Mosaea 28

Liua Patino ma le Faasoaina Atu o le Talalelei

o se talavou o loo talanoa ma isi e uiga i le talalelei

O a ni aafiaga na e maua i le faasoaina atu o le talalelei a Iesu Keriso? Ina ua mavae lo latou liua, sa o atu atalii o Mosaea i le tupu mo se faatagaga e talai atu ai le talalelei ia sa Lamana. Na muamua ole atu le Tupu o Mosaea i le Alii, ona faatagaina lea o ona atalii e o ina ia mafai ona latou avatu le afioga a le Atua ia sa Lamana (tagai Mosaea 28:1). O lenei lesona ua faamoemoe e fesoasoani ia te oe e faateleina ai lou manao e faasoa atu le talalelei.

Fesoasoani i tagata aoao ia maua le taua i upumoni o le talalelei. Atonu e tauivi nisi tagata aoga e vaai pe faapefea ona fesootai le talalelei i o latou olaga i aso uma. Saili ma le agaga tatalo ni auala e fesoasoani ai ia i latou ia lagona o mea o loo latou aoaoina e anoa ma aoga i o latou tulaga patino, fesili, ma manaoga.

Sauniuniga a le tagata aoga: Mafaufau e valaaulia tagata aoga e talanoa i se tagata latou te talitonu ua matuai liua moni lava i le talalelei a Iesu Keriso. O le a se mea na fesoasoani i lena tagata i lona ala o le liuaina? E mafai foi ona e mafaufau e valaaulia tagata aoga e iloilo lo latou manao e faasoa atu le talalelei.

Gaoioiga e Ono Mafai Ona Aoao Ai

Faasoa atu ma le liua

Mafaufau e aumai pe faaali atu se ata o se mea e te fiafia tele i ai e te fiafia foi e faasoa atu i isi. Faasoa atu le aitema lenei i tagata aoga a o lei fai atu le isi fesili.

• O a nisi o mea e te fiafia tele i ai e te manao e faasoa atu i isi?

Na aoao mai Elder David A. Bednar o le Korama a Aposetolo e Toasefululua e faapea, e le o se mea e le masani ai mo i tatou le faasoa atu o mea e taua ia i tatou. Matamata le vitio “Mea Lelei e Faasoa” (2:21), e maua i le ChurchofJesusChrist.org, pe faitau le faamatalaga o loo i lalo.

Elder David A. Bednar

O le faasoa atu i isi tagata o mea e aupito sili ona taua ia i tatou pe na aoga foi ia i tatou o se mea ua masani ai lava.

O lenei mamanu e tasi ua manino faapitoa lava i tulaga e matua taua tele faaleagaga ma taunuuga. …

O valaaulia matou te tuu atu ia te outou ia aoao ma faataitai la matou savali o taunuuga o aafiaga lelei o le talalelei a Iesu Keriso ua i ai i o matou olaga. O nisi taimi atonu matou te faaletonu pe tuusao pe oo lava i le lē faavaivai i a matou taumafaiga. O lo matou naunautaiga faatauvaa lava ia faasoa atu ia te outou upumoni ia e matua silisili ona taua ia i matou. (David A. Bednar, “O Mai Ia Ina Matamata,” Ensign po o le Liahona, Nov. 2014, 109, 110)

Faavasega le moni o faamatalaga nei mo oe i se fua o le 1 i le 5 (lea o le 1 e le moni mo oe ae o le 5 e matua moni mo oe):

Mafaufau e faaali atu faamatalaga nei mo tagata aoga a o latou mafaufau loloto ma manatunatu i o latou olaga.

• O upumoni e uiga i le Faaola o Iesu Keriso ma Lana talalelei e taua tele ia te au.

• E i ai lo’u manao e faasoa atu Lana talalelei i isi.

A o e suesue i olaga ma faataitaiga a atalii o Mosaea, mafaufau loloto i lou manao e faasoa atu le talalelei a le Faaola. Saili faaaliga ia iloa ai po o a laasaga e sosoo ai atonu e finagalo le Alii e te uia ina ia atili anoa ai le talalelei ia te oe ma faateleina ai lou manao e faasoa atu le talalelei.

O atalii o Mosaea

Manatua ina ua mavae lo latou liua, sa talai atu e atalii o le Tupu o Mosaea le talalelei i o latou lava laueleele, ma saili e toe faaleleia a latou mea sese (tagai Mosaea 27:32–37).

Faitau le Mosaea 28:1–5, ma vaavaai mo mea na mananao ai atalii o Mosaea ma pe aisea foi. (Atonu e te manao e faailoga mea sa e mauaina i totonu o au tusitusiga paia.)

• O a upu po o fasifuaitau i nei fuaiupu e tulaga ese ia te oe? O a mafuaaga na i ai i atalii o Mosaea mo le faasoaina atu o le talalelei ia sa Lamana?

  Mafaufau e valaaulia nisi o tagata aoga e faasoa mai mea sa latou mauaina.

• Aisea e ono avea ai nei mea ma mafuaaga faaosofia e faasoa atu ai le talalelei?

• O a upumoni sa e aoaoina mai nei fuaiupu?

E mafai e tagata aoga ona faasoa mai ni mataupu faavae moni eseese. Afai e le o ta’ua mai e tagata aoga le mataupu faavae o loo faailoga atu i lalo, mafaufau e fai atu fesili nei: E faapefea ona fesootai lo tatou manao e faasoa atu le talalelei i lo tatou liua patino? Aisea?

O se tasi o upumoni tatou te aoao mai i nei fuaiupu o le, a o faalolotoina lo tatou liua i le Alii, o le a faateleina lo tatou manao e faasoa atu le talalelei.

Na faamautu mai e Peresitene Dallin H. ​​Oaks o le Au Peresitene Sili lenei upumoni ina ua ia aoao atu mea nei:

Peresitene Dallin H. Oaks

O le malosi o lo tatou naunau e faasoa atu le talalelei o se faailoga sili lea o le tele o lo tatou liua patino (Dallin H. Oaks, “Sharing the Gospel,” Ensign, Nov. 2001, 7).

• O a ni aafiaga na maua e atalii o Mosaea na fesoasoani ia i latou e liua ai ia Iesu Keriso ma Lana talalelei? (Tagai Mosaea 27:34–36; 28:4).

  Mafaufau e faaali atu fesili nei mo tagata aoga e mafaufau loloto i ai pe tali ai i a latou api talaaga mo suesuega a o lei tali mai.

• O a ni aafiaga na fesoasoani ia te oe po o i latou e te iloa ua liua atili ai ia Iesu Keriso ma Lana talalelei?

• O le a se mea e te fiafia i ai e uiga ia Iesu Keriso ma Lana talalelei e te manao e faasoa atu i isi? (Mo se faataitaiga, atonu na e maua ni aafiaga anoa i le faamagaloga a le Faaola, le alofa o le Atua, tatalo, ma isi.)

E tusa lava pe ua tatou liua i le Alii, atonu e i ai mafuaaga e faafaigata ai pea le faasoaina atu o le talalelei.

• Ana faapea o oe o se tasi o atalii o Mosaea, o a ni ou atugaluga e ono i ai e uiga i le talai atu o le talalelei ia sa Lamana?

I le avea ai ma o latou tamā ma o le tupu, sa tele mafuaaga na popole ai Mosaea i le auina atu o ona atalii e talai atu le talalelei i sa Lamana. Sa fefe le Tupu o Mosaea e le gata mo le saogalemu o ona atalii ae afai foi e o ese ona atalii, o le a leai sona suli e faapaleina e avea ma tupu e sosoo ai o sa Nifae.

Faitau le Mosaea 28:6–8, ma vaavaai pe aisea na tuu atu ai e Mosaea ona atalii e o i se misiona lamatia faapena.

• O a faamanuiaga na folafola mai e le Alii ia Mosaea?

O au laasaga e sosoo ai

Faaalu sina taimi e lisi ai ni atugaluga o i ai ia te oe po o isi e uiga i le faasoaina atu o le talalelei.

Lisi tali a tagata aoga i le laupapa. Filifili pe sili atu le filifili o se atugaluga se tasi mo le vasega atoa e taulai faatasi i ai pe fai i tagata aoga e galulue taitoatasi pe i ni vaega toalaiti.

Filifili se tasi o nei atugaluga ma tatalo mo le taitaiga a o e suesue i tusitusiga paia ma mafaufau loloto pe faapefea ona faatoilalo lenei atugaluga. Mo se faataitaiga, afai sa ia te oe se tasi o atugaluga nei, e mafai ona e mafaufau loloto i fesili ma suesue mau o loo lisiina pe a uma ia faamatalaga.

Mafaufau e faaali atu nei faamatalaga pe tusi i luga o le laupapa.

Ou te le o mautinoa pe ua lava lou liua e faasoa atu ai le talalelei. E mafai faapefea e faataitaiga a atalii o Mosaea ona fesoasoani ia te oe? (Tagai Mosaea 28:1–5.) A o e faitauina nisi o fuaiupu nei, vaavaai mo auala e mafai ona e liua atili ai: Galuega 3:19; Iakopo 5:20; Enosa 1:2–5; Mosaea 3:19; 5:2; 27:25; Alema 5:12–14; 22:15–18; 53:10; Helamana 15:7; 3 Nifae 9:20.

Ou te fefe i le teenaina. Iloilo i le Mosaea 28:2–4 ia mafuaaga na mananao ai atalii o Mosaea e faasoa atu le talalelei e ui lava na manatu le toatele e le taliaina e sa Lamana. E faapefea ona fesoasoani nei mafuaaga ia te oe? E mafai faapefea e le mafaufau i mea na faia e le Faaola mo oe (ma mafai ona faia mo isi) ona fesoasoani ia te oe e faatoilalo ai lou fefe?

E le’i avea a’u ma faataitaiga sili o le ola ai i le talalelei. A o lei liua i latou, sa talai atu atalii o Mosaea e faasaga tau i le talalelei (tagai Mosaea 27:8–10), ae ina ua uma ona latou salamo, sa avea i latou ma nisi o faifeautalai sili ona faamanuiaina i le Tusi a Mamona (tagai Alema 17:4). O le a se mea ua musuia oe e la latou faataitaiga e fai? O a nisi faataitaiga i tusitusiga paia e mafai ona e mafaufau i ai e ono fesoasoani?

Valaaulia ni nai tagata aoga e faasoa mai mea na latou maua ma pe faapefea ona fesoasoani i le atugaluga.

Mafaufau e faaali atu fuaiupu nei mo tagata aoga a o latou mafaufau loloto ma tali i totonu o a latou api talaaga mo suesuega.

• “O se tasi o mea sili ona taua na ou aoaoina mai atalii o Mosaea o le …”

• “O le mea e tasi ou te lagona e finagalo le Alii ou te faia e mulimuli ai i faataitaiga a atalii o Mosaea o le …”

• “Ina ia faia se faatinoga lelei i lenei mea, e mafai ona ou …”

Valaaulia tagata aoga e faasoa mai. Atonu e aoga le faaiu i le faasoa atu o lau molimau, lagona, ma uunaiga po o le valaaulia o se tagata aoga se toatasi pe toalua e faia o lea.

Manatu ma Talaaga o Faamatalaga

E mafai faapefea ona ou faasoa lelei atu le talalelei i isi?

Na fautua mai e Peresitene M. Russell Ballard, Sui Peresitene o le Korama a Aposetolo e Toasefululua, se auala aoga e mafai ai e tagata o le Ekalesia ona faasoa atu le talalelei:

Peresitene M. Russell Ballard

O le ki i le faamanuiaina o le galuega talai a tagata o le au paia, o le faatinoina lea o le faatuatua. O le tasi auala e faaali atu ai lou faatuatua i le Alii ma Ana folafolaga o le faatulagaina lea ma le agaga tatalo o se aso e sauniuni ai se tasi e feiloai ma faifeautalai. Na ou mauaina le faitau selau o tusi mai tagata o le Ekalesia o e na faatinoina lo latou faatuatua i lenei auala faigofie. E ui e lei i ai se tasi i mafaufau o aiga po o ai e mafai ona latou faasoa atu i ai le talalelei, ae sa latou fuafuaina se aso, tatalo, ona talanoa atu lea i ni tagata se toatele. O le Alii o le Leoleo Mamoe Lelei ma Na te silafia Ana mamoe o e ua saunia e faalogo i Lona siufofoga. O le a Ia taitaiina i tatou a o tatou sailia Lana fesoasoani paia i le faasoaina atu o Lana talalelei. (M. Russell Ballard, “Atiina Ae o se Fale e Fefaasoaai ai le Talalelei,” Ensign po o le Liahona, Me 2006, 86)

E mafai faapefea ona ou faalolotoina lo’u liua?

Na toe ta’ua e Elder Arnulfo Valenzuela o le Fitugafulu ia aoaoga a Peresitene Nelson e uiga i taumafaiga ma le liua i le faamatalaga lenei:

Elder Arnulfo Valenzuela

Na a’oa’oina i tatou talu ai nei e Peresitene Russell M. Nelson: “Ina ia faia soo se mea ia lelei, e manaomia se taumafaiga. O le avea ai ma se soo moni o Iesu Keriso, e leai se tuusaunoaga. O le faateleina o lou faatuatua ma le faalagolago ia te Ia e manaomia ai se taumafaiga.” Faatasi ai ma fautuaga na ia tuuina mai ia i tatou e faateleina ai lo tatou faatuatua ia Iesu Keriso o le avea lea o i tatou ma tagata a’oa’o gaua’i, ia tatou faatofuina i tatou lava i tusitusiga paia ina ia malamalama atili ai i le misiona ma le auaunaga a Keriso. (Tagai i le “Ua Toetu Keriso: O Le Faatuatua ia te Ia O Le A Aveesea ai Mauga,” Liahona, Me 2021, 103.) (Arnulfo Valenzuela “Faalolotoina o Lo Tatou Liua ia Iesu Keriso,” Liahona, Nov. 2021, 59)

Gaoioiga Faaopoopo e Aoao Ai

O se atugaluga faaopoopo

Afai e aoga, e mafai foi ona e faaaofia ai le atugaluga lenei i le gaoioiga i lalo o le ulutala “O isi au laasaga” o loo i luga:

Ou te le lagona o le a ou fai atu le mea tonu. Mafaufau e faitau e uiga ia Enoka (tagai Mose 6:27, 31–34) ma Mose (tagai Esoto 4:10–12). O le a le mea na aoao atu e le Alii ia i la’ua? E mafai faapefea e a la faataitaiga ona fesoasoani ia te oe?

O le mana ma le taua o le tausiaina o faamaumauga

O le vaega o totoe o le Mosaea 28 o loo faaiu i le faamatalaina atu faapea o Mosaea, i lona tulaga o se tagatavaai, na faaliliuina le talafaamaumau a sa Iareto—o papatusi na maua e le vaega na auina atu e le Tupu o Limae e saili le laueleele o Saraemila (tagai Mosaea 8:7–9). Mafaufau e valaaulia tagata aoga e faitau le Mosaea 28:11–19, ma vaavaai mo fasifuaitau o loo faaalia ai lagona o tagata e uiga i nei talafaamaumau. O le a sou manatu i mea na latou aoaoina mai nei tagata? E faapefea ona fesootai lenei mea ia te oe ma ou lagona e uiga i tusitusiga paia?

Faaliliuina o faamaumauga

O leMosaea 28:13–16 o loo aumaia ai sina malamalamaaga pe na faapefea ma pe aisea na mafai ai e Mosaea ona faaliliu ia faamaumauga. Afai e i ai ni fesili a tagata aoga e uiga i lenei faagasologa, mafaufau e valaaulia i latou e suesue le Mosaea 8:13–18 ma le “Faaliliuga o le Tusi a Mamona” i le Gospel Topics Essays, o loo maua i le ChurchofJesusChrist.org. Valaaulia tagata aoga e faasoa mai mea na latou aoaoina.

Aoao mai isi talavou e uiga i le faalolotoina o le liua ma le faasoaina atu o le talalelei

O le vitio “Autalavou o Faasoa Atu o Latou Aafiaga” (7:59), o loo maua i le ChurchofJesusChrist.org, ua tuuina mai ai ni faataitaiga mamana mai le autalavou lea e mafai e tagata aoga ona faaaoga i a latou taumafaiga e faalolotoina lo latou liua ma faasoa atu le talalelei. E mafai e tagata aoga ona matamata i lenei vitio ma lisi auala e faasoa atu ai le talalelei o loo ta’ua e le autalavou.