« នីហ្វៃទី ៣ ២០–២២ ៖ ‹ យើងនឹងប្រមូលរាស្ត្រយើង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ៣ ២០–២២ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី៣ ២០–២២
« យើងនឹងប្រមូលរាស្ត្រយើង »
តើអ្នកអាចគិតអំពីពេលវេលាមួយនៅក្នុងជីវិតរបស់អ្នក មានន័យនៅពេលដែលបាននៅជាមួយនឹងអ្នកឯទៀត ? ហេតុអ្វីបានជាអ្នកគិតថា ព្រះអម្ចាស់បានណែនាំដល់រាស្ដ្រទ្រង់ជាច្រើនដងឲ្យប្រមូលផ្ដុំទាំងខាងរូបកាយ និងខាងវិញ្ញាណ ? នៅក្នុងអំឡុងពេលនៃការងារបម្រើរបស់ព្រះអង្គសង្គ្រោះក្នុងចំណោមពួកសាសន៍នីហ្វៃ ទ្រង់បានប្រកាសថា ព្រះវរបិតាសួគ៌នឹងចងចាំសេចក្តីសញ្ញារបស់ទ្រង់ ដើម្បីប្រមូលសាសន៍អ៊ីស្រាអែលដែលបានខ្ចាត់ខ្ចាយ ។ ហើយទ្រង់បានបើកបង្ហាញទីសម្គាល់ ដើម្បីជួយយើងឲ្យស្គាល់ នៅពេលដែលការប្រមូលនៅថ្ងៃចុងក្រោយបានចាប់ផ្តើម ។ មេរៀននេះអាចជួយដល់អ្នកឲ្យចូលរួមនៅក្នុងការប្រមូលសាសន៍អ៊ីស្រាអែល ។
ការជួយសិស្សឲ្យមានអារម្មណ៍ថា មានតម្លៃ ។ សូមរកមើលរបៀបវិជ្ជមានដើម្បីកោតសរសើរដល់ការចូលរួមចំណែករបស់សិស្ស ។ សូមបង្ហាញអំណរគុណ នៅពេលសិស្សចូលរួមនៅក្នុងដំណើរការរៀនសូត្រ និងជួយដល់សិស្សទាំងអស់គ្នាឲ្យមានអារម្មណ៍ថាមានសុវត្ថិភាព នៅពេលដែលពួកគេចែកចាយអំពីគំនិត និងអារម្មណ៍របស់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យគិតនៅក្នុងអំឡុងពេលកំពុងអានបទគម្ពីរប្រចាំថ្ងៃរបស់ពួកគេអំពីរបៀបដែលព្រះគម្ពីរមរមនបានជួយពួកគេឲ្យចូលទៅកាន់តែជិតព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
កំពុងប្រមូលផ្តុំគ្នា
ដើម្បីចាប់ផ្តើម សូមលើកមែកឈើមួយមែក ឈើដោតការ៉េម ឬឈើចាក់ធ្មេញមួយឡើង ។ សូមណែនាំសិស្សឲ្យធ្វើសកម្មភាពដូចខាងក្រោមនេះ ។
សូមចំណាយពេលបន្តិច ដើម្បីគិតអំពីស្ថានភាពដែលអ្នក ឬនរណាដែលអ្នកស្គាល់ មានអារម្មណ៍ថា ឯកកោ គ្មានសុវត្ថិភាព ឬដូចជាអ្នកដែលមានអារម្មណ៍ថាខ្លួនឯងមិនមានគេរាប់រក ។
ដាក់បញ្ចូលមែកឈើ ឈើដោតការ៉េម ឬឈើចាក់ធ្មេញបន្ថែមមួយទៀតទៅក្រុមតូចមួយនៃវត្ថុដែលដូចគ្នា ។
-
តើការចូលរួមចំណែកជាផ្នែកមួយនៅក្នុងក្រុមអាចជួយដោះការព្រួយបារម្ភទាំងនេះបានដោយរបៀបណា ?
សូមពិចារណាធ្វើការពន្យល់បង្ហាញអំពីរបៀបដែលឈើមួយដើមងាយកាច់បំបាក់កម្រិតណា ខណៈដែលឈើមួយបាច់កាន់តែពិបាកកាច់បំបាក់យ៉ាងណា ។
ដើម្បីពន្យល់អំពីសំណួរបន្ទាប់ សូមដាក់ឈើបន្ទះក្រាស់មួយ ដែកគោលមួយដើមធំ ឬ ដុំដែកមួយចូលទៅក្នុងក្រុមនេះ ។
-
តើមានអត្ថប្រយោជន៍អ្វីខ្លះសម្រាប់ការចូលរួមនៅក្នុងក្រុមមួយ ដែលមានព្រះអម្ចាស់ និងអស់អ្នកដែលដើរតាមទ្រង់ ?
សូមពិចារណាដោយធ្វើការបង្ហាញឃ្លាខាងក្រោមនេះ ហើយទុកពេលស្ងៀមស្ងាត់បន្តិចសម្រាប់សិស្សសញ្ជឹងគិត និងធ្វើស្វ័យវាយតម្លៃ ។
សូមពិចារណាអំពីសេចក្តីថ្លែងការណ៍ដូចខាងក្រោមនេះ ៖ សូមវាយតម្លៃទៅលើឃ្លាទាំងនេះ តើវាទាក់ទងទៅនឹងអ្នកកម្រិតណា ដោយប្រើប្រាស់ពាក្យ « ភាគច្រើន » « ពេលខ្លះ » ឬ « កម្រ » ។
-
ខ្ញុំមានអារម្មណ៍ថា ខ្ញុំមានទំនាក់ទំនងជាមួយនឹងព្រះអម្ចាស់ ហើយថាទ្រង់ការពារ ប្រោសលោះ និងស្រឡាញ់ខ្ញុំ ។
-
ខ្ញុំស្គាល់របៀបដែលព្រះអម្ចាស់អញ្ជើញខ្ញុំឲ្យមករកទ្រង់ ហើយទទួលបានពរជ័យទាំងនេះ ។
-
ខ្ញុំខិតខំជួយដល់អ្នកដទៃទៀតឲ្យជួបជុំជាមួយនឹងព្រះអម្ចាស់ ហើយមានអារម្មណ៍ថា មានសុវត្ថិភាព និងមានចំណែកចូលរួម ។
នៅខណៈពេលដែលអ្នកកំពុងសិក្សាមេរៀននេះ សូមពិចារណាគិតអំពីរបៀបដែលព្រះអម្ចាស់ចង់ប្រមូលបងប្អូន និងអ្នកផ្សេងទៀតឲ្យមកកាន់ទ្រង់ និងសាសនាចក្ររបស់ទ្រង់ដោយសុវត្ថិភាព ។ សូមសញ្ជឹងគិតអំពីរបៀប ដែលអ្នកអាចជួយដល់ព្រះអម្ចាស់នៅក្នុងកិច្ចការប្រមូលផ្តុំដ៏ពិសិដ្ឋរបស់ទ្រង់ ។
« យើងនឹងប្រមូល »
នៅថ្ងៃ ទីពីរនៃការធ្វើដំណើររបស់ព្រះអង្គសង្គ្រោះនៅទ្វីបអាមេរិក បន្ទាប់ពីព្រះអង្គសង្គ្រោះបានអធិស្ឋានទូលសុំ និងបានប្រទានពរដល់ប្រជាជនទាំងនេះ ទ្រង់បានធ្វើសាក្រាម៉ង់ដ៏អស្ចារ្យដល់ពួកគេ ។ បន្ទាប់មក ទ្រង់បានព្យាករណ៍អំពីប្រជាជននៃសេចក្តីសញ្ញារបស់ទ្រង់នៅថ្ងៃចុងក្រោយ ។ ដើម្បីស្វែងយល់អំពីការព្យាករណ៍របស់ទ្រង់ នោះវាមានសារៈសំខាន់ណាស់ ដែលត្រូវចងចាំនូវចំណុចដូចខាងក្រោមនេះ ៖
-
ពីមុន ព្រះអម្ចាស់បានសន្យាដល់អ័ប្រាហាំ និងកូនចៅរបស់លោកដោយ រួមមានទាំងយ៉ាកុប ( មានឈ្មោះថា អ៊ីស្រាអែល ផងដែរ ) ថា ពួកគេនឹងទទួលបានពរជ័យទាំងអស់នៃដំណឹងល្អ និងបព្វជិតភាព ( សូមមើល អ័ប្រាហាំ ២:៦–១១ ) ។
-
កូនចៅរបស់អ៊ីស្រាអែល រួមទាំងពួកសាសន៍នីហ្វៃបានខ្ចាត់ខ្ចាយនៅពាសពេញពិភពលោកនេះ°។ ព្រះអម្ចាស់បានសន្យាថា នឹងប្រមូលពួកគេមកវិញម្តងទៀត ដើម្បីទទួលបានពរជ័យនៃដំណឹងល្អ។
-
អស់អ្នកណាដែលចូលរួមនៅក្នុងសាសនាចក្រ ដែលមិនមែនជាពូជពង្សរបស់សាសន៍អ៊ីស្រាអែល គឺត្រូវបានទទួលយកទៅក្នុងអ៊ីស្រាអែល ហើយក៏អាចទទួលបានពរជ័យដូចគ្នាទាំងអស់ផងដែរ°។
សូមអាន នីហ្វៃទី ៣ ២០:១១-១៣, ១៨, ២២ ដោយរកមើលអំពីចំណុចអ្វីខ្លះដែលព្រះអម្ចាស់បានសន្យានឹងធ្វើ ។ ព្រោះវាអាចមានប្រយោជន៍សម្រាប់យើងត្រូវដឹងដូចខាងក្រោមនេះ ៖
-
កណ្តាប់ស្រូវ ( នីហ្វៃទី ៣ ២០: ១៨ ) គឺជាកណ្តាប់នៃគ្រាប់ធញ្ញជាតិដែលបានច្រូតកាត់រួចហើយ ។
-
នៅថ្ងៃចុងក្រោយ ព្រះអម្ចាស់នៅក្នុងយុត្តិធម៌របស់ទ្រង់នឹងបំផ្លាញមនុស្សអាក្រក់ដែលមិនព្រមប្រែចិត្ត ( សូមមើល នីហ្វៃទី ៣ ២០:១៥–១៧, ១៩–២០ ) ហើយពួកបរិសុទ្ធនឹងប្រមូលផ្តុំគ្នាទៅកាន់កន្លែងមួយដែលហៅថា ទីក្រុងយេរូសាឡិមថ្មីនៅទ្វីបអាមេរិក ( សូមមើល មាត្រានៃសេចក្ដីជំនឿ ១:១០ ) ។
-
តើអ្នកបានរកឃើញអ្វីខ្លះ ?
សូមស្តាប់សិស្សដោយយកចិត្តទុកដាក់ ។ នៅពេលដែលពួកគេចែកចាយ សូមអញ្ជើញពួកគេឲ្យចង្អុលបង្ហាញនូវឃ្លា ឬសេចក្ដីពិតណាមួយ ដែលទាញចំណាប់អារម្មណ៍របស់ពួកគេ ។
សេចក្តីពិតមួយដែលយើងអាចរៀនអំពីខគម្ពីរទាំងនេះ គឺថា ព្រះនឹងបំពេញសេចក្តីសញ្ញារបស់ទ្រង់ ដើម្បីប្រមូលពូជវង្សអ៊ីស្រាអែលនៅថ្ងៃចុងក្រោយ ។
សូមពិចារណាដោយការអធិស្ឋានអំពីរបៀប ដែលអ្នកអាចជួយដល់សិស្សរបស់អ្នកឲ្យស្គាល់អំពីការខិតខំរបស់ព្រះអម្ចាស់នៅក្នុងការប្រមូលពួកគេ ។ សូមពិចារណាដោយធ្វើការបង្ហាញរូបភាពតាំងពីដើមមេរៀនមក ហើយសួរសំណួរដូចខាងក្រោម ៖
-
តើវិធីណាខ្លះដែលព្រះអម្ចាស់កំពុងនាំយើង « ឲ្យស្គាល់ព្រះអម្ចាស់ … ដែលបានប្រោសលោះ [ យើង ] » ? ( នីហ្វៃទី៣ ២០:១៣ ) ។
-
ទោះបីជាការព្យាករណ៍អំពីក្រុងយេរូសាឡិមថ្មីនឹងត្រូវបានសម្រេចនៅក្នុងសហស្សវត្សរ៍នេះក៏ដោយ តើអស់អ្នកដែលដើរតាមព្រះអង្គសង្គ្រោះមាន « អំណាចនៃស្ថានសួគ៌ … នៅក្នុងចំណោម [ ពួកគេ ] » នៅពេលបច្ចុប្បន្ននេះដោយរបៀបណា ? ( នីហ្វៃទី៣ ២០:២២ ) ។ តើយើងអាចទទួលបានព្រះអម្ចាស់« នៅក្នុងចំណោម » យើងតាមវិធីណាខ្លះ ? ( នីហ្វៃទី៣ ២០:២២ ) ។
-
តើពរជ័យទាំងនេះអាចជួយដល់ជីវិតរស់នៅរបស់យើងបានដោយរបៀបណា ( រួមទាំងនៅពេលយើងមានអារម្មណ៍ឯកោ គ្មានសុវត្ថិភាព ឬដូចជានៅពេលយើងមានអារម្មណ៍ថាខ្លួនឯងមិនចុះសម្រុងនឹងគេ ) ?
ទីសម្គាល់នៃការប្រមូលផ្តុំនៅថ្ងៃចុងក្រោយ
ទីសម្គាល់ដែលព្រះអម្ចាស់បានសន្យានៅជំនាន់របស់យើង ដើម្បីបង្ហាញថា ទ្រង់បានចាប់ផ្តើមប្រមូលរាស្ត្ររបស់ទ្រង់ ។
សូមពិចារណាធ្វើការបង្ហាញ ឬឲ្យ ច្បាប់ចម្លងអំពីសកម្មភាពដែលដូចគ្នានៅខាងក្រោមទៅសិស្ស ។ សូមអញ្ជើញសិស្សឲ្យធ្វើការជាគូ ឬក្រុមតូចៗ ដើម្បីបំពេញវា ។ ចម្លើយគឺ ១-គ, ២-ខ, ៣-ក ។
| |
| |
|
-
តើមូលហេតុអ្វីបានជាអ្នកគិតថា ព្រះអម្ចាស់ចង់ឲ្យយើងស្គាល់ទីសម្គាល់នៃការប្រមូលរបស់ទ្រង់ ?
តើអ្នកត្រូវបានប្រមូលដោយរបៀបណា ?
-
តើចំណុចមួយនៅក្នុងចំណោមចំណុចខាងក្រោមនេះបានជួយដល់អ្នកនៅក្នុងការប្រមូលឲ្យមករកព្រះអម្ចាស់ ហើយរីករាយនឹងពរជ័យដែលទ្រង់បានប្រទានឲ្យដោយរបៀបណា ?
-
សមាជិកសាសនាចក្រដែលរក្សាសេចក្ដីសញ្ញារបស់ពួកគេ
-
ព្រះគម្ពីរមរមន
-
សាសនាចក្រ
-
សូមលើកទឹកចិត្តសិស្សឲ្យចែកចាយគំនិតនិង បទពិសោធន៍របស់ពួកគេ ។ សូមពិចារណាចែកចាយអំពីគំនិតរបស់អ្នកផងដែរ ។
« នោះគ្រប់ទាំងពូជមនុស្សនៅផែនដី [ នឹង ] បានពរ »
នៅក្នុងនាមជាសមាជិកនៃសេចក្តីសញ្ញានៃសាសនាចក្រ វាគឺជាទំនួលខុសត្រូវរបស់យើងនៅក្នុងការជួយ « គ្រប់ទាំងពូជមនុស្សនៅផែនដីបានពរ » តាមរយៈដំណឹងល្អនៃព្រះយេស៊ូវគ្រីស្ទ ( នីហ្វៃទី ៣ ២០: ២៧ ) ។ សកម្មភាពខាងក្រោមនេះអាចជួយដល់អ្នកឲ្យសញ្ជឹងគិតអំពីរបៀបដើម្បីជួយដល់ព្រះអម្ចាស់នៅក្នុងការប្រមូលរបស់ទ្រង់ ។
-
សូមអានព្រះគម្ពីរមរមនរយៈពេលជាច្រើននាទីដោយស្វែងរកខគម្ពីរ ឬឃ្លាដែលជួយអ្នកនៅក្នុងការមករកព្រះអម្ចាស់ មានអារម្មណ៍ទទួលបានសេចក្តីស្រឡាញ់របស់ទ្រង់ និងទទួលបានពរដែលទ្រង់ប្រទានឲ្យ ។ សូមសរសេរឯកសារយោង ឬឃ្លាសំខាន់ៗនៅក្នុងសៀវភៅកំណត់ហេតុការសិក្សារបស់អ្នក ។ សូមគិតអំពីរបៀប ដែលអ្នកអាចចែកចាយខគម្ពីរទាំងនេះជាមួយអ្នកដទៃ ។
-
សូមរៀបចំអ្វីដែលអ្នកអាចនឹងនិយាយ ឬសរសេរដើម្បីចែកចាយព្រះគម្ពីរមរមនជាមួយនរណាម្នាក់ ។ រួមបញ្ចូលទាំងអារម្មណ៍របស់អ្នកចំពោះព្រះគម្ពីរ និងរបៀបដែលអ្នកគិតថា ព្រះគម្ពីរអាចជួយដល់ពួកគេឲ្យចូលទៅកាន់តែជិតព្រះអង្គសង្គ្រោះ ។
-
សូមរៀបចំអ្វីដែលអ្នកអាចនិយាយ ដើម្បីអញ្ជើញនរណាម្នាក់ឲ្យចូលរួមនៅក្នុងសាសនាចក្រ ឬសកម្មភាពសាសនាចក្រជាមួយអ្នក ។ សូមបញ្ចូលគំនិតរបស់អ្នកអំពីរបៀបដែលព្រះគម្ពីរអាចជួយពួកគេ ជាពិសេសអំពីរបៀប ដែលព្រះគម្ពីរអាចជួយពួកគេឲ្យខិតកាន់តែជិតព្រះអម្ចាស់ ។
នៅពេលអ្នកសិក្សានៅសប្តាហ៍នេះ សូមជ្រើសរើសប្រកបដោយការអធិស្ឋាននូវរបៀបមួយដែលអ្នកអាចជួយប្រមូលសាសន៍អ៊ីស្រាអែល ។ គំនិតផ្សេងទៀតនឹងត្រូវបានបង្ហាញនៅក្នុងមេរៀននៅពេលអនាគត ។ សូមស្វែងរកការណែនាំមកពីព្រះអម្ចាស់ ដើម្បីដឹងថា អ្វីដែលល្អបំផុតសម្រាប់អ្នកនៅក្នុងការធ្វើកិច្ចការនេះ ។