Atamai i Aoaoga Faavae: Mosaea 3:19

“[Tuu] Ese le Tagata Natura ma [Avea] ma Tagata Paia e ala i le Togiola a Iesu Keriso.”

talavou o lo o opoina e le tasi le isi

I lau suesuega o le Mosaea 3:19, ua e aoao ai i le ala e faatoilalo ai le tagata natura e ala i le Togiola a Iesu Keriso. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Mosaea 3:19. E mafai foi ona fesoasoani ia te oe e faamatala ai le aoaoga faavae o loo aoaoina i lenei fuaitau ma faaaoga mataupu faavae o le mauaina o le malamalama faaleagaga i tulaga moni o le olaga.

Uunaia le aoaoina faaleagaga e ala i taumafaiga. O le aoaoina o le talalelei lea e uunaia le liua ma fesoasoani i le goto ifo o le talalelei i loto o tagata aoga e manaomia ai le sili atu nai lo le na o se taumafaiga maelega a le faiaoga. O le aoaoina faaleagaga e manaomia ai taumafaiga faifai pea i le vaega a le tagata aoao. Fesoasoani i au tagata aoga ia iloa la latou matafaioi i le faagasologa o le aoao atu ma le aoaoina.

Sauniuniga a le tagata aoga: Valaaulia tagata aoga e amata ona taumafai e tauloto le Mosaea 3:19. Faamalamalama atu o le a e tuuina atu se taimi i le vasega e tauloto ai le fasifuaitau autu o le mau, ae e mafai foi ona aogā ia i latou le faataitai ona taulotoina le fuaiupu atoa.

Gaoioiga e Mafai Ona Aoao Ai

E tatau ona e aoao atu lenei lesona o le atamai i aoaoga faavae pe a uma le lesona o le “Mosaea 3:19,” o le lesona faatatau lea mo le fuaitau o le atamai i aoaoga faavae o le Mosaea 3:19. Afai e te manaomia le tuu o lenei lesona o fuaitau o le atamai i aoaoga faavae i se isi vaiaso, ia mautinoa e aoao atu foi le lesona faatatau i lena lava vaiaso.

Tauloto ma faamatala

I le taimi o le lesona talu ai, sa e aoaoina ai le upumoni lenei mai le Mosaea 3:19: O le gauai atu i uunaiga a le Agaga Paia, e mafai ai ona tatou faatoilaloina le tagata natura ma avea ma tagata paia e ala i le Togiola a Iesu Keriso. O le fasifuaitau autu o le mau mo le Mosaea 3:19 o le “[Tuu] Ese le Tagata Natura ma [avea] o se tagata paia e ala i le Togiola a Iesu Keriso.”

Tuu atu i tagata aoga se auala e faataitai ai le taulotoina o lenei mau faasino ma le fasifuaitau autu o le mau. O le gaoioiga lenei o se tasi lea o auala e mafai ona e faatinoina ai.

Tusi se faatafatolu e pei o lenei i lau api talaaga mo suesuega. Vaevae le mau faasino ma le fasifuaitau autu o le mau mo le Mosaea 3:19 i ni vaega se fa. Tusi vaega e fa i lau tafatolu. Mo se faataitaiga, e mafai ona e tusia le “Mosaea 3:19” i le vaega pito i luga o lau ata, “[Tuu] ese le tagata natura” i le vaega lona lua, ma isi mea faapena. Faataitai le taulotoina o le fasifuaitau atoa e agai mai luga i le pito i lalo o lau ata seia oo ina e lagona le toafimalie i le taulotoina e aunoa ma le tilotilo i ai.

ata faigofie lanu uliuli ma le paepae o se tafatolu ma vaega e fa

Tuu atu i tagata aoga e faataitai le faamatalaina o le aoaoga faavae ia latou lava upu. E mafai ona e faaaogaina le manatu lenei po o se isi manatu e fesoasoani i tagata aoga e faataitai ai.

Manatu faapea o loo e aoaoina atu se lesona e uiga i le Mosaea 3:19 i se vasega o le peraimeri i lau uarota po o le paranesi. E mafai faapefea ona e faamatalaina le sāvali o lenei fuaitau o le atamai i aoaoga faavae i se vaega o tamaiti laiti? Tusi se parakalafa puupuu i au lava upu e faamatala ai le aoaoga faavae o le Mosaea 3:19.

Mafaufau e vaevae tagata aoga i ni paga e faauma ai a latou faamalamalamaga. E mafai ona e valaaulia tagata aoga naunautai e faitau a latou faamalamalamaga i le vasega atoa.

Faataitai le faaaogaina

Tuu i tagata aoga e toe iloilo ia mataupu faavae o le mauaina o le malamalama faaleagaga. O se tasi auala e faia ai lenei mea o le valaaulia lea o ni nai tagata aoga e tusi ni faatusa po o ni ata faigofie i luga o le laupapa e faatusa i mataupu faavae taitasi e tolu. Taumafai e faatulaga le gaoioiga ina ia na o ni nai minute o le vasega e alu ai.

Tuu atu i tagata aoga se vaaiga faataitai e talitutusa ma lenei e fesoasoani ai ia i latou e faataitai le faaaogaina o mataupu faavae uma e tolu o le mauaina o le malamalama faaleagaga.

Sa tauivi Tovia ma le puleaina o lona ita mo le tele o tausaga. E masani ona ita o ia i ona tei ma ona mātua ma siisii lona leo. O loo tauivi foi o ia ina ia fegalegaleai ma isi i le aoga. I se tasi aso, a o talanoa atu i ona mātua e uiga i le vave o lona ita, sa ia ee atu: “Maimau pe ana mafai ona avea au ma se tagata e sili atu le onosai, ae ou te lagona e lē mafai. Ona pau lava o au ia.”

E mafai ona e fetuunaia lenei vaaiga faataitai ina ia lelei atili ai le taulimaina o manaoga o au tagata aoga. E mafai ona e suia le amio o le vave-ita i le vaaiga faataitai i se isi luitau e pei o le paie, gagana lē faaaloalo, po o le agaleaga. O le isi filifiliga o le valaaulia lea o tagata aoga e fai se lisi i luga o le laupapa o amioga e taatele i le tagata natura. Ona mafai lea e tagata aoga ona filifili se tasi o amioga ma fetuunai le vaaiga faataitai e faaaofia ai.

• E faapefea ona e faaaogaina aoaoga o le Mosaea 3:19 ma mataupu faavae o le mauaina o le malamalama faaleagaga e fesoasoani ai i lenei vaaiga faataitai?

Tuu atu i tagata aoga e talanoaina pe faapefea e mataupu faavae taitasi o le mauaina o le malamalama faaleagaga ma le aoaoga faavae o loo aoaoina i le Mosaea 3:19 ona fesoasoani i lenei tulaga. E mafai e tagata aoga ona faia faatasi lenei mea o se vasega pe i ni vaega toalaiti.

Afai e manaomia e tagata aoga nisi taitaiga, o faataitaiga nei o ituaiga o fesili e mafai ona e faasoa atu ia i latou o se vaega o lenei talanoaga.

Saili le malamalama atili e ala i punaoa mamana ua filifilia

• O le a sou manatu e faapefea ona fesoasoani aoaoga o le Mosaea 3:19 i lenei tulaga?

• O a ni isi o mau po o saunoaga mai taitai o le Ekalesia e te manatu e mafai ona fesoasoani?

Mafaufau e faamanatu i tagata aoga ia mau fefaasinoai sa latou suesueina i le lesona talu ai a o latou talanoaina le fesili lenei. Pe e mafai foi ona e faasoa atu nisi po o faamatalaga uma o loo maua i le “Manatu ma Talaaga o Faamatalaga” mai le lesona talu ai.

Iloilo manatu faavae ma fesili ma se vaaiga e faavavau.

• O a nisi o auala e mafai ona e vaai atu ai i lenei popolega faatasi ma se vaaiga e faavavau?

• E mafai faapefea ona fesoasoani le manatuaina o faamoemoega o le Alii mo le faatagaina o i tatou e ola i se lalolagi pa’ū?

• O le a se mea ua e iloa e uiga ia Iesu Keriso ma Lana Togiola e mafai ona faia ai se eseesega i lenei tulaga?

Faatino i le faatuatua

• O a nisi o auala e mafai ai e se tasi i lenei tulaga ona faatino i le faatuatua?

Iloiloga o le atamai i aoaoga faavae

Mafaufau e faaaoga le gaoioiga toeiloilo lenei i se lesona na aoaoina i le faatoa uma ai o le aoaoina o lenei lesona. Tusi se tafatolu i luga o le laupapa e pei o le tafatolu mai le lesona. Amata i le pito i luga, valaaulia tagata aoga e faamaea tulaga taitasi o le tafatolu i le fasifuaitau autu o le mau mo le Mosaea 3:19: “[Tuu] ese le tagata natura ma [avea] ma tagata paia e ala i le Togiola a Iesu Keriso.” Toe fai le faagasologa lenei mo ni nai taimi seia mafai ona tauloto e tagata aoga mai le manatuaga.