“Peta Disanka mu Njila wa Luendu Weba wa Lumu Luimpa,” Liahona, Ngondu wa Muanda Muteketa 2025

Mukenji wa ku Ngondu wa Liahona Ngondu wa Muanda Muteketa 2025

Peta Disanka mu Njila wa Luendu Weba wa Lumu Luimpa

Kudi Mukulu Gary E. Stevenson

Wa mu Mpuilu wa Bapostolo Dikumi ne Babidi

Tshipeta tshinena tshia dinanga dietu bua Mukalenga mu kutumikila Mikenji yenda, tshidi mabenesha adi atuala disanka.

bidimba bia Ekelezia mu Thailande bitua mimuemua

Pamvua nsadila bu mulombodi wa bukenji mu Japon kukadi bidimu bia bungi, nankabuela mu mpuilu wa ku ndekelu kua lumingu mu tshimua tshimenga tshivua kula mu bukenji buetu. Mulombodi wa distrike wakalongolola bua mema kuyukila ne muntu uvua mubuela mu Ekelezia tshidimu tshimua ne uvua ukeba dianyisha dia kubuela mu ntempelo. Uvua mutekemena bua kupeta diambika dienda mu dituku dia mufikilu wa tshidimu tshijima wa ditambula dienda.

Mu muyuki wetu, tshidimba tshipia-tshipia etshi tshiakumvuija muvuatshi ne kusakidila kua bungi bua mabenesha avuayi mupeta mu tshidimu tshivuayi mutambushibua. Uvua ne disanka dia kubuela mu bisangilu bia biakudia bia tshijila ne bikuabu bisangilu. Wakadifila bikola mu bibilu bia mu ditamba dienda. Kundi, wakafila bujadiki bua tshipungidi tshiakapatuka ku dijingulula dia kipatshila kenda ka lumu luimpa, luvua pindiewu tshitupa tshinena tshia bumuntu buenda. Uvua muyidi mukudimuna moyo wa Kilisto uvua mupeta dishintuluka dikola (tangila Mosiya 5:2).

Tshitupa tshia muyuki wetu tshiavua tshilonda tshivua tshia bukola bua bungi. Tuvua bayukila pa bidi bitangila milulu ne bipungidi bikala tshitupa tshia dimanya dienda dia mu ntempelo. Uvua muandamuna ne eyowa ku nkonku yonsu ya tshibidilu mitekibua pamua ne dipeta dia dianyisha dia kubuela mu ntempelo.

Panyima pa muyuki, ndi mvuluka mumvua muambila mulombodi wa distrike ne mvua ne disakidila dia bungi bua kutuilangana ne muntu wa ngumvuilu ewu. Nankamuambila ne bivua binkemesha mushindu uvua bena bukenji ne bidimba bamupeta, ne bakolesha mu nyuma, muntu wa mushinga mukola ne wa ditekemena dia nunku.

Biakankemesha bikola pavua mulombodi wa distrike ungambila ne pavua muntu ewu mutuadija kulonga ne bena bukenji ne kulua mu Ekelezia munkatshi mua tshidimu tshijima, kavua ne muaba wa kulala to ne uvua mu lutatu lunena—kayi ne ditekemena. Pashisha Mulombodi wa distrike wakaleja muvua dilonga dia lumu luimpa dia muanetu ewu ne dikudimuna moyo dienda munkatshi mua ngondu ya bungi bifikisha ku dishintuluka dia tshishima, kumuvuija mu njila wa bubidi mu budikadidi bua mu nyuma ne bua mu mubidi ne kumupesha lungenyi lua kipatshila ne disanka.

Lumu luimpa luakamupesha tshimfuanyi tshimpa tshia moyo wenda. Malelela mimpa ne a mushinga wa bungi a lumu luimpa akatuala mandamuna ku nkonku ya mushinga ya mu moyo wa tshifuaka, kutuadija ne dimanya dia ne “Nzambi udi tatu wetu wa mu Dîulu, ne tudi bana benda. … Nzambi mmutumanya muntu ku muntu ne mmutunanga.” Mu bulongolodi buenda, “Tatu wa mu Dîulu uvua … mutulongoluela mapa a bungi ne maludiki bua kutuambuluisha kupingana kumpala kuenda.”

Ke muvua dibenesha bua muntu ewu, didi momumua bua bana ba Nzambi bonsu kupitshila ku lumu luimpa lua Yezu Kilisto.

Kipatshila ka Moyo

Bualu Yezu Kilisto mupinguluja Lumu luimpa Luenda kupitshila kudi muprofete Joseph Smith, “tudi ne lumvu lua kipatshila ka moyo, ka tshitudi,” Biamba kudi Mulombodi Mukulu M. Russell Ballard (1928–2023). Mu bujadiki buenda bua ndekelu mu Ekelezia, Mulombodi Mukulu Ballard, pavuaye Mulombodi Mukulu Uvuaku wa mu Mpuilu wa Bapostolo Dikumi ne Babidi, wakamba:

“Tudi bamanya udi Nzambi, tudi bamanya udi Musungidi bualu tudi ne Joseph, uvua muya mu mitshi patshivuaye muana muteketa, bua kukeba dibuikidibua bua mibi yenda. …

“Ndi nsaka, ne ndi mutuishibua ne ba bungi ba kunudi badi benza nanku, tudi babeneshibua bua kumanya bitudi bamanya, pa kipatshila ka mu moyo, bua tshinyi tudi apa, tshinyi tshitudi ne bua kudienzeja bua kuenza ne kukumbaja mu nsombelu yetu ya dituku dionsu.”

Bua bidimba bia Ekelezia wa Yezu Kilisto wa Bansantu ba Matuku a Ndekelu, dimanya adi didi diangata ngumvuila wa “bulongolodi buakana” bua Nzambi bua lupandu. Bumanyika kabidi bu “bulongolodi bunena bua disanka,” “bulongolodi bua dipikula,” ne “bulongolodi bua lusa” (Alama 42:8, 11, 15), budi “bumbusha malu a kukema a mu nsombelu ne biumbusha bowa bua malu a matuku etu atshilualua.” Tshia mushinga ku bulongolodi abu tshidi “dilongesha dia Kilisto,” didi pankatshi pa kipatshila ka moyo.

Bualu tudi ne lumu luimpa, tudi bamanya ne tudi bana ba Nzambi, batumibua pa buloba bua kutetshibua, kulengejibua, ne kulongolodibua bua kuikala babishibua ku bafua, ku butshimunyi ne butumbi bua muana wa mukoku (Dilongesha ne Bipungidi 76:39). Tudi bamanya mikenji ne tudi balongeshibua bia “bungi bua kumanya tshidi tshimpa ne tshidi tshibi” (2 Nefi 2:5). Tudi bamanya ne tudi pa buloba bua kunanga ne kusadila. Tudi bamanya ne Mupandishi uvua mutubikila bua kutshimuna malu a pa buloba ne kuambuluisha bakuabu bua kuenzabu biabu bia momumua (tangila Yone 16:33; Dilongesha ne Bipungidi 64:2) mu kudilongolola bua Dilua Dienda Dibidi.

Patudi tuimanyina pa yeya, tshivua Joseph Smith mubikila “dîyi dia disanka dia lumu luimpa lua Mukalenga wetu Yezu Kilisto” neditupesha bukola mu matuku makola ne dituala ngumvuilu ne kipatshila mu nsombelu yetu ne ya bakuabu.

Tshinu Tshionsu ne Tshitua Panshi, kudi Dan Wilson, kabiena mua kutentudibua to

Ditumikila, Mabenesha, Disanka

Nzambi mmutupesha budikadidi bua kudisungiula bua mu meji bua tuikala ne bujunguludi bua masungula etu (tangila Dilongesha ne Bipungidi 101:78; 2 Nefi 2:16). Bu tshitupa tshia “butontolodi mu bintu bionsu” (2 Nefi 2:11), Satana udi ne bukokeshi bua kututeta bua kuenza mudimu bibi ne budikadidi buetu bua kudisunguila.

Kadi Mukalenga Yezu Kilisto, mumana kumanya dikenga didi ne bua kukuata bantu ba pa buloba mu matuku etu wakabikila Muprofete Joseph Smith, kuyukila nenda ku dîulu, ne kumupesha mikenji” (Dilongesha ne Bipungidi 1:17). Mushindu ewu udi Mukalenga ubuluila mikenji ne dijinga bienda kudi baprofete benda ne disua dienda udi utungunuka tô ne mu matuku etu â ne Mulombodi Mukulu Russell M. Nelson—ne bua kabingila kamua. Nzambi udi ne dijinga dia kutulombola ku disanka mu moyo ewu ne ku butumbi bua selestiya mu moyo ulualua.

Ditumikila ku mikenji ya Nzambi didi ne bua kufumina ku didifila ne dinanga dietu buenda. Mukalenga Yezu Kilisto nkayenda wakamba ne kunanga Nzambi “kudi mukenji wa kumpala ne munena” (tangila Matayo 22:37–38). Wakafila ngumvuilu mikuabu pakambaye, “Panuikala bannanga, lamayi mikenji yanyi” (Yone 14:15).

Kudi difutu mu kunanga kua Mukalenga ne kulama mikenji yenda. Mu tshikondu etshi wakaleja mukenji, kawuyi wa kushintulula mu dîulu … , udi wambula mabensha onsu—

Ne patudi tupete dibenesha kampanda kudi Nzambi, tshidi ku ditumikila dia mukenji awu udi muambibua (Dilongesha ne Bipungidi 130:20–21).

Nunku, mushindi munena wa kuleja dinanga dietu kudi Mukalenga udi mu kulama mikenji yenda, mabenesha adi afila disanka.

Mu kutangila kua moyo ku lumonyi lua lumu luimpa lupinguluja ne dibuluila dia tshikondu etshi kudi kutupesha butoka. Ne lumonyi lutoka lua muvu ne disungidibua bietu bia bunzambi, tudi bamanya ne “bintu bienza moyo wetu wa tshifuaka moyo mushema bidi bia momumua bushuwa ne bintu bienza moyo wetu mu tshiendelela mushema mudibi mua kuikala!”

Dioya

Ndi njikijila ne muaba umvua mubangila, mvuluka bidimu bipita bia dimanya dianyi ne tshidimba tshipiatshipia mu Japon. Kupitshila ku didienzeja dienda ne didienzeja dia bena bukenji ne dia bidimba, wakapeta lumu luimpa lupinguluja lua Yezu Kilisto. Mu kupeta lumu luimpa, wakajingulula kabidi kipatshila kenda, kavua kudiundisha lumonu luenda. Wakapeta kabidi dilongolola dinena dia disanka. Ditumikila ku bulongolodi bua bipungidi bia lumu luimpa kua kamutuadila mabenesha ne disanka, kumujula mu mubidi ne mu nyuma.

Luendu luenda lulombola ku dikala tshidimba mu Ekelezia wa Yezu Kilisto luakamufikisha bua kuikala mujadiki wa Yezu Kilisto. Mukulu Patrick Kearon wa mu Mpuilu wa Bapostolo Dikumi ne Babidi wakumvuija disanka didi dilonda nunku:

“Kupitshila ku bulongolodi bua Tatu wetu wa mu diûlu bua dinanga bua bana benda bonsu, ne bua moyo wa disungila ne bukenji bua Musungidi wetu, Yezu Kilisto, tudi mua—ne kuikala—bantu ba disanka dia bungi pa buloba! Nansha mudi bipepela bia mu nsombelu mu buloba bua ntantu bitututa, tudi mua kutantshisha ne kuikala ne luidi lua disanka ne ditalala dia mu mutshima bualu bua ditekemena dietu mu Kilisto ne ngumvuilu wetu wa muaba wetu mu bulogolodi buimpa ne bua disanka.”

Ndi mfila kusakidila buabi, ne bujadiki bua, lumu luimpa lua Yezu Kilisto lupinguluja, biangata ne bulongolodi bunena bua disanka munda muabi. Ndi nnubikila bua kudia mamuma a lumu luimpa ne kumvua disanka dia bungi mu nsombelu ewu mu njila wa luendu weba mutangila ku moyo wa tshiendelela.

© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, July 2025. Tshiluba. 19601 760