Mosiah 28

Personal nga Pagkakabig ug Pagpaambit sa Ebanghelyo

batan-on nga naghisgot mahitungod sa ebanghelyo ngadto sa uban

Unsa nga mga kasinatian ang imong nasinati sa pagpaambit sa ebanghelyo ni Jesukristo? Human sa ilang pagkakabig, ang anak nga mga lalaki ni Mosiah miduol sa hari alang sa pagtugot sa pagsangyaw sa ebanghelyo ngadto sa mga Lamanite. Si Hari Mosiah nangutana una sa Ginoo, dayon mitugot sa iyang anak nga mga lalaki sa paglakaw aron sila makadala sa pulong sa Dios ngadto sa mga Lamanite (tan-awa sa Mosiah 28:1). Kini nga leksiyon gituyo aron sa pagtabang kanimo nga madugangan ang imong tinguha sa pagpaambit sa ebanghelyo.

Pagpaambit ug pagkakabig

• Unsa ang pipila ka mga butang nga imong ganahan pag-ayo nga gusto nimong ipakigbahin kini sa uban?

Si Elder David A. Bednar sa Korum sa Napulog Duha ka Apostoles mitudlo nga dili talagsaon alang kanato ang pagpaambit sa mga butang nga makahuluganon kanato. ChurchofJesusChrist.org

Elder David A. Bednar

Ang pagpakigbahin sa uban sa mga butang nga labing makahuluganon nato o nakatabang nato sagad lang.

Kining sama nga sumbanan makita sa mga butang nga may dakong espirituhanong importansya ug sangpotanan. …

Ang imbitasyon nga among ipaabut ninyo aron makat-on ug masulayan ang among mensahe tungod sa positibong epekto sa ebanghelyo ni Jesukristo sa among kinabuhi. Usahay maulaw o direkta o pursigero mi sa among paningkamot. Ang among yano nga tinguha mao ang pagpakigbahin nganha kaninyo sa kamatuoran nga bililihon para namo. (David A. Bednar, “Dali ug Tan-awa,” Liahona, Nob. 2014, 108, 110)

Gradohi kon unsa ka tinuod ang mosunod nga mga pamahayag alang kanimo sa sukdanan nga 1 ngadto sa 5 (diin ang 1 dili tinuod alang kanimo ug ang 5 tinuod kaayo alang kanimo):

• Ang mga kamatuoran mahitungod sa Manluluwas nga si Jesukristo ug sa Iyang ebanghelyo bililhon kaayo kanako.

• Aduna akoy tinguha sa pagpaambit sa Iyang ebanghelyo ngadto sa uban.

Samtang magtuon ka sa mga kinabuhi ug mga ehemplo sa anak nga mga lalaki ni Mosiah, pamalandongi ang imong tinguha sa pagpaambit sa ebanghelyo sa Manluluwas. Tinguhaa ang pagpadayag aron makahibalo unsa ang sunod nga mga lakang nga gusto sa Ginoo nga imong buhaton aron ang ebanghelyo mahimong mas makahuluganon kanimo ug ang imong tinguha sa pagpaambit sa ebanghelyo molambo.

Ang mga anak nga lalaki ni Mosiah

Hinumdumi nga human sa ilang pagkakabig, ang mga anak nga lalaki ni Hari Mosiah misangyaw sa ebanghelyo sa ilang kaugalingong yuta, nagtinguha sa pagtul-id sa ilang mga sayop (tan-awa sa Mosiah 27:32–37).

Basaha ang Mosiah 28:1–5, mangita sa unsay gitinguha sa mga anak nga lalaki ni Mosiah ug ngano. (Mahimo nimong markahan ang imong napalgan diha sa imong mga kasulatan.)

• Hain nga mga pulong o mga hugpong sa mga pulong niini nga mga bersikulo ang mipatigbabaw diha kanimo? Unsa ang mga rason sa mga anak nga lalaki ni Mosiah sa pagpaambit sa ebanghelyo ngadto sa mga Lamanite?

• Ngano kaha nga kini makapadasig nga mga rason sa pagpaambit sa ebanghelyo?

• Unsa nga mga kamatuoran ang imong nakat-onan gikan niini nga mga bersikulo?

Usa ka kamatuoran nga atong makat-onan gikan niini nga mga bersikulo mao nga samtang ang atong pagkakabig ngadto sa Ginoo nagkalawom, ang atong tinguha sa pagpaambit sa ebanghelyo molambo.

Si Presidente Dallin H. Oaks sa Unang Kapangulohan mikumpirmar niini nga kamatuoran sa dihang iyang gitudlo ang mosunod:

Presidente Dallin H. Oaks

Ang kakusog sa atong tinguha sa pagpaambit sa ebanghelyo usa ka mahinungdanong timailhan sa giladmon sa atong personal nga pagkakabig (Dallin H. Oaks, “Sharing the Gospel,” Ensign, Nob. 2001, 7).

• Unsa nga mga kasinatian nga aduna ang anak nga mga lalaki ni Mosiah nga nakatabang kanila nga makabig ngadto ni Jesukristo ug sa Iyang ebanghelyo? (Tan-awa sa Mosiah 27:34–36; 28:4).

• Unsa nga mga kasinatian ang nakatabang nimo o niadtong imong nailhan aron mahimong mas makabig ngadto ni Jesukristo ug sa Iyang ebanghelyo?

• Unsa ang imong gihigugma mahitungod ni Jesukristo ug sa Iyang ebanghelyo nga gusto nimong ipaambit sa uban? (Pananglitan, tingali aduna kay makahuluganon nga mga kasinatian sa pagpasaylo sa Manluluwas, gugma sa Dios, pag-ampo, ug uban pa.)

Bisan kon kita nakabig ngadto sa Ginoo, tingali adunay mga rason nganong ang pagpaambit sa ebanghelyo lisod gihapon.

• Kon ikaw usa sa anak nga mga lalaki ni Mosiah, unsa kaha ang imong mga kabalaka mahitungod sa pagsangyaw sa ebanghelyo ngadto sa mga Lamanite?

Isip ilang amahan ug isip hari, si Mosiah adunay daghang mga rason nga mabalaka mahitungod sa pagpadala sa iyang anak nga mga lalaki sa pagsangyaw sa ebanghelyo ngadto sa mga Lamanite. Si Hari Mosiah nahadlok dili lamang alang sa kahilwasan [safety] sa iyang anak nga mga lalaki apan lakip na usab nga kon ang iyang anak nga mga lalaki mobiya, wala siyay manununod nga koronahan isip sunod nga hari sa mga Nephite.

Basaha ang Mosiah 28:6–8, mangita kon nganong gitugotan ni Mosiah ang iyang anak nga mga lalaki nga moadto sa ingon ka delikado nga misyon.

• Unsa nga mga panalangin ang gisaad sa Ginoo kang Mosiah?

Imong sunod nga mga lakang

Paggahin og higayon sa paglista sa mga kabalaka nimo o sa uban mahitungod sa pagpaambit sa ebanghelyo.

Pagpili og usa niini nga mga kabalaka ug pag-ampo alang sa giya samtang magsiksik ka sa mga kasulatan ug mamalandong unsaon pagbuntog niini nga kabalaka. Pananglitan, kon aduna kay usa sa mosunod nga mga kabalaka, mahimo nimong pamalandongan ang mga pangutana ug tun-an ang mga kasulatan nga gilista human sa mga pamahayag.

Dili ko segurado nga igo na kong nakabig aron sa pagpaambit sa ebanghelyo.Sa unsang paagi nga ang mga ehemplo sa anak nga mga lalaki ni Mosiah makatabang kanimo? (Tan-awa sa Mosiah 28:1–5.) Samtang magbasa ka sa pipila sa mosunod nga mga bersikulo, pangita og mga paagi nga mas makabig ka: Mga Buhat 3:19; Santiago 5:20; Enos 1:2–5; Mosiah 3:19; 5:2; 27:25; Alma 5:12–14; 22:15–18; 53:10; Helaman 15:7; 3 Nephi 9:20.

Mahadlok ko nga isalikway.Rebyoha sa Mosiah 28:2–4 ang mga rason nga ang anak nga mga lalaki ni Mosiah gustong mopaambit sa ebanghelyo bisan tuod daghan ang naghunahuna nga ang mga Lamanite dili modawat niini. Sa unsang paagi kini nga mga rason makatabang kanimo? Sa unsang paagi kaha ang paghunahuna mahitungod sa unsay nahimo sa Manluluwas alang kanimo (ug mahimo alang sa uban) makatabang kanimo sa pagbuntog sa imong kahadlok?

Wala ako nahimong labing maayo nga ehemplo sa pagsunod sa ebanghelyo.Sa wala pa ang ilang pagkakabig, ang anak nga mga lalaki ni Mosiah misangyaw batok sa ebanghelyo (tan-awa sa Mosiah 27:8–10), apan human sila maghinulsol, nahimo silang pipila sa labing malamposon nga mga misyonaryo sa Basahon ni Mormon (tan-awa sa Alma 17:4). Unsa ang gidasig sa ilang ehemplo diha kanimo nga buhaton? Unsa ang ubang mga ehemplo diha sa mga kasulatan nga imong mahunahunaan nga makatabang?

1. Kompletoha ang labing menos duha sa mosunod nga dili kompleto nga mga kapahayag:

   • “Usa sa labing importante nga mga butang nga akong nakat-onan gikan sa anak nga mga lalaki ni Mosiah mao …”

   • “Usa ka butang nga akong gibati nga gusto sa Ginoo nga akong buhaton sa pagsunod sa ehemplo sa anak nga mga lalaki ni Mosiah mao …”

   • “Aron makahimo og epektibo nga aksiyon niini, mahimo nako …”

Opsiyonal: Gustong Makakat-on Pa og Dugang?

Sa unsa nga paagi ako mas makapaambit sa ebanghelyo ngadto sa uban?

Si Presidente M. Russell Ballard, Acting nga Presidente sa Korum sa Napulog Duha ka Apostoles, misugyot og usa ka epektibong paagi nga ang mga miyembro sa Simbahan makapaambit sa ebanghelyo:

Presidente M. Russell Ballard

Ang yawe sa malamposong misyonaryong buhat sa miyembro mao ang pagpakita og hugot nga pagtuo. Usa ka paagi sa pagpakita sa inyong hugot nga pagtuo diha sa Ginoo ug sa Iyang mga saad mao ang pagmainampuong pagtakda og petsa nga adunay tawo nga andamon para ipaila-ila sa mga misyonaryo. Nakadawat ako og gatosan ka mga sulat gikan sa mga miyembro kinsa nagpakita sa ilang hugot nga pagtuo niining yano nga paagi. Bisan tuod og ang mga pamilya walay usa ka tawo diha sa ilang hunahuna kang kinsa ilang mapaambit ang ebanghelyo, nagtakda sila og petsa, nag-ampo, ug dayon nakigsulti ngadto sa daghan pang mga tawo. Ang Ginoo mao ang Maayong Magbalantay, ug nakaila Siya sa Iyang mga karnero kinsa giandam na nga maminaw sa Iyang tingog. Mogiya Siya kanato samtang kita mosiksik sa Iyang balaanong tabang sa pagpaambit sa Iyang ebanghelyo. (M. Russell Ballard, “Paghimo og Mapaambiton sa Ebanghelyo nga Panimalay,” Liahona, Mayo 2006, 86)

Unsaon nako pagpalawom ang akong pagkakabig?

Si Elder Arnulfo Valenzuela sa Seventy misubli sa mga pagtulun-an ni Presidente Nelson mahitungod sa paningkamot ug pagkakabig sa mosunod nga pamahayag:

Elder Arnulfo Valenzuela

Si Presidente Russell M. Nelson nagtudlo kanato bag-ohay lang: “Ang pagbuhat og bisan unsang mas maayo nagkinahanglan og paningkamot. Ang pagkahimong tinuod nga disipulo ni Jesukristo dili eksepsyon. Ang pagpalambo sa inyong hugot nga pagtuo ug pagsalig Kaniya nagkinahanglan og paningkamot.” Lakip sa mga rekomendasyon nga iyang gihatag kanato sa pagpatubo sa atong hugot nga pagtuo diha kang Jesukristo mao nga kita mamahimong mga tigkat-on, nga isubsob nato ang atong kaugalingon diha sa mga kasulatan aron makasabot og maayo sa misyon ug pagpangalagad ni Kristo. (Tan-awa sa “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102.) (Arnulfo Valenzuela, “Pagpalawom sa Atong Pagkakabig ngadto kang Jesukristo,” Liahona, Nob. 2021, 59)