Alma 14

“Mahimo Kini Sumala sa Kabubut-on sa Ginoo”

Si Alma ug Amulek gipriso

Tungod kay nagpuyo kita sa usa ka napukan nga kalibotan, daghang mga tawo ang gitratar nga mapintas ug dili patas. Dihang sila si Alma ug si Amulek mitudlo sa ebanghelyo ni Jesukristo sa siyudad sa Ammonihah, ang dautang mga tawo misakit sa mga tumutuo ug mipahamtang kanila og kamatayon pinaagi sa kalayo. Si Alma ug si Amulek dayon gipriso ug grabeng gipanglutos. Ang katuyoan niini nga leksiyon mao ang pagtabang kanimo nga mosalig sa Ginoo kon mag-atubang og kalisdanan, pag-antos, ug pagkadili makiangayon.

Mortal nga mga hagit

Basaha ang mosunod nga pamahayag ni Elder Anthony D. Perkins sa Seventy:

Elder Anthony D. Perkins

Bisan asa pa kamo nagpuyo, ang pisikal o emosyonal nga pag-antos sa nagkalainlaing mga pagsulay ug mortal nga mga kahuyang nahimo na kaniadto, karon, o sa umaabot nga kabahin sa inyong kinabuhi. (Anthony D. Perkins, “Hinumdomi ang Imong mga Santos nga Nag-antos, O Among Dios,” Liahona, Nob. 2021, 103)

• Unsa ang pipila sa nagkalain-laing mga paagi nga kita maka-react sa mga pagsulay?

Ang Alma 14 maoy usa ka asoy sa matarong nga mga tawo nga nakasinati og grabe nga mga pagsulay. Kadaghanan niini nga mga pagsulay gipugos ngadto kanila sa mga tawo nga sayop nga migamit sa ilang kabubut-on. Samtang magtuon ka, ikonsiderar kon sa unsang paagi ang mga kamatuoran nga imong nakaplagan gikan sa mga ehemplo ni Alma, Amulek, ug sa ubang matarong nga mga tawo makatabang kanimo sa pagtubag sa mga pagsulay karon ug sa umaabot.

Ilista ang mosunod nga mga ngalan diha sa imong journal sa pagtuon. Isulat ang imong nakat-onan tupad sa tukma nga ngalan.

• Alma ug Amulek

• Zeezrom

• Mga tumutuo sa pulong sa Dios

Basaha ang Alma 14:1–9, mangita sa mga ehemplo sa pag-antos nga nasinati sa nagkalain-laing mga tawo. Mahimo usab nimong tan-awon ang bidyo nga “Si Zeezrom Nagtuo, ug ang mga Matarong Gipanglutos” (3:51), nga anaa sa ChurchofJesusChrist.org.

• Unsa kaha nga mga pangutana ang moabot kanimo kon makasinati ka og mga pagsulay sama sa pipila niini nga mga tawo?

Pagsalig sa Ginoo

Kita makatubag sa daghang mga paagi kon makasinati kita og pag-antos o makasaksi sa pag-antos sa uban. Basaha ang Alma 14:10–11, mangita kon giunsa pagtubag ni Amulek ug Alma ang pag-antos sa mga tumutuo.

• Nakasulay ka na ba sukad nga gusto nimong luwason ang imong kaugalingon o ang uban gikan sa kasakit sa pagsulay, sama sa gibuhat ni Amulek? Ngano man?

• Unsa ang imong nakat-onan mahitungod sa Dios gikan sa tubag ni Alma sa bersikulo 11?

Basaha ang Alma 14:12–13, mangita sa kamatuoran nga gitudlo ni Alma kon unsaon sa pagtubag kon makasinati kita og pag-antos.

• Sa unsang paagi ang mga pulong ni Alma nagpakita og pagsalig sa Ginoo?

• Unsa nga baroganan ang atong makat-onan gikan sa ehemplo ni Alma?

Usa ka baroganan nga atong makat-onan mao nga kon makasinati kita og mga pagsulay ug pag-antos, makapili kita nga mosalig sa Ginoo bisan unsa pa ang resulta. Ikonsiderar ang pagrekord niini nga baroganan diha sa imong journal sa pagtuon ug markahi ang hugpong sa mga pulong nga “Mahimo kini sumala sa kabubut-on sa Ginoo” diha sa imong mga kasulatan.

• Sa unsa nga paagi sa imong hunahuna nga ang pagsalig sa Ginoo usa ka pagpili?

• Unsaon kaha nimo paggamit ang hugpong sa mga pulong nga “Mahimo kini sumala sa kabubut-on sa Ginoo” sa usa ka butang nga imong gisinati karon?

Hunahunaa ang imong kinabuhi ug mga kahimtang. Unsay imong buhaton kon ikaw o kadtong imong gihigugma makasinati og pagbiaybiay, mga pagsulay, o pagkadili makiangayon? Tubaga ang mosunod nga mga pamahayag gamit ang kanunay, usahay, o wala gayod.

1. Ako misalig sa kabubut-on ug tayming sa Ginoo kon mag-ampo alang sa kahupayan gikan sa akong mga pagsulay.

2. Ako matinud-anong nagtinguha og pailob ug pagsabot kon ang kinabuhi ingon og dili na patas.

3. Akong gisentro ang akong hugot nga pagtuo kang Jesukristo ug sa Iyang mahangtorong mga saad kay sa usa ka partikular nga resulta nga akong gilaoman.

Si Elder Quentin L. Cook sa Korum sa Napulog Duha ka Apostoles mipakigbahin og usa ka panglantaw nga makatabang kanato sa pagsalig sa Ginoo atol sa atong mga pagsulay. Tan-awa ang bidyo nga “Personal nga Kalinaw: Ang Ganti sa Pagkamatarong” gikan sa time code 9:02 hangtod sa 9:33, anaa sa ChurchofJesusChrist.org, o basaha ang mosunod:

Elder Quentin L. Cook

Miapil kitang tanan sa konseho sa langit nga naghatag sa moral nga kabubut-on, nakahibalo nga dunay mortal nga kasakit ug gani dili mahulagway nga trahedya tungod sa pag-abuso sa kabubut-on. Nakasabot kita nga kini makapasuko nato, makapalibog, dili makapanalipod, ug makapasakit. Apan nasayod usab kita nga ang Pag-ula sa Manluluwas mobuntog ug mopuli sa tanang dili makiangayon sa mortal nga kinabuhi ug maghatag og kalinaw. (Quentin L. Cook, “Personal nga Kalinaw: Ang Ganti sa Pagkamatarong,” Liahona, Mayo 2013, 34)

• Unsa ang imong nakat-onan nga makatabang kanimo kon ikaw makasinati og pag-antos o makahibalo sa pag-antos sa uban?

Mahinungdanon nga hinumdoman nga kon ikaw nasakitan o giabusohan sa bisan unsang paagi, kinahanglan nga mangayo ka og tabang gikan sa usa ka ginikanan o lider sa Simbahan aron sila makatabang kanimo sa pagsulbad sa problema. Ang Ginoo nahigugma kanimo ug gusto nga ikaw mobati og kalinaw ug kalipay.

Pagpadayon nga may hugot nga pagtuo ug pagsalig sa Ginoo

Human sila si Alma ug si Amulek napugos sa pagsaksi sa pagsunog sa matarong nga mga tumutuo, sila gibugalbugalan, gibunalan, ug gipriso sa mga magmamando sa Ammonihah (tan-awa sa Alma 14:14–17).

Basaha ang Alma 14:18–29, mangita kon sa unsang paagi sila si Alma ug Amulek misalig sa Ginoo atol sa ilang pag-antos. Mahimo usab nimong tan-awon ang bidyo nga “Si Alma ug Amulek Milagrosong Naluwas gikan sa Bilanggoan” (2:45), anaa sa ChurchofJesusChrist.org.

• Sa unsang paagi si Alma ug Amulek nagpadayon sa pagsalig sa Ginoo atol sa ilang mga kasakit?

Kinsay nailhan nimo?

1. Kompletoha ang mosunod diha sa imong journal sa pagtuon. 

   Paghunahuna og usa ka tawo sa imong kinabuhi kinsa naningkamot sa pagsalig sa Ginoo atol sa panahon sa mga pagsulay ug mga kasakit. Unsay imong makat-onan gikan sa iyang ehemplo? Unsa nga mga pagkaparehas ang imong nakita tali sa tubag niini nga tawo ug sa unsa nga paagi si Alma ug si Amulek mitubag sa kalisdanan?

   Pagsulat og usa o duha ka piho nga butang nga imong mahimo aron mas mosalig sa Ginoo kon ang kinabuhi lisod o daw dili makiangayon. Ikonsiderar ang pagbutang sa imong gisulat sa usa ka dapit nga makita nimo kini kanunay.

Opsiyonal: Gustong Makakat-on pa og Dugang?

Sa unsang paagi si Jesukristo makatabang nako kon ang kinabuhi dili makiangayon?

Si Elder Dale G. Renlund sa Korum sa Napulog Duha ka Apostoles mideklarar:

Elder Dale G. Renlund

Tungod kay si Jesukristo milahutay sa walay kataposang matubsanon nga sakripisyo, Siya hingpit nga makasabot kanato. Siya sa kanunay nasayod bahin kanato ug sa atong mga kahimtang.

Dinhi sa mortalidad, kita “uban sa pagsalig makaduol” sa Manluluwas ug makadawat og kaluoy, pagkaayo, ug tabang [tan-awa sa Mga Hebreohanon 4:16]. Bisan kon kita nag-antos sa dili mapasabot nga paagi, ang Dios makapanalangin kanato sa yano, ordinaryo, ug sa makahuluganong mga paagi. Samtang kita magkat-on sa pag-ila niini nga mga panalangin, ang atong pagsalig sa Dios molambo. Didto sa kahangtoran, ang Langitnong Amahan ug si Jesukristo mosulbad sa tanan nga pagkadili makiangayon. Atong masabtan nga kita gustong mahibalo unsaon kaha ug kanus-a kaha. Unsaon kaha Nila sa paghimo niana? Kanus-a kaha Sila mohimo niini? Sa akong nahibaloan, Sila wala motug-an kon unsaon kaha o kanus-a kaha. Ang akong nahibaloan mao nga Sila mohimo niini.

Diha sa dili makiangayong mga sitwasyon, usa sa atong mga tahas mao ang pagsalig nga “ang tanan nga pagkadili makiangayon kabahin sa kinabuhi mahimong mapahusto pinaagi sa Pag-ula ni Jesukristo” [Isangyaw Ang Akong Ebanghelyo: Usa ka Giya sa Misyonaryo nga Pag-alagad (2018), 61]. Si Jesukristo mibuntog sa kalibotan ug “makapahiuli” sa tanan nga pagkadili makiangayon. Tungod Kaniya, makabaton kita og kalinaw dinhi sa kalibotan ug magmaya. (Dale G. Renlund, “Makapungot nga Pagkadili Makiangayon,” Liahona, Mayo 2021, 43)