Mamona 3–6

O Le Pau o le Malo o sa Nifae

O le taua mulimuli a sa Nifae

Pe na i ai se taimi na e popole ai e uiga i se tasi e te alofa i ai? I le talanoa ai e uiga i tagata na siomia o ia, na fai mai ai Mamona, “Sa ou taitaia i latou … ma sa [ou] alofa ia te i latou … ma lo’u loto atoa” (Mamona 3:12). Ae sa popole ma faanoanoa Mamona mo lona nuu a o latou agai atu i le faafanoga ona sa latou mumusu e liliu atu i le Atua mo se fesoasoani. O lenei lesona e mafai ona fesoasoani ia te oe e lagona ai le taua o le liliu atu i le Tama Faalelagi ma le Faaola i lou olaga.

Tuuina atu se vaaiga aoao o le faasologa o tala taua o tusitusiga paia. E mafai ona malamalama atili tagata aoga i le faatatauga ma le anotusi o mau pe a latou vaai i le ata lautele. Faasino maoti tagata taitoatasi taua, mea na tutupu, ma aoaoga faaperofeta i se faasologa o tala faasolo patino. Fautuaina tagata aoga e mafaufau pe faapefea e nei elemene ona faatosinaina lo latou malamalama i le talalelei a le Alii.

Sauniuniga a le tagata aoga: Valaaulia tagata aoga e taumafai e toe mafaufau i se taimi na fesoasoani ai le Atua ia i latou e ala i se tauiviga ona sa latou ole atu ia te Ia mo se fesoasoani.

Gaoioiga e Ono Mafai Ona Aoao Ai

O le a se mea e ao ona e faia?

Sa faamatala e Elder Spencer J. Condie o le Fitugafulu le tala i se alii e igoa ia Murray Ling, o le sa tietie atu i se alalaupapa i le po ina ua ia vaaia le taavale i luma atu o ia na faafuasei lava ona mou ese atu. Sa pa’u ese se vaega tele o le alalaupapa sa i ona luma atu. Sa tu Murray i taofi ma tu ai lana taavale i le taimi lava lea.

• Afai sa e i ai i le tulaga o Murray, mata o a nisi o mea muamua o le a e faia pe a uma ona taofi lau taavale?

Faitau le tala lenei i le mea na filifili Murray e fai. Pe atonu e te manao e matamata i le vitiō “O lapataiga a Perofeta,” o loo maua i le ChurchofJesusChrist.org, mai le faailo taimi 0:00 i le 0:58.

Elder Spencer J. Condie

Murray … sa amata ona lapataia i latou o loo agai mai i le alatele i le faalavelave o loo i luma atu. A o ia talotalo atu ma le popole ona lima, i lona mata’u, sa “tami ese se taavale ia te ia ma pau ifo i le pu” (Stephen Johnson, “Over the Edge!” Reader’s Digest, Nov. 1977, i. 128). O le taavale lona lua sa tauau lava e le tu i lea taimi, ae o le taavale lona tolu sa lei faaalia ai se faailoga o le faalemu ma taia ai le taavale a le aiga o Ling i le faatausiusiuga o le alalaupapa.

Na faafuasei lava ona agai atu se pasi tumu i tagata agai atu ia Murray, ma le lē amanaiaina o ona lima talotalo. (Spencer J. Condie, “A Mighty Change of Heart,” Ensign, Nov. 1993, 17)

• Afai sa e i ai i le tulaga o Murray, o le a sou lagona pe afai e le amanaiaina oe e tagata? Mata o le a taofia lou taumafai e laveai i latou? Aisea pe aisea foi e leai ai?

E pei lava o Murray Ling, na vaai Mamona o loo agai atu lona nuu mo le faafanoga. I le avea ai ma taitai o autau a sa Nifae, ma i le avea ai ma se perofeta a le Atua, sa faia e Mamona mea uma na te mafaia e lapatai ai i latou, puipuia i latou, ma aoao i latou e uiga i lo latou Faaola. Ae paga lea, o le toatele o ona tagata sa le amanaiaina pe teena taumafaiga a Mamona.

Tulaga matautia i luma atu mo le nuu o Mamona

I Lona mua’i silafiaina, sa lapataiaina ai e le Atua sa Nifae mo le fia selau o tausaga e uiga i le mea o le a tupu pe afai latou te faaauau pea ona fouvale faasaga ia te Ia.

Ina ia vaai i se faataitaiga se tasi, faitau le Helamana 13:8–10, ma vaavaai mo se valoaga na faia e le Atua e ala ia Samuelu le sa Lamana i le silia ma le 300 tausaga a o lei fanau mai Mamona. A o e faitauina, maitau le taimi o le a faataunuuina ai le valoaga. (Tagai 1 Nifae 12:6, 11–19 ma le 3 Nifae 27:30–32 mo nisi faataitaiga o le mua’i silafia ma lapataiga a le Atua o le a faataunuuina i ona po o Mamona.)

• Aisea e te manatu ai o le a muai faailoa mamao mai e le Atua lenei mea?

Valaaulia tagata aoga e faitau fuaitau nei ma mafaufau pe aisea o le a taumafai malosi ai Mamona e fesoasoani i lona nuu e ui lava na ia iloa valoaga o lo latou faatafunaga. Ona valaaulia lea o i latou e faasoa atu o latou malamalama’aga i se paga. O tali e ono aofia ai le manao o Mamona e laveai le toatele o tagata na te mafaia e ui lava ina sa ia iloa o le a faaumatia le malo o sa Nifae.

• Mamona 3:1–3, 12

• Moronae 9:3–5, 18–22 (Na faasoa mai e Moronae se tusi na tusia e lona tama, o Mamona.)

• O a ni mea talitutusa o e vaaia i le va o taumafaiga ma manaoga o Mamona ma taumafaiga ma manaoga o le Faaola?

Valaau atu i le Atua

Mafaufau e tusi le fuaiupu le uma lenei i luga o le laupapa ma valaaulia tagata aoga e o mai i le laupapa ma faatumu avanoa i tauiviga masani a le autalavou.

• “E toatele talavou i aso nei o loo tauivi ma .”

Na faasoa mai e Mamona se tasi o mafuaaga na matua faigata ai ia sa Nifae o latou tauiviga. Faitau le Mamona 5:2, ma vaavaai mo mea sa LEI faia e sa Nifae a o latou feagai ma tauiviga.

• E mafai faapefea e mea na faasoa mai e Mamona i le fuaiupu 2 ona faatatau i le toatele o tagata i aso nei?

Faauma le faamatalaga o i luga o le laupapa ina ia faitauina ai faapea:

• “E toatele talavou i aso nei o loo tauivi i e aunoa ma le valaau atu i le Atua mo se fesoasoani.”

Fesoasoani i tagata aoga ia malamalama o le a le aveesea i taimi uma e le Atua mea tatou te tauivi ai ae o le a Ia fesoasoani mai ia i tatou i na mea pe afai tatou te liliu atu ia te Ia. Valaaulia ni volenitia e faasoa mai ni taimi na latou valaau atu ai i le Atua mo se fesoasoani i se tasi o tauiviga i luga o le laupapa ma pe na faapefea ona fesoasoani le Atua ia i latou i lena mea. Lapataia tagata aoga e aua nei faasoa maia se mea e patino tele i le vasega.

Valaaulia tagata aoga e mafaufau loloto pe o i ai ni tauiviga i o latou olaga latou te lei ole atu ai mo le fesoasoani a le Atua. Fautuaina i latou e saili Lana fesoasoani i se tasi o na vaega ma ia maitau le eseesega na te faia i le aluga o taimi.

O le faatafunaga o sa Nifae

Mafaufau e faaali atu le ata lenei ma valaaulia se tagata aoga e faasoa mai mea o loo faailoa mai ai. Faaaoga le faamatalaga o loo i le parakalafa lenei pe a talafeagai ai.

Ua Faamavae atu Mamona i se Malo Maoae sa I Ai, saunia e Arnold Friberg

I le mavae ai o le alofaina, aoaoina, ma le taitaiina o autau a sa Nifae mo le tele o tausaga, sa matuai manu’a ogaoga ai Mamona i le taua mulimuli ma sa Lamana. Mai le tumutumu o se maupuepue, sa ia iloiloina ai o mea na totoe o le malo o sa Nifae. E na o le 24 fitafita sa Nifae na sao mai le fasiga, e aofia ai Mamona ma lona atalii o Moronae (tagai Mamona 6:9–15).

I le Mamona 6, o loo tusia ai e Mamona le “tauiviga mulimuli a [lona] nuu” (Mamona 6:6). Faitau le Mamona 6:7, 10–15, ma vaavaai mo le mea na tupu ia sa Nifae i lenei taua faaiu.

Atonu e te manao e tuu atu i tagata aoga e mafaufau pe toafia sa Nifae na faapotopoto i le amataga o le taua ma pe toafia na totoe ina ua mavae le taua. Atonu latou te maitauina e 23 taitaiau sa Nifae na tofu ma fitafita e toa 10,000 mo se aofaiga e 230,000 sa Nifae. E na o le 24 sa Nifae na sao mai i lenei taua mulimuli.

Vaai faalemafaufau i le i ai i le tulaga o Mamona, i le faanoanoa ai i le leiloloa o tagata e pele ia te oe peitai ia iloaina e mafai lava ona e tuua se savali puupuu mo augatupulaga i le lumanai. O le a se mea e te manao ia iloa e tagata i aso e gata ai?

Faitau le Mamona 5:10–11, 16–18; 6:16–20 e vaai ai i nisi o savali na musuia Mamona e togitogia mo i tatou. Atonu e te manao e faailoga fasifuaitau e te manatu e sili ona manaomia e tagata i o tatou aso ona faalogo i ai.

Mafaufau e valaaulia tagata aoga e faasoa mai fasifuaitau na o latou maua ma se paga. A’o faailoa mai e tagata aoga upumoni, atonu e te manao e tusi ia mea i luga o le laupapa. O le vaega o totoe o lenei lesona e taulai atu i le upumoni lenei. Atonu e te lagona le uunaiga e taulai atu i se isi upumoni e faailoa mai e tagata aoga.

O se tasi upumoni na aoao mai e Mamona e faapea na tula’i mai Iesu Keriso ma aao faaloaloa e talia i latou o e filifili e salamo ma omai ia te Ia (tagai Mamona 6:17).

Mafaufau e moeiini ou mata mo sina taimi ma mafaufau ia Iesu o tu ma silasila atu ia te oe ma aao faaloaloa. Tusi i lau api talaaga ou manatu, lagona, ma uunaiga e faatatau i le uiga i lou olaga o loo tula’i Iesu ma aao faaloaloa e talia oe.

Fautuaina tagata aoga ia faaeteete ia aua nei faasoa maia so o se mea e patino tele pe afai e te talanoaina fesili nei ma le vasega.

• O le fea o aoaoga nei a Mamona e sili ona e manaomia i lou olaga? Aisea?

• O a ni mea sa manao Mamona e te malamalama ai i le Tama Faalelagi ma Iesu Keriso?

• O le a sou manatu i se eseesega o le a i ai lo tatou lalolagi pe afai e toatele atu tagata e talitonu i mea na tusia e Mamona?

Manatu ma Talaaga o Faamatalaga

O le a le uiga o le “opoina [ma le mau] i aao o Iesu” (Mamona 5:11)?

Fai mai Elder Kent F. Richards o le Fitugafulu:

Elder Kent F. Richards

O i latou uma lava e o mai, e mafai ona “fusia i aao o Iesu.” [Mamona 5:11]. E mafai ona faamaloloina agaga uma i Lona mana. E mafai ona fōfōina tiga uma. E mafai ona tatou “maua le malologa o o [tatou] agaga ia te Ia. [Mataio 11:29]. Atonu o le a le vave suia o tatou tulaga i la le tino, ae e mafai ona aveesea o tatou tiga, mafatiaga, ma le fefe i Lona filemu ma le pulupāsama faamalolo. (Kent F. Richards, “O Le Togiola e Aofia ai Tiga Uma,” Ensign poo Liahona, Me 2011, 16)

Mamona 6:17. O le a se mea e mafai ona e aoao mai i le faatusa o Iesu o loo tu “ma aao faaloaloa e talia oe”?

Na faasoa mai e Elder Neil L. Andersen o le Korama a Aposetolo e Toasefululua:

Elder Neil L. Andersen

O’u uso ma tuafafine, o la’u folafolaga ia te outou o le faateleina o lo outou faatuatua i le Alii o Iesu Keriso o le a aumaia ai ia te oe le malosi faaopoopoina ma le faamoemoe sili atu. Mo outou, o ē amiotonu, o le Fomai o ō tatou agaga, i Lana lava taimi ma i Lana lava ala, o le a faamalolo i o outou manu’a uma. E leai se amioletonu, leai se sauaga, leai se tofotofoga, leai se faanoanoa, leai se lototiga, leai se mafatiaga, leai se manu’a—po o le a le loloto, po le a le lautele, po o le a le tiga—o le a taofia mai le faamafanafanaga, filemu, ma le faamoemoe tumau ia te Ia o lē e ona aao mafola ma aao sa manu’a o le a faafeiloaia mai i tatou i Lona afioaga. (Neil L. Andersen, “Manu’a” Ensign po o le Liahona, Nov. 2018, 86)

Na faamalamalama mai e Elder Neal A. Maxwell (1926–2004) o le Korama a Aposetolo e Toasefululua e faapea o Iesu lava ia o le leoleo faitotoa ma “na te le faaaogaina se auauna iina” (2 Nifae 9:41). … O le a ou ta’u atu ia te outou—mai le talitonuga maumaututu o lo’u agaga—o le mea ou te manatu o le mafuaaga autu lava, e pei ona i ai i se isi mau o le Tusi a Mamona o loo faapea mai o loo faatalitali mai o ia mo outou “ma aao faaloaloa mai” (Mamona 6:17). O le pogai lena o loo i ai o ia iina! … E matua mamana tele lena atafaatusa e le tatau ai ona faamatuueseina. … E faatali mai o Ia mo i tatou ma aao e faaloaloa mai, aua e atoatoa lona alofa mo i tatou” (But a Few Days,” [saunoaga i faiaoga faalelotu a le Ofisa o Aoga a le Ekalesia, Sete. 10, 1982; ua faaonaponei faailoga], 9–10).

Gaoioiga Faaopoopo e Aoao Ai

Mamona 5:11. “Fusia i latou i aao o Iesu”

Afai o le a fesoasoani i le vasega e taulai atu i le finagalo o le Faaola e ave i tatou i Ona aao, mafaufau e faaali atu se ata o Ia opoina se tasi, e pei o lenei:

O Keriso o loo opoina se tamaitiiti

Ona valaaulia lea o tagata aoga e suesue le Mamona 5:11 ma le Mamona 6:17, ma vaavaai mo fasifuaitau e mafai ona faamatalaina ai le ata. Valaaulia tagata aoga e faasoa mai o latou manatu i le uiga o fasifuaitau sa latou mauaina. (Afai e aoga, e mafai ona e faasoa atu le saunoaga mai ia Elder Richards, Elder Andersen, po o Elder Maxwell i le vaega o le “Manatu ma Talaaga o Faamatalaga”.)

Filifiliga o le vitio

Afai o le a fesoasoani i tagata aoga le vaai i se ata faatusa o Mamona ma Moronae o faanoanoa i le faatafunaga o sa Nifae, mafaufau e faaali le vitio “O Ye Fair Ones” (5:21).