“Sises Krais: Iei Koapwoaroapwoar oh Inoupen Easter,” Liahona, Epr. 2025.
Padahk en ehu ehu sounpwong Liahona Epreil 2025
Sises Krais: Iei Koapwoaroapwoar oh Inoupen Easter
Sang ni Koapwoaroapwoar oh Inoupen Easter, Sises Krais kin kaitarala wasa me sohte itar nan atail mohngiong kan oh sapengalka peidek kan.
Mahlen sang Michael Dunford
Menlau wiahda wasahn wadawad me mie meleilei oh ngehn sarawi ni ahmw pahn wadek padahk wet.
Pak tohto, sampah wet me katairong, diren likamw oh pohnmwahsu. Ahpw ni ansou me kitail kin saledek, mehlel, oh kin mehlelehng pein kitail oh Koht, Koapwoaroapwoar oh inoupen Easter sang Sises Krais kin mehlela. Soangen ansou pwuka, kitail kin peksawas:
“Ia mwowmen ahi pahn kak pwurehng kilang emen ahi peneieni, kempoakepahi, oh mei kin paokohng kan?”
“Nan momour apwal en sampah wet ‘I kin nantiheng’ rapahki, wasa me i kak diar oh kehn meleilei, koapwoaroapwoar, oh kin ehuong Koht (kilang Doctrine and Covenants 107:19), mehn mpei kan, oh pein ngehi?”
“Mie me i kak poakohng—oh me pahn poakohngie mehlel? Limpoakpene ni inou sarawi kak kekeirda oh erein, kaidehn mwomwen soai ahpw ehupene me kehlailsangh selin mehla, peren mehlel oh kohkohlahte?”
“Ia mwomwen ahi pahn kak ehukihda meleilei, ehupene, oh wehwehki Sises Krais oh Sapwelime rongamwahuo oh Mwomwohdiso nan wasa me diren medek, lokolok, oh sapahrek?”
Nan ansou en Ihster wet, I men wia ahi kadehdehpen Sises Krais oh Sapwelime inou oh koapwoaroapwoar.
Inou en kolokol Inou Sarawi Kan oh Kahrepe
Koht, Samatail Soutuk en Nanleng, Sises Krais, Sapwelime Iehros Kehmpoake; oh Ngehn sarawi kin karanih kitail ansou koaros. Marain sohte idi oh soutuk, ineng en sawas, oh limpoak wia kisehn kahrepen kepikipikdahu oh kasalepen kitail kohsang ia (tehk Alma 30:44; Moses 6:62–63).
Nan mihting lap en Nanleng, “irail weliepe kan, oh sapwelimen Koht seri koaros kokoul ni popohl” (Job 38:7). Kitail pilada pilipil. Met kitail kin aluhki pwoson. Sang ni atail kekeirda, kitail en esehla inou kaselel en Koht, kamehlelpe, popohl, oh kahrepe, mendahte kahpwal kan en sampah, kaluet kan, oh kasongosng kan.
E sohte koasoandi kitail en kelekelehpw seli sampah wet ni sohte koapwoaroapwoar. Kitail kak ehuong nanleng, kakairada pwoson oh ehupene nan peneinei oh nan imwatail kan oh wasahn kousoan kan en souloeng kan, oh wiahla aramas mehlel, saledek, pweida, ni popohl oh peikiong kosonned en Koht. Tomwo—{ni-ehu-te—ong oh sangete Sises Krais me kitail kak kolokolki inou sarawi.
Inoupen mour en Sises Krais oh Sapwelime pwukoah
Rahn koaros, koapwoaroapwoar oh inoupen Ihster iei kapai kan oh padah kan me Sises krais padahngki ansou me e ketin ieias sampah wet. Sangete ni Tapio, Sises Krais pilipildahr pwehn wia Sapwelimen Koht Iehros (tehkJacob 4:5; Alma 12:33–34; Moses 5:7, 9). E kekeirda nan marain oh wiewia mwahu, kahrehda Koht oh aramas akan poakohng (tehk Luke 2:52). Sang ni Ah rapahki pwehn kapwaiada kupwuren Seme, Sises Krais mahkohng dihp, kamwahuiala me samin kan, kamaurada me melahr, oh kansenamwahuiala me soumwahu oh pahtou.
Pak ehu, mwurin Ah kaisihsol kihla rahn 40 e kadehdehki, “Ngenen Kauno ieiangie, pwehki e kasarawihelahr en padahngki rongamwahuo ong me semwehmwe kan; e kadariehdo pweien kamwahuiala me mohngiong ohla kan, padahngki meleilei ong me mih nan imweteng, kamwahuiala me maskun kan, oh kasaledekala irail akan me medekla” (Luk 4:18; pil tehk Isaiah 61:1).
Ih duwen emen emen kitail.
Ni keimwsek en kamadipwo, Sises krais widen nehn Sapwelime Wahnpoaron ko (tehk Sohn 13:4–8). Nan mour en Mahs oh Mweiet, “pihl sarawi en mour” oh “pilawa sarawi en mour” me ieih Krais pein pahkihda kamadipw sarawi. Nan kapakap sarawi en kamadipw sarawi, kitail kin kapakap ong Sahmo oh inoukihong me kitail pahn alehda mwaren Sises Krais, tamataman Ih, oh kolokol Sapwelime kosonned kan, pwe Sapwelime Ngehn Sarawi en ketket rehtail (tehk Luk 22:19–20; 3 Nihpai18:7, 10–11).
Nan Mwetuel en Gethsemane, Sises ahneki lokolok laudsang me kitail kakehng pwehn kak tomwkihla dipatail kan. Nta kohsang ni pwoahr koaros. E ketin lokoloki medek pwukat koaros pwe kitail en dehr kehn ma kitail pahn koluhla (tehk Doctrine and Covenants 18:11; 19:16).
Sises Krais kalokolok oh aramas akan kawe, oh kihong elentupw pohn sihlangih, pwehki sang ni likamw en aramas akan (tehk Madiu 27:26, 29; Mark 15:15, 17, 20, 31; Luke 22:63; John 19:1–2). “Mwoula pwehki dipatail kan … oh sang ni lipwen ohla ni kili kitail maiaudahr” (Aiseia 53:5). E ketin “pwoula ni lohpwuo” pwe kitail en kohdo Reh (tehk 3 Nihpai 27:14–15). Ahpw, mendahte ah kalohpwuala, Sises Krais ahneki Mahk (tehk Luk 23:34. E peki rehn Sohn en apwalih ah nohnohu (tehk Sohn 19:26–27). E kehn atail soikala Ih (tehk Matthew 27:46; Mark 15:34). Iren pwuhk sarawi pweida, E ketin mahsanih me E men nempilda (tehk Sohn 19:28). Ansou me soahng koaros nekier, Pein Ih “mweidala pali ngeni” (Luk 23:46; pil tehk Sohn 10:17–18).
Sises Krais mwangih mwomwen ah pahn apwalih atail soumwahu, luet, loaloid, kelehpw, oh kahpwal kan (tehk Alma 7:12). Soangen kahpwal pwukat kin kalap kohsang ni pilipil en mehteikan. E pil ese ia mwomwen ah pahn iang kitail kaping ansoun peren oh nsenamwahu, oh iang kitail sengisengi atail peren laud. Ni ngihl tikitik, E ketin lukuerih kitail ki Mware, Ni Ngile, en kohdo Reh. E kin ketin lukuerih aramas koaros wasa koaros. E luke kitail en kilang oh wehwehki mour wet oh medewe mour soutuk. Ni atail pahn kin momouriki oh aluhki ni pwung inou sarawi kan, E inoukihong kitail me soahng koaros pahn mwahu ong kamwahupatail (tehk Doctrine and Covenants 90:24; Romans 8:28).
Sang sapwelime ansou oh ahl, kowpurupwurdohu kin kohdo—kaidehnte ni mwohmw en mahso ahpw ni mwowmen dahme e kak wiahla. Ni mehlelo, Sises Krais kak kapit kitailsang kalokolok oh dihp, sang mehla oh ehl, oh kak sewese kitail en wiahla aramas mwakelekel kei sang dahme kitail kasik, sang ni pwoson oh koluhla.
Inou en Koapworopwor
Pwehki Sises Krais, mehla sohte wia imwilahn mehkoaros. Ni Ihster kitail padahngki:
Sang ni kaweidpen Sahmo, Sises kak pwilikihdi ah mour oh pil pwurehng alehda (tehk Sohn 10:17). Erein ansou me paliwere ketiket nan sousou, Sises Krais padahkohng me melahr akan, “ketikihong irail kapai en pitsang mehla soutuk” (Doctrine and Covenants 138:16).
Ni menseng en rahn kesiluh, E ketin iasada sang nan sousou. E mahseniong Mary. E pwarehng sapwelime wahnparon riemen pohn ahl kolahng Emmaus, Rehn Sapwelime Wahnparon ko oh mehteikan. (tehk Madiu 28; Mark 16; Luk 24; Sohn 20.)
E pwurehng katamankin irail, E luke Sapwelime wahnparon kan en kesehla arail uhk kan elep pwohto; ahpw met, mendahte ah direkihla mwahmw, uhk ko sohte ohla (tehk Sohn 21:6–11; Luk 5:3–7). E kamwonge Sapwelime wahnparon kan oh peki rehn pihter en kamwonge Sapwelime sihpw kan (tehk Sohn 21:12–17). E ahpw ketketdahla nanleng, oh padahkihong Sapwelime wahnparon kan ansouo oh pil kitail koaros ansouet en kalohki Sapwelime rongamwahu ong wehi koaros, tiahk koaros, oh aramas koaros nan Ihster Lapalap wet (tehk Madiu 28:19–20; Mark 16:15).
Sises Krais iei silepen sihpw mwahuo oh wia Sihpw en Koht emen. E pwilikihdi ah mour ong, oh kihda ah mour ong na Sihpw akan Nan mwetuelo lel ni lohpwuo, E powehdi medek koaros oh pwoukihla kitail. Met pil kohkohlahte, E ketin kasalehiong kitail ni karasaras mwomwen “mehla ah retingada wenihmw ong mour soutuk.”
Sang ni manaman en Sapwelimen Krais Tomwo oh Iasadahu, paliwaratail oh pali ngenitail kan pahn pwurpene oh iasada ni unsek. Kitail pahn linganla, pwuralahng ni paliwar unsek, nan kakon koaros. Pil lel piten moangatail kan pahn unsek. Kitail pahn maiaudahsang ansou, soumwahu, sapwungalahn paliwar, oh madamadau souitar akan. Sapwelimen Krais Tomwo kak sewese kitail en powehdi salongala oh mehlahn pali ngehn. Sang ni koluhla, kitail pitsang dihp koaros oh pahtou oh alehda limpoak soutuk oh popohl. Unsek, mwakelekel, saledek, kitail kak pwuralahng nan atail peneieni kesempwal nan wein, celestiel rehn Koht Sahm oh Sises Krais.
Kitail pahn pwurehng kilang kempoakepahtail kan. Ansou me kitail pahn pwurehng tuhpene, kitail pahn ahneki paliwar unsek—oh ahneki limpoak laud, wehwehki laudla, oh aktikitik. Sapwelimen Sises Krais Tomwo kak sewese kitail en tamataman dahme mie katepe oh manokehla me sohte katepe kan. Sang ni atail pahn kin ahneki pwoson oh kaping laud ong sounkomouro, e pahn kihong kitail meleilei, kihsang atail katoutou, kameleilei mohngiong kan, oh kamwahuihpene peneinei kan met oh pil kohkohlahte.
Koapwoaroapwoar en Pweida oh Popohl
Rahn en Ihster rehn Krais kin retengada wenihmw en nanleng, wahn tuhkehn wine tohtohla, oh sahpw akan kaselela. Rahn en Ihster rehn Krais kin wahdo meleilei oh sewese lihohdi oh seri sopwoupwou kan, me men mwongedahr oh anahne sawas, me masopwehk kan, me epwel suwed kan, oh me me kin kalokoloki sapwung en mehteikan. Sang ni en Sises Krais ah kin poakohng koaros, E ketin luke kitail en kilang oh padahk wei ni limpoak oh sawas, duehte Ih.
Sises Krais, kapwurehdo soahng koaros me mwahu ni tohto (tehk Sohn 10:10; Alma 40:20–24). E ketin inouki, “me sampah wet direki me mwahu oh itar ong koaros” (Doctrine and Covenants 104:17). Sapwelime kowpurpwurdohn soahng koaros me iangahki unsek en Sapwelime Rongamwahuo, Sapwelime manaman oh mweimwei en prihstuhd, oh tihak sarawi kan en inou sarawi kan nan Sapwelime Mwomwohdiso, ni Ede, me iei Mwomwohdiso en Sises Krais en Souleng en Imwin rahn Akan.
Rahn en Ihster ong Krais kin kahrehda katohtohlahn tehnpas sarawi en Kauno pwehn karanih Sapwelimen Koht seri kan wasa tohto, oh padokediong nan atail mohngiong kan iren padahk pwung me ketihtihki “Sounkomouro pohn Nahna Zion” (tehk Obadiah 1:21). Kauno kaunopadahr ahl sarawi, oh me sohte akahk ehu ong kitail me momour kan en kak sewesehki me melahr akan dahme irail anahne oh inengieng alehdi me pein irail sohte kak alehdi.
Soahng pwukat iei ahi koapwoaroapwoar, inou, oh kadehdeh. I kadehdehki Koht iei Samatail, atail Sounkomour oh Soundoar, Sises Krais, oh Ngehn Sarawi. Nan ansou en Ihster oh pil rahn koaros, i kasik kitail en diar koapwoaroapwoar oh inou nan Sapwelimen Koht koasoandi en peren, iangahki ahn en inou sarawi sang mour nan mour wet lel mour mwurin mehla oh mour soutuk. Rahn koaros, i kasik atail kaluet akan en kak marahrahda sang ni koapwoaroapwoar en tomwpen Sises Krais, oh sewese kaloalamwahuih mehteikan nan arail pahtou, oh kiheng kitail maiau pwehn kak alehdi Sapwelime popohl unsek.
Sang ni Koapwoaroapwoar oh Inoupen Easter, Sises Krais kin kaitarala wasa me sohte itar nan atail mohngiong kan oh sapengala atail peidek kan.
© 2025 sang Intellectual Reserve, Inc. Kolokol pwuhng koaros. Intingda nan Wehin Amerika. Kamanaman ong ni Lokaiahn Wai: 6/19. Kamanaman ong kawehwe: 6/19. Kawehwehpen Monthly Liahona Message, Epreil 2025. Pohnpeian. 19612 885