“Mosaea 21–24, Vaega 2: Liliu Atu i le Alii mo le Laveaiga mai Tofotofoga,” Tusi Lesona a le Faiaoga o le Tusi a Mamona (2024)
“Mosaea 21–24, Vaega 2,” Tusi Lesona a le Faiaoga o le Tusi a Mamona
Mosaea 21–24, Vaega 2
Liliu Atu i le Alii mo le Laveaiga mai Tofotofoga
E faapefea ona e tali atu pe a e feagai ma tofotofoga ma faigata? Aisea e te manatu ai e faalatalata atili atu nisi tagata i le Alii ae o isi e o ’ese mai ia te Ia? I le Mosaea 21–24, ua tatou aoao ai na liliu atu le nuu o Limae ma le nuu o Alema i le Alii mo le malosi ma le laveaiga mai le faatagataotauaina. O lenei lesona ua faamoemoe e fesoasoani ia te oe e faalagolago ai i le Tama Faalelagi ma Iesu Keriso e fesoasoani ia te oe i ou tofotofoga.
Fesoasoani i tagata aoao ia iloa le faatosinaga a le Alii i o latou olaga. A o aoao tagata aoga i le ala na faamanuiaina ai e le Faaola tagata i tusitusiga paia, fesoasoani ia latou iloa le matafaioi o loo Ia faia foi i o latou olaga. Valaaulia tagata aoga e mafaufau pe faapefea ona fesoasoani le Faaola ia i latou e ala i le ofoina atu o le faamalologa ma tuuina atu ia i latou le malosi.
Sauniuniga a le tagata aoga: E mafai e tagata aoga ona talanoa ma se tagata o le aiga e uiga i se tofotofoga po o se mafatiaga na oo i ai le tagata o le aiga ma auala na faamalosia ai o ia e le Alii e onosaia.
Gaoioiga e Ono Mafai Ona Aoao Ai
O le lesona lona lua lenei o lesona e lua e talanoaina ai le Mosaea 21–24. Afai e te lei faia lava, aoao atu le Vaega 1 ao lei faia le lesona lenei. Afai e tapulaa le taimi o le vasega ma e na o le tasi le lesona i le Mosaea 21–24 e mafai ona aoao atu, mafaufau pe faapefea ona tuufaatasi lelei ia lesona e lua.
Tali atu i tofotofoga
O le gaoioiga lenei ua faamoemoe e fesoasoani ai i tagata aoga e faia ni iloiloga faaletagata lava ia e uiga i se tofotofoga o loo latou oo i ai pe sa oo i ai. Atonu e te manao e faaaofia ai ni nai uunaiga tusitusia po o fesili i luga o le laupapa e taiala ai tagata aoga a o latou faamaumauina o latou manatu. E le manaomia e tagata aoga ona faasoa mai a latou tali i le taimi lea o le lesona.
I le lesona talu ai, sa valaaulia ai oe e mafaufau e uiga i se tofotofoga o loo e oo i ai pe sa e oo i ai. Atonu na e aoaoina nisi o upumoni i lau suesuega o le Mosaea 21–24 lea na fesoasoani ia te oe e malamalama ai pe aisea e faataga ai oe e le Alii e oo i tofotofoga. I le asō, toe mafaufau i ou tofotofoga, ae o le taimi lenei mafaufau pe na faapefea ona e tali atu i ai. Atonu e te manao e faamaumau mea faalavefau po o faamanuiaga na e oo i ai ma auala na e lagonaina ai le aafiaga po o faamanuiaga a le Alii.
O le mana laveai o le Alii
Mafaufau e valaaulia se tagata aoga se toatasi pe sili atu e aotele mai mea latou te manatua mai le lesona talu ai e uiga i le faatagataotauaina o le nuu o Limae ma le nuu o Alema. Afai e tatau ai, e mafai ona faaaoga le aotelega lenei.
Atonu e te manatua le suesueina o le nuu o Limae (i le laueleele o Nifae) ma le nuu o Alema (i le laueleele o Helama). Sa latou oo uma i ni tofotofoga faigata a o faatagataotauaina e sa Lamana. O lenei ata o loo faapupula mai ai a latou malaga i le Mosaea 21–24.
O le asō o le a e aoao ai i le ala na laveai ai e le Alii vaega uma e lua o tagata mai le nofopologa ma agai atu ai i le laueleele o Saraemila. A o e suesue, ia manatua ou tofotofoga ma vaavaai mo upumoni e fesoasoani ia te oe e iloa ai auala e faaaoga ai e le Alii Lona mana o le laveaiga i lou olaga.
O le gaoioiga lenei ua faamoemoe e fesoasoani i tagata aoga e aoao ai e uiga i le laveaiina o le nuu o Limae ma le nuu o Alema. Atonu e fesoasoani le vaevae o le vasega i ni vaega toalaiti ma tofi nei vaega e suesue a le o le nuu o Limae po o le nuu o Alema. Ona mafai lea e tagata aoga ona aotele a latou tala ma faasoa mai ni fuaiupu anoa po o ni fasifuaitau ma mataupu faavae e tulagaese ia i latou.
Fatu le siata lenei i lau api talaaga mo suesuega. Ia mautinoa ia lava se avanoa e faamaumau ai ni tali se tele i pusa taitasi.
Mosaea 21–24: Malosi ma le Laveaiga
Tusi Lesona a le Faiaoga o le Tusi a Mamona (2024)—“Mosaea 21–24, Vaega 2: Liliu Atu i le Alii mo le Laveaiina mai Tofotofoga”
|
Nuu o Limae |
Nuu o Alema | |
|---|---|---|
|
O a faatinoga na faia e tagata e maua ai le fesoasoani a le Alii? | ||
|
Na faapefea ona aafia le Alii i lo latou laveaiga? | ||
|
O a nisi o fasifuaitau e sili ona fiafia i ai e manatua mai nei fuaiupu? |
© 2023 Puletaofia e le Intellectual Reserve, Inc. Ua taofia aia tatau uma.
A uma ua lava se taimi e suesue ai tagata aoga, valaaulia i latou e faasoa mai a latou tali i fesili o loo lisi i luga i le siata. Ia mautinoa e faatagaina le toatele o tagata aoga e faasoa mai o latou malamalamaaga.
-
O a nisi o faatinoga na faia e tagata e maua ai le fesoasoani a le Alii?
-
O le a se mea na e aoaoina e uiga i le Alii ma Lona mana a o e suesueina nei tala?
-
O le a se fasifuaitau e sili ona e fiafia i ai na e faailoaina mai se tasi o fuaiupu sa e suesueina?
Iloaina ma le olioli ai i le mana o le Alii
Faatasi ai ma le tele o upumoni e mafai ona tatou aoao mai nei fuaiupu, atonu na e maitauina mai au suesuega e faapea a o tatou liliu atu ia te Ia, o le a lagolagoina i tatou e le Tama Faalelagi i taimi o o tatou tofotofoga ma laveai i tatou i Lana taimi (tagai Mosaea 21:14–16). Ua tatou aoao foi afai tatou te onosaia ma le fiafia ma le onosai o tatou tofotofoga, e mafai e le Alii ona faamalosia i tatou e tauave ma le faigofie a tatou avega (tagai Mosaea 24:15).
-
E mafai faapefea e le iloaina o nei mea e uiga i le Alii ona aafia ai le ala e te tali atu ai i ou tofotofoga?
-
Na faapefea ona lagolagoina ma faamalosia e le Alii oe po o se tasi e te iloa e onosaia se tofotofoga pe tauaveina se avega? Na faapefea e nei mea ona aafia ai ou lagona mo Ia?
Mafaufau e faasoa atu se faataitaiga patino o se vaega o le talanoaga o le fesili na muamua atu. E faalagolago i le taimi o le vasega, atonu foi e te manao e faaali le vitio lenei.
Matamata le vitio “Lagonaina o le Alofa ma le Agalelei o le Alii i Tofotofoga” (4:18) i le ChurchofJesusChrist.org. Vaavaai pe mafai faapefea e upumoni po o fasifuaitau na e faailoa mai i tusitusiga paia ona fesootai i le aafiaga o le aiga o Gutierrez.
O au laasaga e sosoo ai
A uma ona faasoa atu faatonuga nei, mafaufau e faaali i luga o le laupapa ia fesili mo tagata aoga e tali ai ina ia mafai ona latou tagai i fesili a o latou tusitusi.
Mafaufau i mea ua e aoaoina i le aso e mafai ona fesoasoani ia te oe i tofotofoga o feagai ma oe.
Faaopoopo se koluma fou i le siata na e fatuina i le amataga o le lesona ma faaigoa le atulaina pito i luga o lenei koluma “O A’u.” Ona faamaea lea o lau koluma fou e ala i le taliina o fesili nei. (Afai e leai se avanoa e te fatuina ai se koluma fou, tali fesili i se isi avanoa i lau api talaaga mo suesuega.)
-
O a ni faatinoga e mafai ona e faia e maua atili ai le fesoasoani a le Alii i ou tofotofoga?
-
O le a se mea ua e aoaoina e uiga i le Alii i le aso e mafai ona fesoasoani e te malamalama ai i le ituaiga fesoasoani po o le malosi e mafai ona Ia tuuina atu ia te oe?
-
O a upu po o fasifuaitau mai fuaiupu na e suesueina e te manatu e mafai ona fesootai i ou tulaga? Aisea?
Mafaufau e valaaulia ni nai volenitia e faasoa mai nisi o a latou tali i fesili na muamua atu. Molimau atu i upumoni sa outou talanoaina i le aso ma le mana o le Alii e laveai ai i tatou mai o tatou puapuaga.