Importante nga mga Doktrina

Seminaries ug Institutes of Religion

Dios nga Kapangulohan

Adunay tulo ka lahi nga mga personahe sa Dios nga Kapangulohan. Dios ang Mahangturong Amahan; Iyang Anak, si Jesukristo; ug ang Espiritu Santo (tan-awa sa Mga Buhat 7:55–56). Ang Amahan ug Anak adunay mahikap nga mga lawas nga unod ug bukog, ug ang Espiritu Santo usa ka personahe sa espiritu (tan-awa sa D&P 130:22–23). Usa ra ang ilang katuyoan ug doktrina. Hingpit silang nagkahiusa sa pagpahinabo sa balaan nga plano sa kaluwasan sa Langitnong Amahan.

Dios nga Amahan

Ang Dios nga Amahan mao ang Labing Taas nga Tigmando sa uniberso. Siya mao ang Amahan sa atong mga espiritu. Siya hingpit, aduna sa tanang gahum, ug nakahibalo sa tanang mga butang. Siya usab Dios sa hingpit nga kalooy, mabination, ug gugma nga putli.

Jesukristo

Si Jesukristo mao ang Unang Natawo sa Amahan sa espiritu ug ang Bugtong Anak sa Amahan diha sa unod. Siya ang Jehova sa Daang Tugon ug ang Mesiyas sa Bag-ong Tugon.

Siya nagpakabuhi nga walay sala ug nakahimo og hingpit nga Pag-ula alang sa mga sala sa tanang mga tawo. Ang iyang kinabuhi mao ang hingpit nga ehemplo kon unsaon sa pagpakabuhi sa tanang mga tawo (tan-awa 3 Nephi 27:27). Siya ang unang tawo sa yuta nga nabanhaw. Mobalik si Jesukristo pag-usab sa gahum ug himaya ug mohari sa yuta panahon sa Milenyum.

Ang tanang mga pag-ampo, mga panalangin, ug mga ordinansa sa priesthood kinahanglang pagahimoon pinaagi sa Iyang pangalan.

Ang Espiritu Santo

Ang Espiritu Santo mao ang ikatulo nga sakop sa Dios nga Kapangulohan. Siya usa ka personahe sa espiritu nga walay lawas nga unod ug mga bukog. Siya ang kasagarang gipasabut nga ang Espiritu, ang Espiritu Santo, ang Espiritu sa Dios, ang Espiritu sa Ginoo, o ang Maghuhupay.

Ang Espiritu Santo nagsaksi sa Amahan ug sa Anak, nagpadayag sa kamatuoran sa tanang mga butang, ug nagbalaan niadtong maghinulsol ug magpabunyag (tan-awa sa Moroni 10:5).

2. Plano sa Kaluwasan

Sa kinabuhi nga wala pa dinhi sa yuta, ang Langitnong Amahan mipaila sa plano aron kita mahimong sama Kaniya ug makaangkon og pagka-imortal ug kinabuhing dayon (tan-awa sa D&P14:7; Moises 1:39). Ang mga kasulatan nagpasabut niining plano nga plano sa kaluwasan, ang importante nga plano sa kalipay, ang plano sa katubsanan, ug ang plano sa kalooy.

Ang plano sa kaluwasan naglakip sa Paglalang, sa Pagkapukan, sa Pag-ula ni Jesukristo, ug sa tanang mga balaod, mga ordinansa, ug mga doktrina sa ebanghelyo. Moral nga kabubut-on—ang abilidad sa pagpili ug paglihok alang sa atong mga kaugalingon—importante usab sa plano sa Langitnong Amahan. Tungod niini nga plano, mahingpit kita pinaagi sa Pag-ula, makadawat sa hingpit nga kalipay, ug magpuyo sa kahangturan sa presensya sa Dios. Ang atong mga relasyon sa pamilya molungtad hangtud sa kahangturan.

Kinabuhi nga Wala pa dinhi sa Yuta

Sa wala pa kita matawo dinhi sa yuta, nagpuyo kita sa presensya sa atong Langitnong Amahan isip usa sa Iyang espiritu nga mga anak. Niini nga kinabuhi nga wala pa dinhi sa yuta miapil kita sa usa ka konseho uban sa laing espiritu nga mga anak sa Langitnong Amahan. Niana nga konseho ang Langitnong Amahan mipresentar sa Iyang plano, ug ang premortal nga si Jesukristo nakigsaad nga mahimong Manluluwas.

Gipanalanginan sa gasa sa kabubut-on, mihimo kita og importante nga mga desisyon, sama sa desisyon sa pagsunod sa plano sa Langitnong Amahan (tan-awa sa 2 Nephi 2:27). Nangandam kita sa pag-anhi sa yuta, diin kita makapadayon sa pag-uswag.

Kadtong misunod sa Langitnong Amahan ug ni Jesukristo gitugutan nga moanhi sa yuta aron makasinati sa pagkamortal ug mouswag ngadto sa kinabuhing dayon. Si Lucifer, laing espiritu sa Dios, mirebelde batok sa plano. Nahimo siyang Satanas, ug siya ug ang iyang mga sumusunod gisalikway gikan sa langit ug wala hatagi sa pribelihiyo nga makadawat og pisikal nga lawas ug makasinati sa pagkamortal.

Mortal nga Kinabuhi

Ang mortal nga bahin sa atong pagpakabuhi mao ang panahon sa pagkat-on diin kita makaandam alang sa kinabuhing dayon ug momatuod sa atong mga kaugalingon kon kita mogamit sa atong kabubut-on sa pagbuhat sa tanan nga gisugo sa Ginoo kanato. Ang atong espiritu gihiusa sa atong pisikal nga lawas, naghatag nato og mga oportunidad sa pagtubo ug paglambo sa mga paagi nga dili mahitabo sa atong kinabuhi nga wala pa dinhi sa yuta.

Kinabuhi human sa Kamatayon

Inig kamatay nato, ang atong mga espiritu mosulod sa kalibutan sa espiritu ug maghulat sa Pagkabanhaw. Ang mga espiritu sa matarung dawaton ngadto sa kahimtang sa kalipay, nga gitawag og paraiso. Daghan sa matinud-anon magpadayon sa pagsangyaw sa ebanghelyo niadtong anaa sa bilanggoan sa espiritu.

Ang bilanggoan sa espiritu usa ka temporaryong dapit human sa kinabuhi dinhi sa kalibutan alang niadtong namatay nga wala makahibalo sa kamatuoran o niadtong kinsa dili masulundon dinhi sa pagkamortal. Dinhi ang mga espiritu tudloan sa ebanghelyo ug adunay oportunidad sa paghinulsol ug pagdawat sa mga ordinansa sa kaluwasan nga gipahigayon alang kanila diha sa mga templo. Kadtong modawat sa ebanghelyo magpuyo sa paraiso hangtud sa Pagkabanhaw.

Ang pagkabanhaw mao ang paghiusa sa atong espiritu uban sa atong pisikal nga lawas nga unod ug mga bukog (tan-awa sa Lucas 24:36–39). Human sa pagkabanhaw, ang espiritu ug ang lawas dili na gayud magbulag, ug kita mahimong imortal. Ang tanang tawo dinhi sa yuta mabanhaw tungod kay si Jesukristo mibuntog sa kamatayon (tan-awa sa Job 19:25–26; 1 Mga Taga-Corinto 15:20–22). Ang matarung mabanhaw og una kay sa dautan ug mobangon sa Unang Pagkabanhaw.

Ang Katapusang Paghukom mahitabo human sa Pagkabanhaw. Si Jesukristo mohukom sa matag tawo aron sa pagtino sa mahangturon nga himaya nga iyang madawat. Kini nga paghukom ibase sa pagkamasulundon sa matag tawo ngadto sa mga sugo sa Dios (tan-awa sa Pinadayag 20:12–13).

Adunay tulo ka mga gingharian sa himaya (tan-awa sa 1 Mga Taga-Corinto 15:40–42). Ang pinakataas sa tulo ka gingharian mao ang celestial nga himaya. Kadtong maisugon sa pagpamatuod ni Jesus ug masulundon sa mga baruganan sa ebanghelyo makapuyo sa presensya sa Dios ang Amahan ug sa Iyang Anak, nga si Jesukristo.

Ang ikaduha sa tulo ka gingharian sa himaya mao ang terrestrial nga gingharian. Kadtong ania niini nga gingharian mao ang gidayeg nga mga tawo sa yuta kinsa dili maisugon sa ilang pagpamatuod ni Jesus.

Ang telestial nga gingharian mao ang pinakaubos sa tulo ka mga gingharian sa himaya. Kadtong ania niini nga gingharian mipili sa pagkadautan kay sa pagkamatarung panahon sa ilang mortal nga mga kinabuhi. Kini nga mga indibidwal makadawat sa ilang himaya human sila matubos gikan sa bilanggoan sa espiritu.

3. Paglalang ug Pagkapukan

Ang Paglalang

Ang Langitnong Amahan mao ang Gamhanang Tiglalang. Si Jesukristo milalang sa langit ug yuta ubos sa direksyon sa Langitnong Amahan. Ang yuta wala malalang gikan sa wala; giorganisar kini gikan sa mga butang nga diha na. Si Jesukristo milalang og mga kalibutan nga dili maihap.

Ang paglalang sa yuta importante sa plano sa Dios. Nakahatag kini og dapit diin kita makaangkon og pisikal nga lawas, masulayan, ug makapalambo og balaan nga mga hiyas.

Kinahanglan nga atong gamiton ang mga kapanguhaan sa yuta uban sa kaalam, paghukom, ug pagpasalamat.

Si Adan mao ang unang tawo nga gilalang dinhi sa yuta. Ang Dios milalang ni Adan ug ni Eva sumala sa Iyang dagway (tan-awa sa Genesis 1:26–27). Ang tanan nga mga tawo—lalaki ug babaye—gilalang subay sa panagway sa Dios.

Ang Pagkapukan

Ang kalapasan nila ni Adan ug Eva ug ang misangpot nga mga kausaban, naglakip sa espirituhanon ug pisikal nga kamatayon.

Didto sa Tanaman sa Eden, ang Dios misugo kang Adan ug Eva nga dili mokaon sa bunga sa kahoy sa kahibalo sa maayo ug dautan, ang sangputanan sa pagbuhat sa ingon mao ang espirituhanon ug pisikal nga kamatayon. Ang espirituhanong kamatayon mao ang pagkabulag gikan sa Dios. Ang pisikal nga kamatayon mao ang pagkabulag sa espiritu gikan sa mortal nga lawas.

Tungod kay si Adan ug si Eva milapas ug mikaon sa bunga sa kahoy sa kahibalo sa maayo ug sa dautan, sila gihinginlan gikan sa atubangan sa Ginoo—sila nakasinati og espirituhanon nga kamatayon. Nahimo usab sila nga mortal—ubos sa pisikal nga kamatayon.

Isip mga kaliwat nila ni Adan ug Eva, napanunod nato ang napukan nga kahimtang panahon sa pagkamortal diin kita pagasulayan pinagi sa mga kalisud sa kinabuhi ug sa mga tintasyon sa kaaway (tan-awa sa Mosiah 3:19).

Ang Pagkapukan usa ka mahinungdanon nga bahin sa plano sa kaluwasan sa Langitnong Amahan. Kini adunay duha ka bahin nga direksyon—pagkapukan gikan sa mas taas nga kahimtang apan sinugdanan sa pagpadayon sa pag-uswag sa tawo. Agi og dugang sa pagpaila sa pisikal ug espiritwal nga kamatayon, naghatag usab kanato kini og kahigayunan nga matawo dinhi sa yuta ug sa pagkat-on ug paglambo.

Isip resulta sa Pagkapukan, sila si Adan ug Eva ug ang ilang kaliwat makasinati og kalipay ug kasubo, makahibalo sa maayo ug dautan, ug makabaton og mga anak (tan-awa sa 2 Nephi 2:22–25).

4. Ang Pag-ula ni Jesukristo

Sa pag-ula mao ang pag-antus sa silot alang sa sala, sa ingon nagkuha sa mga epekto sa sala gikan sa mahinulsulon nga makasasala ug pagtugot kaniya sa pagpakig-uli sa Dios. Si Jesukristo mao ang bugtong makahimo sa hingpit nga Pag-ula alang sa tanang katawhan. Ang Iyang Pag-ula naglakip sa Iyang pag-antus alang sa mga sala sa katawhan didto sa Tanaman sa Getsemani, sa pagpaagas sa Iyang dugo, sa Iyang pag-antus ug kamatayon diha sa krus, ug sa Iyang Pagkabanhaw gikan sa lubnganan (tan-awa sa Isaias 53:3–5; D&P 19:16–19). Ang Manluluwas nakapahigayon sa Pag-ula tungod kay Iyang gipalingkawas ang Iyang kaugalingon gikan sa sala ug adunay gahum sa kamatayon. Gikan sa Iyang mortal nga inahan, Siya nakapanunod sa abilidad nga mamatay. Gikan sa imortal nga Amahan, Iyang napanunod ang gahum sa pagkuha pag-usab sa Iyang kinabuhi.

Pinaagi sa Pag-ula ni Jesukristo ang tanan mabanhaw ug makabuntog sa pisikal nga kamatayon. Pinaagi sa Pag-ula kadtong maghinulsol, magsunod sa mga sugo, makadawat sa makaluwas nga mga ordinansa, ug maghupot sa ilang mga pakigsaad makabuntog sa espirituhanon nga kamatayon ug makadawat sa gasa sa kinabuhing dayon.

Isip kabahin sa Iyang Pag-ula, si Jesus miangkon sa mga kasakit, sakit, ug mga balatian sa tanang mga tawo diha sa Iyang kaugalingon (tan-awa sa Alma 7:11–12). Nakasabot Siya sa atong pag-antus tungod kay nakasinati Siya niini.

5. Dispensasyon, Apostasiya, ug Pagpahiuli

Dispensasyon

Ang dispensasyon mao ang tagal sa panahon sa dihang ang Ginoo mipadayag sa Iyang mga doktrina sa ebanghelyo, mga ordinansa, ug sa priesthood. Usa kini ka panahon diin ang Ginoo adunay labing minos usa ka tinugutan nga sulugoon sa ibabaw sa yuta kinsa naghupot sa balaan nga priesthood ug kinsa adunay balaan nga sugo sa pagsangyaw sa ebanghelyo ngadto sa mga lumulupyo sa yuta. Ang dispensasyon sa kahingpitan sa mga panahon mao ang katapusan nga dispensasyon. Nagsugod kini uban sa pagpadayag sa ebanghelyo ngadto ni Joseph Smith.

Ang nangagi nga mga dispensasyon nailhan uban nila ni Adan, Enoch, Noe, Abraham, Moises, ug Jesukristo. Agig dugang, dihay laing mga dispensasyon, lakip sa mga Nephite ug sa mga Jaredite.

Ang plano sa kaluwasan ug ang ebanghelyo ni Jesukristo gipadayag ug gitudlo sa kada dispensasyon.

Apostasiya

Kon ang katawhan mobiya gikan sa mga baruganan sa ebanghelyo ug walay mga yawe sa priesthood, sila anaa sa kahimtang sa apostasiya.

Mga panahon sa kinatibuk-ang apostasiya nahitabo sa tibuok kasaysayan sa kalibutan. Usa ka ehemplo niini mao ang Dakong Apostasiya, nga nahitabo human ang Manluluwas mitukod sa Iyang Simbahan (tan-awa sa 2 Mga Taga-Tesalonica 2:1–3). Human sa kamatayon sa mga Apostoles sa Manluluwas, ang mga tawo mituis sa mga baruganan sa ebanghelyo ug mihimo og mga kausaban bisan kon walay pagtugot sa organisasyon sa Simbahan ug sa mga ordinansa sa priesthood. Tungod niining hilabihan nga pagkadautan, ang Ginoo mibawi sa katungod sa priesthood gikan sa yuta.

Atol sa Dakong Apostasiya, ang mga tawo walay balaanong direksyon gikan sa buhing mga propeta. Daghang mga simbahan gitukod, apan sila walay awtoridad sa pagtugyan sa gasa sa Espiritu Santo o sa pagpahigayon sa mga ordinansa sa priesthood. Adunay bahin sa balaan nga mga kasulatan nga natuis o nawala, ug ang mga tawo wala nay tinuod nga kahibalo sa Dios.

Kini nga apostasiya milungtad hangtud ang Langitnong Amahan ug ang Iyang Pinalanggang Anak nagpakita kang Joseph Smith ug mipasiugda sa Pagpahiuli sa kahingpitan sa ebanghelyo.

Ang Pagpahiuli

Ang Pagpahiuli mao ang pag-establisar pag-usab sa mga kamatuoran ug mga ordinansa sa Iyang ebanghelyo diha sa mga tawo sa yuta (tan-awa sa Isaias 29:13–14; Pinadayag 14:6–7).

Sa pagpangandam alang sa Pagpahiuli, ang Ginoo mipasanay og halangdon nga mga tawo panahon sa unsay gitawag nga Reformation. Misulay sila sa pagpabalik sa relihiyoso nga doktrina, mga praktis, ug organisasyon subay sa paagi nga gi-establisar sa Manluluwas. Bisan pa niana, sila, walay priesthood ni kahingpitan sa ebanghelyo.

Ang Pagpahiuli nagsugod niadtong 1820 sa dihang ang Dios nga Amahan ug Iyang Anak, nga si Jesukristo, nagpakita ngadto ni Joseph Smith agig tubag sa iyang pag-ampo (tan-awa sa Joseph Smith—Kasaysayan 1:15–20). Ang pipila sa importante nga mga hitabo sa Pagpahiuli mao ang paghubad sa Basahon ni Mormon, ang pagpahiuli ssa Aaronic ug Melchizedek Priesthood, ug ang organisasyon sa Simbahan niadtong Abril 6, 1830.

Ang Aaronic Priesthood gipahiuli ngadto ni Joseph Smith ug ni Oliver Cowdery pinaagi ni Juan Bautista niadtong Mayo 15, 1829. Ang Melchizedek Priesthood ug ang mga yawe sa gingharian gipahiuli niadtong 1829 sa dihang ang mga Apostoles nga sila si Pedro, Santiago, ug Juan mitugyan niini ngadto ni Joseph Smith ug Oliver Cowdery.

Ang kahingpitan sa ebanghelyo gipahiuli, ug Ang Simbahan ni Jesukristo sa mga Santos sa Ulahing mga Adlaw mao “lamang ang tinuod ug buhi nga simbahan diha sa ibabaw sa tibuok yuta” (D&P 1:30). Ang Simbahan sa katapusan mopuno sa tibuok yuta ug magbarug sa kahangturan (tan-awa sa Daniel 2:44–45).

6. Mga Propeta

Ang usa ka propeta mao ang tawo kinsa gitawag sa Dios aron mamulong alang Kaniya (tan-awa sa Amos 3:7). Ang mga propeta nagpamatuod ni Jesukristo ug nagtudlo sa Iyang ebanghelyo. Ilang ipahibalo ang kabubut-on ug tinuod nga kinaiya sa Dios. Ilang ipanghimaraut ang sala ug mopasidaan sa mga sangputanan niini. Usahay, sila managna sa umaabut nga mga hitabo.

Kita mopaluyo sa Presidente sa Simbahan isip propeta, manalagna, ug tigpadayag ug ang bugtong tawo sa yuta kinsa nakadawat og pagpadayag sa paggiya sa tibuok Simbahan. Kita mopaluyo usab sa mga magtatambag sa Unang Kapangulohan ug mga sakop sa Korum sa Napulog Duha ka mga Apostoles isip mga propeta, mga manalagna, ug mga tigpadayag (tan-awa sa D&P 1:38).

7. Priesthood

Ang priesthood mao ang mahangturong gahum ug awtoridad sa Dios. Pinaagi sa priesthood gilalang ug gidumala sa Dios ang kalangitan ug ang kayutaan. Pinaagi niini nga gahum Siya mitubos ug mihimaya sa Iyang mga Anak, sa pagpahinabo sa “pagka-imortal ug kinabuhi nga dayon sa tawo” (Moises 1:39).

Ang Dios naghatag sa awtoridad sa priesthood ngadto sa takus nga lalaki nga mga miyembro sa Simbahan aron sila makalihok alang sa Iyang pangalan alang sa kaluwasan sa Iyang mga anak. Ang mga tighupot sa priesthood mahimong tugutan sa pagsangyaw sa ebanghelyo, pagpangalagad sa mga ordinansa sa kaluwasan, ug pagdumala sa gingharian sa Dios dinhi sa yuta. Kini nga pagtugot nagagikan niadtong mga lider kinsa naghupot sa mga yawe sa priesthood.

Aaronic Priesthood

Ang Aaronic Priesthood sa kasagaran gitawag og priesthood alang sa pagpangandam. Ang mga katungdanan sa Aaronic Priesthood mao ang deacon, teacher, priest, ug bishop. Sa Simbahan karon, ang takus nga mga miyembro nga lalaki mahimong makadawat sa Aaronic Priesthood sugod sa edad nga 12 anyos.

Ang Aaronic Priesthood “naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag” (D&P 13:1).

Melchizedek Priesthood

Ang Melchizedek Priesthood mao ang mas taas o mas labaw nga priesthood ug nangalagad sa espirituhanong mga butang. Kining mas labaw nga priesthood gihatag ngadto ni Adan ug diha sa yuta sa higayon nga ang Ginoo mopadayag sa Iyang ebanghelyo.

Gitawag kini og “Balaan nga Priesthood, subay sa Kapunongan sa Anak sa Dios” (D&P 107:3). Sa wala madugay kini nailhan nga Melchizedek Priesthood, ginganlan gikan sa usa ka bantugang halangdon nga pari kinsa nagpuyo sa panahon ni propeta Abraham (tan-awa sa Genesis 14:18; D&P 107:2).

Diha sa Melchizedek Priesthood, ang mga katungdanan mao ang elder, high priest, patriarch, Seventy, ug Apostol. Ang Presidente sa Melchizedek Priesthood mao ang Presidente sa Simbahan.

8. Unang mga Baruganan ug mga Ordinansa

“Kami nagtuo nga ang unang mga baruganan ug mga ordinansa sa Ebanghelyo mao ang: una, Hugot nga pagtuo diha sa Ginoong Jesukristo; ikaduha, Paghinulsol; ikatulo, Bunyag pinaagi sa pagpaunlod alang sa kapasayloan sa mga sala, ikaupat, Pagpandong sa mga kamot alang sa mga gasa sa Espiritu Santo” (Mga Artikulo sa Hugot nga Pagtuo 1:4).

Hugot nga Pagtuo

Ang hugot nga pagtuo usa ka “paglaum sa mga butang diin dili makita, diin mga tinuod” (Alma 32:21). Ang hugot nga pagtuo mao ang espirituhanong gasa nga nagagikan sa pagpaminaw sa pulong sa Dios. Ang hugot nga pagtuo madugangan samtang kita mag-ampo, magtuon sa mga kasulatan, ug magsunod sa mga sugo sa Dios.

Mas labaw pa kay sa sunod-sunod nga pagtuo, ang hugot nga pagtuo makita pinaagi sa atong pagpuyo.

Ang hugot nga pagtuo kinahanglang masentro kang Jesukristo aron kini makagiya sa usa ka tawo ngadto sa kaluwasan. Ang pagbaton og hugot nga pagtuo kang Jesukristo nagpasabut og hingpit nga pag-agad Kaniya ug pagsalig sa Iyang walay kinutuban nga Pag-ula, gahum, ug gugma. Naglakip kini sa pagtuo sa Iyang mga pagtulun-an ug pagtuo nga bisan og kita wala makasabut sa tanang mga butang, Siya nakasabut sa tanan.

Ang mga Santos sa Ulahing mga adlaw adunay hugot nga pagtuo sa Dios ang Amahan, sa Espiritu Santo, sa gahum sa priesthood, ug sa ubang importante nga mga aspeto sa gipahiuli nga ebanghelyo. Ang hugot nga pagtuo makatabang nato nga makadawat og espirituhanon ug pisikal nga pagkaayo ug kusog sa pagpadayon, pag-atubang sa mga kalisud, ug pagbuntog sa tintasyon. Makahatag usab kini nato og kalinaw. Ang Ginoo mohimo og gamhanan nga mga milagro sa atong kinabuhi sumala sa atong hugot nga pagtuo.

Pinaagi sa hugot nga pagtuo ang usa ka tawo makaangkon og kapasayloan sa mga sala ug sa katapusan makahimo sa pagpuyo diha sa presensya sa Dios.

Paghinulsol

Ang paghinulsol mao ang kausaban sa hunahuna ug kasingkasing nga makahatag nato og bag-ong panglantaw mahitungod sa Dios, mahitungod sa atong mga kaugalingon, ug mahitungod sa kalibutan. Naglakip kini sa pagpalayo sa sala ug pagduol ngadto sa Dios alang sa kapasayloan. Nadasig kini sa gugma alang sa Dios ug sa kinasingkasing nga tinguha sa pagsunod sa Iyang mga sugo.

Ang atong mga sala makahimo nato nga dili limpyo—dili takus nga mobalik ug mopuyo sa presensya sa Langitnong Amahan. Pinaagi sa Pag-ula ni Jesukristo, ang atong Amahan sa Langit nakahatag sa bugtong paagi alang nato nga mapasaylo sa atong mga sala (tan-awa sa Isaias 1:18).

Ang paghinulsol naglakip sa pagbati og kasubo tungod sa pagbuhat og sala, pagkumpisal ngadto sa Langitnong Amahan ug ngadto sa uban kon gikinahanglan, pagbiya sa mga sala, pagpaningkamot sa pagpahiuli kutob sa mahimo sa tanan nga nadaot tungod sa sala, ug pagpuyo og kinabuhi sa pagsunod sa mga sugo sa Dios (tan-awa sa D&P 58:42–43).

Bunyag

Bunyag pinaagi sa pagpaunlod diha sa tubig sa usa ka tawo nga adunay awtoridad mao ang unang makaluwas nga ordinansa sa ebanghelyo ug gikinahanglan alang sa usa ka indibidwal nga mahimong miyembro sa Ang Simbahan ni Jesukristo sa mga Santos sa Ulahing mga Adlaw. Ang bunyag gikinahanglan usab alang sa usa ka tawo sa pagsulod sa celestial nga gingharian (tan-awa sa Juan 3:5).

Ang pulong bunyag nagagikan sa pulong nga Griyego nga nagpasabut “pagtuslob” o “pagpaunlod.” Ang pagpaunlod simbolo sa kamatayon sa makasasala nga kinabuhi sa usa ka tawo ug ang pagkatawo pag-usab ngadto sa espirituhanong kinabuhi, gipahinungod sa pagserbisyo sa Dios ug sa Iyang mga anak. Nagsimbolo usab kini sa pagkamatay ug pagkabanhaw.

Tungod kay dili tanang tawo nga natawo sa yuta adunay oportunidad sa pagdawat sa ebanghelyo panahon sa pagkamortal, ang Ginoo mitugot sa mga bunyag alang sa mga patay (tan-awa sa 1 Mga Taga-Corinto 15:29). Kini nagtugot niadtong kinsa nga modawat sa ebanghelyo didto sa kalibutan sa espiritu nga makasarang sa pagsulod ngadto sa gingharian sa Dios.

Gasa sa Espiritu Santo

Human mabunyagi ang usa ka tawo, usa o daghang mga tighupot sa Melchizedek Priesthood mopandong sa ilang mga kamot diha sa ulo sa tawo ug mokumpirma kaniya nga miyembro sa Simbahan. Isip kabahin niini nga ordinansa, nga gitawag ug kumpirmasyon, ang tawo hatagan sa gasa sa Espritu Santo (tan-awa sa Juan 3:5).

Ang gasa sa Espiritu Santo lahi sa impluwensya sa Espiritu Santo. Sa dili pa ang bunyag, ang tawo mahimong mobati sa impluwensya sa Espiritu Santo matag karon ug unya ug pinaagi niana nga impluwensya makadawat og pagpamatuod sa kamatuoran. Human makadawat sa gasa sa Espiritu Santo, ang usa ka tawo adunay katungod sa Iyang kanunay nga pagpakig-uban kon siya magsunod sa mga sugo.

9. Mga Ordinansa ug mga Pakigsaad

Mga Ordinansa

Sa Simbahan, ang ordinansa sagrado, pormal nga buhat nga adunay espirituhanong kahulugan. Ang kada ordinansa gihimo sa Dios aron sa pagtudlo og espirituhanong mga kamatuoran. Ang mga ordinansa sa kaluwasan gipahigayon pinaagi sa awtoridad sa priesthood ug ubos sa direksyon niadtong kinsa naghupot sa mga yawe sa priesthood.

Ang ubang mga ordinansa importante sa kahimayaan ug gitawag og makaluwas nga mga ordinansa. Naglakip kini sa bunyag, kumpirmasyon, ordinasyon ngadto sa Melchizedek Priesthood (alang sa mga lalaki), ug temple endowment, ug pagbugkos sa kaminyoon. Tanang makaluwas nga mga ordinansa sa priesthood giubanan og mga pakigsaad.

Adunay uban pang mga ordinansa, sama sa sakrament, patriyarkal nga mga panalangin, ug pagpangalagad sa masakiton.

Mga Pakigsaad

Ang pakigsaad mao ang usa ka sagrado nga kasabutan tali sa Dios ug sa tawo. Ang Dios mohatag sa mga kondisyon alang sa pakigsaad, ug kita uyon sa pagbuhat unsay Iyang gisugo nato nga buhaton; dayon ang Dios misaad nato og mga panalangin alang sa atong pagkamasulundon (tan-awa sa D&P 82:10; 84:33–39).

Tanang makaluwas nga mga ordinansa sa priesthood giubanan og mga pakigsaad. Nakigsaad kita sa Ginoo atol sa bunyag ug bag-ohon kadto nga mga pakigsaad pinaagi sa pag-ambit sa sakrament. Ang mga kaigsoonan nga modawat sa Melchizedek Priesthood mosulod ngadto sa panumpa ug pakigsaad sa priesthood. Mohimo kita og dugang nga mga pakigsaad didto sa templo.

10. Mga sugo

Ang mga sugo mao ang mga balaod ug mga kinahanglanon nga gihatag sa Dios ngadto sa katawhan. Atong ipakita ang atong gugma alang Kaniya pinaagi sa pagsunod sa Iyang mga sugo (tan-awa sa Juan 14:15). Ang pagsunod sa mga sugo makahatag og mga panalangin gikan sa Ginoo (tan-awa sa D&P 130:20–21).

Ang duha ka labing sukaranan nga mga sugo mao ang “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan. … Ug … higugmaa ang imong silingan sama sa imong kaugalingon” (Mateo 22:37, 39).

Ang Napulo ka mga Sugo importante nga bahin sa ebanghelyo ug mahangturong mga baruganan nga gikinahanglan alang sa atong kahimayaan (tan-awa sa Exodo 20:3–17). Ang Ginoo mipadayag niini ngadto ni Moises sa karaang mga panahon, ug Siya mipahayag niini pag-usab diha sa mga pagpadayag sa ulahing mga adlaw (tan-awa sa Mosiah 13:12–24). Ubang mga sugo naglakip sa pagtuman sa balaod sa kaputli, pagbayad sa hingpit nga ikapulo, pagkamatinuoron, pag-ampo kada adlaw, pagbaton og espiritu sa pagpasalamat, ug pagsunod sa Pulong sa Kaalam.

11. Kaminyoon ug Pamilya

“Ang kaminyoon tali sa usa ka lalaki ug sa usa ka babaye gi-orden sa Dios” ug “ang pamilya mahinungdanon” sa Iyang plano sa kaluwasan ug kalipay.

“Ang sagrado nga mga gahum sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa.” Ang mga ginikanan gisugo “sa pagdaghan ug pagpuno sa yuta,” “sa pag-amuma sa ilang mga anak sa paghigugma ug pagkamatarung,” ug “sa pagsangkap alang sa ilang pisikal ug espirituhanon nga mga panginahanglan.”

“Ang bana ug asawa adunay ligdong nga kapangakohan sa paghigugma ug pag-amuma alang sa usag usa.” “Ang mga amahan mangulo sa ilang mga pamilya diha sa gugma ug sa pagkamatarung,” ug “sa pagsangkap sa mga kinahanglanon sa kinabuhi.” “Ang unang kapangakohan sa mga inahan mao ang pag-atiman sa ilang mga anak. Niining sagrado nga mga kapangakohan, ang mga amahan ug mga inahan adunay katungdanan sa pagtabang sa usag usa ingon nga magkauban.”

“Ang balaan nga plano sa kalipay” nagtudlo nga ang “relasyon sa pamilya” mahimong magpadayon “human sa kamatayon.” Ang yuta gilalang ug ang ebanghelyo gipadayag aron ang mga pamilya matukod, mabugkos, ug mahimaya sa kahangturan.

(Tan-awa sa “Ang Pamilya: Usa ka Pamahayag ngadto sa Kalibutan,” Ensign, Nob. 1995, 102.

Alang sa dugang nga impormasyon niini nga mga hilisgutan, adto sa lds.org, Gospel Library, Gospel Topics; o tan-awa ang Matinud-anon sa Tinuhoan: Usa ka Pakisayran sa Ebanghelyo [2004].

© 2009 sa Intellectual Reserve, Inc. Tanang mga katungod gigahin. Pagtugot sa Iningles: 6/09. Pagtugot sa paghubad: 6/09. Hubad sa Seminary and Institute of Religion Basic Doctrine. Cebuano. PD50010275 853