“Itulau Autu: O Le Faamoemoega o le Tusi a Mamona,” Tusi Lesona a le Faiaoga o le Tusi a Mamona (2024)
“Itulau Autu,” Tusi Lesona a le Faiaoga o le Tusi a Mamona
Itulau Tomua o le Tusi a Mamona
Itulau Autu
O le Faamoemoega o le Tusi a Mamona
Aisea tatou te manaomia ai le Tusi a Mamona a o lea ua i ai afioga a le Atua i le Tusi Paia? I le itulau autu o le Tusi a Mamona, o loo fesoasoani mai ai le perofeta o Moronae ia i tatou ia malamalama i le pogai e taua tele ai le Tusi a Mamona. O lenei lesona ua faamoemoe e fesoasoani ia te oe e malamalama ai ma faamatala ia faamoemoega o le Tusi a Mamona.
O le Faaaogaina o Sini Faamoemoeina o Seminare ma Inisitituti o Mataupu Faalelotu. Ia manatua “o lo tatou faamoemoega o le fesoasoani lea i le autalavou laiti ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o o latou aiga, ma isi mo le ola e faavavau faatasi ma lo latou Tama i le Lagi” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], x).
Sauniuniga a le tamaitiiti aoga: Valaaulia tamaiti aoga e mafaufau loloto pe aisea ua faamamafaina ai le Tusi a Mamona ma faaaoga soo i Le Ekalesia a Iesu Keriso o le Au Paia o Aso e Gata Ai.
Gaoioiga e Ono Mafai Ona Aoao Ai
O le taua o le iloaina o se faamoemoega o se mea
Mafaufau e faaali atu ni ata o meafaigaluega e le masani ai tamaiti aoga pe aumai ni meafaigaluega faapena i le vasega mo tamaiti aoga e vaai ma tagotago i ai. O le meafaigaluega o loo i lalo o se vaai fetū, lea sa faaaoga i aso anamua mo folauga.
Na e vaai ea muamua i se meafaigaluega e pei o lea o loo faaalia i le ata? Vaai faalemafaufau i le tatau ai ona faamalamalama le faamoemoega ma le taua o se meafaigaluega e le masani ai se isi tagata.
-
Aisea e fesoasoani ai le iloa ma malamalama i le faamoemoega po o le taua o se mea a o lei faaaogaina pe faasoa atu i isi?
Ataaikona, faatonuga o le aoaoinaMafaufau e faaali atu se kopi o le Tusi a Mamona a o lei oo i le isi fesili.
-
E faapefea ona fesootai lenei mea i le malamalama ai i le faamoemoega ma le taua o le Tusi a Mamona?
Mafaufau pe faapefea sou lagona to’a i le faamatalaina o le faamoemoega ma le taua o le Tusi a Mamona i se tasi e leai sona malamalama i ai. A o e suesue lenei lesona, vaavaai mo mea e fesoasoani e te malamalama ai i le faamoemoega ma le taua o le Tusi a Mamona ma le ala e te faasoa atu ai lou malamalama i isi.
Malamalama ai i le faamoemoega ma le taua o le Tusi a Mamona
Mafaufau e tusi le fuaiupu lē uma lenei i luga o le laupapa ma valaaulia tamaiti aoga e faauma le fuaiupu i mea latou te maua.
O le Tusi a Mamona na tusia mo …
O le Tusi a Mamona na tusia mo …
O le itulau autu o loo i ai upu mulimuli na tusia e Moronae i le lautusi mulimuli o papatusi auro. Faitau le itulau autu ma parakalafa muamua e tolu o le faatomuaga o le Tusi a Mamona. Vaavaai mo ni auala e faauma ai le fuaiupu o loo i luga. E ono fesoasoani fesili nei a o e faia lenei mea.
-
O ai na tusia i ai le Tusi a Mamona?
-
O ai e faatatau i ai le tusi a Mamona?
-
Aisea na tusia ai le Tusi a Mamona?
(Mo nisi faamatalaga, tagai “O Se Faamalamalamaga Puupuu e uiga i le Tusi a Mamona” i le itulau tomua.)
Na molimau mai Elder Ulisses Soares o le Korama a Aposetolo e Toasefululua i le faamoemoega o le Tusi a Mamona.
Ou te molimau atu o le Tusi a Mamona o le meafaigaluega lea a le Atua ina ia faataunuu ai le faapotopotoina o Isaraelu i o tatou aso ma ia fesoasoani ai i tagata ia iloa Lona Alo, o Iesu Keriso. (Ulisses Soares, “O Le Oo Mai o le Tusi a Mamona,” Ensign po o le Liahona, Me 2020, 35)
-
O le a se mea ua e aoaoina mai i au lava suesuega faapea ma le saunoaga a Elder Soares e uiga i faamoemoega o le Tusi a Mamona?
O se tasi o upumoni atonu na e faailoaina mai e faapea o le Tusi a Mamona na tusia e fesoasoani ai e faapotopoto Isaraelu ma faatalitonu tagata uma o Iesu o le Keriso.
-
O le a se faamaoniga ua e vaaia i lenei mea i le parakalafa lona lua o le itulau autu?
O gaoioiga nei e lua e mafai ona fesoasoani i tamaiti aoga e faalolotoina ai lo latou malamalama i le upumoni matamatatetele o loo i luga. O nei gaoioiga e mafai ona faia i ni auala eseese. E ono mafai ona e faaali atu gaoioiga taitasi mo tamaiti aoga pe tuuina atu foi ni kopi o gaoioiga taitasi. E mafai e tamaiti aoga ona filifili e fai se tasi ona aoao atu lea e le tasi le isi i mea sa latou aoaoina. E mafai foi ona latou galulue i ni paga po o ni vaega toalaiti e faamaea uma gaoioiga e lua.
Gaoioiga A: O le Tusi a Mamona ua faamoemoe e fesoasoani e faapotopoto Isaraelu
O le Tusi a Mamona e tele ina faasino i le feagaiga na faia e le Alii e faapotopoto ai Isaraelu. Faitau le saunoaga a Peresitene Russell M. Nelson ma le lua pe tolu o mau o loo i lalo.
[I] le Tusi a Mamona, o le a e aoaoina ai le aoaoga faavae o le faapotopotoina, upumoni e uiga ia Iesu Keriso, Lana Togiola, ma le atoaga o Lana talalelei e le o maua i le Tusi Paia. O le Tusi a Mamona e totonugalemu i le faapotopotoina o Isaraelu. O le mea moni, pe ana leai le Tusi a Mamona, o le a le tupu le faapotopotoina folafolaina o Isaraelu. (Russell M. Nelson ma Wendy W. Nelson, “Faamoemoe o Isaraelu [faigalotu a le autalavou i le lalolagi, 3 Iuni, 2018],” faaopoopoga i le New Era ma le Ensign, 13, ChurchofJesusChrist.org)
-
O le a sou manatu e faapefea ona fesoasoani le Tusi a Mamona e faapotopoto Isaraelu?
Mafaufau loloto pe na faapefea ona fesoasoani le Tusi a Mamona ia te oe po o isi ina ia faapotopotoina atu i le Ekalesia moni a Iesu Keriso. Mafaufau e tusifaamaumau faamanuiaga ua oo mai ona o lenei faapotopotoina.
-
Faamata e faapeī ona ese lou olaga e aunoa ai ma le Tusi a Mamona?
-
O ai e mafai ona e faasoa atu i ai le Tusi a Mamona?
Gaoioiga E: O le Tusi a Mamona ua faamoemoeina na te faatalitonu tagata uma o Iesu o le Keriso
Manatunatu toto’a i mea ua e iloa e uiga ia Iesu Keriso ma le ala ua aafia ai la oulua sootaga ma Ia i le Tusi a Mamona. Ona faaalu lea o sina taimi e lisi ai ni mau se lua pe tolu mai le Tusi a Mamona o loo aoaoina ai oe e uiga ia Iesu Keriso. Afai e te manaomia se fesoasoani, tagai i le “Iesu Keriso” i le faasino upu i le fusitolu po o le Tusi a Mamona.
-
O a ni mea o fesoasoani nei fuaiupu ia oe e malamalama ai e uiga ia Iesu Keriso?
O le gaoioiga lenei e mafai ona fetuunai mo tamaiti aoga e faatino-faataitai i ni paga po o ni vaega toalaiti.
Vaai faalemafaufau i le talanoa atu ai i se uo e le masani i le Tusi a Mamona pe e le o lagonaina sona aoga tele. O le a se mea e mafai ona e faasoa atu i lenei tagata e uiga i le Tusi a Mamona ma lona faamoemoega? Mafaufau e faaaofia ai aafiaga patino, fasifuaitau mai le itulau autu ma le faatomuaga, po o soo se mau faasino mai le Tusi a Mamona e te lagona atonu e aoga.
Mafaufau e faaiu i se molimau patino i le faamoemoega ma le taua o le Tusi a Mamona. E mafai foi e tamaiti aoga ona faasoa mai a latou molimau po o lagona e uiga i a latou suesuega ua tuanai ma le lumanai o lenei faamaumauga paia.