Mukenji Mulenga wa Dinanga ne wa Disanka

Kudi Mukulu Patrick Kearon

Wa mu Mpuilu wa Bapostolo Dikumi ne Babidi

Mabenesha a Dipinguluja adi ne bua kusankisha mioyo yetu ne kutupesha dianyisha bua dinanga dinena dia Nzambi.

lupingu lua muanjelu Moloni ku mubuelu wa dîba

Mukenji wetu wa ditekemena ne ditalala mu kabujima udi ne Yezu Kilisto udi ne moyo ne ukadi mupingaja lumu luimpa Luenda ne Ekelezia mu matuku a ndekelu â.

Muambi Joseph Smith wakamba ne, “Malu â adi ne butumbi bua dikema!”. Bushuwa bidi bua kuikala mukenji mulenga wa disanka dinena kudi bantu bonsu; ne mukenji mulenga, kabidi, bua kuwuja buloba ne kusankisha mutshima wa muntu yonsu padiye uwumvua.

Nkama ya bidimu panyima pa mudimu wa pa buloba wa Mupandishi, bana ba Nzambi bavua bamukeba ne bavua bajinga butoka ne bulelela bua bungi. Mpindiewu mukenji mulenga wa Yezu Kilisto ne Dipinguluja dienda didi dienda diya bua kubenesha bantu bonsu ne kulongolola buloba bua dituku dialua Yezu Kilisto bu “Mukalenga wa bakalenga ne Mfumu wa bamfumu.” Didi dileja dinena dia dinanga kadiyi ndekelu dia Tatu wetu wa mu diûlu ne Mupandishi wetu. Ndi ne disanka dia kutangalaja malelela â moyi wanyi mujima pa buloba bujima.

Adi Kaayi Mafuana Kuenzeka ne adi Atebeledibua

Dituku dipiadipia diakamueneka mu dîku dia bantu mu tshipuka tshia mitshi, muaba uvua Nzambi Tatu ne muanenda Yezu Kilisto bamuenekela ne bayukila ne Joseph Smith bua kuandamuna disambila dia nsongaluma Joseph bua Ekelezia uvuaye ne bua kubuela (tangila Joseph Smith—Mulubu 1:14–20). Yezu Kilisto wakambila Joseph bua kadisangishi nansha ku Ekelezia umua to. Wakalaya ne tshiwudi tshia lumu luimpa luenda neabuleja kudi Joseph mu matuku alua.

Kudi ba bungi, Joseph kavua ukumbana kubikidibua ku mudimu ewu munena to, ne bavua babinga. Uvua muana wa mu tshiamba tshikesa mu musoku wa mifitu uvua kayi mulonga tulasa tua bungi ne uvua kayi ne mushinga wa bungi. Anu bu muvua bamua bamba bua Mupandishi mu matuku enda, “Tshintu tshimpa tshidi tshimanya mua kufuma mu Nazaleta anyi?” (Yone 1:46), ba bungi mbadiebeja ne ntshinyi tshidi bua kufuma kudi muana kayi mulonga wa bidimu dikumi ne inayi wa mu Palmyra, New York. Kadi kupitshila kudi Joseph—bu kayi ne mutshinga bu muvuabu bamutangila—Tatu wa mu Diûlu ne Mukalenga Yezu Kilisto ba kenza tshikena kutangila tshishiwa shiwala. Etshi ntshitutuadila ditekemena ne mu bukesa ne budipuekeshi buetu, tudi petu bua kudifila ne mushinga mu mudimu wa Mukalenga.

Mu tshikondu atshi, Mukalenga mufuma ku diûlu wakabikila Joseph ne kumupesha mikenji (Dilongesha ne Bipungidi 1:17). Joseph wakapeta bimonyi bia mushinga ne dilongesha dia moyo dia katuala bukenka bupiabupia ku ngumvuilu wetu wa dilongolola dia dinanga bua Tatu wa mu Diûlu ne dinanga dia disungila dia Yezu Kilisto ne bukola bua mulambu wenda wa bupikudi. Bidi bimueneka ne, mukenji mulenga ewu mmufika anu mu tshikondu tshivua malu a bungi maya kumpala mu dienza dia ngendu, ngûmu, ne bibadi bikuabu avua mua kuenza bua butoka bua Nzambi bukenkesha muaba onsu bua kubenesha bana benda.

Muanjelu Moloni upesha Joseph Smith bitata, kudi C. C. A. Christensen

Bujadiki Bunena bua Dinanga dia Nzambi

Dimueneka dia muanjelu Moloni kudi Joseph Smith divua ne mushinga mu Dipinguluja ne bujadiki bunena bua buikadianganyi bua dinanga dia Nzambi. Moloni wa kambila Joseph bua mulubu, mifunda pa bitata bia ngolo, mijîka pabuipi (tangila Joseph Smith—Mulubu 1:33–34). Ndekelu wa bionsu,Joseph wakapeshibua bukokeshi bua ku diûlu (Dilongesha ne Bipungidi 20:8) bua kukudimuna mulubu awu mu tshîkala Mukanda wa Molomo, udi wimana pamua ne Bibiliya ne udi bujadiki bukuabu bua Yezu Kilisto.

Mu Mukanda wa Molomo, tudi tubala bantu badi, nkama ya bidimu kumpala kua Kilisto, bamanya ne badianjila kumanyisha bua dilua dienda ne badindila. Tudi kabidi bapeta mulubu wa pabuawu wa dimueneka dia Mupandishi ne wa mudimu wenda munkatshi mua Bena Nefi, mu tshikondu tshivuaye mubikila bonsu bua kulua kudiye ne kumvua tshimanyinu mu lubadi luenda ne mikuvu bia misonsu mu bianza ne makasa enda (tangila 3 Nefi 11:14–15). Wakondopa babedi, balema, mpofu—“bonsu bavua batatshishibua mu mushindu yonsu”—ne kabidi kubenesha bana bateketa ne kubasambidila (tangila 3 Nefi 17:7–9, 21). Tudi tulonga bikola pa dinanga ne lusa bia Mupandishi mu mulubu wa tshijila ewu.

Mukanda wa Molomo udi ujadika ne “Yezu udi Kilisto.” Malu adi mu Mukanda wa Molomo adi atuvuluija misangu ne misangu ne Tatu wetu wa mu Diûlu ne Mupandishi wetu mbatunanga kupita tshintu tshionsu tshitudi mua kuela meji.

Mabenesha a Buakuidi ne Ekelezia

Dipinguluja nditungunuka ne dimueneka dia bakuabu batumibua ba ku diûlu kudi Joseph Smith. “Mubishibua ku lufu Yone mutambuishi wa kapingaja bukokeshi bua kutambuisha ku dinyishibua bua dilekela dia mibi. Basatu ba ku Bapostolo dikumi ne babidi ba ntuadijilu—Petelo, Yakobo, ne Yone—bakapinguluja mudimu wa bupostolo ne nsapi ya bukokeshi bua buakuidi. Bakuabu ba kalua pabu, bu mudi Eliya, uvua mupingaja bukokeshi bua kusangisha mêku bua kashidi mu malanda a tshiendelela adi ashipa lufu.”

Mu Ngondu Muinayi 6, 1830, Yezu Kilisto wa kashikika kupitshila ku Muambi Joseph Ekelezia mu tshilejelu ne Ekelezia uvuaye mulongolola mu tshikondu tshia Dipungila Dipiadipia (tangila Tunungu tua Ditabuja 1:6), mukumbaja ne “bishimikidi bia bapostolo ne bambi, Yezu Kilisto nkayenda muikala dibua dia mu ditumba” (Efeso 2:20). Ekelezia wa Yezu Kilisto wa Bansantu ba Matuku a Ndekelu udi ufila mabenesha a bukola bua dipinguluja dia buakuidi kudi bana bonsu ba Nzambi badi badilongolola bua kuapeta.

Bu mudi Mulombodi Mukulu Russell M. Nelson wakatulongesha ne, tudi buakupeta disanka mu dikudimuna mutshima dituku dionsu patudi tupingana kudi Tatu wa mu Diûlu ne Mupandishi wetu. Kudi aba badi badiumvua bateketshibua anyi ne kabena bakumbana anyi ba muaba awu: bonsu badi babikidibua bua kulua kudi Kilisto ne Ekelezia wenda. Ekelezia kena muikala muaba wa bajalama to kadi udi lupitadi bua babedi. Mukulu Dieter F. Uchdorf wa mu Mpuilu wa Bapostolo Dikumi ne Babidi udi utuvuluija ne “tudi tulua mu Ekelezia ki mbua kusokoka malu etu to kadi bua kuondopa.”

Mu Ekelezia tudi tupeta disanka mu mpunga ya kuleja mutudi bantu bakuabu, kuambuluisha bakuabu ne dinanga, ne kuamba malu atudi badimuena nkayetu ne bungi bua buimpa bua Kilisto. Tudi bua “kubadibua munkatshi mua bantu ba mu ekelezia wa Kilisto” ne “bavuluijibua ne badishibua ne dîyi dimpa dia Nzambi” (Moloni 6:4). Ndibenesha dinena be!

Kabingila ka Disanka Dinena

Muambi Joseph Smith wakamba musangu mukuabu ne, Ntshinyi tshitudi tuteleja mu lumu luimpa lutuakapeta? Dîyi dia disanka! Tudi tumvua dîyi dia lusa dia ku diûlu; ne dîyi dia bulelela dia pa buloba; mukenji mulenga bua bafua; diyi dia disanka bua ba moyo ne bafua; mukenji mulenga wa disanka (Dilongesha ne Bipungidi 128:19).

Mukenji mulenga ewu mmulua bualu Tatu wa mu Diûlu ne Muanenda munangibua, Yezu Kilisto mbatunanga ne mbasua—kupita bintu bionsu—kutuakadila kumpala kuabu, bua tuikala ne moyo wa kashidi bu mudibu. Dipinguluja ndibuluila ne bakadi benza bionsu bidi bikengela bua bualu ebu kuikala mushindu wa butumbi bua tuetu buonsu. Mu luendu luetu lua tshiendelela, netupeta mateta ne ntatu, kadi ”[tuetu] tudi, bua [tuetu] kuikala ne disanka” (2 Nefi 2:25) mu moyo ewu ne mu utshilualua. Muambi Joseph Smith uvua mutshimanya bimpa kupita ba bungi.

Joseph uvua mupeta buluishi ne kusubisha kua bungi, kadi wakalama lutulu luenda lua ku tshileledi (Joseph Smith—Mulubu 1:28). Wakatungunuka ne kuikala ne disanka, bukola, ne kutantamena, ne wakakumbaja mudimu wa pabuawu uvuabu bamupesha. Ndi ntumbisha bansantu bonsu ba kumpala bavua bitabuja, ne balonda Muambi Joseph Smith ne badijidila ku dîbaka dia Ekelezia. Tudi nabu ne dibanza dia dianyisha ne kanemu.

Bivua bikola mu matuku a kumpala a Ekelezia, ne bidi mua kuikala bikola kabidi lelu. Kadi Dipinguluja didi ditunguluka. Ne Yezu Kilisto ku mutu kua Ekelezia wenda, bambi badi ne moyo nebatunguluka ne kutuludika. Nzubu ya Mukalenga neyitunguluka ne kuashibua, ne mabenesha a bipungidi bia tshiendelela ne Nzambi neatusuika kudiye ne kudi banangibua betu mu nseka yonsu ya tshilamba (tangila Matayo 16:19). Dinanga dia Nzambi ne Yezu Kilisto neditangalaka pa buloba bujima patudi tulonda mukenji wa Mupandishi wa kudisha mikoku yenda ne kutangalaja lumu luimpa luenda. Netujadika malelela a Dipinguluja bua atangalaka mu njila ne mu miaba ivuabu bela meji ne mikola mu tshikondu tshia Joseph.

Tudi mua kupeta bukola ne disanka dinena—anu bu Muambi Joseph—patudi tuakadila ne tutumikila malelela a mushinga â. Dibikila divua Joseph muenza kudi Bansantu ba mu tshikondu tshienda didi ditunguluka netu lelu: katuena ne bua kutunguluka ne mudimu munena ewu? Ndaku kumpala ne kupinganyi to. Dikima, … ne kumpala, kumpala bua kutshimuna! Mitshima yenu isankishibua, ne isankishibua bikola (Dilongesha ne Bipungidi128:22).

Mukenji mulenga wa dinanga ne wa disanka udi Dipinguluja dituala mabenesha ne buludiki mu nsombelu wetu—mpindiewu ne kashidi.

© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, January 2025. Tshiluba. 19600 760