“Alema 24: ‘O Le a Tatou Tanu Loloto i Latou i le Eleele,’” Tusi Lesona a le Faiaoga o le Tusi a Mamona (2024)

“Alema 24,” Tusi Lesona a le Faiaoga o le Tusi a Mamona

Alema 24

“O Le a Tatou Tanu Loloto i Latou i le Eleele”

O Aneti-Nifae-Liae o loo tanuina a latou pelu

O nisi taimi tatou te gauai atu ai i le agasala lava e tasi ma atiina a’e se mausa leaga po o se vaisu foi. O le faatoilaloina o nei agasala e mafai ona faigata tele. O le toatele o Aneti-Nifae-Liae na atia’eina faiga agasala a o lei liua i le Alii. Ina ua latou oo i le faamagaloga a le Faaola, sa musuia i latou e aloese mai le toe foi atu i na agasala. O lenei lesona e mafai ona fesoasoani ia te oe e faatoilalo ai le agasala ma mausa leaga e faaaogaina ai le fesoasoani a le Faaola.

Fesoasoani i tagata aoao e saili le liua. O le liua e sili atu nai lo na o se suiga o le amio; o se suiga o le loto e aumaia e le Agaga Paia. A o aoao ma faia e tagata aoga ni faatinoga mataalia, amiotonu, uunaia i latou e tatalo i le Tama Faalelagi mo Lana taitaiga e ala i le Agaga.

Sauniuniga a le tagata aoga: Valaaulia tagata aoga e faitau le Alema 24:7–16 ma o mai saunia e faasoa mai mea ua latou aoaoina mai ia Aneti-Nifae-Liae e uiga i le Faaola, salamo, ma le faamagaloga.

Gaoioiga e Ono Mafai Ona Aoao Ai

Faatoilaloina o le agasala i le fesoasoani a le Faaola

Maitau o lenei lesona ua mamanuina ina ia aoao atu pe a uma le lesona i le Alema 23.

Faitau le tulaga faataitai lenei:

Sa tauivi Samantha ma se agasala faapitoa mo le tele o tausaga. Ina ua amata ona liua atili o ia i le Alii, sa ia faia ni taumafaiga maoa’e e salamo ai ma liliu atu i le Faaola mo le malosi e faatoilalo ai lona faafitauli. Sa ia lagonaina le faamagaloga ma le alofa o le Alii. Peitai, i taimi o vaivaiga, o nisi taimi e toe pau atu ai o ia i lena agasala.

Mata o a ni lagona o Samantha i lenei tulaga?

A maua e tagata aoga ni avanoa e iloilo ai i latou lava, e mafai ona fesoasoani ia i latou e lagona atili ai le punouai i le lesona ma naunau e aoao mea latou te lei iloaina. O le valaaulia o le tagata aoga e tomanatu le leoa i mea nei o se tasi lea o auala e mafai ona e fesoasoani ai i tagata aoga e fai lenei mea.

Mafaufau loloto po o le a le lelei o lou lagona e mafai ona e fesoasoani ai ia Samantha ma poo a mea atonu o loo manaomia pea ona e iloa ma malamalama i ai e fesoasoani atili ai ia te ia. Ma le isi, mafaufau i mea faigata e te lagona e mafai ona fesoasoani ai le Alii ia te oe e faatoilalo. A o e suesue, saili mo upumoni ia, pe a faaaogaina, e mafai ona valaaulia ai le Faaola e fesoasoani ia Samantha ma oe e faatoilalo ai le agasala.

O tagata o Aneti-Nifae-Liae

O tagata o Aneti-Nifae-Liae o sa Lamana o e sa faaaogaina muamua a latou pelu e fasioti ai isi. Peitai, ina ua uma ona latou “faaliliuina i le Alii,” sa latou “tuu i lalo auupega o lo latou fouvale” (Alema 23:6–7).

Faitau le Alema 24:1–4 e iloa ai pe na faapefea ona tali atu nisi o sa Lamana. Ia manatua o lima o auupega ia.

Ana faapea o oe o se tasi o Aneti-Nifae-Liae, mata o a ni manatu ma ni lagona sa ia te oe i lea taimi? Aisea?

Sa faia e Amona ma ona uso se fono ma le Tupu o Lamonae ma lona uso, le tupu o tagata o e sa faaigoa ia Aneti-Nifae-Liae (tagai Alema 24:5). Ona talanoa atu lea o le tupu i lona nuu.

Afai e te lagona o le a fesoasoani atu ai i le agaga o le vasega, mafaufau e valaaulia se tagata aoga e faitau ma le faaaloalo ia fuaiupu nei e pei o ia o le taitai o Aneti-Nifae-Liae. Valaaulia tagata aoga e vaai faalemafaufau i le faalogo atu i lenei lauga o se tasi o Aneti-Nifae-Liae ma mafaufau loloto i manatu ma lagona atonu na latou maua.

Faitau le lauga a le tupu i le Alema 24:7–16. Vaavaai mo ma mafaufau e faailoga upu po o fasifuaitau o loo faamatala ai mea nei:

O le mea na faia e le Atua mo nei tagata
O mea na faia e tagata ia salamo ai
O le mea na fautuaina i latou e le tupu e fai e lafoai ai a latou agasala

Faamanatu i tagata aoga a latou sauniuniga mo le vasega. Talanoaina upu ma fasifuaitau na faailogaina e tagata aoga i le gaoioiga talu ai. Fai atu i tagata aoga e faamatala mai po o le a le uiga o upu ma fasifuaitau ma valaaulia le vasega e galulue faatasi ia malamalama atili i ai. Mafaufau e faasino atu fasifuaitau e foliga e taua ma talanoaina foi na fasifuaitau.

Mata o a ni manatu ma ni lagona atonu na ia te oe pe ana faapea sa e i ai iina e faalogologo ai i lenei lauga? Aisea?
O a upu po o fasifuaitau semanu e faaosofia ai oe e taumafai e aua nei toe foi atu i au agasala?

Tanuina o a latou auupega o le taua

Ata

O Aneti-Nifae-Liae o loo tanuina a latou pelu

Faitau le Alema 24:17–19 ma faailoga pe na faapefea ona tali atu tagata ina ua uma lenei lauga ma pe aisea foi.

O le a sou manatu e faapefea ona faatatau le aafiaga o Aneti-Nifae-Liae ia i tatou?

O se upumoni e tasi e mafai ona tatou faailoa mai i lenei tala o lo tatou alolofa mo, ma le tautinoga ia Iesu Keriso e mafai ona fesoasoani ia i tatou e lafoai ai a tatou agasala.

Faaalu sina taimi e mafaufau loloto ai pe aisea e moni ai lenei mataupu faavae.

Pe a saili e lafoai le agasala, aisea e ono fesoasoani ai le manatua o le alofa o le Tama Faalelagi ma Iesu Keriso ma mea na La faia mo i tatou? (Atonu e fesoasoani le mafaufau loloto i fasifuaitau e pei o le “ua ia faamagaloina foi i tatou” [Alema 24:10], “ua alofa mutimutivale mai le Atua silisili ia te i tatou” [Alema 24:14], ma le “ua alofa o ia i o tatou agaga” [Alema 24:14].)
Na faapefea e le tanumia o a latou pelu “loloto i le eleele” (Alema 24:17) ona fesoasoani i nei tagata e lafoai a latou agasala?

Maitau fasifuaitau nei i le fuaiupu 18 (faaopoopoina le faamamafa):

“Nai lo le faamaligiina o le toto o o latou uso o le a latou tuuina atu o latou lava ola.”
“Ma nai lo le aveese mai i se uso o le a latou foai atu ia te ia.”
“Ma nai lo le faamaʼumau o o latou aso i le paie o le a latou galulue malolosi i o latou lava lima.”

O lona uiga, sa le na ona tanumia e Aneti-Nifae-Liae a latou auupega o taua; sa latou suia foi a latou agasala muamua i ni faatinoga lelei.

E mafai faapefea e le faia ai o lenei mea ona fesoasoani ia i tatou e lafoai le agasala?
O a nisi o auala e mafai ai ona tatou faia lenei mea i le asō?

Ina ia vaai i se faataitaiga, matamata le vitio “O Le Mana o le Tusi a Mamona i le Liuaina” mai le faailo taimi 6:11 i le 8:12, o loo maua i le ChurchofJesusChrist.org.

O le tautinoga a le nuu o Aneti-Nifae-Liae

Faitau le Alema 24:20–27 e iloa ai le ala na ola ai Aneti-Nifae-Liae i la latou tautinoga e lafoai le agasala. A o e faitau, vaai faalemafaufau i le i ai iina. Mafaufau loloto i vaaiga, leo, ma lagona atonu na e oo i ai a o e ifo i le tatalo, ma le iloaina e leai se mea e te puipuia ai oe lava ma sa e i ai atoa i aao o le Alii.

O le a se mea ua faagaeetia ai oe e uiga i la latou tautinoga?

Na faamatalaina e Elder Dale G. Renlund o le Korama a Aposetolo e Toasefululua le ala e mafai ona faatatau ai taulaga a Aneti-Nifae-Liae ia i tatou i aso nei.

Ata
Elder Dale G. Renlund

Ia tatanu atoa a outou auupega o le fouvale e aunoa ma le lala a’e i luga o ‘au. Ona o le Togiola a Iesu Keriso, o le osia o feagaiga i se faamoemoega moni ia faamamalu i ai ma le faamaoni o le a faamanuia ai lou olaga e faavavau. O le a e avea atili oe e pei o le Faaola pe a o e manatua pea o Ia, mulimuli ia te Ia, ma faamemelo ia te Ia. Ou te molimau atu o Ia o le faavae mautu. E faamoemoeina o Ia, ma o Ana folafolaga e mautinoa. (Dale G. Renlund, “Tautinoga Mausali ia Iesu Keriso,” Ensign po o le Liahona, Nov. 2019, 25)

Sa faasoa mai foi e Elder Renlund se faataitaiga mamana o le tautinoga a le Au Paia i Congo. Mafaufau e faasoa atu i tagata aoga le vitio “Tautinoga Mausali ia Iesu Keriso“ mai le faailo taimi 0:00 i le 1:39, o loo maua i le ChurchofJesusChrist.org.

Auala e lafoai ai le agasala

Mafaufau e valaaulia tagata aoga e fai le gaoioiga lenei i ni vaega toalaiti ina ia mafai ona latou faaaogaina mea ua latou aoaoina i se tulaga moni o le olaga.

Toe mafaufau i le tulaga faataitai ia Samantha i le amataga o le lesona. Faamatala pe faapefea ona e fautuaina o ia e faaaoga mataupu faavae sa e suesueina i le asō. Ia aofia ai mea nei:

auala e mafai ona ia manatua ai le alofa o le Alii mo ia
faatinoga patino e mafai ona ia faia e aloese ai mai le toe pau atu i ana agasala sa iai

Valaaulia nisi o tagata aoga e faasoa mai o latou manatu. A o faalogologo tagata aoga i le tasi ma le isi, valaaulia i latou e mafaufau loloto pe mafai faapefea e le faatinoina o nei fuafuaga ona fesoasoani ia i latou e faatoilalo a latou agasala.

Lafoaiina o au agasala

I lau api talaaga mo suesuega, tusi ai pe faapefea ona e faaaogaina mea sa e aoaoina i le asō i lou lava olaga. Tusi laasaga e mafai ona e faia e manatua ai le alofa o le Alii. Ia aofia ai laasaga faatino e lafoai ai le agasala ma puipuia ai mai le toe foi atu i ai.

A o e taumafai e mulimuli i lau fuafuaga, ia talitonu e alofa le Faaola ia te oe ma o le a fesoasoani ia te oe a o e taumafai e aloese mai tulaga e mafai ona taitai atu ai oe i le agasala.

Molimau atu i le alofa o le Alii mo tagata aoga taitasi ma o le a Ia fesoasoani ia i latou pe a latou taumafai ia avea atili e faapei o Ia, e ui lava o nisi taimi latou te le atoatoa ai i a latou taumafaiga.

Manatu ma Talaaga o Faamatalaga

Aisea e tatau ai ona tatou puipuia mai le toe foi atu i le agasala?

Na aoao mai Elder Richard G. Scott (1928–2015) o le Korama a Aposetolo e Toasefululua:

Ata
Elder Richard G. Scott

O a [tatou] filifiliga i le tuanai [e mafai ona ta’ina i tatou] i se manao faaletino lea sa ono mafai ona toe avea ma se vaivaiga e taumafai Satani e faaaoga mo ona faamoemoega.

O le a taumafai Satani e faaaoga o tatou manatuaga o so o se tausalaina ua mavae e mailei ai i tatou e toe foi i tua i ana faatosinaga. E tatau ona tatou matua mataala e aloese mai ana faatosinaga. (Richard G. Scott, “Malosi Patino e ala i le Togiola a Iesu Keriso,” Ensign po o le Liahona, Nov. 2013, 83)

Na faamalamalama mai e Elder Neil L. Andersen o le Korama a Aposetolo e Toasefululua:

Ata
Elder Neil L. Andersen

O le lafoaia o se agasala o lona uiga o le a tatou le toe faia lava—e le toe foi i ai—e le i le faatinoga po o le upu e oo lava i o tatou mafaufau. O le lafoaiina o lona uiga o le agasala ua faagaloina atoa i lo tatou tuanai. O le lafoai o se agasala o le a sili atu lona uiga nai lo le na o le lagonaina o le salamo ma le faanoanoa ua aumaia ia i tatou ma isi sa tatou faatiga iai; o lona uiga o le mautinoa tatou te le tuu i tatou lava i le tulaga lava e tasi na aumaia muamua ai le agasala. O lona uiga o le fegalegaleai ma uo faatuatuaina ma aiga o le a fesoasoani ia i tatou i le agai i luma. Mo nisi, atonu o lona uiga o le suia o uo, atonu o le suia o a tatou galuega po o mea tatou te faia i o tatou taimi. O lona uiga o le matua tatala ma le faamaoni i soa faatuatuaina a o tatou agai i luma. Tatou te le mananao lava e toe foi atu i agasala o o tatou taimi ua tuanai. (Neil L. Andersen, The Divine Gift of Forgiveness [2019], 207–8)

Gaoioiga Faaopoopo e Aoao Ai

Tulaga Faataitai

Mafaufau e faaaoga tulaga faataitai nei pe afai o le a manuia tagata aoga mai le faataitaiina o le faaaogaina o tulaga faataitai ma nisi faamatalaga.

E solia pea lava pea e Kona le Upu o le Poto.
E tauaimisa pea Audrey ma nai ona tei.
E faaalu e Taft le taimi i lana telefoni nai lo le auai i lesona i le lotu, suesuega faaleaiga, ma avanoa e auauna atu ai.
E matamata Lia i ponokalafi pe a ia lagona le tuuatoatasi po o le le fiafia.

Aloese ai mai tulaga e taitai atu ai i le agasala

Mafaufau e faaaoga le gaoioiga lenei i se nofoaga talafeagai i le lesona. Valaaulia tagataaoga e vaai faalemafaufau i se togalaau vaoa ma vaai faalemafaufau i lena lava togalaau pe a uma ona vele mama. Ona valaaulia lea o tagata aoga e tali mai i fesili nei:

O le a le mea e tatau ona fai ina ia mautinoa ai le tumau pea o le leai o se vao i lenei togalaau?
E faapefea ona fesootai lenei mea i mea e manaomia ona tatou faia pe a uma ona faamagaloina i tatou i le agasala?

Alema 24:20–27. A o tatou tausia a tatou feagaiga, e mafai ona tatou fesoasoani i isi ia liua

Valaaulia tagata aoga e faitau le Alema 24:20–27, ma vaavaai mo le mea na tupu a o osofaia e sa Lamana ia Aneti-Nifae-Liae. Fesoasoani i tagata aoga e faailoa mai ma talanoaina le mataupu faavae lenei: A o tatou tausia a tatou feagaiga, e mafai ona tatou fesoasoani i isi ia liua.

Mafaufau e fai atu fesili e pei o le “O a nisi o avanoa ua e maua e faia ai se faataitaiga mo isi e ala i le tausia o au feagaiga?” po o le “E mafai faapefea e le tausia o au feagaiga i nei tulaga ona fesoasoani i isi ia liua?”