Doktrinal nga Kahanas: Alma 34:9–10

“Kinahanglan Gayod nga Adunay Pag-ula nga Pagahimoon, … usa ka Walay Kinutoban ug Walay Kataposan nga Sakripisyo.”

Kristo diha sa krus

Sa miaging leksiyon, imong nakat-onan ang mahitungod sa walay kinutoban ug walay kataposan nga Pag-ula ni Jesukristo. Kini nga leksiyon makatabang nimo sa pagsag-ulo sa pakisayran ug sa mahinungdano nga hugpong sa mga pulong sa kasulatan sa Alma 34:9–10, mapasabot ang doktrina nga gitudlo niini nga mga bersikulo, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo gamit niini nga tudling sa kasulatan.

Ipasabot ug isag-ulo

Namatikdan na ba nimo sukad nga mas sayon sabton ang usa ka butang sa imong hunahuna kaysa ipasabot kini sa mga pulong? Usa sa mga katuyoan sa doktrinal nga kahanas mao ang paghatag kanimo og mga kahigayonan sa pagpasabot sa doktrina gikan sa mga tudling sa doktrinal nga kahanas diha sa imong kaugalingong mga pulong.

Sa imong bag-ohay lang nga pagtuon sa Alma 34:9–10, imong nakat-onan nga kon wala ang walay kinutoban ug walay kataposan nga Pag-ula ni Jesukristo, ang tanang katawhan mahisalaag sa kahangtoran.

Handurawa nga aduna kay kahigayonan sa pagpasabot sa kahulugan sa Alma 34:9–10 ngadto sa usa ka tawo nga gamay ra ang nahibaloan mahitungod ni Jesukristo. Paggahin og panahon sa pagrebyo niini nga mga bersikulo ug markahi o isulat ang mga pulong o mga hugpong sa mga pulong nga gusto nimong masabtan niini nga tawo.

icon, rekord

icon, record

1. Tubaga ang mosunod nga pangutana:

   • Unsaon nimo pagpasabot ang mga pagtulun-an diha sa Alma 34:9–10 sa imong kaugalingong mga pulong?

Ang mahinungdanon nga hugpong sa mga pulong sa kasulatan alang sa Alma 34:9–10 mao: “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”

Aron matabangan ka sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan, isulat ang “Kinahanglan gayod nga adunay pag-ula nga pagahimoon, … ” sa pipila ka higayon diha sa papel hangtod nga imong masag-ulo kini nga bahin sa hugpong sa mga pulong. Dayon buhata ang samang butang alang sa ikaduhang bahin sa hugpong sa mga pulong: “usa ka walay kinutoban ug walay kataposan nga sakripisyo.” Sa higayon nga masag-ulo na nimo ang ikaduhang bahin, balika og dungan ang tibuok pakisayran sa kasulatan ug ang mahinungdanon nga hugpong sa mga pulong sa kasulatan hangtod nga masag-ulo na nimo ang tanan niini.

Pagbansay sa paggamit

Mahinumdoman ba nimo ang mga ngalan sa tulo ka baroganan sa pag-angkon og espirituhanong kahibalo? Tan-awa kon mahimo ba nimo kining masulti og balik nga dili motan-aw. Kon nagkinahanglan ka og tabang, mahimo nimong irebyo kini nga mga baroganan pinaagi sa pagtuon sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Makabaton ka og mga kahigayonan sa pagrebyo niini nga mga baroganan ug pagbansay sa paggamit niini atol niini nga leksiyon.

Handurawa nga gihangyo ka sa pagtudlo og usa ka leksiyon mahitungod sa Pag-ula ni Jesukristo sa imong klase sa Sunday School. Isip kabahin sa imong pagpangandam, miduol ka sa usa ka batan-ong babaye sa imong ward nga ginganlan og Olive ug mihangyo nga siya mopakigbahin sa iyang mga hunahuna kon sa unsang paagi gipanalanginan ni Jesukristo ang iyang kinabuhi tungod sa Iyang Pag-ula.

Nakurat ka sa tubag ni Olive. Siya miingon, “Magmatinuoron ako kanimo, nagtuo ako nga ang Pag-ula ni Jesukristo mahinungdanon alang sa kadaghanan sa mga tawo, apan dili na ako sigurado kon asa kutob kini magamit kanako tungod sa pipila ka mga sayop nga akong nabuhat ug gipadayon sa pagbuhat. Adunay pipila ka mga sala nga wala nako mahibalo kon mahimo pa ba nako nga mabuntog.”

Samtang nagpadayon ka sa pag-andam sa imong leksiyon, kanunay nimong hunahunaon ang mga komentaryo ni Olive ug gusto nimo siyang tabangan. Ikonsiderar kon sa unsang paagi ang mga pagtulun-an diha sa Alma 34:9–10 ug ang mga baroganan sa pag-angkon og espirituhanong kahibalo makatabang kang Olive sa iyang kabalaka.

Lihok diha sa Hugot nga Pagtuo

icon, record

2. Tubaga ang mga pangutana nga adunay kalabotan sa labing menos usa sa mosunod nga mga bullet point:

   • Unsa ang piho nga matinud-anon nga mga buhat sa imong hunahuna ang mahimo ni Olive aron makatabang kaniya?

   • Unsa ang imong matudlo kang Olive mahitungod ni Jesukristo ug sa Iyang Pag-ula nga mahimong makatabang kaniya sa paglihok uban sa hugot nga pagtuo? Sa unsang paagi nga ang mga pagtulun-an diha sa Alma 34:9–10 makatabang?

Alang sa ubang mga ideya kon sa unsang paagi si Olive molihok diha sa hugot nga pagtuo, mahimo nimong basahon ang mga parapo 5–7 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Susihon ang mga konsepto ug mga pangutana inubanan sa mahangtorong panglantaw

icon, record

3. Tubaga ang bisan usa lamang sa mosunod nga mga pangutana:

   • Unsa sa imong hunahuna ang panglantaw sa Langitnong Amahan ug ni Jesukristo sa usa ka kabalaka sama sa kang Olive?

   • Ngano nga importante nga mahinumdoman ni Olive nga ang Pag-ula sa Manluluwas “walay kinutoban ug walay kataposan” (Alma 34:10)?

   • Sa unsang paagi nga ang paghinumdom nga ang tanan napukan ug nahisalaag kon wala ang Pag-ula sa Manluluwas makatabang niya sa pagtan-aw sa iyang kabalaka sa lahi nga paagi?

Alang sa ubang mga ideya kon sa unsang paagi masusi ni Olive ang mga konsepto o mga pangutana nga adunay mahangtorong panglantaw, mahimo nimong basahon ang parapo 8 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Tinguhaa ang dugang nga panabot pinaagi sa balaanong gitudlo nga mga tinubdan

4. Tubaga ang mga pangutana nga adunay kalabotan sa labing menos usa sa mosunod nga mga bullet point:

   • Unsa nga mga matang sa balaanong gitudlo nga mga tinubdan ang imong irekomendar kang Olive aron matabangan siya nga makadawat og giya ug direksiyon? Ngano man?

   • Agi og dugang sa Alma 34:9–10, unsa nga kasulatan o pamahayag gikan sa usa ka lider sa Simbahan ang mahimo nimong ipakigbahin kang Olive? Sa unsang paagi kini makatabang kaniya?

Alang sa ubang mga ideya kon unsaon ni Olive pagtinguha og dugang nga panabot pinaagi sa balaanong gitudlo nga mga tinubdan, mahimo nimong basahon ang mga parapo 11–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.