1 Nephi 8:1–18

Ang Gugma sa Dios Mao ang Labing Madanihon sa Tanan nga mga Butang

Kahoy sa Kinabuhi

Unsaon nimo paghulagway ang gugma sa Dios? Si Lehi adunay panan-awon diin siya nakakita og usa ka matahom nga kahoy. Mikaon siya sa bunga sa maong kahoy, ug kini “hilabihan ka tam-is, labaw pa sa tanan” nga iyang natilawan sukad (1 Nephi 8:11). Kini nga kahoy ug ang iyang bunga nagrepresentar sa gugma sa Dios, nga gipakita sa pagkatawo, kinabuhi, pangalagad, ug maulaong pagsakripisyo ni Jesukristo. Kini nga gugma “mipuno sa kalag [ni Lehi] sa tuman nga hingpit nga kalipay” (1 Nephi 8:12). Kini nga leksiyon gituyo aron sa pagtabang kanimo nga madugangan ang imong tinguha nga makasinati sa gugma sa Dios ug sa Pag-ula ni Jesukristo.

Kangitngit ug kahayag

Pipila sa mga mamumulong sa kinatibuk-ang komperensiya ang mipaambit og mga istorya sa pagsinati sa pisikal nga kangitngit nga gisundan sa dugang nga panabot ug pagpasalamat sa kahayag. Suwayi paghanduraw ang mosunod nga mga sitwasyon. Basaha o tan-awa ang usa niini nga mga istorya.

Pagsakay og bisikleta agi sa 15 ka milya ang gitas-on nga tunnel (tan-awa sa Vern P. Stanfill, “Pilia ang Kahayag,” Liahona, Nob. 2015, 55–57).

Ang mga suga sa Salt Lake Temple dili mosiga sa gabii (tan-awa sa Sharon Eubank, “Kristo: Ang Kahayag nga Nagdan-ag taliwala sa Kangitngit,” Liahona, May 2019, 73–76).

Nag-rappell sa lawom nga langob (tan-awa Timothy J. Dyches, “Ang Kahayag Mounong ngadto sa Kahayag,” Liahona, Mayo 2021, 112–15).

Si Lehi nag-ampo alang sa kaluoy sa Ginoo

Samtang nagpuyo sa kamingawan, si Lehi mipaambit sa mga detalye sa usa ka panan-awon nga iyang nakita ngadto sa iyang pamilya. Niini nga panan-awon, siya didto sa “usa ka mangitngit ug awaaw nga kamingawan” (1 Nephi 8:4).

Basaha ang 1 Nephi 8:5–8, nga mangita unsay nahitabo ni Lehi ug unsay iyang nabati. Makatabang ang paghanduraw sa imong gibasa. Pangita og naghulagway nga mga detalye nga makatabang kanimo nga makamugna og hulagway sa hunahuna [mental picture] o handurawa ang mga panghitabo sama sa salida.

• Unsa nga matang sa mga panghunahuna o mga pagbati sa imong hunahuna ang hinungdan nga si Lehi nag-ampo alang sa kaluoy?

Paggahin sa makadiyot sa pagpamalandong sa nagkalain-laing mga paagi nga mahimo natong bation ang kangitngit sa atong kinabuhi ug ang mga rason nga tingali kita mangamuyo sa Ginoo alang sa kaluoy.

Basaha ang 1 Nephi 8:9–12, nga mangita kon giunsa pagtabang sa Ginoo si Lehi.

Sa imong journal sa pagtuon, paghimo og yano nga drowing nga nagrepresentar sa kahoy nga nakita ni Lehi. Idrowing ang bunga sa kahoy, ug sulati ang bunga base sa mga pagpasabot ni Lehi diha sa 1 Nephi 8:10–12. (Alang sa dugang nga mga paghulagway aron masulat sa bunga sa kahoy, basaha ang 1 Nephi 15:36 ug Alma 32:42.) Samtang magdrowing ka, hunahunaa kon unsa kaha ang girepresentar niini nga kahoy ug sa iyang bunga.

Sa wala madugay, si Nephi gusto nga personal nga makahibalo ug makasabot sa panan-awon, lakip ang kahulogan sa kahoy nga nakita ni Lehi. Samtang namalandong sa unsay gitudlo kaniya, si Nephi gipakita, pinaagi sa Espiritu, sa usa ka panan-awon sa Birhen Maria nga nagkugos sa batang si Jesus diha sa iyang mga bukton (tan-awa sa 1 Nephi 11:13, 20).

Tan-awa ang mosunod nga hulagway ug hunahunaa kon ngano kaha nga gipakita kini ngadto kang Nephi sa dihang gusto Niyang mahibalo sa kahulogan sa kahoy.

Maria ug ang bata nga si Jesus

Basaha ang 1 Nephi 11:21–23, nga mangita kon unsa pa ang gipakita ngadto kang Nephi ug sa unsang paagi kini nakatabang kaniya nga makat-on sa kahulogan sa kahoy. Mahimo nimong sulatan ang kahoy base sa unsay imong nakat-onan.

• Sa imong hunahuna giunsa sa Manluluwas pagtabang kanato nga mobati sa gugma sa Dios?

Si Elder David A. Bednar sa Korum sa Napulog Duha ka Apostoles mitudlo:

Elder David A. Bednar

Ang dakong pagpakita sa gugma sa Dios alang sa Iyang mga anak mao ang mortal nga pangalagad, maulaong sakripisyo, ug Pagkabanhaw ni Ginoong Jesukristo. Ang bunga sa kahoy makonsiderar nga simbolo sa mga panalangin sa Pag-ula sa Manluluwas. (David A. Bednar, “Dali ug Tan-awa,” Liahona, Nob. 2014, 109)

• Gikan sa panan-awon ni Lehi ug sa pamahayag ni Elder Bednar, unsa nga mga kamatuoran ang imong maila mahitungod sa gugma sa Dios?

Pagbati sa gugma sa Dios ug tumang kalipay pinaagi ni Jesukristo

Usa ka kamatuoran nga atong makat-onan mao nga ang gugma sa Dios, gipadayag pinaagi ni Jesukristo, mao ang labing madanihon kay sa bisan unsang butang ug naghatag og labing dakong kalipay.

Ang mosunod nga mga kalihokan makatabang kanimo sa pag-ila kon sa unsang paagi kaha nimo mabati ang gugma sa Dios alang kanimo tungod ni Jesukristo. Samtang buhaton nimo kini nga mga kalihokan, sulayi pag-ila ang daghang mga panalangin nga moabot pinaagi ni Jesukristo ug sa Iyang Pag-ula ug isulat kini diha sa bunga o sa palibot sa bunga nga imong gidrowing.

Kalihokan 1

Basaha kon unsa ang gipamatuod ni Lehi human makakita niini nga panan-awon diha sa 1 Nephi 10:5–6. Basaha usab ang pipila sa mosunod nga mga kasulatan o pangitaa ang uban nga naghulagway sa mga panalangin nga atong madawat pinaagi sa Pag-ula ni Jesukristo: Isaiah 53:4–5; John 1:17; Mosiah 4:2–3; Alma 7:11–12; Helaman 5:12.

Kalihokan 3

Pamalandong sa mga paagi nga imong nasinati ang mga panalangin nga gitanyag ni Jesukristo o giunsa nimo kini pagkakita sa kinabuhi sa ubang mga tawo. Mahimong maglakip kini sa mga paagi diin gipanalanginan ka sa Ginoo sa mga panahon sa kangitngit.

Unsay imong nakat-onan?

Paggahin sa makadiyot sa pagrebyo sa mga panalangin nga mahimo natong madawat pinaagi sa Pag-ula ni Jesukristo nga imong nasulat diha sa imong drowing sa bunga. Pamalandong nganong kini nga mga panalangin mahimong “[makapalipay sa usa]” (1 Nephi 8:10), mahimong “hilabihan ka tam-is, labaw pa sa tanan“ (1 Nephi 8:11), ug mopuno kanimo “sa tuman nga hingpit nga kalipay” (1 Nephi 8:12).

icon, rekord

1. Tubaga ang labing menos duha sa mosunod nga mga pangutana:

• Unsay imong nakat-onan mahitungod sa gugma sa Dios alang kanimo?

• Hain sa mga panalangin nga nahimong posible pinaagi ni Jesukristo ang imong labing gitinguha sa imong kinabuhi? Ngano man?

• Sa unsang paagi ka napanalanginan tungod sa gugma nga gipakita sa Dios sa pagpadala sa Iyang Anak nga si Jesukristo aron sa pag-ula alang kanimo?

Opsiyonal: Gustong Makakat-on pa og Dugang?

Unsa nga mga panalangin ang atong madawat pinaagi sa Pag-ula ni Jesukristo?

Ang mga kasulatan nagpamatuod sa daghang mga panalangin nga gitanyag sa Manluluwas kanato pinaagi sa Iyang Pag-ula. Kita mapasaylo sa atong mga sala, ug ang atong mga kasingkasing mahimong maputli (tan-awa sa Mosiah 4:2–3). Mahimo kitang makig-uli sa Dios (tan-awa sa Jacob 4:11). Kita makadawat sa “grasya ug [sa] kamatuoran” (Juan 1:17). Mabuntog nato ang kalibotan ug mobati og kalinaw (tan-awa sa Juan 16:33). Makadawat kita og balaanong tabang ug pagkaayo sa atong mga kasakit, mga sakit, mga kasubo, ug mga balatian (tan-awa sa Isaias 53:4–5; Alma 7:11). Siya nahibalo sa atong mga kahuyang ug motabang kanato niini (tan-awa sa Alma 7:12). Siya makapalig-on kanato batok sa tintasyon (tan-awa sa Doktrina ug mga Pakigsaad 62:1). Siya usa ka tinuod nga tukuranan, ug kon atong itukod ang atong mga kinabuhi diha Kaniya, kita dili gayod mapukan (tan-awa sa Helaman 5:12). Ang tanan nga katawhan pagabanhawon gikan sa mga patay (tan-awa sa Mosiah 16:7–8; Alma 7:12; 1 Corinthians 15:22). Kita mahimong sama sa Manluluwas ug makapanunod sa kinabuhing dayon (tan-awa sa Moroni 7:48; 2 Nephi 2:27).