“Tudi Tulonda Yezu Kilisto ku Dibuela Nenda mu Mudimu Wenda,” Liahona, Ngondu Muisambombu 2025.
Mukenji wa ku Ngondu wa Liahona Ngondu Muisambombu 2025
Tudi Tulonda Yezu Kilisto ku Dibuela Nenda mu Mudimu Wenda
Tudi tudibuinka mu mudimu wa Mupandishi patudi tushindamena pa tuipatshila tuenda, tulama mikenji yenda, ne tunangangana umua ne mukuabu.
Diumvuija ku Kilisto ne Nsongaluma Mubanji Mumanyi wa Mukenji, kudi Heinrich Hofmann
Patudi tutambushibua, tudi tubanga luendu lua diangata pa mitu yetu dina dia tshijila dia Yezu Kilisto. Tshitupa tshia luendu elu tshidi tshiumvuija ne tudi tubuela ne Mupandishi mu mudimu wenda. Mulombodi Mukulu Dallin H. Oaks, Mubedi wa Kumpala wa mu Bulombodi Bukulu, wakafunda, “Dimua dia ku mumvuija a diangata pa mitu yetu dina dia Kilisto [didi] didisuila ne dipangadika dia kuangata pa mitu yetu mudimu wa Mupandishi ne bukalenga buenda.”
Mudimu wa Mupandishi udi “bua kutuala dibenga kufua ne moyo wa tshiendelela bia muntu” (Mose 1:39). Dibenga kufua didi dipa dia sungusunga dia Yezu Kilisto dikadiye mutukumbajila kupitshila ku Dibika ku Lufu dienda. Moyo wa tshiendelela, wowu, kawena momumua ne dibenga kufua to. Moyo wa tshiendelela udi muikala dipa dinena didi Nzambi mupesha bukua bantu (tangila Dilongesha ne Bipungidi 14:7). Tshidi kusomba kashidi mu mêku ku mesu kuenda. Bua tuetu kupeta moyo wa tshiendelela, tudi ne tshia kulua bayidi ba lulamatu ba Yezu Kilisto. Tshidi tshiumvuija ne tudi tupeta lumu luimpa lupingajilula mu kuikala ne ditabuja mu Mupandishi ne mu Mulambu Wenda wa Bupikudi, mu dikudimuna mutshima, ditambushibua, dipeta dipa dia Nyuma wa Tshijila, dienza ne dilama bipungidi bia ntempelo, ne dinanukila tô ne ku ndekelu. Dinanukila tô ne ku ndekelu didi diangata dibuela mu mudimu wa Mupandishi.
Mudifila ne Tshisumi
Tudi tudibuinka mu mudimu wa Mupandishi patudi tuambuluisha bana ba Nzambi bua balua bayidi ba lulamatu ba Yezu Kilisto. Etshi tshidi tshiangata ditangalaja dia lumu luimpa luenda, disangisha dia Isalele udi mutangalaka, ku dikumbaja dia majitu etu mu Ekelezia wa Mupandishi ne mu didienzeja bua kulua bu Yeya. Tshietu “tshipeta tshimpa [mu mudimu wenda] katshiena tshilonda mushindu udi bakuabu basungula bua kutuandamuna, ku mabikila etu anyi ku bienzedi bietu bia kalolu.” Mulombodi Mukulu Russell M. udi ujadika, “Musangu onsu uwudi wenza tshintu kampanda tshidi mua kuambuluisha muntu kampanda—ku nseka yonsu ya tshilamba—bua kuela tshidia tshia kuenza bipungidi ne Nzambi ne kupeta milulu ya mushinga ya ditambula ne ya ntempelo, udi wambuluisha bua disangisha dia Isalele.”
Bua kuenza bua mudimu wa Mupandishi wikala wetu, tushindamena pa tuipatshila tuenda, tulama mikenji yenda, ne tunangangana umua ne mukuabu. Patudi tuenza mudimu wenda mu mushindu wenda (tangila Dilongesha ne Bipungidi 51:2), bintu bikuabu nebitushadila bua tubijandula nkayetu. Mupandishi wakambila Bansantu bavua badisangisha mu Jackson, Missouri:
Bualu monayi, kabiena bikumbana bua ngela mukenji mu bintu bionsu, bualu ewu udi muenzeja mu bintu bionsu, udi musadidi wa lulengu ne mupanga meji; ke bualu kayi kena upeta matapishi to.
Bulelela ndi ngamba, bantu badi ne tshia kudifila ne tshisumi mu bualu buimpa, ne kuenza bintu bia bungi mu didisuila diabu, ne kutuala bululama bua bungi;
Bualu makanda adi mu bobu, ki bualu kayi badi bantu badi badienzeja bobu nkayabu. Ne monsu mudi bantu benza bimpa kabakujimija mu mushindu nansha umua matapishi abu (Dilongesha ne Bipungidi 58:26–28).
Patudi tulonda Mupandishi, tubuela nenda mu mudimu wenda, ne tuambuluisha bakuabu bua kulua bayidi benda ba lulamatu, tudi tulongesha tshivuaye mulongesha. Bualu katuena bapeshibua bua kulongesha tshintu tshikuabu tshia tshianana to (tangila Dilongesha ne Bipungidi 52:9, 36), tudi tushindamena kakuyi dikisha pa Dilongesha dienda (tangila Dilongesha ne Bipungidi 68:25). Mu disakidila, tudi tuteya ntema ya pabuayi kudi aba badi bapele, badi mu dijinga, ne badi mu njiwu (tangila Dilongesha ne Bipungidi 52:40). Bitupa ebi bia mushinga mbileja patoka padi Mupandishi mutela Yeshaya mu Sinagoga mu Nazalete:
“Nyuma wa Nzambi udi pambidi panyi, bualu mmungele manyi bua kuambila bapele lumu luimpa; mmuntume bua kumanyisha dilekedibua kudi badibu bakuate, ne dipetulula dia lumonu kudi bafofo ne bua kupingaja budishikaminyi kudi badi batata,
“Ambila bantu bualu bua tshidimu tshiakitabusha Mukalenge” (Luka 4:18–19; tangila kabidi Yeshaya 61:1–2).
Tshidimu tshitabuja tshia Mukalenga tshidi tshituma ku diba dikala mabenesha onsu a tshipungidi tshia Nzambi mapesha tshisamba tshienda. Tudi tulonda Yezu Kilisto ku dibikila bakuabu bua bapeta mabenesha a dienza ne dilama bipungidi ne Nzambi ne mu dikuba dia aba badi bapele anyi badi mu dijinga.
Dibuela mu mudimu wa Yezu Kilisto didi dizanjika bualu midimu, mapangadika, ne tuipatshila bienda “kabiena mua kupangishibua, ne kabiena mua kupanga tshipeta nansha” (Dilongesha ne Bipungidi 3:1). Bua badi badiumvua bateketa, Mukalenga wakababela: Pananku, kanutshioki bua kuenza buimpa, bualu nudi nuenza tshishimikidi tshia mudimu munena. Ne bintu bikesa bidi bituala bidi binena (Dilongesha ne Bipungidi 64:33). Tudi tulekela Mukalenga atata bua dipola, ne tuetu tudi tuenza tshietu tshitupa.
Mutshima ne Meji Bidisuila
Kuenza tshietu tshitupa tshidi tshipepela tshipita mutudi tuela meji bualu katuena basua kufila bipedi anyi mamanya makola ku mudimu wa Mukalenga to. Dibangu dienda didi dipangadika ne didisuila bipepela. Mukalenga wakambila Bansantu ba mu Kirtland, Ohio, Monayi, Mukalenga udi ulomba mutshima ne meji bidisuila (Dilongesha ne Bipungidi 64:34). Mukalenga udi mua kukolesha udi musua, kadi kena mua kutabuluja udi mukolakana to. Mu tshiakuidi tshikuabu, tuetu bapangadika ne badisuila, udi mua kukuata netu mudimu. Kadi nansha mushindu utudi mua kuikala ne bipedi bietu, kakukuata netu mudimu amu tuetu babuela mu mudimu wenda ne badisuila bua kumuambuluisha.
Samuel ne Anna-Maria Koivisto bakaleja dipangadika ne meji madisuila. Panyima pa diselangana diabu, ba Koivisto bakumbuka ku Jyväskylä, Finland, bua kusombela mu Göteborg, Suede, balonda midimu yabu. Pakafikabu, muanetu Koivisto uvua mubikidibua bua kumonangana ne Mulombodi Mukulu Leif G. Mattsson, mubedi mu Bulombodi Bukulu bua Dikunji dia Göteborg mu Suede. Bualu Samuel kavua mumanya muakulu wa Suedois to, muyuki wa nkaya wakapita mu Angele.
Panyima pa dikumbulangana dikesa edi, Mulombodi Mukulu Mattsson wakalomba Samuel bua kusadila bu mulombodi wa bena bukenji ba mu Tshikongu tshia Utby. Samuel wakaleja tshivua tshitatshisha: “Kadi tshiena ngakula muakulu wa Suedois to.”
Mulombodi Mukulu Mattsson wakinyika mutu pa mesa ne kumukonka ne, “Ngakukonki ne udi wakula muakulu wa Suedois, anyi ne udi mudisuila bua kusadila Mukalenga?”
Samuel wakandamuna, “wakonki ne pangikala musua bua kusadila Mukalenga. Ne ndi musua.”
Samuel wakitaba dibikila. Anna-Maria wakitaba bienda mabikila. Bonsu babidi bakasadila ne lulamatu ne bakalonga bua kuakula muakulu wa Suedois muimpa mu bula bua ntanta.
Dipangadika ne didisuila bua kusadila Mukalenga biakakaja nsombelu wa Samuel ne Anna-Maria. Badi bikala bilobu bia tshibidilu mu Ekelezia. Bavua basadila ne lulamatu misangu yonsu ivuabu balombibua. Bakandongesha ne patudi tusadila, tudi tuenzela bipedi bitudi nabi (tangila Dilongesha ne Bipungidi 60:13), ne Mukalenga neatuambuluisha pashisha bua kukumbaja tuipatshila tuenda.
Patudi basua bua kusadila, tudi tuditatshisha bua kubenga kudiabakena anyi kunungana, bualu katuena basua kunyanga mu mushindu kampanda disadila dietu to. Didiabakena didi mua kuikala tshimanyinu tshia dielakana dia dipangadika, anyi dipanga dia dinanga bua Mupandishi. Kakuyi diyikenketa, minungenyi idi mua kukola ne kutuma ku ditombokela Mukalenga. Ditanta edi ndimueneka mu nsombelu wa Ezra Booth, wa ku bakudimuna moyo ba kumpala ku Ekelezia mu Ohio uvua mubikidibua bu muena bukenji ku Missouri.
Pakumbukaye mu Ohio mu ngondu Muisambombu 1831, Ezra uvua mufika munda ne bena bukenji bakuabu bavua bendela mu matempu pavuaye wenda pa munya mukola wa mushipu, uyisha ku mpenga kua njila. Wakanungana. Pakafikaye mu Missouri, wakadiumvua muteketa. Missouri ki ntshimvuaye muindila to. Pa mutu patshi, wakatangila ku luseka luenda ne kuamba ne “matuku alua kumueneka misangu mikuabu mabuitakana.”
Ezra wakalua ne dikamakama dikola, musendeki ne mujanyi. Panyima pa mumbuka mu Missouri, pamutu pa kuyisha pavuaye mu njila, bu muvuabi bimulomba bua kuenza, wakalukila pa lukasa ku Ohio. Minungenyi yenda yakashala dielakana ne ndekelu wakajimija mamanya enda a mu nyuma a mbangilu. Pashisha Ezra wakumbuka mu Ekelezia ne “ndekelu wa bionsu ‘wakalekela buena Kilisto ne wakalua muena agnostike.’”
Tshia momumua tshidi mua kutufikila patudi katuyi batalama. Patudi katuyi tulama muenenu wa tshiendelela, mu didivuluija muena mudimu wenda bushuwa, tudi mua kuteta kudiabakena, kuelakana, ne kujimija ditabuja ditudi nadi.
Ndi ndomba bua tusungula bua kulonda Yezu Kilisto ku dibuela nenda mu mudimu Wenda. Patudi tutshienza, tudi tupeta “milayi ya mushinga mukole ne mitambe bunene” (2 Petelo 1:4). Mabenesha â adi angata difuidibua lusa dia bubi (tangila Dilongesha ne Bipungidi 60:7; 61:2, 34; 62:3; 64:3), disungidibua (tangila Dilongesha ne Bipungidi 6:13; 56:2), ne dizanjikibua (tangila Dilongesha ne Bipungidi 58:3–11; 59:23). Eyowa, tudi balayibua dipa dinena didi Nzambi mua kutupesha—moyo wa tshiendelela.
© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, June 2025. Language. 19610 760