pamilya nga nagatuon sang balaan nga mga kasulatan

Paggamit sang Dali, Magsunod sa Akon—Para sa Puluy-an kag Simbahan

Para Kay Sin-o Ang Ining Materyal?

Ini nga manwal para sa bisan sin-o nga gusto magtuon halin sa Libro ni Mormon—bilang indibidwal, bilang pamilya, kag sa mga klase sa Simbahan. Kon wala mo pa matun-an ang balaan nga mga kasulatan sing regular sang una, ang ining materyal makabulig sa imo nga magsugod. Kon may ara ka na sang maayo nga kagawian sang pagtuon sang balaan nga mga kasulatan, ang ining materyal makabulig sa imo nga makaangkon sang mas makahulugan nga mga eksperiyensya.

Mga Indibidwal kag mga Pamilya sa Puluy-an

Ang pinakanami nga lugar sa pagtuon sang ebanghelyo amo ang puluy-an. Ang mga titser mo sa simbahan makasuporta sa imo, kag makabaton ka sang pagpapagsik halin sa iban nga mga miyembro sang ward. Pero agud maglampuwas sa espirituhanon, ikaw kag ang imo pamilya nagakinahanglan sang adlaw-adlaw nga sustansya halin sa “maayo nga pulong sang Dios” (Moroni 6:4; tan-awa man sa Russell M. Nelson, “Nagabukas nga Pamulong-pulong,” Liahona, Nob. 2018, 6–8).

Gamita ang materyal nga ini sa ano man nga paagi nga makabulig sa imo. Ang mga outline nagapatalupangod sang pila ka wala katapusan nga mga kamatuoran sa Libro ni Mormon kag nagapanugyan sang mga ideya kag aktibidades nga makabulig sa imo sa pagtuon sang balaan nga mga kasulatan sing indibidwal, upod sa imo pamilya, ukon upod sa mga abyan. Samtang nagatuon ka, sunda ang giya sang Espiritu sa pagpangita sang wala katapusan nga mga kamatuoran nga makahulugan para sa imo. Pangitaa ang mga mensahe sang Dios para sa imo, kag sunda ang mga pagpabatyag nga imo mabaton.

Mga Titser kag mga Manugtuon sa Simbahan

Kon nagatudlo ka sang klase sa Primary, klase sang mga lamharon ukon hamtong sa Sunday School, korum sang Aaronic Priesthood, ukon klase sang Young Women, ginapanugyan sa imo nga gamiton ang mga outline sa sining manwal samtang nagahanda ka sa pagtudlo. Ang Dali, Magsunod sa Akon—Para sa Puluy-an kag Simbahan amo ang kurikulum para sa klase mo kon Domingo. Ang mga ideya sa pagtuon sa sining manwal gindisenyo para sa pagtuon sa puluy-an kag sa simbahan. Samtang nagahanda ka sa pagtudlo, magsugod paagi sa pag-agom sang imo kaugalingon nga mga eksperiyensya sa balaan nga mga kasulatan. Ang imo pinakaimportante nga preparasyon matabo sa pagtuon mo sang balaan nga mga kasulatan kag pagpangayo sang inspirasyon sang Balaan nga Espiritu. Pangitaa ang wala katapusan nga mga kamatuoran nga makabulig sa imo nga mangin mas pareho sa Amay nga Langitnon kag kay Jesucristo. Ang Dali, Magsunod sa Akon makabulig sa imo nga kilalahon ang pila sining mga kamatuoran kag maintiendihan ang konteksto sang balaan nga mga kasulatan.

Tandai nga ang pagtuon sang ebanghelyo, pinakamaayo nga, nasentro sa puluy-an kag suportado sang Simbahan. Buot silingon, ang imo mayor nga responsibilidad amo nga suportahan ang mga tawo nga imo ginatudloan sa ila mga pagpaninguha nga magtuon kag ipangabuhi ang ebanghelyo sa puluy-an. Hatagi sila sang mga oportunidad nga iistorya ang ila mga eksperiyensya, mga panghunahuna, kag mga pamangkot parte sa mga dinalan sang balaan nga kasulatan. Agdaha sila sa pagpaambit sang wala katapusan nga mga kamatuoran nga ila nakita. Mas importante pa ini sangsa pagtapos sang halos tanan nga topiko.

Primary

Ang imo preparasyon sa pagtudlo sang Primary nagasugod sa imo pagtuon sang Libro ni Mormon sing personal kag upod ang imo pamilya. Samtang ginahimo mo ini, mangin bukas sa espirituhanon nga mga pagpabatyag kag mga ideya halin sa Balaan nga Espiritu parte sa mga kabataan sa imo klase sa Primary. Mangin mainampuon, kag hatagan ka sang Espiritu sang mga idea kon paano sila buligan nga magtuon sang ebanghelyo ni Jesucristo.

Samtang nagapreparar ka sa pagtudlo, pwede nga makaagom ka sang dugang nga inspirasyon paagi sa pagtuon sang mga ideya sa pagtudlo nga ari sa sining manwal. Ang tagsa ka outline sa Dali, Magsunod sa Akon—Para sa Puluy-an kag Simbahan may seksyon nga ginatig-ulohan “Mga Ideya para sa Pagtudlo sang mga Kabataan.” Hunahunaa ining mga ideya bilang mga panugyan para pukawon ang imo inspirasyon. Kilala mo ang mga kabataan sa imo klase sa Primary—kag mas makilala mo sila samtang nagapakigsimpon ka sa ila sa klase. Kilala man sila sang Dios, kag hatagan ka Niya sang inspirasyon kon ano ang pinakamaayo nga mga paagi para tudloan kag bugayan sila.

Posible nga ang mga kabataan sa imo klase nakatapos na sang pila ka aktibidades sa Dali, Magsunod sa Akon upod sa ila mga pamilya. OK lang ina. Maayo ang pagsulit-sulit. Pamensara nga hagaron ang mga bata nga iistorya sa kada isa ang ila natun-an sa balay—pero dapat magplano ka man sang mga paagi nga makapartisipar ang mga kabataan bisan nga wala sila nagatuon sa balay. Mas makatuon ang mga kabataan sang mga kamatuoran sang ebanghelyo kon ining mga kamatuoran ginasulit-sulit sa pagtudlo paagi sa lainlain nga aktibidades. Kon pamatyag mo epektibo ang isa ka aktibidades sa pagtuon para sa kabataan, sulita ini, labi na gid kon nagatudlo ka sang mas magagmay nga kabataan. Pwede mo man rebyuhon ang isa ka aktibidades halin sa nagligad nga leksyon.

Sa mga bulan nga may lima ka Domingo, ginapaisog ang mga titser sang Primary nga islan ang naiskedyul nga leksyon sa Dali, Magsunod sa Akon para sa ikalima nga Domingo sang isa ukon mas madamo pa nga mga kahiwatan sa pagtuon nga makita sa “Appendix B: Para sa Primary—Paghanda sang Inyo Kabataan para sa Bilog-Kinabuhi sa Dalan sang Kasugtanan sang Dios.”

Mga Klase sa Sunday School sang mga Lamharon kag Hamtong

Isa sa mayor nga rason nga nagatipon kita sa mga klase sa Sunday School amo nga suportahan kag papagsikon ang kada isa samtang ginatinguhaan naton nga sundon si Jesucristo. Isa ka simple nga paagi para himuon ini amo ang mamangkot pareho sang “Ano ang gintudlo sang Balaan nga Espiritu sa imo sini nga semana samtang ginatun-an mo ang Libro ni Mormon upod sa Dali, Magsunod sa Akon?” Ang mga sabat sa sining pamangkot magaresulta sa makahulugan nga mga diskusyon nga nagapatubo sang pagtuo kay Jesucristo kag sa Iya ebanghelyo.

Dayon pwede mo sugdan ang diskusyon base sa ginapanugyan sa Dali, Magsunod sa Akon. Halimbawa, ang isa ka ideya sa pagtuon nagapanugyan nga basahon ang Alma 36 kag ilista ang mga tinaga nga nagatudlo parte sa papel sang Manluluwas sa paghinulsol. Pwede mo pangabayon ang mga miyembro sang klase nga magpaambit kag istoryahan ang mga tinaga nga ila nakita. Ukon pwede ka maghatag sang oras para himuon ini nga lista bilang klase.

Mga Korum sang Aaronic Priesthood kag mga Klase sa Young Women

Kon ang mga korum sang Aaronic Priesthood kag mga klase sa Young Women nagatipon kon Domingo, ang ila katuyuan lain gawa sangsa klase sa Sunday School. Dugang pa sa pagbulig sa kada isa nga magtuon sang ebanghelyo ni Jesucristo, ini nga mga grupo nagatipon man sa pagkonsultahanay parte sa pagtuman sang buluhaton sang kaluwasan kag pangkahitaasan (tan-awa sa Libro sang Pangkabilogan nga Pagsulundan: Pagserbisyo sa Ang Simbahan ni Jesucristo sang mga Santos sa Ulihing mga Adlaw, 1.2). Ginahimo nila ini sa direksyon sang mga presidency sang klase kag korum.

Tungod sini, ang tagsa ka miting sang korum ukon klase dapat magsugod nga ginapangunahan sang isa ka miyembro sa presidency sang korum ukon klase ang diskusyon parte sa mga pagpaninguha, halimbawa, sa pagpangabuhi sang ebanghelyo, pagminister sa mga tawo nga nagakinahanglan, pagpaambit sang ebanghelyo, ukon pagpartisipar sa buluhaton sang templo kag family history.

Pagkatapos sining oras sang pagkonsultahanay, isa ka instruktor ang magapanguna sa klase ukon korum sa pagtuon sang ebanghelyo sing ululupod. Ang hamtong nga mga lider ukon miyembro sang klase ukon korum pwede maasayn sa pagtudlo. Ang presidency sang klase ukon korum, nga nagakonsulta sa hamtong nga mga lider, ang nagahimo sini nga mga asaynment.

Ang mga tawo nga naasayn sa pagtudlo dapat nga maghanda paagi sa paggamit sang mga suhestyon sa pagtuon sa semanal nga outline sang Dali, Magsunod sa Akon. Sa tagsa ka outline, ini nga icon tanda sang aktibidades nga para gid sa mga lamharon. Pero, pwede gamiton ang bisan ano nga panugyan sa outline bilang kahiwatan sa pagtuon para sa mga lamharon.

Para sa sampol nga agenda para sa mga miting sang korum kag klase, tan-awa sa appendix D.