Mosaea 5:1–5

Ua Le Toe i ai Se Manao e Fai Mea Leaga

Ua lauga atu le Tupu o Peniamina i lona nuu

E i ai taimi, atonu tatou te lagonaina ai le manaomia ona faia ni suiga pe faaleleia se mea sa tatou faia. Sa faapena lagona o le nuu o le Tupu o Peniamina ina ua uma ona faalogo atu ia te ia o talanoa e uiga ia Iesu Keriso ma mea na Ia laveaiina mai ai i tatou. O lenei lesona e mafai ona fesoasoani ia oe e faateleina ai lou manao e sui pe faaauau pea ona suia faatasi ma le fesoasoani a le Alii.

Faatinoina o aoaoga a le Faaola. Na aoao mai e Iesu Keriso ia aoaoga faavae ma mataupu faavae moni ina ia mafai ai ona suia o tatou olaga mo le lelei sili atu. Ia saili e le aunoa ni avanoa e valaaulia ai tagata aoga e faia faatinoga amiotonu lelei e faavae i Ana aoaoga. Atonu e eseese faatinoga mo tagata aoga taitasi, ae e mafai e le Agaga Paia ona fesoasoani ia i latou e faailoa mai mea e mafai ona latou faia e mulimuli ai i le Faaola.

Sauniuniga a le tagata aoga: Mafaufau e valaaulia tagata aoga e mafaufau po o le a le mafuaaga o lo latou mananao e faalatalata atili atu i le Tama Faalelagi ma Iesu Keriso.

Gaoioiga e Mafai Ona Aoao Ai

Avea e faapei o Iesu Keriso

Mafaufau e faaali atu ata nei pe aumai ni mea faitino i le vasega pe a maua. Ona faaaoga lea o fesili e pei o nei e fesoasoani ai i tagata aoga e mafaufau pe faapefea ona faatusatusa suiga o mea faitino i lo tatou suia ma avea atili e faapei o le Tama Faalelagi ma Iesu Keriso.

poloka aisa, vai, ma le aūsa

malala

• O le a le mafuaaga o le suiga o nei mea faitino?

• O a mafuaaga e suia ai tagata?

• E faapefea ona tutusa pe ese le suia e le Alii o o tatou loto mai le ala e suia ai nei mea faitino?

Mafaufau e faaali atu le faamatalaga lenei pe tusi i luga o le laupapa. Valaaulia tagata aoga e mafaufau pe o le a le malosi o o latou lagona e faatatau le faamatalaga lenei ia i latou.

• Ou te manao i le Alii e fesoasoani mai ia te a’u ia suia mo le lelei sili atu.

Valaaulia tagata aoga e mafaufau pe aisea ua faapena ai o latou lagona. E mafai ona aofia ai le mafaufau loloto i auala atonu na fesoasoani ai le Alii ia i latou i le taimi ua tuanai.

A o e suesueina le Mosaea 5, vaavaai mo mafuaaga atonu e te manao ai e saili le fesoasoani a le Alii ina ia suia ma faaleleia.

Oo i se suiga o le loto

Ina ua uma ona fetalai atu le Tupu o Peniamina i lona nuu, sa ia fia iloa pe na latou “talitonu i upu na tautala atu e ia ia te i latou” (Mosaea 5:1).

Faitau le Mosaea 5:1–5 e iloa ai pe na faapefea ona latou tali atu. Atonu e fesoasoani le iloa o le upu manao e faasino i le uiga po o le faananau o se tasi, o le mea ua latou masani ai. Atonu foi e te manao e matamata le vitio “Ua Osia e Tagata o le Tupu o Peniamina se Feagaiga” mai le faailotaimi 0:00 i le 1:37, o loo maua i le ChurchofJesusChrist.org.

Ina ia fesoasoani i tagata aoga ia malamalama atili i nei fuaiupu, e mafai ona e valaaulia i latou e kopi ma faauma le siata lenei i a latou api talaaga mo suesuega. Pe mafai foi e tagata aoga ona faitau ia fuaiupu ma maka mea latou te maua i a latou tusitusiga paia. Mo se faataitaiga, e mafai e tagata aoga ona lio upu ma fasifuaitau o loo ta’u mai ai le ala na suia ai tagata ma vase lalo o upu ma fasifuaitau o loo ta’u mai ai le mea na mafua ai ona suia tagata.

O le ala na suia ai tagata	O le a le mea na mafua ai ona sui tagata
O le ala na suia ai tagata	O le a le mea na mafua ai ona sui tagata

Atonu e te manao e valaaulia tagata aoga e faasoa mai mea ua latou mauaina. Valaaulia tagata aoga e aotele mai mataupu faavae na latou aoaoina. O le gaoioiga lenei o se tasi lea o auala e mafai ona latou faatinoina ai.

E faavae i le Mosaea 5:1–5, faamaea le fasifuaitau lenei.

A o suia o tatou loto e ala i le Agaga o le Alii, tatou te …

E mafai e tagata aoga ona faauma le faamatalaga i ni auala eseese. O nisi o auala talafeagai e aofia ai le, A o suia o tatou loto e ala i le Agaga o le Alii, tatou te …

• lafoai le manao e fai mea leaga ma maua le manao e fai mea lelei e lē aunoa.

• lagona le olioli.

• naunau e ulu atu i feagaiga e usitai i poloaiga.

E ono fesoasoani le valaaulia o tagata aoga e lisi mataupu faavae i luga o le laupapa ma tusi i a latou tusitusiga paia. Faaaoga nisi po o fesili uma nei e fesoasoani ai i tagata aoga ia malamalama ma mafaufau loloto i le taua o upumoni ua latou faailoa mai.

E taua le malamalama faapea e ui ina sa “le toe i ai [so matou] manao e fai mea leaga” (Mosaea 5:2), ae e lē faapea ua latou lē toe agasala ai. Nai lo lena, sa suia e le Alii o latou loto ina ia naunau faamaoni e fai mea lelei ma ia aloese mai le agasala.

• O anafea na e, faapei ai o le nuu o le Tupu o Peniamina, na i ai se naunautaiga malosi e “faia mea lelei e lē aunoa”? O le a se mea na fesoasoani ia te oe e lagona ai faapea?

• Aisea e te manatu ai o le toatele o i tatou e lē o lagona faapea i taimi uma?

• O le a sou manatu o le a se mea e mafai ona fai e se tagata ina ia lagona soo ai faapea?

Malamalama i le suiga

Mafaufau e faailoga i le Mosaea 5:3 le fasifuaitau “e ala i le agalelei aoao o le Atua.” Ina ia malamalama moni i le suiga na tupu i le nuu o le Tupu o Peniamina, e tatau ona tatou malamalama i le ala e mafai ai e Iesu Keriso ona fesoasoani ia i tatou ia suia.

Na faamalamalama mai e Sister Wendy W. Nelson:

Mafaufau e faaali atu le faamatalaga lenei ma valaaulia tagata aoga e vaavaai mo upu po o fasifuaitau e faagaeetia ai i latou.

Sister Wendy W. Nelson

O le Faaola o le afuaga sili ma ua na o le pau lea o le mafuaaga moni o suiga ola. O Ia o le punavai o suiga uma. … O le a Ia aumaia le mea sili mai ia te oe, pe a e liliu atu ia te Ia. O le a Ia laveai moni mea uma e sili ona lelei i totonu ia te oe. …

… E alofa o Ia ia te oe. E fiafia o Ia i au taumafaiga e sui.

O Lona finagalo ia e sui, i le aluga o taimi, ia tuu ese atoa le tagata natura, ia i ai se suiga o le loto, o se suiga o le natura. Sa faia e Iesu le Keriso mea uma ia sa Ia faia ina ia mafai ona e suia! O Ia o lou Faaola ma lo’u Faaola!

Ma a o tatou aioi atu ma le naunautai, ma le faatauanau mo le mana o Lana taulaga togiola e lē i’u ina ia faaaogaina i o tatou olaga, o Lana faamalologa silisili o le a aumaia i o tatou olaga taitoatasi le suiga sili tatou te saili malosi i ai. (Wendy W. Nelson, “Change: It’s Always a Possibility!” [Faigalotu a le Iunivesite o Polika Iaga, 7 Aperila, 1998], 10, speeches.byu.edu)

• E tusa ai ma le saunoaga a Sister Nelson, o le a se mea e mafai ona fai e Iesu Keriso e fesoasoani ai ia i tatou ina ia suia?

• O le a se mea na e aoaoina e uiga i lau matafaioi i suiga?

Valaaulia tagata aoga e mafaufau i se tasi latou te iloa ua suia i le fesoasoani a Iesu Keriso. E mafai ona e faasoa atu le faataitaiga o Ever i le vitio “O se Suiga o le Loto” (4:39), e maua i le ChurchofJesusChrist.org. E mafai foi ona fesoasoani le faasoa atu e uiga i se tasi e te iloa na suia.

Ona fai atu lea o fesili e pei o nei:

• Na faapefea ona fesoasoani le Alii i lenei tagata?

• O a taumafaiga faaletagata lava ia na faia e lenei tagata e sui ai?

• Aisea e te manatu ai o nei suiga e taitai atu ai i le olioli sili atu?

Faia ina ia tumau le suiga

Ina ia faaiu lau suesuega, mafaufau i lou olaga ma lou alualu i luma i le taimi nei e agai atu i le avea e faapei o le Tama Faalelagi ma Iesu Keriso. Mafaufau loloto i mea e te lagona e finagalo le Agaga Paia e te faia o se taunuuga o mea sa e aoaoina ma lagonaina.

Faasoa atu lau molimau e faapea o le a fesoasoani le Alii, e ala i Lona Agaga, i tagata aoga e suia ma avea atili e faapei o le Tama Faalelagi ma Iesu Keriso.

Manatu ma Talaaga o Faamatalaga

E vave oo mai le suia o le loto ma le manao pe e umi se taimi e alu ai?

Na ta’ua e Brother Bradley R. Wilcox o le Au Peresitene Aoao o Alii Talavou:

Brother Bradley R. Wilcox

O le lafoaia o le agasala ma le “le toe i ai se manao e fai mea leaga, ae ia faia mea lelei e le aunoa” [Mosaea 5:2] o sailiga o le olaga atoa.

O le olaga e pei o se malaga i le ala e faasopoia ai le atunuu atoa. E le mafai ona tatou tini i le taunuuga i se tane se tasi o le kesi. E tatau ona toe faatumu pea lava pea le tane. O le taumafa i le faamanatuga e pei o le afe atu i se pamu kesi. A tatou salamo ma faafou a tatou feagaiga, ua tatou tuuto atu lo tatou naunautaiga e tausia poloaiga, ma e faamanuiaina i tatou e le Atua ma Keriso i le Agaga Paia. A faapuupuu, ua tatou folafola atu e fetaomi atu i luma i la tatou malaga, ma ua folafola mai e le Atua ma Keriso e toe faatumu le tane. (Bradley R. Wilcox, “O Le Agavaa E Le o le Atoatoa,” Liahona, Nov. 2021, 61–62)

Na aoao mai Sister Becky Craven o le Au Peresitene Aoao o Tamaitai Talavou:

Sister Becky Craven

E le o faapea mai tusitusiga paia na vave ona atoatoa le [nuu o le Tupu o Peniamina]; ae, faapea na uunaia e lo latou naunau i latou e faatinoina. O lo latou liuga o le loto o lona uiga o le aveesea lea o le alii po o le tamaitai natura ma gauai atu i le Agaga a o tauivi malosi ia avea atili e faapei o Iesu Keriso. …

O le tuufaatasia o a tatou taumafaiga ma le mafai e le Alii ona suia i tatou, e avea ai i tatou ma tagata fou. (Becky Craven, “Tuu Ma Oe le Sui,” Ensign po o le Liahona, Nov. 2020, 58)

O le a le matafaioi e faia e le Agaga Paia e fesoasoani ia i tatou ia suia?

Na faamatala mai e Brother Brian K. Ashton, sa avea muamua ma Au Peresitene Aoao o le Aoga Sa:

Brother Brian K. Ashton

O le faagasologa o le faapaiaga e lē gata ua faamamaina i tatou, ae ua faaee mai ia i tatou ni meaalofa faaleagaga e manaomia po o ni uiga paia o le Faaola ma suia o tatou lava natura, i se tulaga “ua le o toe i ai so [tatou] manao e fai mea leaga” [Mosaea 5:2]. O taimi uma tatou te talia ai le Agaga Paia i o tatou olaga e ala i le faatuatua, salamo, sauniga, auaunaga faa-Keriso, ma isi taumafaiga amiotonu, ua suia i tatou seia oo i lea laa ma lea laa, o sina mea itiiti ma sina mea itiiti e avea ai i tatou faapei o Keriso. (Brian K. Ashton, “O Le Mataupu Faavae a Keriso,” Ensign po o le Liahona, Nov. 2016, 108)

Gaoioiga Faaopoopo e Aoao Ai

E mafai ona faia suiga e ala i le fesoasoani a le Alii ma a tatou taumafaiga

Afai e manaomia, e mafai e tagata aoga ona faaalu le tele o le taimi e sailiili ai a latou lava taumafaiga e sui ma le auala e fesoasoani ai le Alii ia i tatou ina ia suia. E mafai ona e faia se siata i luga o le laupapa ma faaigoa le tasi itu O Le Fesoasoani a le Alii ma le isi itu O a Tatou Taumafaiga. E mafai e tagata aoga ona faasoa mai ni manatu i lalo o ulutala taitasi.

Atonu e lisi mai e tagata aoga ia “lagona o le faamoemoe,” “naunautaiga,” po o le “malosi e toe taumafai ai” i lalo o le “O Le Fesoasoani a le Alii.”

Atonu latou te lisiina le “tatalo,” “ositaulaga,” po o le “aloese mai le leaga” i lalo o le “O a Tatou Taumafaiga.”

O le Agaga Paia ma suiga

Atonu e fesoasoani le faamanatu atu i tagata aoga le matafaioi a le Agaga Paia i le fesoasoani ia i tatou ina ia suia. Valaaulia tagata aoga e iloilo le Mosaea 3:19, ma vaavaai mo mea na aoao mai e le Tupu o Peniamina e uiga i le Agaga Paia ma Lana matafaioi i le fesoasoani ia i tatou ina ia suia. E mafai e tagata aoga ona faatusatusa lenei fuaiupu i le ala na tali atu ai tagata i le Mosaea 5:2–3 ma mea na latou fai mai ai e uiga i le Agaga o le Alii. E mafai ona e fesili i tagata aoga pe na faapefea ona fesoasoani le Agaga Paia ia i latou ina ia suia. Ia mautinoa e lapataia i latou ia aua nei faasoa maia se mea e patino tele pe le faalauaiteleina.

Toe iloilo upumoni taua mai le lauga a le Tupu o Peniamina

Valaaulia tagata aoga e faitau pe iloilo le Mosaea 5:1–5, ma vaavaai mo le taua o le talitonu i aoaoga a perofeta ma isi taitai o le Ekalesia. Fesoasoani i tagata aoga e mafaufau e uiga i upumoni sa latou aoaoina mai taitai musuia e mafai ona faateleina ai lo latou manao e faia mea lelei ma mulimuli i le Faaola. Valaaulia tagata aoga e faaalu ni nai minute e toe faamanatu ai upumoni na latou aoaoina mai le lauga a le Tupu o Peniamina i le Mosaea 1–4. E mafai ona latou vaavaai mo upumoni latou te lagona o le a latou latalata atili atu ai i le Alii ma valaaulia o Ia e suia o latou loto. Ona mafai lea ona latou taliina fesili nei:

• O a ni upumoni e le itiiti ifo ma le lua na e mauaina?

• E mafai faapefea ona e faatinoina le faatuatua i nei upumoni?

• A o e faatinoina le faatuatua i nei upumoni, e mafai faapefea e le Alii ona suia ou manaoga ma fesoasoani ia te oe ia lagona atili le olioli?