatataki era vakasamataka na gone.

• Oqo e dua na qito e rawa mo ni cakava me vukei ira na luvemu me ra kila na veivakalougatataki ni Tamada Vakalomalagi. E rawa ni ra veisoliyaka wavoki na gone e dua na iyaloyalo ni iVakabula ni ra lagata se rogoca e dua na sere me baleta na vakavinavinaka (raica na “Gratitude” ena ituvatuva vakamatanivola ni ulutaga ni iVolanisere ni Gonelalai). Cegu na lagasere se muduka vagauna na ivakatagi, ka sureti cei ga e taura tu na iyaloyalo oya me tukuna e dua na veivakalougatataki e vakavinavinakataka. Na itukutuku ena Mosaia 2:22–24, e rawa vakacava ni da vakaraitaka ni da vakavinavinakataka na noda veivakalougatataki?

Mosaia 3:5–10, 19

Ena vukei au o Jisu Karisito meu vakataki Koya vakalevu cake.

• A tukuna e dua na agilosi vei Tui Penijamini na dina bibi baleta na bula kei na veiqaravi i Jisu Karisito. Sa rawa vei iko kei ira na luvemu mo ni vakasaqara na iyaloyalo ni so na veika a yaco e tukuni tiko ena Mosaia 3:5–10 (raica me vaka na iVola iYaloyalo ni Kosipeli, naba 30, 41, 42, 57, 59). Ni o wilika na Mosaia 3:5–10, e rawa ni ra laveta na ligadra na luvemuni ni ra rogoca e dua na ka ena malanivosa e basika ena dua vei ira na iyaloyalo.

• Era sa bau veivuke beka na luvemu ena kena vakarautaki na kakana ni vakayagataki e dua na icakacaka ni kakana? Sa qai rawa ni o sureti ira me ra vakayagataka na Mosaia 3:19 me rawati kina e dua na “kena icakacaka” ena ivakarau me da yaco kina me vakataki Jisu Karisito. E vukei keda vakacava o Jisu Karisito me da vakataki Koya?

Me ikuri ni vakasama tale eso, raica na ilavelave ni vula oqo ena iTokani ena kena mekasini.

Na Tui o Penijamini e vunau tiko vei ira na nona tamata

Na Vosa nei Penijamini na Tui, mai vei Jeremy Winborg

tabana ni itaviqaravi: niu sa qaravi ira na tamata, au sa qarava tale tiko ga na Kalou.