O Aoaoga Faavae Autu
Seminare ma Inisitituti o Aoaoga Faalelotu
1. Aiga Atua
E tolu peresona mavaevae i le Aiga Atua: o Le Atua le Tama Faavavau; o Lona Alo o Iesu Keriso; ma le Agaga Paia (tagai Galuega 7:55–56). E i ai i le Tama ma le Alo ia tino o aano ma ivi, a o le Agaga Paia o le peresona o agaga (tagai MFF 130:22–23). E tasi lo latou faamoemoega ma le aoaoga faavae. Ua atoatoa a’ia’i lo latou lotogatasi ina ia faataunuuina le fuafuaga paia a le Tama Faalelagi o le faaolataga.
Le Atua Le Tama
O Le Atua le Tama o le Pule Aoao o le atulaulau. O Ia o le Tama o o tatou agaga. E atoatoa o Ia, e ona le mana uma, ma e silafia mea uma. O Ia foi o le Atua o le alofa mutimutivale atoatoa, agalelei, ma le alofa moni.
Iesu Keriso
O Iesu Keriso o le Ulumatua a le Tama i le agaga ma o le Alo e Toatasi na Fanaua e le Tama i la le tino. O Ia o Ieova o le Feagaiga Tuai ma le Mesia o le Feagaiga Fou.
Sa soifua o Ia e aunoa ma se agasala ma faia se Togiola atoatoa mo agasala a tagata uma. O Lona soifuaga o se faataitaiga tonu e tatau ona ola ai tagata uma (tagai 3 Nifae 27:27). O Ia o le uluai tagata i lenei lalolagi ua toetu mai. O le a toe afio mai Iesu Keriso i le mana ma le mamalu ma o le a nofotupu i le lalolagi i le taimi o le Meleniuma.
E tatau ona faia tatalo, faamanuiaga ma sauniga faaleperisitua uma i Lona suafa.
O Le Agaga Paia
O le Agaga Paia o le sui lona tolu o le Aiga Atua. O ia o le peresona o agaga e leai se tino o aano ma ivi. E masani lava ona taua o le Agaga, le Agaga Paia, le Agaga o le Atua, le Agaga o le Alii, po o le Faamafanafana.
E molimau mai le Agaga Paia i le Tama ma le Alo, e faaalia mai le moni o mea uma, ma faamama i latou o e salamo ma ua papatisoina (tagai Moronae 10:5).
2. Ata o le Faaolataga
I le olaga i le muai olaga, sa folasia ai e le Tama Faalelagi se fuafuaga e mafai ai e i tatou ona avea faapei o Ia ma maua ai tino ola pea ma le ola e faavavau (tagai MFF 14:7; Mose 1:39). E faatatau tusitusiga paia i lenei fuafuaga o le ata o le faaolataga, o le fuafuaga sili o le fiafia, o le fuafuaga o le togiola, ma le fuafuaga o le alofa.
O le ata o le faaolataga e aofia ai le Foafoaga, o le Pau, le Togiola a Iesu Keriso, ma tulafono uma, o sauniga, ma aoaoga faavae o le talalelei. O le pule faitalia—o le tomai e filifili ma faatino ai mo i tatou lava—e taua foi i le fuafuaga a le Tama Faalelagi. Ona o lenei fuafuaga, ua mafai ai ona faaatoatoaina i tatou e ala i le Togiola, maua le atoaga o le fiafia, ma ola e faavavau i le afioaga o le Atua. E mafai ona tumau a tatou sootaga faaleaiga e oo i le faavavau.
Muai Olaga
Ae tatou te lei fananau mai i le lalolagi, sa tatou nonofo i le afioaga o lo tatou Tama Faalelagi o se tasi o ana fanau agaga. I lenei muai olaga sa tatou auai i se fonotaga ma isi fanau agaga a le Tama Faalelagi. I lena fonotaga sa folasia mai ai e le Tama Faalelagi Lana fuafuaga, ma na osifeagaiga ai le Iesu Keriso o le muai olaga e avea ma Faaola.
I le faamanuiaina la i le meaalofa o le faitalia, na tatou faia ai ni faaiuga taua, e pei o le faaiuga e mulimuli i le fuafuaga a le Tama Faalelagi (tagai 2 Nifae 2:27). Na tatou saunia e o mai i le lalolagi, lea o le a mafai ai ona tatou alualu ai pea i luma.
O e na mulimuli i le Tama Faalelagi ma Iesu Keriso na faataga e o mai i le lalolagi ia latou maua le poto masani i le olaga faitino ma alualu ai i luma e agai atu i le ola e faavavau. O Lusifelo, o le isi atalii agaga o le Atua, na tetee i le fuafuaga. Sa avea o ia ma Satani, ma tuliesea faatasi ma e na mulimuli ia te ia mai le lagi ma taofia ai faamanuiaga o le mauaina o se tino faaletino ma le poto masani i le olaga faitino.
Olaga Faaletino
O le vaega faaletino o lo tatou olaga o se taimi e aoao ai lea e mafai ai ona tatou saunia mo le ola e faavavau ma faailoa atu ai i tatou lava pe o le a tatou faaaogaina lo tatou faitalia e faia ai mea uma ua poloaiina ai i tatou e le Alii. E tuufaatasi o tatou agaga ma o tatou tino faaletino, e maua ai e i tatou avanoa e tutupu ae ai ma atiina ae i auala ia na lē mafai i o tatou muai olaga.
Olaga pe a mavae le Oti
Pe a tatou oti, o le a ulufale atu o tatou agaga i le lalolagi o agaga ma faatalitali ai mo le Toetu. O agaga o e amiotonu o le a nonofo i le mea o i ai le fiafia, ua ta’ua o le parataiso. O le toatele o ē faamaoni o le a faaauau pea ona talai atu le talalelei ia i latou o i le falepuipui o agaga.
O le falepuipui o agaga o se nofoaga le tumau lea i le lalolagi pe a mavae le oti mo i latou o e na maliliu e aunoa ma se malamalama i le upumoni po o i latou o e na lē usiusitai i le olaga faitino. O iina o le a aoao atu ai le talalelei i agaga ma maua le avanoa e salamo ai ma talia sauniga o le faaolataga lea e faatino mo i latou i totonu o malumalu. O i latou e taliaina le talalelei o le a nonofo ai i le parataiso seia oo i le Toetu.
O le Toetu o le toe faatasia lea o o tatou tino agaga ma o tatou tino faaletino o aano ma ivi (tagai Luka 24:36–39). Pe a mavae le toetu, o le a le toe mafai ona tuueseeseina le agaga ma le tino, ma o le a tatou ola pea lava. O tagata uma e fananau mai i le lalolagi o le a toetutu aua na manumalo Iesu Keriso i le oti (tagai Iopu 19:25–26; 1 Korinito 15:20–22). O le a toetutu muamua e amiotonu nai e amioleaga ma o le a tula’i mai i le Uluai Toetu.
O le a faia le Faamasinoga Mulimuli pe a mavae le Toetu. O le a faamasinoina e Iesu Keriso tagata taitasi e iloa ai le mamalu faavavau o le a ia mauaina. O lenei faamasinoga o le a faalagolago i le usiusitai o tagata taitoatasi i poloaiga a le Atua (tagai Faaaliga 20:12–13).
E tolu malo o le mamalu (tagai 1 Korinito 15:40–42). O le malo pito i maualuga o malo e tolu o le malo selesitila. O i latou o e na loto totoa i le molimau ia Iesu ma usiusitai i aoaoga faavae o le talalelei o le a nonofo ai i le afioaga o le Atua le Tama ma Lona Alo, o Iesu Keriso.
O le malo lona lua o malo e tolu o le mamalu, o le malo terasitila. O i latou e i lenei malo o alii ma tamaitai faamamaluina o le lalolagi o ē lei loto totoa i a latou molimau ia Iesu.
O le malo telesitila o le malo pito i maualalo o malo e tolu o le mamalu. O i latou e i lenei malo na filifili le amioleaga nai lo le amiotonu i le taimi o o latou olaga faitino. O le a maua e nei tagata taitoatasi o latou mamalu pe a maea ona togiolaina mai le falepuipui o agaga.
3. Foafoaga ma le Pau
O Le Foafoaga
O Le Tama Faalelagi o Le Foafoa Aoao. Na foafoaina e Iesu Keriso le lagi ma le lalolagi i lalo o le taitaiga a le Tama. E lei foafoaina le lalolagi mai se mea noa; sa faatulagaina mai mea sa i ai. E le mafaitaulia lalolagi na foafoaina e Iesu Keriso.
Na taua i le fuafuaga a le Atua le foafoaina o se lalolagi. Na tuuina mai ai se nofoaga e mafai ai ona tatou maua se tino faaletino, e tofotofoina ma suesueina ai, ma atiina ae ai uiga paia.
E tatau ona tatou faaaogaina ia punaoa o le lalolagi ma le atamai, faautauta, ma le loto faafetai.
O Atamu o le uluai tagata na foafoaina i le lalolagi. Na foafoaina e le Atua ia Atamu ma Eva i Lona lava faatusa (tagai Kenese 1:26–27). O tagata uma—tane ma le fafine—ua foafoaina i le faatusa o le Atua.
O Le Pau
O le solitulafono a Atamu ma Eva ma suiga na oo mai ai, e aofia ai le oti faaleagaga ma le faaletino, ua ta’ua o le Pau.
I le Faatoaga i Etena, sa poloai atu ai le Atua ia Atamu ma Eva e aua ne’i aai i le fua o le laau e iloa ai le lelei ma le leaga; o le taunuuga o le faia o lena mea o le oti faaleagaga ma le faaletino. O le oti faaleagaga o le vavaeeseina lea o le tagata mai luma o le Atua. O le oti faaletino o le vavaeeseina lea o le agaga mai le tino faaletino.
Ona sa agasala Atamu ma Eva ma aai i le laau e iloa ai le lelei ma le leaga, sa tuliesea ai i laua mai luma o le Alii—sa la oo ai i le oti faaleagaga. Sa avea foi i laua ma tagata ola i la le tino—e tatau ona oti faaletino.
I le avea ai ma e tupuga mai ia Atamu ma Eva, ua tatou mauaina ai le tulaga pau i le olaga nei lea o le a tofotofoina ai i tatou i faigata o le olaga ma faaosoosoga a le fili (tagai Mosaea 3:19).
O le Pau o se vaega taua o le ata o le faaolataga a le Tama Faalelagi. E itulua lona faasinoga—e faasino i lalo ae agai i luma. E le gata la i le folasiaina mai ai o le oti faaletino ma le faaleagaga, ae ua tatou maua ai le avanoa e fananau mai ai i le lalolagi ma ia aoaoina ma alualu ai i luma.
O se taunuuga la o le Pau, ua mafai ai e Atamu ma Eva ma a la fanau ona tofo i le olioli ma le faanoanoa, iloa le lelei ma le leaga, ma fanafanau (tagai 2 Nifae 2:22–25).
4. Togiola a Iesu Keriso
O le togiolaina o le mafatia lea i le totogiina o le agasala, lea e aveese ai aafiaga o le agasala mai le tagata agasala ua salamo ma faatagaina ai o ia ia toe faalelei ma le Atua. Ua na o Iesu Keriso lava e toatasi e mafai ona faataunuuina se Togiola atoatoa mo tagata uma. O Lana Togiola na aofia ai Lona puapuagatia mo agasala a tagata uma i le Togalaau i Ketesemane, o le faamaligiina o Lona toto, o Ona puapuaga ma le maliu i luga o le satauro, ma Lona Toetu mai le tuugamau (tagai Isaia 53:3–5; MFF 19:16–19). Sa mafai e le Faaola ona faataunuuina le Togiola aua na Ia tausisia Ia lava ia mama mai agasala ma na i ai le mana e manumalo ai i le oti. Na Ia mauaina le mana e oti ai, mai Lona tina faaletino. Na Ia mauaina le mana e toe aumai ai Lona ola, mai Lona Tama faavavau.
E ala i le Togiola a Iesu Keriso o le a toetutu ai tagata uma ma manumalo i le oti faaletino. E ala i le Togiola, o i latou o ē salamo, usiusitai i poloaiga, maua ia sauniga faaola, ma tausia a latou feagaiga, o le a manumalo i le oti faaleagaga ma maua le meaalofa o le ola e faavavau.
I le avea ai ma vaega o Lana Togiola, na tauave ai e Iesu i Ona lava luga ia tiga, o ma’i, ma vaivai o tagata uma (tagai Alema 7:11–12). E malamalama o Ia i o tatou mafatiaga aua na oo i ai o Ia.
5. Tisipenisione, Liliuese, ma le Toefuataiga
Tisipenisione
O le tisipenisione o se vaega o taimi lea o le a faaalia ai e le Alii Ana aoaoga faavae o le talalelei, sauniga, ma le perisitua. O se vaitaimi lea e i ai i le Alii e lē itiiti ifo ma le toatasi se auauna tofia o lē e umia le perisitua paia ma e i ai le tiute paia e tufa atu le talalelei i e o nofoia le lalolagi. O le tisipenisione o le atoaga o taimi o le tisipenisione mulimuli lea. Na amata i le faaaliga o le talalelei ia Iosefa Samita.
O tisipenisione ua mavae na iloga ia Atamu, Enoka, Noa, Aperaamo, Mose, ma Iesu Keriso. E le gata i lea, na i ai isi tisipenisione, e aofia ai i latou o le au sa Nifae ma le au sa Iareto.
O le ata o le faaolataga ma le talalelei a Iesu Keriso ua faaalia mai ma ua aoaoina i tisipenisione uma.
Liliuese
Pe a o ese tagata mai mataupu faavae o le talalelei ma leai ni ki o le perisitua, ua latou i ai i le tulaga o le liliuese.
O vaitaimi o le liliuese lautele na tutupu lava i le gasologa o le talafaasolopito o le lalolagi. O se tasi o faataitaiga o le Liliuese Tele, lea na tupu ina ua mavae ona faatuina e le Faaola Lana Ekalesia (tagai 2 Tesalonia 2:1–3). Ina ua mavae le maliliu o Aposetolo a le Faaola, na faaleagaina ai e tagata ia mataupu faavae o le talalelei ma faia ai suiga e le’i faatagaina i le faatulagaga a le Ekalesia ma sauniga o le perisitua. Ona ua salalau tele lenei amioleaga, o lea sa aveesea ai e le Alii le pule ma ki o le perisitua mai le lalolagi.
I le taimi o le Liliuese Tele, sa leai se taitaiga faalelagi mai perofeta soifua mo tagata. Sa faatuina le tele o lotu, ae sa le’i i ai ia te i latou le pule e faaee atu ai le meaalofa o le Agaga Paia pe faia ai isi sauniga o le perisitua. Na faaleagaina pe na leiloloa ni vaega o tusitusiga paia, ma e lei toe maua e tagata le malamalama moni o le Atua.
Sa i ai pea lenei liliuese seia oo i le taimi na faaali mai ai le Tama Faalelagi ma Lona Alo Pele ia Iosefa Samita ma na amataina ai le Toefuataiga o le atoaga o le talalelei.
O Le Toefuataiga
O le Toefuataiga o le toe faatuina lea e le Atua o upumoni ma sauniga o Lana talalelei i tagata o le lalolagi (tagai Isaia 29:13–14; Faaaliga 14:6–7).
I le sauniuniga la mo le Toefuataiga, na faatulai mai ai e le Alii ni tamalii faamamaluina i le taimi na ta’ua o le Toefaatulagaina. Sa latou taumafai e toe faafoi mai aoaoga faavae faalelotu, faatinoga, ma faatulagaga i le ala na faatuina ai e le Faaola. Peitai, latou te lei mauaina le perisitua po o le atoaga o le talalelei.
Na amata le Toefuataiga i le 1820 ina ua faaali mai le Atua le Tama ma Lona Alo o Iesu Keriso, ia Iosefa Samita i le tali o lana tatalo (tagai Talafaasolopito—Iosefa Samita 2:15–20). O nisi o mea autu na tutupu i le Toefuataiga o le faaliliuga lea o le Tusi a Mamona, o le toefuataiga mai o le Perisitua Arona ma le Mekisateko, ma le faatulagaga o le Ekalesia i le aso 6 o Aperila 1830.
Na toefuatai mai e Ioane le Papatiso le Perisitua Arona ia Iosefa Samita ma Oliva Kaotui i le aso 15 o Me 1829. Na toefuatai mai le Perisitua Mekisateko ma ki o le malo i le 1829 ina ua faaee atu e Aposetolo o Peteru, Iakopo, ma Ioane ia Iosefa Samita ma Oliva Kaotui.
Ua toefuatai mai le atoaga o le talalelei, ma o Le Ekalesia a Iesu Keriso o le Au Paia o Aso e Gata Ai o “le ekalesia ola e tasi ma le faamaoni i luga o le fogaeleele atoa” (MFF 1:30). E oo lava ina faatumulia le lalolagi atoa e le Ekalesia ma tumau ai e faavavau (tagai Tanielu 2:44–45).
6. O Perofeta
O le perofeta o se tagata lea ua tofia e le Atua e saunoa mo Ia (tagai Amosa 3:7). E molimau mai perofeta ia Iesu Keriso ma aoao atu Lana talalelei. Latou te faalauiloa mai le finagalo o le Atua ma lona tulaga moni. Latou te tauleagaina le agasala ma lapatai mai i ona taunuuga. I nisi o taimi, latou te valoia mea e tutupu i le lumanai.
Matou te lagolagoina le Peresitene o le Ekalesia o se perofeta, tagatavaai, ma talifaaaliga ma na o le pau lea o le tagata i le lalolagi e mauaina faaaliga e taitaiina ai le Ekalesia atoa. Matou te lagolagoina foi fesoasoani i le Au Peresitene Sili ma sui o le Korama a Aposetolo e Toasefululua e avea o ni perofeta, tagatavaai, ma talifaaaliga (tagai MFF 1:38).
7. Perisitua
O le perisitua o le mana e faavavau ma le pule a le Atua. Na foafoaina e le Atua ma pulea le lagi ma le lalolagi e ala i le mana o le perisitua. E ala mai i lenei mana Na te togiolaina ma faaeaina ai Lana fanau, e faataunuuina ai le faaofuina “o le tagata i le tino ola pea ma le ola faavavau” (Mose 1:39).
E tuuina atu e le Atua le pule o le perisitua i alii agavaa e auai i le Ekalesia e mafai ai ona latou galulue i Lona suafa mo le faaolataga o Ana fanau. E mafai ona faatagaina i latou e umia le perisitua e talai atu le talalelei, faia sauniga o le faaolataga, ma pulea le malo o le Atua i le lalolagi. O lenei faatagaga e aumai mai na taitai o e umia ki o le perisitua.
Perisitua Arona
E masani lava ona taua le Perisitua Arona o le perisitua sauniuni. O tofi i le Perisitua Arona o le tiakono, aoao, ositaulaga, ma le epikopo. I le Ekalesia i lenei vaitaimi, e mafai e alii agavaa o le ekalesia ona mauaina le Perisitua Arona e amata i le 12 tausaga.
O le Perisitua Arona “e umia ki o asiasiga ma galuega a agelu, ma le talalelei o le salamo, ma le papatisoga” (MFF 13:1).
Perisitua Mekisateko
O le Perisitua Mekisateko o le perisitua maualuga pe sili atu foi ma e taitai ai i mea faaleagaga. O lenei perisitua maualuga na tuuina atu ia Atamu ma na i ai pea lava i le lalolagi i soo se taimi e faaali mai ai e le Alii Lana talalelei.
Sa faaigoaina muamua “o le Perisitua Paia, e tusa ma le faatulagaga a le Alo o le Atua” (MFF 107:3). Sa ta’ua mulimuli ane o le Perisitua Mekisateko, na faaigoaina ai i se faitaulaga sili maoae o le sa soifua ai i le taimi o le perofeta o Aperaamo (tagai Kenese 14:18; MFF 107:2).
E aofia i le Perisitua Mekisateko ia tofi o le toeaina, faitaulaga sili, peteriaka, Fitugafulu ma le Aposetolo. O le Peresitene o le Perisitua Mekisateko o le Peresitene lea o le Ekalesia.
8. O Uluai Mataupu Faavae ma Sauniga
“Matou te talitonu o muai mataupu faavae ma sauniga o le Talalelei e faapea: muamua, Faatuatua i le Alii o Iesu Keriso; lona lua, o le Salamo; lona tolu, o le Papatisoina i le faatofuina mo le faamagaloina o agasala; lona fa, o le Faaee atu o lima e maua ai le mea foaifua o le Agaga Paia” (Mataupu Faavae o le Faatuatua 1:4).
Faatuatua
O le faatuatua o le “faamoemoe i mea e le o vaaia, a ua moni ia” (Alema 32:21). O le faatuatua o se meaalofa faaleagaga lea e oo mai i le faalogo i afioga a le Atua. E mafai ona faateleina le faatuatua pe a tatou tatalo, suesue i tusitusiga paia, ma usitai i poloaiga a le Atua.
E sili atu i le na o le talitonu fua, o le faatuatua e faaalia mai i auala tatou te ola ai.
O le faatuatua e tatau ona taulai atu ia Iesu Keriso ina ia mafai ai ona taitaiina atu se tagata i le faaolataga. O le i ai o le faatuatua ia Iesu Keriso o lona uiga o le faalagolago atoatoa ia te Ia ma talitonu i Lana Togiola e le iu, mana, ma le alofa. E aofia ai le talitonu i Ana aoaoga ma talitonu e tusa lava pe tatou te le malamalama i mea uma, Na te faia.
E i ai foi le faatuatua o le Au Paia o Aso e Gata Ai i le Atua le Tama, le Agaga Paia, le mana o le perisitua, ma isi vaega taua o le talalelei toefuataiina. O le faatuatua e fesoasoani lea tatou te maua ai le faamalologa faaleagaga ma le faaletino ma le malosi e fetuleni ai i luma, e feagai ai ma o tatou tulaga faigata, ma manumalo ai i faaosoosoga. E aumaia foi ia i tatou le filemu. O le a galueaiina e le Alii vavega tetele i o tatou olaga e tusa ai ma lo tatou faatuatua.
O le faatuatua e maua ai e se tasi le faamagaloga o agasala ma e iu ai ina mafai ona nofo i le afioaga o le Atua.
Salamo
O le salamo o se suiga o le mafaufau ma le loto lea e aumaia ai ia i tatou se vaaiga fou e uiga i le Atua, e uiga ia i tatou lava, ma e uiga i le lalolagi. E aofia ai le fulitua i le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga.
O a tatou agasala tatou te lē mama ai—lē agavaa ai e toe foi atu ma nonofo ai i le afioaga o lo tatou Tama Faalelagi. E ala i le Togiola a Iesu Keriso, ua tuuina mai ai e lo tatou Tama i le Lagi le ala lava e tasi mo i tatou ina ia faamagaloina ai a tatou agasala (tagai Isaia 1:18).
O le salamo e aofia ai le lagona faanoanoa i le faia o le agasala, ta’uta’u atu i le Tama Faalelagi ma isi pe a tatau ai, lafoaia o agasala, o le sailia e toefuatai pe toe totogi mea na faaleagaina e le agasala a se tagata, ma ola usiusitai i poloaiga a le Atua (tagai MFF 58:42–43).
Papatisoga
O le papatisoga i le faatofuina i le vai e se tasi e i ai le pule, o le uluai sauniga faaola lea o le talalelei ma e tatau ai ina ia avea ai ma tagata O Le Ekalesia a Iesu Keriso o le Au Paia o Aso e Gata Ai. E tatau ai foi le papatisoga e ulu atu ai se tagata i le malo selesitila (tagai Ioane 3:5).
O le upu papatisoga e sau mai le upu Eleni o lona uiga ia “fufui” pe “faatofu.” O le faatofuina e faatusa lea i le maliu o se tagata mai le olaga e tumu i le agasala ma toe fanaufouina i se olaga faaleagaga, e tuuto i le galuega a le Atua ma Ana fanau. E faatusaina foi i le maliu ma le toetu.
Ona e le maua uma e tagata e fananau mai i le lalolagi le avanoa e talia ai le talalelei i lenei olaga, o lea ua faatagaina ai e le Alii ia papatisoga mo e ua maliliu (tagai 1 Korinito 15:29). O lenei tulaga e faataga ai i latou o e talia le talalelei i le lalolagi o agaga, ia agavaa ai e ulufale atu i le malo o le Atua.
Meaalofa o le Agaga Paia
Pe a maea ona papatisona se tagata, ona faaee atu lea o aao o se tasi pe sili atu o e umia le Perisitua Mekisateko i luga o le ulu o le tagata ma faamauina o ia o se tasi o le Ekalesia. I le avea ai o se vaega o lenei sauniga, ua ta’ua o le faamauga, e tuuina atu ai i le tagata le meaalofa o le Agaga Paia (tagai Ioane 3:5).
O le meaalofa o le Agaga Paia e ese mai le uunaiga a le Agaga Paia. A o lei faia le papatisoga, e mafai ona lagona e le tagata le uunaiga a le Agaga Paia mai lea taimi i lea taimi ma e ala mai i lena uunaiga e mafai ai ona maua se molimau o le upumoni. A uma ona talia le meaalofa o le Agaga Paia, e i ai i le tagata le aia tatau i Lana mafutaga tumau pe afai na te tausia poloaiga.
9. Sauniga ma Feagaiga
Sauniga
I totonu o le Ekalesia, o le sauniga o se gaoioiga paia ma aloaia lea e i ai se faauigaga faaleagaga. Ua mamanuina sauniga taitasi e le Atua ina ia aoao atu ai upumoni faaleagaga. O sauniga o le faaolataga e faia i le pule o le perisitua ma i lalo o le taitaiga a i latou o e umia ki o le perisitua.
O nisi sauniga e taua mo le faaeaga ma ua ta’ua o sauniga faaola. E aofia ai le papatisoga, faamauga [o le papatisoga], faauuga i le Perisitua Mekisateko (mo alii), o faaeega paia o le malumalu, ma le faamauga o le faaipoipoga. O sauniga faaola uma o le perisitua e o faatasi ma feagaiga.
E i ai isi sauniga, e pei o le faamanatuga, faamanuiaga faapeteriaka, ma auaunaga i e mama’i.
Feagaiga
O le feagaiga o se maliega paia i le va o le Atua ma le tagata. E tuuina mai e le Atua tuutuuga mo le feagaiga, ma e tatou te malilie e faia le mea Na te poloaiina i tatou e fai; ona folafola mai lea e le Atua mo i tatou ni faamanuiaga faapitoa mo lo tatou usiusitai (tagai MFF 82:10; 84:33–39).
O sauniga faaola uma o le perisitua e o faatasi ma feagaiga. Tatou te osi feagaiga ma le Alii i le taimi o le papatisoga ma toe faafouina na feagaiga e ala i le taumamafa ai i le faamanatuga. O uso o ē mauaina le Perisitua Mekisateko, e ulu atu i se tautoga ma le feagaiga o le perisitua. Tatou te osia isi feagaiga i le malumalu.
10. Poloaiga
O poloaiga o tulafono ia ma mea e manaomia e tuuina mai e le Atua i le tagata. Tatou te faaalia lo tatou alolofa ia te Ia e ala i le tausia o Ana poloaiga (tagai Ioane 14:15). O le tausia o poloaiga o le a aumai ai faamanuiaga mai le Alii (tagai MFF 130:20–21).
O poloaiga autu sili e lua o le “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. … Ma le … alofa atu i le lua te tuaoi, ia pei o oe lava ia te oe” (Mataio 22:37, 39).
O Poloaiga e Sefulu o se vaega taua o le talalelei ma o ni mataupu faavae e faavavau lea e tatau ai mo lo tatou faaeaga (tagai Esoto 20:3–17). Sa faaali atu e le Alii ia Mose [poloaiga] i aso anamua, ma na Ia toe aumaia [poloaiga] i faaaliga i aso e gata ai (tagai Mosaea 13:12–24). O isi poloaiga e aofia ai le tausia o le tulafono o le ola mama, totogiina o se sefuluai atoa, ia faamaoni, tatalo i aso uma, o le i ai o se agaga o le lotofaafetai, ma le tausia o le Upu o le Poto.
11. Faaipoipoga ma le Aiga
“O le faaipoipoga i le va o se alii ma se tamaitai, ua faauuina e le Atua” ma “o le aiga o le totonugalemu lea” o Ana fuafuaga o le faaolataga ma le fiafia.
“O mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava e tatau ona faaaogaina ai.” Ua i ai i matua se tiute o le “ia fanafanau ma uluuluola ai le lalolagi,” “e tausia a latou fanau i le alofa ma le amiotonu,” ma “ia tuuina atu i ai mea e manaomia faaletino ma le faaleagaga.”
“O le tane ma le ava ua i ai se tiutetauave paia e alofa ma tausi e le tasi le isi.” “E tatau ona pulefaamalumalu tamā i o latou aiga i le alofa ma le amiotonu,” ma “e tuuina atu mea e manaomia o le olaga.” “O le uluai matafaioi a tina o le faafaileleina lea o a latou fanau. O nei matafaioi paia, e ao i tamā ma tina ona fesoasoani le tasi i le isi o se paaga tutusa.”
“O le fuafuaga paia o le fiafia” ua mafai ai ona faaauau “fegalegaleaiga faaleaiga” i “tala atu o le tuugamau.” Sa foafoaina le lalolagi ma faaalia mai le talalelei ina ia mafai ai ona fausia aiga, faamauina, ma faaeaina e faavavau.
(Tagai “O Le Aiga: O Se Folafolaga i le Lalolagi,” Liahona, Iun. 1996, 10, 11.)
Mo nisi faamatalaga i nei autu, alu i le lds.org, Gospel Library, Gospel Topics; pe tagai ane i le Faamaoni i le Faatuatua: O Se Tusitaiala o le Talalelei [2004].
© 2009 Puletaofia e le Intellectual Reserve, Inc. Ua taofia aia tatau uma. Faamaonia le faaPeretania: 6/09. Faamaonia le faaliliuga: 6/09. Faaliliuga o le Seminary and Institute of Religion Basic Doctrine. Samoan. PD00010275 890