“Nembôndopa”

Kudi Mukulu Dieter F. Uchtdorf

Wa mu Mpuilu wa Bapostolo Dikumi ne Babidi

Disadila dia londôpu dia Mupadishi didi mudimu wa bunzambi wa kumpala ne mulayi wa londôpu lua kashidi lua mu mubidi ne mu meji lualua kudi ewu yonsu wa kutudi mu Dibika dia ku Lufu.

Ntshidi mvuluka ne lumonu lujima imua ya ku ngendu mila ya ndeka imvua muenza mu mudimu wanyi wa bumuntu bu kapita ka ndeka.

Mu lumua lua ku yoyi, Mvua ne tshia kubûka mu Allemagne mu 11:00 ne kuikila mu Californie mu 13:00 mu dituku dimua. Mu dielekeja diba dia kuya ne meba a difika, bidi mua kumueneka ne dibûka kupitshila pa Mbû Munena ne Node wa Amelika bivua biangata amu meba abidi. Ndeka wa Boeing 747, uvua ne lubilu, kadi kaluyi lukola nansha! Mu bulelela, biakatuangata meba 11, bilondeshila lupepela, bua kuenza luendu mu bula bua 5,600 miles (9,000 km).

Bualu tuvua tubûka batangila ku wesete, diba kadivua dibuela mu luendu luetu. Tuvua batshionkomoka ne bukenka bua dituku mu njila yonsu kumbuka mu Allemagne tô ne mu Californie.

Kupingana mu Allemagne, tshivua bushuwa, muanda mujima mushilangana. Nansha mutuvua babûka bitamba kuikala dilolu, ne mutuvua tubûkila ku esete, dibuela dia diba diakalua lukasa bipita mutubi bifika, ne kumpala kua biobi kufika, butuku buakalua.

Mu ngendu eyi mila, anyima wanyi uvua utamba kuwujibua ne dikemesha pamvua nana meji bua bulenga bua buloba ne bulongolodi bua difuka dia Nzambi. Nansha pamvua mbûka mu ndeka butuku, mu muidima mujima, Mvua mumanya ne dituishibua ne diba nedipatuka kabidi, nsesa ya bukenka neipingana ne kutuala luya ne moyo kudi dituku dipia-dipia kumpala kua luendu luetu kujika. Bipolu bia dibûka dianyi bivua mua kuenza bua bimueneka ne diba divua dibuela bia bungi biteketa anyi bia bungi lubilu, kadi Mvua mumanya ne diba ditu dîmana tshimuku, kadiyi dinyunga, dijalama mu diûlu.

Ndi ngumvua bia momumua pa Nzambi. Bualu Ndi ne dituishibua dishindama dîmana pa meji a Nzambi ne kipatshila bua tshifukibua tshionsu, Ndi mua kumvua ditekemena dia disanka ne ditalala dia kashidi pandi ngela meji pa buikadi buetu mu moyo ewu wa tshifuaka. Tudi bana ba Nzambi Udi mutunanga. Mmumanya malu etu. Udi pabuipi bua kuambuluisha. Malelela â kâtu akudimuka, nansha padi bintu bikuabu ku mesu etu kabiyi bishindama ne bifika nanku.

Tutu bonsu tupeta mamanya a bikondu bia ntatu ne dipanga ditekemena, kanyinganyinga, ne dipanga kutuishibua bidi bibunda ditalala dietu. Ndi ne disakidila dia bungi bua mushimi mulelela ne wa kueyemena wa bulelela ne wa bukenka (tangila Dilongesha ne Bipungidi 88:6–11). Yezu Kilisto udi bukenka ne moyo wa ba pa buloba. Kupitshila ku Yeya ne mulambu Wenda wa bupikudi, tudi ne ditekema bua matuku alualua, diesa ku bukenka bua bunzambi bua kukankamika mu matuku a ntatu a mu luendu luetu, ne mulayi wa butshimunyi bunena pamutu pa bubi ne lufu.

“Udi munanga Ba pa Buloba”

Yezu Kilisto uvua muntu umuepela muakana wakenda pa buloba. Bualu bua luendu luenda luakana, kena ne dibanza ne buakana to. Ku dinanga buetu, Mmufila moyo wenda bua umua yonsu wa kutudi pa nkaya ne bua bana bonsu ba Nzambi bua kuenza dibenga kufua dia bantu ne moyo wa tshiendelela bipepela.

Nansha bionsu bidi Satana wenza bua kutuitabija, kakuena nansha umua wa kutudi udi pamutu pa bukola bua Mupandishi bua kutusungila. Kakuena muntu nansha umua wa kutudi udi mubengibua ku ngâsa wa dibuikidila. Kakuena muntu nansha umua wa kutudi udi pamutu pa dikala “munyunguludibua tshiendelela mu maboku a dinanga dienda” (2 Nefi 1:15).

Dipa edi dinena dia ku mapa onsu didi tshipeta tshia bukola budi bukumbana ne busungila bua Bupikudi bua Yezu Kilisto. Bualu bua dikenga dia Mupandishi mu Getesemane ne ku Gologota, Mmumanya mushindu wa kutusungila ne kutuambuluisha kupitshila ku bimua ne ku bionsu bia mateketa etu (tangila Alama 7:12).

“Kena wenza tshintu to amu bikala bua dikuatshisha dia ba pa buloba; bualu udi munanga ba pa buloba, mena bua ne udi ufila moyo wenda bua akoka bantu bonsu kudiye” (2Nefi 26:24).

Yezu Kilisto udi bukola buetu.

Udi utupesha tshieyemenu.

Udi upingajilula.

Udi utusungila.

Pavua Mupandishi [muenza mulambu wenda wa bupikudi] bua bukua bantu bonsu, wakakangula njila bua aba badi bamulonda bapeta londôpu, dikankamika, ne bukola bua disungila,” biamba kudi Mulombodi Mukulu Russell M. Nelson.

Bukola abu, bu diba, budiku misangu yonsu. Kabua kutakankana nansha. Disungula bua kulonda tshilejilu tshia Mupandishi didi bu kubenga kuenda mu dibenga kuitaba ne mu dibenga kutekemena ne mu kuenda mu ditekemena, lumonu ne lumvu, muaba utudi mua kupeta mabenesha a Nzambi a bukenka, luya, ne dinanga. Ndi mumanya ne dituku dikuabu, netutangila panyima ne bikala buwujibua ne kusakidila ne tuvua benza mapangadika a tshiendelela a mushinga bua kueyemena Yezu Kilisto ne dinanga dienda dia bunzambi bua kutujula ne kutukankamika.

“Pinganayi Kundi”

Mukanda wa Molomo udi wakula pa bantu bavua benza matuku asatu mu muidima mukola bua kulonda ditshiamakajibua dia Mupandishi. Muidima wa pa buloba uvua mubanyunguluka uvua mua kuleja muidima wa mu nyuma udi bonsu ba kutudi bapeta ku bubi. Pashisha bantu bakumvua dîyi dia Kilisto dibabikila pambelu pa muidima ne mu bukenka buenda:

“Kanuena mpindiewu nupingana kundi ne, nukudimuna mutshima ku mibi yenu, ne nukudimuna mioyo, bua ne nnôndopa anyi?” (3 Nefi 9:13).

“Nulambula mulambu kundi ne mutshima mutshibuluka ne nyuma munyingalala” (3 Nefi 9:20).

“Kudimunayi mutshima ne pinganayi kundi ne mutshima mujima” (3 Nefi 10:6).

Mukalenga mmutantshisha mabikila â a momumua kutudi lelu patudi tudisangana bajimina mu nyuma. Anu bu mudi dibanda dionsu dia diba dileja ntuadijilu wa dituku dipia-dipia, diba dionsu ditudi tukudimuna mutshima, tudi tupeta ntuadijilu mupia-mupia, mbangilu mupia-mupia wa bukenka.

Kabiena biumvuija ne mbipepela nansha. Dikudimuna Mutshima didi diumvuija kukudimuka, ne kukudimuka kakuena kufika lukasa to. Bumudi disanka, dikudimuna mutshima didi diangata “kanyinganyinga kadi Nzambi musua” (2 Kolinto 7:10). Bidi bilomba ne tuitabuja ne tutonda bilema bietu, dilomba dibuikila kudi Nzambi ne kudi aba bonsu batudi benzela bibi. Bionsu, bidi bilomba ne tukeba “Nyuma wa Mukalenga wa Bukola Bonsu,” bua tuetu kumanya “dishintuluka dikola mu … mitshima yetu, ne katuena kabidi ne dijinga dia kuenza malu mabi to, kadi dia kuenza malu mimpa diba dionsu” (Mosiya 5:2).

Dikudimuka edi didi diangata tshipolu tshila ne didienzeja dia bungi, kadi pawudi wenza dikasa dia kumpala pa lukasa, “Dituku dia lupandu lueba” didi dituadija, ne “katataka dilongolola dinena dia disungila nedienjibua buenu” (Alama 34:31).

Kupitshila ku dikudimuna mutshima dishuwashuwa dietu , Nzambi udi utulaya dibuikidila ne kena uvuluka mibi yetu kabidi to. Padibi bikola bua tuetu kupua moyo mibi yetu, tuditatshisha bua kueyemena mu mulayi wa mupandishi bua kubuikidila ne kulonga bua kubuikidila bakuabu ne tuetu nkayetu.

“Nyuma yetu idi minyanguka patudi tuenza bilema ne tueza mibi,” Bilongesha kudi Mulombodi Mukulu Boyd K. Packer (1924–2015). “Kadi bishilangana ne mibidi yetu ya tshifuaka, padi ndongamu wa dikudimuna mutshima ujika, kakuena bibangu bishala bualu bua Bupikudi bua Yezu Kilisto.”

Healing the Blind Ma (Diondôpa dia Muntu Mpofu), kudi Carl Heinrich Bloch

“Luayi Nabu Apa”

Mupandishi udi Mfumu Mundôpi. Dimua dia ku maleji enda manena a bukola buenda bua londôpu didi dipetshibua mu Mukanda wa Molomo, mu mulubu wa disadila dienda nkayenda mu Amelika wa Kala.

“Nudi ne babêdi munkatshi muenu anyi?” Muakakonkayi. “Luayi Nabu Apa. Nudi ne bibombu, anyi mpofu, anyi batebuki, anyi badi balema, anyi bena nsudi, anyi badi ne bitupa bifulama, anyi bapata matshi, anyi badi batatshishibua mu mushindu yonsu anyi? Luayi nabu apa ne nembôndopa, bualu ndi ne moyo wa lusa buenu; munda muanyi mudi muwula ne lusa. …

“Ne biakalua ne pakakulaye nanku, musumba onsu wa bantu, wakasemena patshimua ne babêdi babu ne batatshishibua babu, ne balema babu, ne mpofu yabu, ne tumama tuabu, ne babu bonsu bavua batatshishibua mu mushindu onsu; ne wakabondôpa bonsu bu muvuabu balua nabu kudiye” (3 Nefi 17:7, 9).

Diba dionsu divua Mupandishi wondôpa muntu “udi mutatshishibua mu mushindu onsu,” bubidi kumpala ne panyima pa Dibika ku Lufu, bivua bujadiki ku bukola buenda bunena bua kondôpa anyima yetu. Diondôpa dionsu dia tshishima divua anu mudimu wa kumpala ne mulayi wa londôpu lua kashidi mu mubidi ne mu meji lualua kudi ewu yonsu wa kutudi mu dibika dia ku lufu, tshidi “tshienzedi tshinena tshia londôpu tshia Mupandishi.”

Bidi bulelela ne masambila etu bua londôpu mu moyo ewu kâtu misangu yonsu mandamunyibua mu mushindu utudi tutekemena, kadi kaêna mapuibua moyo to. Diba edi dia londôpo nedilua, amu mutu muidima wa butuku ufila njila—mu diba diakana—ku dibanda dia butumbi dia diba.

Bu muvua Mulombodi Mukulu Nelson mujadika; “Ditabuja dietu kadiena dipanga kuanyishibua nansha. Ndi mumanya ne mu meji onsu a lumonu lua Tatu wa mu Diûlu adi matamba kupita etu. Mutudi bamanya malu etu ne makenga etu bia mu tshifuaka, Mmumanya ditanta dietu mu dibenga kufua ne mushindu wetu wa kulua. Patudi tusambila bua kumanya disua dienda ne tudifila nkayetu ku diodi ne ditukija, dikima, londôpu lua ku diûlu ludi mua kupeta muaba mu njila ne diba dienda.”

Matuku mashala muena kuanyi, Harriet, ne Mema tuvua babueja mu masambila etu ditekemena dia pabuadi ne balombela bamua ba batudi bananga. Tuvua basambila bua ne aba bavua batangila mibidi yabu bapeta bukola bua pabuawu bua kondôpa masama abu. Tuvua bapeta meji a nyuma bua kukumbaja ne nansha londôpu lua pa lukasa anyi dikankamikibua kabiyi bienzeka, bukola bua londôpu lua Mupandishi ludi mua kubatuadila busambi ne ditalala. Bipeta bia londôpu lua bukola bua disungila bia Mupandishi bidi mua kuikala ne dbuenzeji bunena mu meji, mu nyuma, nansha mu bukola bua mubidi bipita londôpu lonsu lua mubidi lutudi mua kupeta. Yezu Kilisto udi Mondôpi mu moyo ewu ne ku tshiendelela.

Bana betu baluma ne bakaji, balunda banangibua, Ndi njadika ne lusa lua Mupanadishi wetu ludi lukumbana bua kondôpa mputa yenu, kusukula ku bubi, kukolesha ku mateta alualua, ne kukubenesha ne ditekemena, meji ne ditalala bienda. Bukola buenda budianu koku—kabuyi bunyunga ne bua kueyemena—nansha patudi, ku misangu, tudiumvua kula ne dinanga, bukenka ne luya bienda.

Ndi nsambila bua katujimiji luidi luetu lua kanemu ne kusakidila kunena bua bionsu bidi Yezu Kilisto muenza buetu. Suaku umanya ne udi munangibua biakana, ne vuluka ne uvua mulayibua bua tshiendelela.

“Nzambi akuambuluisha bua bujitu bueba buikala bupepela, kupitsila ku disanka dia Muanenda Muluma,”Yezu Kilisto (Alama 33:23).

© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, February 2025.. Tshiluba. 19609 760