“Alema le Itiiti,” Tala o le Tusi a Mamona (2023)
“Alema le Itiiti,” Tala o le Tusi a Mamona
Alema le Itiiti
O se suiga tele
Na tuuina atu e le Tupu o Mosaea ia Alema le pule e taitai ai le Ekalesia i Sara’emila. Na aoao e Alema tagata ia salamo ma ia faatuatua i le Alii.
Sa i ai se atalii o Alema o lē sa igoa foi ia Alema. Sa le’i talitonu Alema le Itiiti i mea na aoao atu e lona tamā.
Sa i ai atalii o Mosaea sa le’i talitonu foi i le Alii. Sa latou uo ma Alema le Itiiti. Sa mananao i latou uma e o ese tagata mai le Ekalesia. Na taitai atu e Alema ma atalii o Mosaea le toatele o tagata e faia mea e faasagatau i poloaiga a le Atua.
I se tasi aso, na auina mai ai e le Alii se agelu e taofi i latou. Na ta’u atu e le agelu ia i latou e tuu le taumafai e faaumatia le Ekalesia a le Atua. Sa matua fefefe Alema ma atalii o Mosaea ua latou pauu ai i le eleele.
Sa le mafai e Alema ona tautala pe minoi mo aso e tolu ma po e tolu. Sa ia lagona le faanoanoa tele ona o mea sese uma sa ia faia. Sa popole foi o ia ona sa ia taitaieseina le toatele o tagata mai le Alii.
Sa lagona e Alema le tiga tele ona o ana agasala. Ona ia manatua lea o lona tamā o talanoa e uiga ia Iesu Keriso, le Alo o le Atua.
Sa tatalo Alema ia faamagalo o ia e Iesu. Ina ua uma ona ia tatalo, sa le mafai ona ia manatuaina lona tiga. Sa ia iloa ua faamagaloina o ia e le Alii. Na te le’i toe lagonaina le faanoanoa e uiga i ana agasala. Nai lo lena, sa lagona e Alema le fiafia tele.
Mosaea 27:24, 28–29; Alema 36:18–22
Na toe maua e Alema lona malosi. Sa tonu ia te ia ma atalii o Mosaea e salamo ma taumafai e faaleleia tiga uma na latou faia. Sa latou auauna atu i le Alii mai lena taimi agai i luma e ala i le fesoasoani atu i isi ia salamo. Sa latou faimalaga atu i le laueleele na pulea e Mosaea ma aoao atu tagata e uiga ia Iesu.
Mosaea 27:20–24, 32–37; Alema 36:23–26
Na mananao Alema ma atalii o Mosaea e faasoa atu le fiafia na aumaia e aoaoga a Iesu i o latou olaga. Sa latou galulue malosi e auauna atu i le Alii ma tagata. Na filifili atalii o Mosaea e o ma aoao atu sa Lamanā e uiga ia Iesu. Na filifili Alema e nofo ma aoao pea sa Nifaē.