“Usa ka Barko nga Motabok sa Kadagatan,” Mga Sugilanon sa Basahon ni Mormon (2023)
“Usa ka Barko nga Motabok sa Kadagatan,” Mga Sugilanon sa Basahon ni Mormon
Usa ka Barko nga Motabok sa Kadagatan
Pagpangandam sa pag-adto sa gisaad nga yuta
Ang Bountiful usa ka yuta nga puno sa mga bunga ug dugos. Matahom kini nga dapit nga kapuy-an. Ang pamilya ni Lehi ug ni Sariah nagpuyo daplin sa dagat ug aduna sa tanan nga ilang gikinahanglan.
Human sa pipila ka adlaw, ang Ginoo misulti ni Nephi sa pag-adto sa bungtod aron mag-ampo. Didto, gisultihan siya sa Ginoo sa pagtukod og usa ka barko nga modala sa iyang pamilya tabok sa dagat.
Gipakita sa Ginoo kang Nephi unsaon paghimo sa barko. Apan wala mahibalo si Nephi kon asa mangita og puthaw aron himoong mga gamit. Gipakita sa Ginoo kang Nephi kon asa makakita og puthaw.
Sa wala madugay, nakahimo si Nephi og kalayo aron makahimo og mga gamit. Si Laman ug Lemuel nagtan-aw sa ilang igsoon nga si Nephi. Dili sila gustong motabang kaniya sa paghimo og barko. Nagtuo sila nga dili maayong ideya ang pagsulay og tabok sa dagat.
Si Laman ug Lemuel wala motuo nga ang Ginoo misulti kang Nephi sa paghimo og barko. Gipangutana sila ni Nephi nganong wala gihapon silay hugot nga pagtuo sa Ginoo. Gipahinumdoman nila ang iyang mga igsoong lalaki nga nakakita na sila og anghel ug nahibalo sa gahom sa Ginoo. Si Laman ug Lemuel hilabihan kasuko nga gusto nilang patyon si Nephi.
Apan si Nephi napuno sa gahom sa Dios. Si Nephi mipahimangno ni Laman ug Lemuel sa dili paghikap kaniya. Nangahadlok sila ug wala mangahas sa paghikap kang Nephi sulod sa daghang adlaw. Dayon miingon ang Ginoo kang Nephi sa paghikap sa iyang mga igsoon. Dihang gihikap sila ni Nephi, mibati sila nga gipakurog sa gahom sa Dios.
Si Laman ug Lemuel misimba sa Ginoo ug mitabang sa pagtukod sa barko. Si Nephi nag-ampo sa Ginoo sa daghang higayon alang sa tabang. Ang barko nga gitukod sa pamilya ni Nephi maanindot. Human sa daghang adlaw, nahuman ang barko, ug nakita nila nga maayo kini. Ang pamilya ni Nephi nasayod nga gitabangan sila sa Ginoo.