Sauaina
O A Ni Faailoga o Iloa ai O Loo Sauaina se Tagata?

“O A Ni Faailoga o Iloa ai O Loo Sauaina se Tagata?” Auala e Fesoasoani Atu Ai (2018).

“O A Ni Faailoga o Iloa ai O Loo Sauaina se Tagata?” Auala e fesoasoani atu ai.

O a ni faailoga o iloa ai o loo sauaina se tagata?

Manatua: E le o faamoemoe pe uunaia oe e suesue pe o tauivi se tasi ma ni faafitauli e faatatau i sauaga faatautala. O lenei faamatalaga e mafai ona fesoasoani e te iloa ai pe o manaomia se fesoasoani faapolofesa.

O faailoga o le faatautala/sauaina e le faigofie ona iloaina i taimi uma. E mafai ona faaalia e se tasi na aafia, pe o aafia i le faatautala/sauaina ni faailoga se tele e faailoa mai ai e i ai se mea o sese, ae e mafai lava ona tupu le faatautala e tusa lava pe leai ni faailoga o vaaia i fafo. Ma le isi, o faailoga e ono faaalia ai le faatautala/sauaina e mafai ona tupu e ala i nisi faafitauli. O le talanoa i le tagata o afaina o se laasaga lelei muamua lea e iloa ai le mea o loo tupu. Ae, e masani lava ona faigata i tagata o afaina ona faasoa mai sa sauaina pe o loo sauaina i latou. Afai e i ai se faailoga o le faatautala/sauaina, faitau “O le a se mea e tatau ona ou faia pe afai ou te iloa pe masalomia se tasi o loo sauaina?”

I le avea ai ma fanau o le Atua ma uso ma tuafafine, ua i ai so tatou tiutetauave ina ia nofouta i manaoga ma popolega o isi ma ia aapa atu ia i latou i le alofa. Na aoao mai Sister Bonnie L. Oscarson, Peresitene na i ai o Tamaitai Talavou, “[Tatou] te tausi i le tasi ma le isi, e leoleo e le tasi le isi, e fefaamafanafanaai le tasi ma le isi, ma e i ai iina mo le tasi ma le isi i taimi lelei ma taimi faigata.” (“Le Usoga: Oka, so Tatou Manaomiaina o le Tasi ma le Isi,” Ensign po o le Liahona, Me 2014, 119).

Faailoga Lautele Lapatai

E tele ina faaalia e tagata na afaina i le faatautala/sauaina le sili atu ma le tasi ni faailoga lapatai. O faailoga o le faatautala/sauaina e mafai ona fua i le ituaiga o faatautala/sauaga (faalefeusuaiga, faaletino, faalelagona, po o upu) ma le matua o le tagata o loo faatautalaina/sauaina.

E mafai ona faaalia e tagata na afaina i le faatautala/sauaina faailoga lapatai nei:

  • E ese uiga nai lo le mea e masani ai

  • Faaalia le faateleina o uiga ita

  • Ua sili atu ona mateitei pe mataalia

  • Faigata ona moe pe fai ni miti taufaafefe

  • Tuuatoatasi ma lē manao e faatasitasi ma nisi tagata

  • Ua leai se fiafia i gaoioiga sa masani ona fiafia i ai

  • Mauaina o ni manuaga faaletino e lemafaamatalaina

  • Faateteleina le suisui o lagona (ita, faavauvau, faanoanoa) nai lo le mea e masani ai

  • Ua soona mafaufau tele i feusuaiga

  • Auai i amioga lamatia (e mafai ona aofia ai le faaoolima ia te ia lava, faaaoga vailaau ma fuaalau faasaina, ma amioga faalefeusuaiga le sefe pe le soifua maloloina).

O nei lava faailoga e le faapea o loo sauaina ai se tagata. Ina ia aoao atili e uiga i le auala e talanoa ai i se tagata o e masalomia atonu o aafia i le faatautala/sauaina, faitau le tusiga “O le a se mea e tatau ona ou faia pe afai ou te iloa pe masalomia se tasi o loo faatautalaina/sauaina?”

O Lagona, Mafaufauga, ma Amioga o loo Aafia Tutusa ai i latou o Sao mai le Faatautala/Sauaina Faalefeusuaiga

O le aoaoina o lagona, mafaufauga, ma amioga atonu na mafua mai se tulaga faalefeusuaiga e mafai ona fesoasoani ia te oe ia iloa ai faailoga o le faatautala/sauaina. E mafai foi ona fesoasoani ia te oe ina ia e malamalama ma faamalosiau atu i tagata na afaina ma uunaia i latou e saili se fesoasoani. E ui o le pogai o nei lagona, mafaufauga, ma amioga o le faatautala/sauaina, ae e mafai ona vaaia aafiaga i le tele o vaega o le olaga o le tagata na afaina.

Lagona

  • Tauivi ma le le mautonu ia te ia lava ia ma le talitonuga.

  • Lagona le maasiasi.

  • Nenefu e uiga i le faasinomaga.

  • Lagona le ita ia te ia lava faapea ma isi.

  • Tauivi ma le tele o le tausalaina.

  • Lagona le fefe ma tauivi ma le talitonuina o isi.

  • Lagona le tiga i taimi uma; lagona le vaivai.

  • Lagona le pei o tilotilo uma atu tagata ia i latou ma e mafai ona vaai sa’o atu i totonu o i latou.

  • Lagona le atuatuvale po o le popole.

  • O loo le mautonu.

Mafaufauga

Mafaufau:

  • Aisea e tupu ai lenei mea ia te a’u?

  • Aisea e le alolofa ai tagata ia te au?

  • Aisea e le mafai ai ona ou lelei?

  • O le a le mea na tupu ia te a’u?

  • Aisea latou te le tuua ai na o a’u?

  • Aisea e le mafai ai ona ou pei o isi?

  • Aisea e tupu soo ai lenei mea ia te a’u?

  • Aisea e le taofia ai e le Atua po o se tasi?

Tuuaia ma tausalaina o ia lava:

  • Masalo o a’u na mafua ai.

  • Masalo o a’u e sese.

  • Masalo o a’u o se tagata e sili ona leaga.

  • Masalo e i ai se mea e matuai sese lava ia te a’u.

E talitonu i nisi taimi:

  • E le alofa le Atua ia te a’u.

  • E le mafai ona alofa o’u matua ia te a’u.

  • O le a le suia lava lou tulaga.

Mafaufauga faaopoopo:

  • E le talitonu i ana lava faaiuga.

  • E talitonu o le a sili atu ona lelei le lalolagi e aunoa ma i latou.

  • E le mafai ona o faatasi ma isi tagata.

  • E i ai se uiga “ou te le kea”.

Amioga

  • Alu ese po o le faafuasei ona osofaia isi (e ala i upu po o faatinoga).

  • Amata ona matuai toaga i le lotu.

  • Tauivi ma le pulega, e aofia ai taitai o le Ekalesia.

  • Atiae ni faafitauli faafomai.

  • Taumafai e pule i le ola pe aafia i le lamatiaina o ia lava.

  • Auai i amioga faalefeusuaiga lē soifua maloloina; ono aafia i ni faafitauli faalefeusuaiga faaleulugalii.

  • E i ai ni sootaga le lelei ma faatagaina isi e puleaina i latou.

  • E masani ona taliaina le tuuaiga; talia le tausalaina ma le tiutetauave.

  • Taumafai ina ia atoatoa.

  • Lagona le alofa tele mo isi.

  • Ova le taulai atu i manaoga o isi (e aofia ai le aiga) e sili atu nai lo o latou lava [manaoga].

Amioga faaopoopo i tamaiti ma talavou:

  • Faigofie na tagi.

  • Manao ma moomoo i le gauai mai o tagata matutua, masalo e oo lava i le tagata na faia le mea sese.

  • Aloese pe e le fiafia pe matuai fiafia lava i talanoaga o le talafeagai o le matutua e uiga i feusuaiga.

  • E tele naua ni mata’ua e lemafaamatalaina.

  • E le ‘ano i meaaoga, pe solaese e ala i le tele o meaaoga, taaloga, po o isi gaoioiga.

  • Faigofie ona pepelo.

  • Tetee faasaga i matua ma taitai.

  • Solaese mai le aiga.

Punaoa a le Nuu ma le Ekalesia

(O nisi o punaoa o loo lisiina atu i lalo e le i fausia, tausia, pe pulea e Le Ekalesia a Iesu Keriso o le Au Paia o Aso e Gata Ai. E ui o nei anomea ua faamoemoe e avea o ni punaoa faaopoopo, ae e le faamaonia e le Ekalesia ni anotusi e le ogatusa ma ona aoaoga faavae ma aoaoga.

Tusiga e Faatatau I Ai